Kudou Auka Taudia Idia Kamonai Neganai

LAGANI 1989 AI, IEHOVA ENA WITNESS TAUDIA POLAND dekenai be gavamani ese idia abia dae bona gwaumaoro idia henia tomadiho oreana bamona idia noho. Edia Keristani gini siri karana dainai dibura dekenai idia atodia Witness taudia be metairametaira idia ruhadia. Dibura idia rakatania neganai, idia amo Baibel idia ura idia dibaia dibura taudia momo idia rakatania. Inai sivarai ese ia hahedinaraia edena bamona Iehova ena Witness taudia be dibura gabuna ta dekenai kudou auka taudia idia durua Dirava ena Hereva ena siahu idia badinaia totona.

WOŁÓW be Poland ena sautwest kahana dekenai ia noho taoni ta bona unuseniai idia noho taudia edia namba be 12,000. Unuseniai lagani 200 lalonai ia noho dibura ruma badana ta ia noho, ia lalonai Poland ena kara dika momokani idia karaia taudia idia atoa. Iehova ena Witness taudia be gwaumaoro idia abia negana amo, idia hekwarahi bada unuseniai idia noho dibura taudia dekenai Basileia ena sivarai namona idia abia lao totona, bona unai gaukara idia karaia mai edia ura ibounai ida.

Dala ia kehoa gauna be February 1990 ai, Ministry of Justice ese Poland lalonai dibura rumadia ibounai edia dairekta taudia dekenai revareva ta ia siaia. Unai revareva ese ia hadibadia namona be Watch Tower Society edia magasin bona buka idia ura abia dibura taudia eiava idia ura Iehova ena Witness taudia idia hereva henia dibura taudia “edia dala do idia koua lasi.” Witness taudia, idia haida be lagani momo lalonai Wołów dibura gabuna dekenai idia noho, be kara dika momokani idia karaia taudia idia diba namonamo. To, Iehova idia noia idia do ia durua, Baibel ena hereva momokanina amo dibura taudia ma haida edia kudou aukadia do idia hamanokaia totona.

Gaukara Idia Hamatamaia

Tadikaka Czesław, ia be Wrocław siti dekenai ia noho, unai be kilomita 40 bamona Wołów amo, be gwaumaoro ia abia unai dibura gabuna ia vadivadi henia totona. Ia gwau: “Gaukara ai hamatamaia be auka. Hora momo lalonai dibura gabuna idia naria taudia ida ai herevahereva, badina ai ura hahedinaraia aiemai ‘tomadiho heboudia’ be dibura taudia durua totona.”

Czesław ida ia gaukara tauna Paweł ia gwau, edia hekwarahi ia habadaia gauna be “mai ena dagi bada opesa ta ia gwau dibura taudia be unai tomadiho heboudia idia gaukaralaia, hunia dalana amo sibodia edia namo idia tahua totona.” To gabeai lagani 1991 ai, guna kara dika momokani idia karaia taudia toi idia bapatiso neganai, dibura gabuna naria taudia ese edia lalohadai idia haidaua bona heduru idia henia.

Czesław ia gwau: “Ai ese dibura taudia, idia vadivadi ruma bese taudia, bona dibura gabuna dekenai idia gaukara taudia ai haroro henidia matamaia. Bena ai dekenai gwaumaoro idia henia dibura gabuna ena kahana ta ta dekenai sivarai namona ai harorolaia totona, unai be hoa gauna. Kamonai taudia haida ai davaria neganai, Baibel stadi bona Keristani hebou ai karaia totona, ai dekenai ruma maragina ta idia henia.” Oibe, Iehova ese dala ia kehoa dibura taudia edia kudou aukadia ia hamanokaia totona.

Namo Ia Havaraia Edukeisen Gaukarana

Daudau lasi murinai, unai ruma maragina be ia hegeregere lasi. Idia bapatiso dibura taudia bona murimuri amo idia mai tadikaka idia haroro dainai, dibura taudia 50 bamona be hebou dekenai idia mai matamaia. Elda tadikaka ta ia gwau: “Lagani toi mai kahana lalonai, unuseniai hebou ai karaia, bona dibura taudia be wiki ta ta ena hebou dekenai idia mai hanaihanai.” Bena, May 1995 ai daiutu badana idia henidia idia gaukaralaia totona.

Unai gaukara idia naria tadikaka be edena bamona idia abia hidi daika be dibura gabuna ai idia karaia hebou dekenai idia mai diba? Tadikaka Czesław bona Zdzisław idia gwau: “Ai be mai emai lista, bona unai lista dekenai idia hahedinaraia idia be hereva momokani idia ura henia momokani taudia edia ladana ai torea. Bema dibura tauna ta be lauma dalanai ia goada ia lao lasi eiava badina namona lasi dainai hebou ia reaia, unai ia hahedinaraia ia be lauma gaudia ia laloa bada lasi, bona ena ladana be lista amo ai kokia bona dibura gabuna ena dairekta ai hadibaia.”

Edia Baibel stadi lalonai, tadikaka ese dibura taudia dekenai hebou totona idia hegaegae dalana idia hadibaia bona iseda buka bona magasin gaukaralaia namonamo daladia idia hadibaia. Unai amo, dibura taudia be hebou dekenai idia mai neganai, idia hegaegae namonamo bona idia haere diba. Idia be hagoadaia haere idia henia, edia Baibel idia gaukaralaia namonamo, bona idia sibona dekenai sisiba idia badinaia, nega momo edia haere lalonai do idia gwau, ‘Lau itaia lau be inai o unai lau karaia be namo.’

Kongregesen ena seketere ia gwau: “Wołów dibura gabuna ai Baibel stadi ibounai 20 ai karaia. Dibura pablisa taudia toi ese idia 8 idia naria.” Dibura gabunai idia loaloa neganai bona dibura gabuna ena kahana ta ta dekenai idia haroro neganai anina namona idia havaraia. Hegeregere, hua 10 lalonai, September 1993 ela bona June 1994 ai, buka 235, kahirakahira buklet ibounai 300, bona magasin 1,700 idia hariharilaia. Vanegai, dibura naria taudia rua be Baibel stadi totona idia henanadai.

Spesel Hebouhebou ese Moale Idia Havaraia

Unai dibura gabuna dekenai idia karaia edukeisen gaukarana dekenai gau ma ta idia karaia, unai be spesel hebouheboudia. Loaloa naria taudia bona lo tadikaka ma haida ese sekit hebouhebou bona dina tamona hebouhebou edia hereva badadia idia henia dibura gabuna ena gadara rumana lalonai. October 1993 ai spesel hebouhebou ginigunana idia karaia. Hebouhebou dekenai idia lao taudia ibounai be 139, dibura taudia 50 idia noho, bona niuspepa ta, ladana Słowo Polskie, ia hereva hegeregerena, “Wrocław amo ruma bese ibounai, hahine bona natudia maragidia danu idia mai.” Hebouhebou ena program ai idia laga-ani neganai, taihu ese idia nadua aniani idia ania bona Keristani tadikaka bona taihu ida idia hebamo heheni.

Unai nega amo spesel hebouhebou 7 idia karaia vadaeni, bona dibura gabuna lalonai idia noho taudia sibona dekenai namo ia havaraia lasi, to murimuri ai idia noho taudia dekenai namo ia havaraia danu. Witness taihu ta be guna Wołów dekenai ia dibura tauna ta ia vadivadi henia. Hari ia be taoni dekenai ia noho, to ia ura lasi kamonai. To unai tauna ia hamaoroa dibura tauna ma ta be Witness tauna ai ia lao neganai, unai tauna be mai hoa bada ida ia boiboi bada, ia gwau: “Unai ala-ala tauna be hari Witness tauna ta ai ia lao, a?” Unai amo, unai tau be Baibel stadi ia abia dae.

Edia Kara Idia Haidaua

Unai edukeisen gaukara badana ese dibura taudia mai edia kudou aukadia ia hamanokaia momokani, a? Idia sibodia ese edia sivarai do idia gwauraia.

Ia laloa momo tauna Zdzisław ia gwau: “Lau be egu tama sina lau diba lasi badina lau maragi neganai lau idia rakatania, bona ta ese lau ia lalokau henia mamina lau ura henia. Lau do maragi neganai, taravatu utua karadia lau karaia bena tau ta lau alaia mase. Lau diba kara dikana lau karaia dainai lau ura lau sibona egu mauri lau hadokoa, bona lau hekwarahi helaro momokanina lau davaria totona. Bena, lagani 1987 ai, Gima Kohorona magasin lau davaria. Ia amo toreisi lou bona mauri hanaihanai ena helaro lau dibaia. Lau lalo-parara helaro ia noho dainai, lau sibona egu mauri lau hadokoa lalohadaina lau dadaraia bona Baibel lau stadilaia matamaia. Hari, lau be Iehova amo bona tadikaka amo lalokau ena anina lau dibaia.” Lagani 1993 amo, unai tauna, guna tau ta ia alaia mase tauna, be hesiai tauna ta bona heduru painia gaukara ia karaia, bona vanegai lagani lalonai ia be regula painia tauna ta ai ia lao.

To, Tomasz be haraga momokani Baibel stadi ia abia dae. Ena kara ia gwauraia hedinarai ia gwau: “To, unai be egu lalona momokani ida lau karaia lasi. Lau stadi badina lau ura mai hekokoroku ida ma haida dekenai Iehova ena Witness taudia ese idia abidadama henia gaudia lau gwauraia hedinarai. To Baibel ena hereva momokani hegeregerena gau ta lau karaia lasi. Dina ta, egu lalona lau hadaia bona Keristani hebou ta dekenai lau lao. Idia bapatiso vadaeni dibura taudia be mai moale ida lau idia hanamoa. Lau lalo-parara, diba bada dainai lau hekokoroku be namo lasi, to gau badana be egu kudou aukana do lau hamanokaia bona egu lalona do lau haidaua.” Tomasz ese Keristani tauna ena kara matamata ia hahedinaraia matamaia. (Efeso 4:​22-24) Hari, ia be Dirava ia gwauhamata henia bapatiso Witness tauna ta bona dibura gabuna ena kahana kahana dekenai haroro gaukara ia moalelaia.

Hahetoho, Turadia Gunadia Amo

Dibura rumana lalonai Baibel ena hereva momokanina idia dibaia taudia be edia turadia gunadia bona dibura gabuna naria taudia amo hahetoho idia davaria. Idia ta ia gwau: “Nega ibounai lau idia hevasehalaia bona lau idia hereva dika henia. To lau be tadikaka edia hahegoada herevadia lau laloatao. Lau idia hamaoroa, ‘Iehova oi guriguri henia noho.’ ‘Emu Baibel oi duahia bena emu lalona dekenai maino do ia noho.’ Unai herevadia ese lau idia durua bada.”

Bapatiso tadikaka Ryszard, tauanina goada tauna, ia gwau: “Dibura taudia be hereva dikadia idia gwauraia hanaihanai lau dekenai. Lau do idia hamaoroa: ‘Emu hebou dekenai oi lao diba, to namo lasi oi hekokoroku bona oi hahedinaraia oi sibona be kara namo tauna, OK?’ Baibel ena hakaua herevadia lau badinaia dainai egu mauri dalana lau haidaua neganai, hisihisi lau davaria. Egu mahuta patana idia giroa, egu Baibel buka bona magasin idia negea gabu ibounai, bona egu kahana dekenai gau ibounai idia hadikaia momokani. Iehova lau guriguri henia, goada do ia henia egu kara lau biagua totona, bena mai manau ida egu gaudia lau atoa namonamo. Nega sisina murinai, lau idia hadikaia karana idia hadokoa.”

Bapatiso dibura taudia haida idia gwau: “Dibura taudia haida idia itaia, aiemai lalona ai hadaia auka Iehova do ai hesiai henia neganai, dala idauna amo ai idia hahekwarahia. Reana do idia gwau, ‘Laloatao, oi be do oi inuinu lasi, kuku oi ania lasi, eiava oi koikoi lasi.’ Unai bamona kara ese ta ia durua iena tauanina ia biagua, kara dika eiava inuinu bona kuku ania karana do ia rakatania haraga totona. Danu, ta ia durua lauma ena huahua ia havaraia totona.”​—⁠Galatia 5:​22, 23.

Dirava Ena Gwauhamata Hesiai Taudia ai Idia Lao

Dibura rumana naria taudia edia gwaumaoro ida, lagani 1991 ena siahu negana ia matamaia negana ai, gadara rumana ai bapatiso ginigunana idia karaia. Mai moale ida do ia bapatiso tauna be Zdzisław. Dibura taudia 12 bona tadikaka bona taihu 21 be murimuri amo unai bapatiso idia itaia totona idia lao. Unai hebou ese dibura taudia ia hagoadaia. Idia momo be lauma dalanai idia goada idia lao haraga bona gabeai, unai lagani tamona lalonai ma rua idia bapatiso. Lagani rua murinai, lagani 1993 ai, hebou rua idia karaia bapatiso totona, bona dibura taudia 7 ese edia gwauhamata Iehova dekenai idia hahedinaraia!

December lalonai idia karaia bapatiso ia ripotilaia neganai, niuspepa ta, ladana Wieczór Wrocławia, ia gwau: “Taunimanima be gadara rumana lalonai idia vareai lao, ibounai idia hanamoa bona imana idia ude-udea. Unuseniai ta be idau tauna lasi. Idia be ruma bese badana tamona, idia lalo-tamona, edia mauri dalana be tamona, bona Dirava tamona, Iehova, idia tomadiho henia hebou.” Unai “ruma bese badana tamona” be taunimanima ibounai 135, idia 50 be dibura taudia. Mani idia haida ita hedavari henidia.

Jerzy be June ai ia bapatiso, bona ia gwau: “Ena be lagani momo gunanai lau be Baibel ena hereva momokani lau kamonai, lauegu kudouna be ia auka momokani. Koikoi karadia, egu adavana ginigunana lau rakatania, Krystyna ida lau sihari kava, ai headava lasi to natuna ta ai havaraia, bona hanaihanai dibura dekenai lau giroa lou​—⁠egu mauri gunana be unai bamona.” Dibura gabuna lalonai ia itaia, kara dika momokani idia karaia taudia be Witness taudia ai idia lao neganai, sibona ia nanadaia, ‘Lau danu be tau namona ai lau lao diba, ani?’ Baibel stadi totona ia henanadai bona hebou dekenai ia lao matamaia. Lagani toi gunanai Krystyna be Iehova ena Witness hahinena ta ai ia lao sivaraina be loea tauna amo ia kamonai neganai, ena mauri ia haidaua momokani. Jerzy ia gwau: “Lau hoa bada herea! Lau laloa, ‘Lau be edena bamona? Lau be dahaka lau karaia noho?’ Lau lalo-parara Iehova ese lau ia abia dae totona, egu mauri do lau hanamoa be namo.” Unai dainai, mai moale ida dibura gabuna dekenai Jerzy, Krystyna bona edia mauri lagani 11 natuna kekenina, Marzena, idia hedavari lou. Daudau lasi murinai, edia headava idia rejista. Ena be ia be dibura dekenai ia do noho bona ia do hekwarahi noho, vanegai Jerzy be taia kudima taudia edia saini gado ia sibona dekenai ia hadibaia bona taia kudima dibura taudia ia durua diba.

Mirosław be komiuniti sikuli dekenai ia do lao neganai, taravatu utua karadia ia karaia. Iena turadia ese idia karaia gaudia ia ura henia, bona daudau lasi murinai ia danu be unai gaudia ia karaia. Edia kohu ia dadia bona ia botaia taudia be momo. Bena dibura dekenai ia lao. Mirosław ia gwau: “Dibura dekenai lau mai neganai, heduru totona pris tauna dekenai lau lao. To lau lalohisihisi bada. Unai dainai egu lalona lau hadaia poisini amo lau sibona egu mauri do lau hadokoa.” Ia palani ena mauri do ia hadokoa dinana ai, dibura daiutu ma ta dekenai idia atoa. Unuseniai mauri ena anina ia herevalaia Gima Kohorona ta ia davaria. Ia gwau: “Auka lasi bona anina ia hedinaraia goevagoeva herevana ese lau ia durua bada. Hari lau ura do lau mauri noho! Unai dainai Iehova lau guriguri henia bona Witness taudia lau noia Baibel stadi totona.” Ena Baibel stadi lalonai ia goada ia lao haraga bona lagani 1991 ai ia bapatiso. Hari, dibura gabuna dekenai ia be heduru painia gaukara ia karaia, dibura ruma ena kahana ta ta dekenai ia haroro ena hahenamo ia abia.

Dibura taudia 15 idia bapatiso vadaeni. Idia iboudiai edia dibura laganidia ita haboua neganai, ibounai be lagani 260. Haida be edia dibura lagani idia do haorea lasi neganai idia ruhadia. Dibura tauna ta be ena dibura lagani 25 amo lagani 10 idia kokia. Bona dibura lalonai hereva momokani idia ura taudia haida be idia ruhadia murinai bapatiso Witness taudia ai idia lao. Bona danu, dibura dekenai dibura taudia hani be bapatiso totona idia hegaegae noho.

Dibura Naria Taudia ese Idia Gwauraia Namo

Dibura gabuna ena ripoti ta ia gwau: “Ai itaia dibura taudia edia kara be idia idau. Momo be kuku ania karana idia rakatania bona edia daiutu idia goeva. Unai bamona kara be dibura taudia momo dekenai ai itaia diba.”

Niuspepa ta Życie Warszawy ia gwau Wołów dekenai ia noho dibura gabuna badana idia naria taudia idia abia dae “dibura taudia be edia kara idia biagua namonamo; bona gadi taudia dekenai hekwakwanai idia havaraia lasi.” Unai niuspepa ripoti ia gwau edia dibura laganidia idia haorea lasi to idia ruhaia taudia be Iehova ena Witness taudia edia orea ida idia hebamo namonamo bona taravatu utua karadia idia karaia lou lasi.

To unai dibura gabuna ena dairekta ena lalohadai be dahaka? Ia gwau: “Iehova ena Witness taudia edia gaukara inai dibura gabuna dekenai ai ura henia bada bona ai ia durua bada.” Dairekta tauna ia gwau “[Witness taudia ida] Baibel idia stadilaia lalonai, dibura taudia edia kara bona lalohadai idia idau, edia mauri lalonai hakaua gauna matamatana ia henidia. Mai hemataurai bona manau ida idia kara. Idia be gaukara goadagoada taudia, bona hekwakwanai ta idia havaraia lasi.” Oibe, dibura gabuna idia naria taudia ese unai bamona hereva namodia idia gwauraia neganai, Wołów dibura gabuna dekenai dibura taudia ida idia gaukara hebou Witness taudia idia hanamoa.

Dibura taudia idia vadivadi henia Witness taudia be Iesu ena hereva idia abia dae momokani: “Lauegu mamoe be lau diba. Lauegu mamoe danu idia diba lau. . . . Egu gadona do idia kamonai, vadaeni orea do ia tamona, naria tauna danu do ia tamona.” (Ioane 10:​14, 16) Mamoe Naria Tauna Namona, Iesu Keriso, be mamoe bamona taudia ia gogoa totona, dibura gabuna ena magu ese ia koua diba lasi. Wołów dekenai Witness taudia be unai gaukara namona idia karaia diba ena hahenamo dainai idia moale. Dokona ia do mai lasi lalonai, idia ese kudou auka taudia momo do idia durua Basileia ena sivarai namona idia kamonai totona, bona idia ese Iehova idia noia edia gaukara do ia hanamoa noho.​—⁠Mataio 24:⁠14.

[Box on page 27]

‘Natuna Bamona’ Hekwakwanai

Wołów dibura ruma badana dekenai idia gaukara Witness taudia idia gwau, “nega daudau lalonai dibura dekenai idia noho murinai, dibura taudia be sibona idia noho, eiava ura kwalimu maurina ena mamina idia laloaboio. Ai itaia ‘natuna bamona’ hekwakwanai ia noho, dibura amo idia ruhaia tauna be ia diba lasi edena bamona ia sibona do ia naria. Unai dainai kongregesen ena maduna be Baibel ena hereva momokani ia hadibaia sibona lasi. Ia ai durua taunimanima ida do ia noho hebou lou totona, bona do ia davaria dika gaudia bona hahetoho karadia dainai ai sisiba henia. Ena be ai ura lasi ia ai biagua auka, to namona be mauri matamatana ia noholaia totona ia ai durua.”