“Iehova Bona Ena Goada Umui Tahua”

“Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.”​—⁠2 SIVARAI 16:⁠9.

1. Siahu ena anina be dahaka, bona taunimanima ese edena dala ai idia gaukaralaia?

SIAHU ena anina be momo, hegeregere ta ena siahu ma haida ia hakaua bona biagua totona; ta ese haida ia veria diba siahuna; tauanina ena goada; eiava ta ena lalona eiava kara ena siahu. Taunimanima ese siahu idia gaukaralaia namonamo lasi. Histori torea tauna ta, Lord Acton, ese politikol taudia idia gaukaralaia siahuna ia herevalaia neganai, ia gwau: “Siahu ese taunimanima ia hadikaia bona siahu bada ese idia ia hadikaia bada.” Idia hanaia laganidia lalonai idia vara gaudia momo ese Lord Acton ena hereva idia hamomokania. Idia hanaia laganidia handred lalodiai, ‘taunimanima haida ese ma haida idia biagua bona idia hisihisi henidia,’ bona unai ia vara ena bada be guna bamona lasi. (Hadibaia Tauna 8:⁠9) Dagedage lohia taudia dikadia ese dala kererena ai edia siahu idia gaukaralaia bona taunimanima milioni momo idia hamasea. Lalokau, aonega, bona hahemaoro maoromaoro ese idia biagua lasi siahuna be dika ia havaraia gauna.

2. Iehova ena kara ma haida edia anina iena siahu ia gaukaralaia dalana dekenai oi gwauraia.

² Taunimanima amo Dirava be idau, nega ibounai ena siahu be namo havaraia totona ia gaukaralaia. “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Sivarai 16:⁠9) Iehova ese ena siahu ia gaukaralaia dalana ia biagua. Haheauka dainai Dirava ese dika taudia ia do hadikaia ore lasi, unai amo idia dekenai dala ia kehoa idia helalo-kerehai totona. Iena lalokau dainai dina be taunimanima idauidau​—⁠kara maoromaoro bona kara maoromaoro lasi taudia​—⁠dekenai diari ia henia. Hahemaoro maoromaoro dainai, gabeai iena siahu badana do ia gaukaralaia mase ia havaraia tauna, Satani Diabolo, ia hadikaia ore totona.​—⁠Mataio 5:​44, 45; Heberu 2:14; 2 Petero 3:⁠9.

3. Dahaka dainai Dirava ena siahu badana be badina namona ia ita abidadama henia totona?

³ Iseda guba Tamana ena siahu badana ese abidadama ia havaraia​—⁠iena gwauhamata bona iena gimaia karana dekenai. Natuna maragi be ia diba lasi taudia huanai bema ena tamana ena imana ia dogoatao ia gari lasi, badina ia diba ena tamana ese dika amo ia do ia gimaia. Unai hegeregerena, iseda guba Tamana, ‘taunimanima hamauria totona mai ena siahu momokani’ tauna, be ita do idia hadikaia gaudia amo ita ia gimaia bema ia ida ita raka. (Isaia 63:1; Mika 6:⁠8) Bona Tamana namona bamona, Iehova be nega ibounai ena gwauhamata ia hagugurua. Ena siahu be hetoana lasi dainai, ena hereva ‘ia siaia totona gaukarana be do ia karaia momokani.’​—⁠Isaia 55:11; Tito 1:⁠2.

4, 5. (a) King Asa ese Iehova ia abidadama henia neganai dahaka ia vara? (b) Bema hekwakwanai ita davaria neganai taunimanima edia dala ita abidadama henia, dahaka ia vara diba?

⁴ Dahaka dainai gau badana be iseda lalona ita hadaia iseda guba Tamana ena gimaia karana do ita laloaboio lasi? Badina idia vara gaudia dainai ita daradara diba bona reana ita laloaboio edena dala ai namo do ita davaria. King Asa, nega daudau Iehova ia abidadama henia tauna, ena kara ese unai ia hahedinaraia. Asa ena lohia negana lalonai, Etiopia tuari taudia milioni ese Iuda idia tuari henia. Asa ia itaia edia inai taudia be idia goada dainai, ia guriguri: “Lohiabada e, oi tamona sibona ese manoka taudia oi durua noho, vadaeni idia ese goada taudia idia halusia diba. Lohiabada, aiemai Dirava e, mani ai do oi durua, badina oi dekenai ai abidadama henia noho inai, bona oiemu ladana dekenai inai tuari orea badana do ai tuari henia. Lohiabada e, oi be aiemai Dirava, inai orea do oi halusia, badina taunimanima be idia gini diba lasi oiemu vairana dekenai.” (2 Sivarai 14:11) Iehova ese Asa ena noinoi ia kamonai bona edia inai taudia idia halusia.

⁵ To, lagani momo lalonai mai ena kamonai ida Iehova ia hesiai henia murinai, Asa ena abidadama Iehova ena hamauria siahuna dekenai ia manoka. Not kahana basileiana, Israela, ena tuari karana koua totona, Suria amo heduru ia tahua. (2 Sivarai 16:​1-3) Ena be Suria ena King Benehadada dekenai ia henia lalo-ani monina dainai Israela ese Iuda ia hagaria noho lasi, to Asa ese Suria danu gwauhamata ia karaia karana amo ia hahedinaraia Iehova ia abidadama henia lasi. Peroveta tauna Hanani ese ia nanadaia, ia gwau: “Etiopia taudia bona Libia taudia be orea bada herea lasi, a? Edia kariota bona hosi guia taudia be momo herea lasi, a? To oi ese Lohiabada oi abidadama henia dainai, ia ese kwalimu idia dekena amo oi dekenai ia henia.” (2 Sivarai 16:​7, 8) To, Asa ese unai sisiba ia dadaraia. (2 Sivarai 16:​9-12) Hekwakwanai ita davaria neganai, namona be taunimanima edia dala ita abidadama henia lasi. To, namona be Dirava ita abidadama henia, badina taunimanima edia siahu ita abidadama henia neganai lalohisihisi do ita davaria.​—⁠Salamo 146:​3-5.

Iehova Ia Henia Siahuna Oi Tahua

6. Dahaka dainai ‘Iehova bona ena goada ita tahua’ be namo?

⁶ Iehova ia hegeregere ena hesiai taudia ia hagoadaia bona idia ia gimaia. Baibel ese ita ia hamaoroa, “Iehova bona ena goada umui tahua.” (Salamo 105:​4, NW ) Dahaka dainai? Badina Dirava ena goadana amo gau ta ita karaia neganai, iseda siahu be ma haida hadikaia totona lasi to idia hanamoa totona do ita gaukaralaia. Ena kara amo unai ia hahedinaraia tauna badana be Iesu Keriso, ia ese “Lohiabada ena siahu dekenai” hoa karadia momo ia karaia. (Luka 5:17) Iesu ia gaukara goada diba kohu momo tauna, ladana bada tauna, eiava siahu bada king tauna ai ia lao totona. (Luka 4:​5-7) To, Dirava ese ia dekenai ia henia siahuna be ma haida hadibaia, durua, bona hanamoa totona ia gaukaralaia. (Mareko 7:37; Ioane 7:46) Unai be haheitalai namo hereana ita dekenai!

7. Dirava ena goada dekenai gaukara ita karaia neganai, edena kara badana ita habadaia?

⁷ Danu, “Dirava ese ia henia gauna” dekenai gaukara ita karaia neganai, unai ese ita ia durua ita manau noho totona. (1 Petero 4:11) Siahu idia ura henia taudia be hekokoroku taudia ai idia lao. Asuria ena King Esarahadona ena kara ese unai ia hahedinaraia namo herea, ia be mai hekokoroku ida ia gwau: “Egu siahu be bada, egu siahu be bada herea, lau be goada tauna, lau be bada momokani, lau be bada herea momokani.” To, Iehova ese ‘tanobada ena manoka gaudia ia abia hidi, goada taudia ia hahemaraia totona.’ Unai dainai, bema Keristani tauna momokanina ia heagi, ia be Iehova dainai ia heagi, badina ia diba ia karaia gaudia be ia sibona ena goada dainai ia karaia diba lasi. ‘Dirava ena imana goadana henunai ita manau’ neganai, ita do ia abia isi.​—⁠1 Korinto 1:​26-31; 1 Petero 5:⁠6.

8. Iehova ena goada abia totona ita karaia gau ginigunana be dahaka?

⁸ Edena dala ai Dirava amo goada ita abia? Gau ginigunana be, guriguri amo ita noia be gau badana. Iesu ese ena hahediba taudia ia hamaoroa iena Tamana ese idia noia taudia dekenai lauma helaga do ia henia. (Luka 11:​10-13) Tomadiho gunalaia taudia ese Keriso ena hahediba taudia idia oda henia Iesu ena sivarai do idia harorolaia lasi neganai, ena hahediba taudia ese Dirava kamonai henia dalana idia abia hidi bena goada idia abia karana be mani oi laloa. Iehova ena heduru abia totona idia guriguri neganai, mai momokani ida idia gwauraia guriguri ena haere idia abia, bona lauma helaga ese idia ia hagoadaia, mai gari lasi ida sivarai namona idia harorolaia noho totona.​—⁠Kara 4:​19, 20, 29-31, 33.

9. Lauma dalanai goada ia henia gau iharuana mani oi gwauraia, bona ena namo ia hahedinaraia karana ta Baibel lalonai oi gwauraia.

⁹ Gau iharuana be, Baibel amo lauma dalanai goada ita abia diba. (Heberu 4:12) Dirava ena hereva ena siahu be King Iosaia ena negai ia hedinarai. Ena be unai Iudea ena king ese tano amo kaivakuku ia kokidia vadaeni, dubu lalonai Iehova ena Taravatu idia davaria karana ese Iosaia ena lalona ia veria unai hagoevaia karana ia hagoadaia totona.a Iosaia ese taunimanima dekenai unai Taravatu ia duahia murinai, unai bese ibounai be Iehova ida gwauhamata idia karaia, bena kaivakuku tomadiho henia karana kokia totona kara iharuana, bona badana, idia hamatamaia. Iosaia ena hagoevaia karana dainai “ena mauri dinadia lalonai, idia be Lohiabada . . . ena dala dekena amo idia raka siri lasi.”​—⁠2 Sivarai 34:⁠33.

10. Iehova amo goada ita abia dalana ihatoina be dahaka, bona dahaka dainai unai be mai anina bada?

¹⁰ Gau ihatoina be, Keristani taudia ita bamoa neganai Iehova amo goada ita abia. Paulo ese Keristani taudia ia hagoadaia hebou do idia lao henidia hanaihanai, “lalokau dekena amo kara namodia” idia karaia bona idia hagoadaia heheni totona. (Heberu 10:​24, 25) Aneru ese hoa dalana ai dibura amo Petero ia ruhaia neganai, Petero ia ura ena tadikaka ida ia noho dainai, maoromaoro Ioane Mareko ena sinana ena ruma dekenai ia lao, unuseniai “taunimanima momo idia hebou, idia guriguri noho.” (Kara 12:12) Momokani, idia ibounai be edia ruma dekenai idia noho diba bona unuseniai idia guriguri. To idia ura guriguri totona idia hebou bona unai nega aukana lalonai idia ta ta idia hagoadaia heheni. Paulo ena laolao daudauna bona aukana Roma dekenai ena dokona kahana ai, ia be Puteoli dekenai tadikaka haida bona gabeai ia idia itaia totona idia mai tadikaka ma haida ida ia hedavari. Unai dainai ena hemami be edena bamona? “Paulo ese idia [idia mai tadikaka] ia itaia neganai, Dirava dekenai ia tanikiu henia, bona iena lalona dekenai goada ia abia.” (Kara 28:​13-15) Keristani tadikaka ida ia noho lou dainai goada ia abia. Keristani tadikaka ita bamoa neganai goada ita abia danu. Ita hebou diba dalana ia do noho neganai, namo lasi mauri ia lao henia dala aukana dekenai ita sibona ita raka.​—⁠Aonega Herevadia 18:1; Mataio 7:⁠14.

11. “Siahu badana” ita abia be mai anina bada negadia haida oi gwauraia.

¹¹ Hanaihanai ita guriguri, Dirava ena Hereva ita stadilaia, bona abidadama tamona taudia ita bamoa karadia dainai, ‘Lohiabada ena siahu dekena amo do ita siahu, bona Lohiabada ena goada dekena amo do ita goada.’ (Efeso 6:10) Ita daradara lasi, ita ibounai ese “Lohiabada ena siahu” ita abia be gau badana. Haida be tauanina hamanokaia gorere bona buruka negana ena hekwakwanai idia hisihisilaia, ma haida be edia turana namona ena mase dainai idia lalohisihisi. (Salamo 41:⁠3) Ma haida ese edia abidadama lasi adavana ena dagedage karana idia haheaukalaia. Tama sina momo idia itaia ful-taim moni gaukara idia karaia bona ruma bese idia naria be maduna mai ena hekwarahi, bona sibona ese natudia ia naria tama eiava sina dekenai unai be auka herea. Matamata Keristani taudia ese goada idia abia be namo, bamodia edia lalo-ani karana, drag ania kava karana, bona matabodaga karadia idia dadaraia totona. Namona be ta ia daradara lasi to Iehova amo “siahu badana” ia noia unai bamona hekwakwanai ia hanaia totona.​—⁠2 Korinto 4:⁠7.

‘Manoka Bona Hesiku Taudia Ia Hagoadaia Noho’

12. Edena dala ai Iehova ese Keristani hesiai gaukarana lalonai ita ia hagoadaia?

¹² Danu, Iehova ena hesiai taudia ese iena gaukara idia karaia neganai Ia ese idia ia hagoadaia. Isaia ena peroveta herevana ia gwau: “Manoka bona hesiku taudia be Lohiabada ese ia hagoadaia noho, bona goada lasi taudia edia goada ia habadaia noho. . . . Lohiabada dekenai idia abidadama henia taudia ese, edia goada do idia hamatamataia lou. Idia be hanina dekena amo, do idia roho daekau, ugava bamona. Idia be do idia heau, bona do idia manoka lasi. Idia be do idia raka lao, bona do idia moru lasi.” (Isaia 40:​29-31) Aposetolo Paulo be siahu ia abia ena hesiai gaukara ia karaia totona. Unai dainai, ena gaukara lalonai anina ia havaraia. Ia ese Tesalonika Keristani taudia ia tore henia, ia gwau: “Ai ese Sivarai Namona ai mailaia umui dekenai, hereva sibona dekenai lasi, to Lauma Helaga ena siahu dekenai danu.” (1 Tesalonika 1:⁠5) Iena haroro bona hadibaia gaukarana be mai ena siahu ena hereva idia kamonai taudia edia mauri haidaua totona.

13. Herevana dagedage ia vara to dahaka ese Ieremia ia hagoadaia ia haheauka totona?

¹³ Iseda teritori​—⁠reana lagani momo lalonai ita haroro henia bona momo idia kamonai lasi gabuna​—⁠dekenai idia ura lasi toana oi itaia neganai, reana oi lalo-manoka diba. Ieremia danu be idia dagedage henia, kirikirilaia, bona laloa lasi karana dainai unai bamona ia lalo-manoka. Sibona dekenai ia gwau: “Lau ese Lohiabada do lau laloaboio, bona iena ladana dekenai do lau hereva lasi.” To unai bamona ia noho diba lasi. Unai sivarai be “lahi bamona, [iena] lalona ia gabua noho, ela bona [iena] turiana dekenai.” (Ieremia 20:⁠9) Unai dagedage bada negana ai, dahaka ese ena goada ia hamatamataia. Ieremia ia gwau: “Oi Lohiabada ese lau oi durua noho. Oi be goada bona mai oiemu siahu.” (Ieremia 20:11) Ieremia ia lalo-parara ia harorolaia sivaraina bona Dirava amo ia abia gaukarana be mai anina bada dainai, Iehova ese ia hagoadaia neganai ia gaukara noho.

Hadikaia Bona Hanamoa Siahuna

14. (a) Malana ena siahu be edena bamona? (b) Malana ese dika bada ia havaraia diba ena haheitalai haida oi gwauraia.

¹⁴ Ita abia siahu ibounai be maoromaoro Dirava amo ia mai lasi. Hegeregere, malana be mai ena siahu hadikaia bona hanamoa totona. Solomona ena sisiba ia gwau: “Oiemu hereva ese mauri ia henia diba, bona mase ia mailaia diba.” (Aonega Herevadia 18:21) Satani bona Heva edia herevahereva kwadogina ena anina dikana ese ia hahedinaraia ta ena hereva ese dika bada ia havaraia diba. (Genese 3:​1-5; Iamesi 3:⁠5) Ita danu be iseda malana amo dika bada ita havaraia diba. Bema kekeni matamata ta ena tauanina ena bada ita herevalaia kava, reana kara haida do ia karaia bena gabeai anorexia gorerena do ia abia. Ta ia laloa lasi dainai ia gwauraia hadikaia herevana be nega daudau ia moalelaia hetura karana ia hadikaia diba. Oibe, malana ita biagua be gau badana.

15. Edena dala ai iseda malana ita gaukaralaia diba, lalona hagoadaia bona hanamoa totona?

¹⁵ To, malana ese dika sibona lasi to namo ia havaraia diba danu. Idaunegai aonega herevana ia gwau: “Ia hereva haraga tauna ena hereva, be tuari kaia ia gwadaia noho bamona, to aonega tauna ena hereva ese, taunimanima idia hamauria diba.” (Aonega Herevadia 12:18) Aonega Keristani taudia ese malana ena siahu idia gaukaralaia, lalo-metau bona lalohisihisi taudia idia hagoadaia totona. Hebogahisi herevadia ese turadia edia lalo-ani karadia dainai idia hekwarahi memero kekeni idia hagoadaia diba. Hebogahisi herevadia ese tadikaka bona taihu burukadia idia hagoadaia bena idia diba idia be mai anina bada bona idia ita lalokau henia. Hereva namodia ese gorere taudia edia lalona idia hamoalea diba. Bona gau badana be, iseda malana ita gaukaralaia diba, Basileia ena sivarai mai siahuna be kamonai taudia ibounai dekenai ita harorolaia totona. Iseda siahu ia hegeregere Dirava ena Hereva do ita harorolaia bema mai eda kudouna ibounai ida ita karaia. Baibel ia gwau: “Bema dika ese taunimanima namodia ia hadikaia, bona bema oi be mai oiemu dala do oi durudia neganai, oiemu durua do oi koua lasi.”​—⁠Aonega Herevadia 3:⁠27.

Siahu Gaukaralaia Dalana Maorona

16, 17. Elda taudia, tama sina, bona idia headava tatau bona hahine ese Dirava amo idia abia siahuna idia gaukaralaia neganai, edena dala ai idia ese Iehova idia tohotohoa diba?

¹⁶ Ena be Iehova ena siahu be bada herea, ia ese kongregesen ia lohiaia mai ena lalokau ida. (1 Ioane 4:⁠8) Keristani elda taudia ese ia idia tohotohoa dainai Dirava ena mamoe oreana idia naria mai edia lalokau ida​—⁠dala kererena lasi, to dala maorona ai edia siahu idia gaukaralaia. Momokani, nega haida elda taudia ese ‘taunimanima idia sisiba henia, edia kudouna idia pidia, bona edia lalona idia hagoadaia,’ to unai idia karaia neganai do ‘idia hadibadia namonamo mai edia haheauka danu.’ (2 Timoteo 4:⁠2) Unai dainai elda taudia be aposetolo Petero ese kongregesen lalonai siahu idia abia taudia dekenai ia torea herevadia idia laloa loulou, ia gwau: “Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia. Ta ese umui ia oda dainai do umui karaia lasi, to sibona emui ura dainai. Kohu do umui davaria totona do umui karaia lasi. Lohia mai hekokoroku danu bamona emui orea do umui gunalaia lasi, to emui kara namodia do umui hedinaraia, vadaeni emui kara bamona do idia karaia.”​—⁠1 Petero 5:​2, 3; 1 Tesalonika 2:​7, 8.

¹⁷ Tama sina bona headava tatau danu be Iehova ese siahu ia henidia, bona unai siahu be ruma bese durua, naria, bona ubua totona idia gaukaralaia be namo. (Efeso 5:​22, 28-30; 6:⁠4) Iesu ena kara ese ia hahedinaraia lalokau dalanai siahu gaukaralaia karana ese anina namona ia havaraia. Bema matahakani be dala maorona ai idia henia, natudia be do idia lalo-metau lasi. (Kolose 3:21) Headava do idia goada bema Keristani tatau be mai edia lalokau ida edia kwara dagina idia gaukaralaia bona bema hahine ese edia tau edia kwara dagina idia matauraia, bona Dirava ese idia dekenai ia henia siahuna idia hanaia lasi edia adavana idia biagua eiava sibona edia ura gaudia idia abia totona.​—⁠Efeso 5:​28, 33; 1 Petero 3:⁠7.

18. (a) Iseda badu ita biagua karana dekenai Iehova ena haheitalai be edena dala ai ita tohotohoa diba? (b) Siahu idia abia taudia be edia siahu henunai idia noho taudia dekenai edena kara idia habadaia toho?

¹⁸ Ruma bese bona kongregesen lalonai siahu idia abia taudia ese edia badu idia biagua namonamo be gau badana, badina badu ese lalokau ia havaraia lasi to gari ia havaraia. Peroveta tauna Nahumu ia gwau: “Lohiabada be ia badu haraga lasi, to ia be mai ena siahu bada herea.” (Nahumu 1:3; Kolose 3:19) Iseda badu ita koua karana ese ia hahedinaraia ita be mai eda goada, to ita koua lasi neganai ia hamomokania ita be manoka taudia. (Aonega Herevadia 16:32) Ruma bese bona kongregesen lalonai ita ura habadaia karana be lalokau​—⁠Iehova lalokau henia, ta ta lalokau henia, bona kara maoromaoro taravatudia ura henia karana unai. Lalokau be lalo-tamona havaraia gauna badana bona kara maorona karaia totona ita ia veria siahuna badana.​—⁠1 Korinto 13:​8, 13; Kolose 3:⁠14.

19. Edena hereva amo Iehova ese ita ia hagoadaia, bona unai dainai dahaka do ita karaia be namo?

¹⁹ Iehova ita diba ena anina be ita diba momokani ia be mai ena siahu. Iehova be Isaia amo ia gwau: “Oi diba lasi eiava oi kamonai lasi, a? Iehova, tanobada ena kahana ibounai ia Havaraia Tauna, be Dirava ela bona hanaihanai. Iena goada ia ore lasi bona ia hesiku lasi.” (Isaia 40:​28, NW ) Iehova ena siahu be ia ore diba lasi. Bema ita sibona lasi to ia dekenai ita tabekau, ita do ia rakatania lasi. Ita ia hamaoroa: “Do umui gari lasi, lau be umui dekenai lau noho! Lau be umui emui Dirava, gau ta ese umui do ia hagaria lasi. Lau ese umui do lau hagoadaia, bona umui do lau durua. Lau ese umui do lau naria, bona umui do lau hamauria.” (Isaia 41:10) Mai lalokau ida ita ia naria dainai dahaka ita karaia be namo? Iesu bamona, namona be Iehova ese ita ia henia siahu ibounai be haida durua bona hagoadaia totona ita gaukaralaia. Namona be iseda malana ita biagua ia ese dika lasi to namo do ia havaraia totona. Bona namona be hanaihanai lauma dalanai ita noga noho, abidadama dekenai ita gini goada, bona ita ia Havaraia Tauna Badana, Iehova Dirava, ena siahu ai do ita goada.​—⁠1 Korinto 16:⁠13.

[Footnote]

Anina Oi Gwauraia Diba, A?

• Edena dala ai Iehova ese ena siahu ia gaukaralaia?

• Edena dala idauidau ai Iehova ena siahu ita abia diba?

• Edena dala ai malana ena siahu ita gaukaralaia be namo?

• Edena dala ai Dirava ese ia henia siahuna ese namo ia havaraia diba?

[Picture on page 15]

Iesu ese Iehova ena goada ia gaukaralaia ma haida ia durua totona

[Pictures on page 17]

Iseda siahu ia hegeregere Dirava ena Hereva do ita harorolaia, bema mai eda kudouna ibounai ida ita karaia