Pacific Motumotudia Dekenai Ai Lao Do Ai Gaukara!

INTENESENEL peleini diho gabudia Brisbane bona Sydney, Australia dekenai, edia naria daiutu lalodiai, taunimanima idia herevahereva mai moale bada ida. Taunimanima 46 ese dina siahu gabuna, Samoa, dekenai do ia lao peleini ta idia naria, bona New Zealand, Hawaii, bona United States amo idia lao tadikaka ma 39 be unuseniai do idia hedavari. Idia huaia gaudia be idau​—⁠kohu momo be tulu, hegeregere hama, iri, bona ibudu​—⁠Pacific motumotu hairaina vadivadi henia totona vaia do oi mailaia lasi kohuna. To, gaukara idauna ta do idia karaia.

Sibodia edia moni idia henia tiketi abia totona, bona pura rua lalonai moni lasi volantia gaukara do idia karaia, Iehova ena Witnes taudia edia brens opesi Australia dekenai ena Regional Engineering Office ese ia naria haginia gaukarana dekenai idia vareai. Unai gaukara be tadikaka ese idia henia kontribusen monina amo idia karaia, bona Iehova ena Witnes taudia edia tubu haraga kongregesen momo Pacific motumotudia dekenai idia durua Kingdom Hall, Assembly Hall, misinari rumadia, brens opesi, bona hahanaia gaukara opesi idia haginia totona. Namona be unai gaukara taudia haida, guna edia tano dekenai Kingdom Hall idia haginia oreadia dekenai idia noho taudia unai, ita hedavari henia.

Max, guhi karaia tadikakana, be Cowra, New South Wales, Australia, dekena amo. Ia be mai ena adavana bona ena natudia be ima. Arnold be Hawaii amo. Ia bona ena adavana edia natudia memero be rua, bona ia be painia, o ful-taim hesiai gaukara ia karaia tauna. Max hegeregerena, Arnold be elda ta iena kongregesen lalonai. Unai dainai ita diba unai tatau​—⁠inai program lalonai idia vareai taudia momo hegeregerena​—⁠be volantia gaukara idia karaia lasi badina edia nega be bada herea. Lasi, to idia bona edia ruma bese taudia idia itaia unai tadikaka idia durua be namo, bona idia ura idia karaia.

Tano Idauidau amo Idia Mai Taudia be mai Anina Gaukara Idia Karaia

Tuvalu dekenai, mai edia diba konstraksen taudia idia abia be mai anina. Unai Pacific tanona ena taunimanima be 10,500 bona motumotu maragidia 9, equator kahirakahira bona Samoa amo notwest kahana ai, idia noho. Motumotu edia bada be sikoea kilomita 2.5 bamona sibona. Lagani 1994 ai, idia noho Witnes taudia 61 ese Kingdom Hall matamata bona hahanaia gaukara opesi badana ta idia abia haraga be namo.

Unai Pacific siahu gabuna ai, nega momo medu bada ia diho bona lai bada ia toa dainai, gau badana be ruma idia haginia auka. To unai motumotu dekenai ruma haginia gaudia namodia be haida sibona. Unai hekwakwanai ena hanamoa dalana be dahaka? Kahana ta ta iboudiai​—⁠guhi ena auri gaudia, ruma ena kohu, uindo koua dabuadia, toileti, digudigu daiutu kohudia, ikoko bona gau maragimaragi ibounai danu​—⁠be Australia amo, maua badadia lalonai idia siaia.

Unai gaudia idia do ginidae lasi neganai, idia mai guna tadikaka ese tano idia hegaegaelaia bona ruma ena badina idia haginia. Bena intenesenel konstraksen gaukara taudia idia mai ruma idauidau idia haginia, penia, bona ruma ena kohu idia atoa totona.

Tuvalu dekenai unai gaukara badana ia vara dainai, unai gabu ena pasto tauna ia badu bona reidio dekenai taunimanima ia hamaoroa Witnes taudia ese idia haginia gauna be “Babela Kohorona”! To hereva momokani be dahaka? Volantia tauna Graeme ia gwau: “Baibel lalonai, taunimanima ese unai Babela Kohorona idia haginia neganai, Dirava ese edia gado ia haidaua bona mai lalo-parara ida idia hereva heheni diba lasi dainai, edia gaukara idia rakatania bona kohorona idia haorea lasi. To Iehova Dirava ena gaukara idia karaia be idau. Ena be edia gado bona edia kastom be idauidau, to edia gaukara ibounai idia karaia haorea.” (Genese 11:​1-9) Unai gaukara idia haorea danu​—⁠wiki rua lalonai sibona. Taunimanima 163, praiminista ena adavana danu, be ruma hahelagaia hebouna dekenai idia lao.

Doug, gaukara naria tadikakana, ese idia vara gaudia ia laloa lou, bona ia gwau: “Hamoalea gauna be tano ma haida amo idia mai volantia taudia ida ai gaukara hebou. Aiemai karaia daladia be idauidau, ai gaukaralaia herevadia be idauidau, gau ta ena lata o lababa gwauraia daladia be idauidau danu, to unai gaudia ese hekwakwanai ta idia havaraia lasi.” Unai bamona gaukara be gabu idauidau dekenai ia itaia vadaeni dainai, ma ia gwau: “Unai gaudia dainai hari lau diba momokani Iehova ese ia durua dainai, iena taunimanima ese inai tanobada dekenai ruma ta idia ura idia haginia neganai, herevana ia be daudau gabuna eiava gabu dikana ai, to do idia karaia. Momokani, diba bada taudia ai abia, to Iehova ena lauma ese dala ia kehoa.”

Dirava ena lauma ese motumotu dekenai idia noho Witnes ruma besedia ia hagoadaia danu, aniani bona ruma idia henia totona, bona idia haida dekenai unai be gau badana. Bona edia heabidae karana idia mamia tadikaka ese unai idia laloa bada. Ken, Melbourne, Australia, dekena amo ia lao tadikakana, ese unai bamona gaukara ia karaia French Polynesia dekenai. Ia gwau: “Hesiai taudia bamona ai lao, to ai idia kara henia dalana be ai be king bamona.” Dala ia noho neganai, unai gabu dekenai idia noho Witnes taudia ese konstraksen gaukara idia durua danu. Solomon Islands dekenai, taihu ese semensi idia mikisi​—⁠edia imana amo. Medu ia diho ororodia dekenai, tadikaka bona taihu 100 idia daekau, bona idia ese au, edia metau be ton 40 ia hanaia, idia huaia diho. Matamata taudia idia durua danu. New Zealand amo ia lao gaukara tauna ta, ia gwau: “Unai motumotu ena matamata tauna ta lau laloatao, ia ese semensi baege rua o toi be nega tamona ia huaia. Bena dina ibounai, siahu bona medu ia diho negadia ai, nadi maragimaragi ia geia noho.”

Unai gabu dekenai idia noho tadikaka ese unai gaukara idia durua neganai, hahenamo ma ta ia vara. Watch Tower Society ena Samoa brens opesi ese inai ripoti ia henia: “Motumotu tadikakadia ese konstraksen gaukara dekenai diba idia abia, bona unai diba idia gaukaralaia Kingdom Hall matamata haginia bona lai badana ia hadikaia rumadia hanamoa o haginia lou totona. Nega haida, moni gaukara be momo lasi gabudia ai, idia ia durua moni gaukara abia totona.”

Haginia Gaukara ese Haheitalai Namona Ia Henia

Colin be Honiara dekenai Solomon Islands Assembly Hall haginia gaukarana ia itaia. Ia laloa bada dainai, Watch Tower Society ena Solomon Islands brens opesi ia tore henia, bona Pidgin English dekenai revareva ia torea, ia gwau: “Iboudiai be mai lalo-tamona ida idia gaukara, bona ta ia badu lasi, idia be famili tamona bamona.” Nega sisina murinai, iena hanua Aruligo dekenai ia giroa lao, ena daudau be kilomita 40, bona ia bona iena ruma bese ese Kingdom Hall ta idia haginia. Bena brens opesi dekenai revareva ma ta idia siaia, idia gwau: “Aiemai Kingdom Hall, pata danu, ai haginia vadaeni, unai dainai hebou haida ai karaia diba iniseniai, a?” Tadikaka ese maoromaoro hebou karaia dalana idia hegaegaelaia bona taunimanima 60 bamona be hanaihanai idia lao.

European Union ena sisiba henia tauna ese Tuvalu dekenai idia karaia gaukarana ia itaia, bona konstraksen tadikaka dekenai ia gwau: “Lau laloa iboudiai edia hereva be lauegu bamona, to lau dekenai unai be hoa karana!” Telefon gabuna dekenai ia gaukara hahinena ese ia vadivadi volantia hahinena ia nanadaia: “Dahaka dainai umui ibounai umui moale bada? Iniseniai ia siahu bada!” Unai be nega ginigunana Keristani tomadiho be dalana namona ai bona sibona laloa lasi dalana ai idia itaia momokani.

Ura Gaudia Dadaraia mai Lalohisihisi ida Lasi

Baibel be 2 Korinto 9:6 ai ia gwau: “Uhe momo do ia hadoa tauna be anina momo do ia geia.” Unai gaukara taudia, edia ruma bese taudia, bona edia kongregesen ese uhe momo herea idia hadoa, Pacific kahana dekenai idia noho Witnes tadikaka durua totona. Ross, elda tauna, Kincumber, Sydney kahirakahira ia noho gabuna ai, ia gwau: “Egu kongregesen ese peleini ena davana ibounai amo kahana ihatoina idia henia, bona egu nakimi, lau ia bamoa tauna, ese $500 ia henia danu.” Gaukara tauna ma ta ese laolao ena davana abia totona ena motuka ia hoihoilaia. Ma ta ese tano ta ia hoihoilaia. Kevin ese $900 ia tahua noho, unai dainai ena lalona ia hadaia ena lagani rua pune 16 do ia hoihoilaia. Turana ta amo, ia ura ia hoia tauna ia davaria, bona ia gwau $900 do ia henia ia abia totona, ia tahua davana unai!

Danny bona Cheryl dekenai inai henanadai idia henia: “Peleini ena davana bona emui moni gaukara ena davana umui haboioa, edia davana ibounai be $6,000, to umui karaia gaukarana be mai anina, a?” Idia haere, idia gwau: “Oibe! Bema ena davana be nega rua ai idia habadaia do ai laloa noho unai kara be mai anina.” Alan, Nelson, New Zealand dekenai, ia noho tauna, ia gwau: “Bema Tuvalu lao henia davana lau gaukaralaia Europe dekenai lau lao totona, moni sisina be ia do noho. To lau abia hahenamo, bona gabu idauidau amo lau davaria turadia, do lau abia, a? Eiava tadikaka ma haida lau durua diba karana do lau karaia diba, a? Lasi! Bona, motumotu tadikaka dekenai lau henia gaudia be maragi, to lau dekenai idia henia gaudia be bada.”

Unai gaukara ia kwalimu ena badina ma ta be edia ruma bese taudia ese idia durudia. Hahine haida ese edia adavana idia bamoa diba bona haginia gabuna ai gaukara idia karaia diba danu, to ma haida ese edia natu maragidia eiava famili bisinesi idia naria. Clay ia gwau: “Lau lao neganai, egu adavana be mai ena ura ida aiemai natudia bona ruma ia naria. Sibona ena ura dadaraia karana ese egu ura dadaraia karana ia hereaia.” Momokani, edia adavadia idia abia lao diba lasi tadikakadia ibounai be unai hereva dekenai idia gwau diba “Amen!”

Tuvalu ena gaukara idia haorea murinai, volantia taudia ese Kingdom Hall, Assembly Hall, misinari rumadia, bona hahanaia gaukara opesi idia haginia Fiji, Tonga, Papua New Guinea, New Caledonia, bona gabu ma haida dekenai. Gaukara ma haida, Southeast Asia ena kahana lalonai danu, idia hegaegaelaia noho. Gaukara taudia edia namba do idia hegeregere, a?

Unai be hekwakwanai ta lasi. Hawaii ena brens opesi ia gwau: “Intenesenel konstraksen idia karaia vadaeni taudia edia noinoi be gaukara ma ta idia hamatamaia neganai idia boiridia be namo. Bona gaukara ta ia ore bona edia ruma dekenai idia giroa lao neganai, vadaeni moni idia haboua matamaia.” Unai tadikaka be sibodia edia ura idia dadaraia bona Iehova ese idia ia hanamoa dainai, unai haginia gaukarana program do ia kwalimu sibona, ani?

[Picture on page 9]

Haginia gaukara ena kohu

[Pictures on page 9]

Gaukara taudia be haginia gabuna ai

[Pictures on page 10]

Gaukara ia ore neganai, Dirava ena lauma ia havaraia gaudia ai moalelaia