Mauri Sivaraina

Iehova Lalokau Henia Mamina be Aiemai Natudia Edia Kudouna Lalonai Ai Atoa

WERNER MATZEN ESE IA SIVARAILAIA

Lagani haida gunanai, egu vara guna merona, Hans Werner, ese lau dekenai Baibel ta ia henia. Ena rau ginigunana lalonai ia torea: “Tamagu e, Namona be Iehova ena Hereva ese iseda ruma bese be mauri dalana dekenai ita do ia hakaua lao noho. Mai tanikiu danu, emu vara guna merona.” Tama sina do idia lalo-parara dahaka dainai unai hereva ese egu kudouna be tanikiu bona moale amo ia hahonua. To unai neganai lau diba momokani lasi egu ruma bese be edena bamona hekwakwanai do ia davaria.

LAU be lagani 1924 ai lau vara Halstenbek dekenai, ia be kilomita 20 bamona Germany ena bouti abia gabuna Hamburg amo, bona egu sinana bona tubuna tau ese lau idia naria. Gaukara kohudia karaia gaukarana lau dibaia, bena lagani 1942 ai, Wehrmacht ami gaukara totona lau idia abia hidi. Tanobada Tuarina Iharuana lalonai Russia taudia ida ai tuari negana be dika herea, lau herevalaia diba lasi. Typhoid gorerena lau abia to lau namo murinai tuari gabuna dekenai lau idia siaia lou. January 1945 ai, Lodz, Poland dekenai, bero badana lau abia, bona ami taudia edia hospital dekenai lau idia siaia. Tuari ia ore neganai, unuseniai lau do noho. Hospital ai bona gabeai Neuengamme ena dibura kamepa dekenai, nega ia noho gau momo lau lalohadailaia totona. Inai henanadai lau lalo-hekwarahilaia, Dirava ia noho momokani, a? Bema oibe, dahaka dainai hisihisi ia koua lasi?

September 1947 ai, dibura kamepa amo lau idia ruhaia nega sisina murinai, Karla lau adavaia. Ai ruaosi be taoni tamona dekenai ai tubu daekau, to Karla be Katolik hahine, lau tubu daekau neganai tomadiho be lau diba lasi. Aiemai headava ia karaia pris tauna ese ai ia hadibaia namona be adorahi ibounai Lohiabada ena Guriguri ai gwauraia hebou. Ia hereva bamona ai karaia, to ai diba lasi dahaka totona ai guriguri.

Lagani ta murinai Hans Werner ia vara. Unai neganai, egu gaukara turana, Wilhelm Ahrens, amo Iehova ena Witnes taudia ida lau hedavari. Baibel amo ia hahedinaraia nega ta tuari be do ia vara lou lasi. (Salamo 46:⁠9) Lagani 1950 ena siahu ia ore neganai, egu mauri lau gwauhamatalaia Iehova dekenai bona bapatiso lau abia. Lau moale bada badina lagani ta murinai egu adavana lalokauna ese bapatiso ia abia danu!

Iehova Ena Dala be Egu Natudia Dekenai Lau Hadibaia

Baibel dekenai lau duahia headava be Iehova ese ia havaraia gauna. (Genese 1:​26-​28; 2:​22-​24) Aiemai natudia​​—⁠Hans Werner, Karl-Heinz, Michael, Gabriele, bona Thomas​​—⁠idia vara neganai lau noho, bona unai ese lau ia durua bada adavana bona tamana namona ai lau lao totona. Aiemai natudia ta ta idia vara neganai, Karla bona lau ai moale bada.

Lagani 1953 ai, Iehova ena Witnes taudia edia hebouhebou Nuremberg dekenai, be mai anina bada negana aiemai ruma bese dekenai. Friday adorahi ai, hereva henia tauna ena hereva “Tanobada Matamata Oreana Lalonai Natudia Naria Gaukarana” lalonai, ai laloaboio diba lasi gauna ta ia herevalaia, ia gwau: “Iseda natudia dekenai Dirava ena hesiai taudia ai idia lao urana ita henia be ahuna hereadaena.” Iehova ena heduru amo, Karla bona lau ai ura bada unai bamona do ai karaia. To edena dala ai?

Matamanai, dina ta ta ai, aiemai ruma bese taudia ai guriguri hebou. Unai amo emai natudia idia itaia diba guriguri be mai anina bada karana. Natuna ta ta be idia maragi negana amo idia dibaia ai do aniani lasi neganai do ai guriguri guna. Edia beibi negana danu, edia aniani kavabu idia itaia neganai, karaharaga edia kwarana idia atoa diho bona edia imana maragidia idia lokua. Nega ta, egu adavana ena Witnes lasi varavara ta ena headava totona ai idia boiria. Headava idia karaia murinai, headava matamata kekeni ena tama sina ese vadivadi taudia idia boiria edia ruma dekenai aniani haida idia ania totona. Ibounai idia ura maoromaoro idia aniani. To emai lagani 5 merona Karl-Heinz ia laloa unai be maoro lasi. Ia gwau: “Mani guriguri gwauraia guna.” Vadivadi taudia ese ia idia itaia, bena ai, bona dokonai ai ia boiria tauna idia raraia. Hemarai mamina koua totona, ai ia boiria tauna lau noia bema ia ura aniani totona tanikiu herevana lau gwauraia guriguri amo, bona unai ia abia dae.

Unai neganai Iesu ena hereva lau laloatao: “Natudia maragidia, rata idia inua memero, edia uduna dekenai Dirava idia hanamoa namonamo.” (Mataio 21:16) Ai diba emai kudouna ibounai ida ai gwauraia loulou guriguridia ese emai natudia idia durua dainai, idia laloa Iehova be edia lalokau guba Tamana.

Aiemai Maduna Iehova Dekenai

Natudia hadibaia Dirava idia lalokau henia totona ena anina be ena Hereva idia duahia bona idia stadilaia loulou. Unai ai laloa noho dainai, pura ta ta ena Monday adorahi ai ruma bese stadi ai karaia. Emai natuna badana bona natuna ginigabena edia vara negadia huanai idia noho laganidia be 9, bona idia iboudiai edia laloa dalana be idauidau, unai dainai buka tamona ai stadilaia diba lasi.

Hegeregere, idia do sikuli lasi maragidia dekenai, auka lasi hakaua herevadia ai gaukaralaia. Karla ese Baibel siri ta ia kikilaia idia danu, eiava Baibel idia herevalaia bukadia edia laulau ia gaukaralaia. Lagani bada lasi natudia ese dabai emai bedi dekenai idia daekau bona ai idia hanogaia, badina idia ura ai dekenai idia ura henia laulaudia The New World bukanaa amo idia hahedinaraia, bona unai negadia be mai moale ida lau laloa noho.

Karla be mai haheauka ida Iehova lalokau henia karana ena badina idauidau be emai natudia dekenai ia hadibaia. Toana be ia auka lasi, to, tauanina bona hemami dalanai Karla bona lau dekenai unai be kahirakahira ful-taim gaukarana. To, unai gaukara ai hadokoa lasi. Iehova idia diba lasi taudia edia lalo-ani herevadia ese emai natudia idia do hakaua kerere lasi neganai, ai ura edia kudouna lalonai Iehova hesiai henia urana ai atoa guna. Unai badina dainai ai ura idia helai diba vadaeni natudia ibounai be ruma bese stadi lalonai idia noho.

Karla bona lau ai lalo-parara tama sina edia haheitalai namona be mai anina bada aiemai natudia edia tomadiho karana dekenai. Bona herevana ai aniani, uma gabu ai karaia, eiava ai raka loaloa, to emai natudia ta ta ai durudia edia hetura karana Iehova ida idia goadalaia. (Deuteronomi 6:​6, 7) Ai ese dala ai karaia emai natudia idia matamata negana amo, idia ta ta be mai edia Baibel. Danu, magasin matamata ai abia neganai, ruma bese tauna ta ta edia kopi dekenai edia ladana lau torea. Unai dala amo edia buka bona magasin idia davaria dalana idia dibaia. Ai be lalohadai ta ai abia, ai be Awake! magasin ena hereva ta ai abia hidi, bena natuna ta ena gaukara be unai do ia duahia. Sunday ena dina tubu aniani murinai, ai dekenai do idia hahedinaraia bema idia duahia gaudia idia lalo-pararalaia.

Natudia Ta Ta Ai Durua

Momokani, hekwakwanai haida idia vara. Natudia idia tubu daekau negana lalonai, ai davaria lalokau henia mamina be edia kudouna dekenai ai atoa neganai ai ura diba dahaka ia noho vadaeni edia kudouna lalonai. Anina be idia ai kamonai henia. Nega haida aiemai natudia idia laloa gau haida dainai idia maumau be mai badina, unai dainai Karla bona lau ai helai hebou bona idia danu ai kikilaia. Ai laloa namona be famili stadi ia ore murinai, miniti 30 do ai atoa idia totona. Unai nega lalonai idia lalo-hekwarahilaia gauna do idia herevalaia diba mai gari lasi ida.

Hegeregere, Thomas bona Gabriele, aiemai natudia ginigabedia, idia laloa ai ruaosi ese edia kakana badana ai ura henia bada bona laloa guna. Nega ta, edia lalohadai idia gwauraia hedinarai bona idia gwau: “Tamagu, ai laloa Sinagu bona oi ese hanaihanai Hans Werner ena ura umui karaia.” Matamanai, lau hoa maragi lasi. To, unai ai laloa namonamo murinai, Karla bona lau ai diba emai natudia Thomas bona Gabriele edia hereva be momokani. Unai dainai ai hekwarahi emai natudia be maka tamona dekenai ai kara henidia.

Nega haida, natudia lau panisia haraga eiava davana maorona lau henia lasi. Unai bamona negadia ai tama sina be sori herevana idia gwauraia be namo. Unai murinai, Iehova dekenai ai guriguri. Gau badana be natudia idia itaia edia tamana ia noho hegaegae Iehova dekenai bona idia, ena natudia, dekenai sori herevana ia gwauraia totona. Unai dainai, emai hetura karana dekenai lalokau bona mamina namona ia havaraia. Nega momo ai dekenai idia gwau, “Umui be aiemai turadia namodia.” Unai ese ai ia hamoalea bada.

Ruma bese taudia idia gaukara hebou neganai, lalo-tamona ia havaraia. Unai ia vara totona, ai ibounai be mai emai maduna ruma gaukara dekenai. Wiki ta ta lalonai, Hans Werner ia abia gaukarana be sitoa dekenai ia lao aniani bona ruma gaudia ia hoia totona, anina be do ia hoia gaudia edia lista bona moni haida ia abia. Wiki ta, lista ta bona moni ai henia lasi. Ia ese ena sinana ia nanadaia, bona sinana ese ia hadibaia moni ai do abia lasi. Natudia be gado regena maragina ai idia herevahereva hebou murinai, idia ibounai ese sibodia edia moni udaia mauana idia abia lao bona teibolo latanai idia bubua diho. Idia ibounai idia gwau: “Sinagu, hari ai hegeregere bona sitoa dekenai ai lao diba!” Momokani, emai natudia ese dika negadiai karaharaga heduru idia henia lalohadai idia dibaia, bona unai ese emai ruma bese ia hatamonaia.

Gabeai, aiemai natudia memero idia bada bona kekeni idia ura henia matamaia. Hegeregere, Thomas be mauri lagani 16 Witnes kekeni ia tura henia matamaia. Lau hamaoroa bema unai kekeni ia tura henia noho, namona be ia gini hegaegae kekeni ia adavaia totona bona ia hegeregere adavana bona natudia naria maduna huaia totona. Thomas ena mauri lagani be 18 sibona dainai, ia lalo-parara headava totona ia hegeregere lasi.

Ruma Bese be Lauma Dalanai Ia Goada Ia Lao

Idia do maragi neganai, natuna ta ta be Tiokratik Haroro Sikuli lalonai idia vareai. Idia abia hereva ai kamonai namonamo, bona unai ese ai ia hagoadaia, badina ai itaia aiemai natudia ese Dirava idia lalokau henia mai edia kudouna ibounai ida. Ai danu idia noho sekit bona distrik naria taudia momo ese edia mauri lalonai idia davaria ekspiriens idia kikilaia, eiava ai dekenai Baibel idia duahia. Inai tatau bona edia adavadia ese ful-taim hesiai gaukara lalokau henia mamina be emai ruma bese ena kudouna lalonai idia atoa.

Hebouhebou badadia negana ai naria mai ura bada ida. Emai natudia dekenai Dirava hesiai henia urana be edia kudouna dekenai ai atoa totona idia be mai anina bada gaudia. Emai natudia be hebouhebou gabuna dekenai idia do lao lasi neganai, edia hebouhebou kadi idia atoa guna be mai anina bada karana. Hans Werner ena mauri lagani be 10 neganai bapatiso ia abia, bona unai ese emai kudouna ia hamarerea bada. Haida idia laloa ia matamata momokani dainai, ena mauri be Iehova dekenai ia gwauhamatalaia be maoro lasi, to ena mauri lagani be 50 neganai, lau ia hamaoroa ia moale bada lagani 40 lalonai Iehova ia hesiai henia diba.

Aiemai natudia dekenai ai hahedinaraia mai anina bada karana be edia hetura karana Iehova ida do idia goadalaia, to gwauhamata idia karaia totona ai doridia lasi. To, ai moale idia oredia idia goada idia lao bona idia hegeregere negana ai bapatiso idia abia.

Iehova Dekenai Metau Negea Karana Ai Dibaia

Lagani 1971 ai, Hans Werner be Watchtower Bible School of Gilead ena klas namba 51 ia haorea bona misinari gaukara karaia totona Spain dekenai idia siaia neganai, ai moale bada herea. Aiemai natudia ta ta ese nega idia atoa ful-taim hesiai gaukara idia karaia totona, bona unai ese ai, edia tama sina, ia hamoalea bada. Unai neganai, Hans Werner ese inai sivarai ena hamatamaia herevana ai ia herevalaia Baibel ia henia. Aiemai ruma bese ena moale be bada.

Bena ai davaria Iehova kahirakahira dekenai ai lao karana ai hagoadaia be namo. Dahaka dainai? Badina ai itaia idia bada vadaeni natudia haida ese hekwakwanai idia davaria bona unai ese edia abidadama ia tohoa. Hegeregere, aiemai lalokau natuna kekeni Gabriele ese hahetoho momo ia davaria. Lagani 1976 ai, Lothar ia adavaia. Nega sisina edia headava murinai ia gorere matamaia. Ena tauanina ia manoka ia lao bona Gabriele ese ia naria ela bona ia mase. Emai lalokau ruma bese tauna goadana ta ena gorere bona mase ai itaia neganai, ia ese ai ia hadibaia Iehova ena lalokau heduruna ai abia be namo.​—⁠Isaia 33:⁠2.

Iehova Ena Orea Lalonai Hahenamo Idauidau

Lagani 1955 ai, kongregesen ena naria tauna (hari ai gwauraia hakaua naria tauna) ena gaukara totona lau idia abia hidi, to lau laloa unai maduna huaia totona lau hegeregere lasi. Gaukara bada ia noho, unai maduna huaia namonamo totona daba haida 4 o’klok lau toreisi. Egu adavana bona natudia ese lau idia durua bada, adorahi ai lau gaukara noho neganai, lau idia koua lasi.

To, ruma bese ta bamona, laga-ani totona nega ai atoa. Nega haida egu gaukara biaguna ese ena motuka ia henia ai gaukaralaia totona, bona dina ta lalonai ai loaloa hebou. Aiemai natudia ese uda lalonai Gima Kohorona ai stadilaia negana idia moalelaia. Ororo dekenai ai loaloa hebou danu, nega haida uda dekenai ai raka neganai egu harmonica lau gadaralaia bona ane ai abia hebou.

Lagani 1978 ai, sekit naria tauna durua gaukarana (loaloa hesiai tauna) lau abia. Lau be lalo-manoka mamina lau abia, lau guriguri: “Iehova, lau laloa lau karaia diba lasi. To bema oi ura lau tohoa, mai egu goada ibounai ida do lau karaia toho.” Lagani rua murinai, egu mauri lagani be 54 neganai, egu mero ginigabena Thomas dekenai egu bisinesi lau henia hanaia.

Aiemai natudia ibounai idia bada vadaeni dainai, unai ese Karla bona lau dekenai dala ia kehoa emai hesiai gaukara Iehova dekenai ai habadaia totona. Unai lagani tamona lalonai, lau idia abia hidi sekit naria gaukara karaia totona bona ai idia siaia Hamburg ena kahana ta bona Schleswig-Holstein ena kahana ibounai karaia totona. Ruma bese naria gaukara dekenai ai manada dainai, tama sina bona natudia edia hekwakwanai ai lalo-pararalaia diba. Tadikaka momo ese ai idia gwauraia edia sekit ena tama sina.

Lagani 10 lalonai, Karla ese sekit gaukara dekenai lau ia bamoa murinai, opereisen ia abia. Unai lagani tamona lalonai, doketa taudia ese egu harana lalonai tiuma ta idia davaria. Unai dainai, sekit naria gaukarana lau rakatania bona egu harana dekenai opereisen lau abia. Lagani toi murinai sekit naria tauna durua gaukarana lau karaia matamaia lou. Karla bona lau emai mauri lagani be 70 idia hanaia bona loaloa gaukara ai karaia lasi. Iehova ese ai ia durua dainai ai itaia ia namo lasi unai hahenamo ai dogoatao noho bema lau hegeregere lasi huaia totona.

Guna negadia ai laloa lou neganai, Karla bona lau ese Iehova ai tanikiu henia, ena heduru amo emai natudia edia kudouna dekenai hereva momokani lalokau henia mamina ai atoa diba dainai. (Aonega Herevadia 22:⁠6) Idia hanaia laganidia lalonai, Iehova ese ai ia gimaia bona hadibaia, ai ia durua emai maduna idauidau ai huaia diba totona. Herevana ai buruka bona emai tauanina ia manoka, to emai lalokau Iehova dekenai ia matamata noho bona ia mauri noho.​—⁠Roma 12:​10, 11.

[Footnote]

[Picture on page 16]

Lagani 1965 ai, Hamburg dekenai, aiemai ruma bese be Elbe Sinavai badinai ai raka

[Picture on page 18]

Lagani 1998 intenesenel hebouhebou Berlin ai, idia lao ruma bese taudia haida

[Picture on page 19]

Lau bona egu adavana, Karla