Duahia Taudia Edia Henanadai

Bema tamana sibona eiava sinana sibona be Iehova ena Witnes tauna ta, natuna hadibaia karana dekenai Baibel ese dahaka hakaua herevadia ia henia?

Baibel ese hakaua hereva badadia rua ia henia Witnes tama eiava sina, edia adavana be Witnes lasi taudia unai, idia hakaua totona. Ta be: “Dirava ai kamonai henia be namo, taunimanima ai kamonai henia be dika.” (Kara 5:​29) Ma ta be: “Tau be iena adavana ena kwarana, Keriso be ekalesia ena kwarana bamona.” (Efeso 5:​23) Unai siri gabena be Witnes hahine mai edia Witnes adavadia sibona ia herevalaia lasi, to Witnes hahine mai edia Witnes lasi adavadia danu ia herevalaia. (1 Petero 3:⁠1) Witnes tama eiava sina ese edia natudia idia hadibaia neganai, unai hakaua herevadia be edena bamona idia laloa namonamo diba?

Bema tau be Iehova ena Witnes tauna ta, ia be mai ena maduna ruma bese ena lauma bona tauanina gaudia ia henia totona. (1 Timoteo 5:⁠8) Herevana Witnes lasi sinana be edia natudia ida nega bada ia noho, to ruma dekenai Witnes tamana ese lauma dalanai iena natudia ia hadibaia bona Keristani hebou dekenai ia abidia lao be namo, unuseniai kara goeva hadibaia herevadia bona hebamo namodia amo namo bada do idia abia.

Bema iena Witnes lasi hahine be iena tomadiho gabuna dekenai edia natudia ia abidia lao totona eiava ia abia dae hahediba herevadia ia hadibadia totona ia hereva goada be edena bamona? Idia noholaia tanona ena taravatu be reana unai bamona ia karaia diba ena maoro ia henia. Unai bamona gabudia dekenai tomadiho karadia totona edia natudia idia lao eiava lasi be lauma dalanai tamana ena hadibaia karana ena namo ese do ia hahedinaraia. Natudia idia bada neganai, edia tamana ese Baibel amo idia ia hadibaia karana be idia ia durua diba Dirava ena hereva momokani idia badinaia totona. Unai abidadama tauna ena natudia be hereva momokani idia badinaia neganai do ia moale bada herea momokani!

Bema sinana be Iehova ena Witnes hahinena ta, ia ese iena tau ena kwara dagi ena hakaua herevana do ia matauraia, to ena natudia edia namo ia laloa danu be namo. (1 Korinto 11:⁠3) Nega momo, Witnes hahine ese natudia dekenai kara goeva bona lauma gaudia ia hadibaia, bona unai bamona heduru herevadia be Iehova ena taunimanima edia hebou dekenai idia abia diba, iena Witnes lasi adavana be unai do ia laloa lasi. Sinana ese iena Witnes lasi adavana ia durua diba, Iehova ena orea amo edia natudia ese idia abia hagoadaia herevadia edia namo ia itaia totona. Mai aonega ida ia hahedinaraia diba, kara dika tanobadana ai idia noho dainai, kara goeva dekenai Baibel ena hakaua herevadia edia natudia dekenai idia hadibadia ena namo be bada.

To sedira, abidadama lasi tauna ia ura iena natudia be iena tomadiho idia badinaia, unai dainai iena tomadiho gabuna dekenai ia abidia lao bona iena abidadama hegeregerena tomadiho herevadia ia hadibaia. Eiava tau be tomadiho ibounai ia dadaraia bona iena natudia ese tomadiho ta ena hadibaia hereva do idia diba lasi totona ia hereva goada. Ia be ruma bese ena kwarana dainai, unai dala ia abia hidi be iena maduna.a

Gwauhamata Keristani hahine ese iena tau ena kwara dagi ia matauraia lalonai, aposetolo Paulo bona Ioane edia kara do ia laloa, idia gwau: “Ai itaia bona ai kamonai gaudia ai hunia diba lasi, aiemai uduna ai koua diba lasi.” (Kara 4:​19, 20) Witnes sinana ese natudia edia lauma dalana ia laloa bada dainai, dala do ia tahua idia dekenai kara goeva do ia hadibaia totona. Ia be Iehova vairanai mai ena maduna ia dibaia hereva momokanidia be ma haida dekenai ia hadibaia totona, bona iena natudia ia hadibaia danu be namo. (Aonega Herevadia 1:8; Mataio 28:​19, 20) Witnes hahinena ese edena bamona unai hekwakwanai aukana ia hanaia diba?

Hegeregere, Dirava abidadama henia karana mani ita laloa. Witnes hahine be reana dala lasi iena natudia ida Baibel stadi ia karaia namonamo totona badina be ena tau ese ia taravatua. Unai dainai iena natudia dekenai Iehova ena kara ia hadibaia lasi, a? Lasi. Iena abidadama Havaraia Tauna dekenai be iena hereva bona kara ese do ia hahedinaraia. Ita daradara lasi unai hereva dekenai iena natudia be mai edia henanadai. Ia ese ena tomadiho ia badinaia ena maoro ia gaukaralaia be hegeregere, iena abidadama Havaraia Tauna dekenai be ma haida dekenai bona iena natudia dekenai ia gwauraia hedinarai totona. Ena be iena natudia danu Baibel stadi ia karaia eiava hanaihanai hebou dekenai ia abidia lao be hegeregere lasi, Iehova Dirava ena sivarai be idia dekenai ia hadibaia diba.​​—⁠Deuteronomi 6:⁠7.

Witnes tau eiava hahine bona edia abidadama lasi adavadia edia hetura karana dekenai, aposetolo Paulo ia gwau: “Keristani hahine ese iena adavana, abidadama lasi tauna ia hahelagaia noho. Bona Keristani tauna ese iena adavana, abidadama lasi hahine ia hahelagaia noho. Bema lasi neganai, umui emui natudia be helaga lasi. To momokani, harihari be idia helaga noho.” (1 Korinto 7:​14) Abidadama adavana dainai Iehova ese edia headava be helaga gauna bamona ia itaia, bona natudia be helaga Iehova ena matana ai. Witnes hahine ia hekwarahi be namo iena natudia be hereva momokani idia lalo-pararalaia totona, bona gabeai do ia vara gauna be Iehova ena imana dekenai ia rakatania.

Natudia idia bada daekau neganai, edia tama sina ese idia hadibaia vadaeni herevadia amo idia sibona ese edia tomadiho do idia abia hidi. Iesu ena hereva hegeregerena, reana inai bamona do idia karaia: “Tau ta ese iena tamana o iena sinana ia ura henia bada, to lau dekenai ia ura henia maragi, ia be lau dekenai do ia hegeregere lasi.” (Mataio 10:37) Idia ia hagania danu: “Memero bona kekeni e, umui emui tamana bona sinana do umui kamonai henia.” (Efeso 6:⁠1) Matamata taudia momo idia laloa edia Witnes lasi tamana eiava sinana do idia kamonai henia lasi to ‘Dirava idia kamonai henia be namo,’ ena be unai bamona idia karaia dainai idia hisihisi danu. Bema Witnes tamana eiava sinana ese edia natudia idia itaia, herevana hahetoho idia davaria to Iehova idia hesiai henia, unai be moale bada gauna!

[Footnote]