Manu amo Ita Dibaia Gaudia

“ATAIAI manu mani umui itaia. Idia be hadoa lasi, idia geia lasi, naria gabuna dekenai aniani idia haboua lasi. To emui Tamana guba dekenai noho ese unai manu ia naria namonamo. Umui ese manu umui hereaia, ani?” (Mataio 6:26) Iesu Keriso be Galilea Gohuna kahirakahira ia noho ororona ta dekenai, haroro hereva badana ia henia neganai, unai hereva ia gwauraia. Iena murinai idia raka taudia sibona ese ia idia kamonai henia lasi. To, iena hahediba taudia ai idia lao diba taudia hutuma bada herea, unai tano ena gabu idauidau amo, be idia noho danu. Idia momo be ogogami taudia, gorere taudia idia abia mai Iesu ese do ia hanamodia totona.​​—⁠Mataio 4:​23–5:2; Luka 6:​17-​20.

Iesu ese gorere taudia ibounai ia hanamodia murinai, mai anina bada lauma gaudia ia herevalaia. Ia hadibaia gaudia ta be ataiai ia noho.

Guba manudia be nega daudau lalonai idia noho vadaeni. Haida be manumanu maragidia idia ania, ma haida be au huahua bona uhe idia ania. Bema Dirava ese unai bamona aniani bada herea be manu totona ia karaia vadaeni, ita diba momokani iena hesiai taudia tanobada dekenai ia durua diba, dina ta ta ai edia aniani idia abia totona. Idia ia durudia moni gaukara idia davaria totona, unai amo moni idia abia diba aniani gaudia idia hoia totona. Eiava, tano ia hanamoa dainai edia aniani ia tubu namonamo. Nega dikadia ai, Dirava ese iseda dekena taudia bona turadia edia kudouna ia veria diba idia dekenai ia noho aniani be ogogami taudia ida idia haria totona.

Manu edia mauri dalana ita itaia namonamo karana amo, gau momo ita dibaia diba. Dirava ese manu ia havaraia neganai, idia lalonai diba ia atoa, unai amo edia ruma idia karaia diba edia natudia idia naria bona ubua totona. Mani inai rau dekenai ia noho manu ruma idaudia rua edia laulau oi itaia. Laurina kahanai manu maragina ta (rock martin) Africa amo ia mai. Iena ruma be nadi badana henunai eiava ruma ena haba ai ia karaia. Unai bamona ruma ena guhi be nadi amo, eiava laulau ese ia hahedinaraia hegeregerena, ruma badadia edia guhi. Unai ruma ena foloa be kopukopu amo ia karaia, idia hakapua hebou bona toana be kapusi bamona. Tau bona hahine idia gaukara goadagoada kopukopu idia haboua totona bona reana hua ta lalonai edia ruma idia haorea. Bena ena lalona be ava bona manu huina amo idia koua. Idia gaukara hebou edia natudia idia ubua totona. Henunai ia noho be manu ma ta (masked weaver) ena ruma. Unai Africa manuna be gaukara goadagoada manuna, ava bona au raurau gaudia ia gaukaralaia ena ruma haginia totona. Dina tamona lalonai ruma tamona ia haorea diba bona nega sisina daudau lalonai ruma 30 mai kahana ia karaia diba!

Unai amo dahaka ita dibaia? Bema Dirava ese manu dekenai unai bamona diba bona kohu ia henia edia ruma idia karaia totona, momokani iena hesiai taudia ia durudia diba ruma idia abia totona. To, bema ita ura Iehova Dirava ese ita ia durua tauanina durua gaudia ita abia totona, Iesu ese mai anina bada gauna ma ta ia hahedinaraia. Iesu ia gwauhamata, ia gwau: “Umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.” (Mataio 6:​33) Reana oi laloa, ‘Dirava ena Basileia tahua guna ena anina be dahaka?’ Inai magasin idia hariharilaia taudia, Iehova ena Witnes taudia unai, be mai edia moale ida unai henanadai idia haerelaia diba.