Taunimanima Ibounai Edia Namo Umui Tahua
“Egu Dirava e, inai lauegu kara ibounai do oi laloatao, bona idia dainai mani lau do oi hanamoa.”—NEHEMIA 13:31.
1. Edena dala ai Iehova ese taunimanima ibounai dekenai namo bada ia hahedinaraia?
DINA momo lalonai ori ese dina ia koua, to dina ia hedinarai neganai moale ia mailaia. Taunimanima idia moale bada, bona mamina namona idia abia. Unai hegeregerena, dina siahu be nega daudau ia hedinarai bona gabu ia kaukau, to medu ia diho neganai ita ia hamoalea. Iseda lalokau Havaraia Tauna, Iehova, ese tanobada ia gegea hodahoda lalonai unai bamona harihari gaudia ia karaia. Iesu ese Dirava ena hariharibada ia hadibaia neganai, ia gwau: “Umui dekenai idia badu henia taudia do umui lalokau henia, bona umui dekenai idia dagedage henia taudia dainai do umui guriguri. Unai dekena amo emui Tamana guba dekenai ia noho ese iena natuna do ia halaoa umui. Badina be ia ese kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” (Mataio 5:43-45) Oibe, Iehova ese ibounai dekenai namo bada ia hahedinaraia. Namona be iena hesiai taudia idia hekwarahi ma haida edia namo idia tahua karana dekenai iena kara idia tohotohoa totona.
2. (a) Dahaka dainai Iehova be namo bada ia hahedinaraia? (b) Iehova ena namo bada karana dainai ita karaia karadia dekenai ia ese dahaka ia itaia?
2 Dahaka dainai Iehova be namo bada ia hahedinaraia? Adamu ia kara dika negana amo ema bona hari, Iehova be taunimanima edia namo ia do tahua noho. (Salamo 130:3, 4) Ia ura kamonai taudia be Paradaiso lalonai mauri do idia abia lou. (Efeso 1:9, 10) Iena hebogahisi karana dainai gwauhamata Garana amo ita be kara dika bona goevadae lasi maurina amo ia ruhaia. (Genese 3:15, NW; Roma 5:12, 15) Unai davana henia karana ese dala ia kehoa ita ese mauri goevadaena ita abia lou totona. Hari inai negai Iehova ese ita ta ta ia itaia noho, ia ura gau ma haida amo ia diba iena hariharibada ita abia dae eiava. (1 Ioane 3:16) Ena namo bada ita abia dae dainai ita hahedinaraia karadia ibounai ia itaia. Aposetolo Paulo ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia.”—Heberu 6:10.
3. Edena henanadai ita laloa be namo?
3 Ma haida edia namo ita laloa neganai, edena dala ai Iehova ena kara ita tohotohoa diba? Namona be mauri daladia foa ai unai henanadai ena haere ita laloa: (1) Keristani haroro gaukara lalonai, (2) ruma bese lalonai, (3) kongregesen lalonai, bona (4) iseda hetura kara ma haida ida.
Haroro Bona Hahediba Taudia Halaoa Gaukarana Lalonai
4. Edena dala ai Keristani haroro gaukara ita karaia neganai ita hahedinaraia ita be ma haida edia namo ita tahua?
4 Iesu ena hahediba taudia ese ia dekenai uiti bona ava ena parabole idia henanadailaia neganai, ia gwau: “Uma be tanobada.” Hari inai negai, ita be Keriso ena hahediba taudia dainai, iseda haroro gaukara ita karaia neganai, unai hereva momokani ita lalo-pararalaia. (Mataio 13:36-38; 28:19, 20) Iseda haroro gaukara lalonai taunimanima vairanai iseda abidadama ita gwauraia hedinarai. Taunimanima momo idia diba Iehova ena Witnes taudia be ruma ta ruma ta bona dala dekenai idia haroro, unai ese ia hamomokania Basileia ena sivarai idia ura kamonai taudia ibounai tahua totona ita gaukara goadagoada. Momokani, Iesu ese ena hahediba taudia ia hadibaia, ia gwau: “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua.”—Mataio 10:11; Kara 17:17; 20:20.
5, 6. Dahaka dainai taunimanima be edia ruma dekenai ita vadivadi henidia loulou?
5 Ena be taunimanima ese ita idia boiria lasi, to idia ita vadivadi henia neganai, edia kara ita itaia, ita abia lao sivaraina idia kamonaia eiava idia dadaraia. Nega haida ita davaria ruma tauna ta be do ia kamonai, to unai ruma lalonai ma ta do ia boiboi, ia gwau, “Ai ura lasi,” bona vadivadi be unuseni ia doko. Tau tamona ena dagedage eiava kamonai lasi karana ese ta ena kamonai karana ia hadikaia dainai ita sori bada! Vadaeni, dahaka ita karaia diba taunimanima ibounai edia namo ita tahua noho totona?
6 Gabeai unai gabu dekenai ita haroro bona unai ruma ita vadivadi henia lou neganai, unai ese reana dala ia kehoa guna ia ura lasi kamonai tauna ita hereva henia totona. Guna ia vara gauna ita laloa neganai, ita ia durua diba ita hegaegae totona. Reana unai kamonai lasi tauna be mai ena badina namona ta dainai ia ura kamonai tauna ia koua Basileia ena sivarai ia kamonai lasi totona. Reana iseda haroro gaukara dekenai koikoi sivaraidia ia kamonai. To unai ese ita ia koua lasi unai ruma dekenai Basileia ena sivarai namona ita harorolaia noho totona, mai aonega ida lalohadai kereredia ita hamaoromaoroa totona. Ita ura taunimanima ibounai ita durua Dirava ena diba maoromaorona idia abia totona. Bena reana Iehova ese unai tauna be ia kahirakahira do ia veria mai diba.—Ioane 6:44; 1 Timoteo 2:4.
7. Taunimanima ita haroro henia neganai, dahaka ese ita ia durua diba lalohadai maorona ita abia totona?
7 Iesu ese iena hahediba taudia ia hadibaia neganai, ruma bese lalonai inai heheni karana danu ia herevalaia. Ia gwau: “Lau mai, be heai do lau havaraia totona. Tau ta ese iena tamana do ia badu henia, bona kekeni ta ese iena sinana do ia badu henia, bona hahine matamata ese iena ravana hahine do ia badu henia,” a? Iesu ma ia gwau: “Ruma taudia ese ruma ena biaguna do idia badu henia.” (Mataio 10:35, 36) To, taunimanima edia noho dalana bona laloa dalana idia idau diba. Gorere, varavara ta ia mase, dika bada, lalohisihisi gaudia, bona gau ma haida dainai taunimanima edia kara ese iseda haroro gaukara ia haidaua diba. Bema ita be lalohadai kererena ita abia—hegeregere ita haroro henia taudia be do idia kamonai lasi—ita be momokani edia namo ita tahua noho, a? Mai moale ida nega ma ta ai edia ruma oi vadivadi henia lou, ani? Reana do ita davaria edia kara idia haidaua. Nega haida ita herevalaia gauna lasi, to ita herevalaia dalana ese edia kara ia haidaua. Haroro gaukara ita do matamaia lasi neganai, Iehova dekenai ita guriguri goadagoada ese ita do ia durua lalohadai maorona ita abia totona, bona Basileia ena sivarai be taunimanima edia lalona ia veria dalana ai ita herevalaia.—Kolose 4:6; 1 Tesalonika 5:17.
8. Keristani taudia ese edia abidadama lasi varavara taudia edia namo idia tahua neganai, dahaka ia vara diba?
8 Kongregesen haida dekenai, ruma bese tamona lalonai momo ese Iehova idia hesiai henia. Ruma bese lalonai lo varavara ta ena hetura karana namona ruma bese bona headava mauri lalonai dainai, nega momo matamata taudia ese unai idia laloa bada bona idia matauraia, bona dala ia kehoa edia lalona idia haidaua. Keristani hahine momo ese aposetolo Paulo ena sisiba idia badinaia, “edia hereva be momo lasi” dainai edia tatau be edia lalona idia giroa.—1 Petero 3:1, 2.
Ruma Bese Lalonai
9, 10. Iakobo bona Iosepa be edena dala ai edia ruma bese edia namo idia tahua?
9 Ruma bese taudia huanai ia noho hetura karana be dala namona ta ma haida edia namo ita tahua diba. Iakobo ese iena natudia memero ia kara henia dalana mani ita laloa. Genese karoa 37, siri 3 bona 4 dekenai, Baibel ese ia hahedinaraia Iakobo be Iosepa ia lalokau henia bada. Iosepa ena tadikaka idia maumau, bona idia ura edia tadikaka idia hamasea. To, Iakobo bona Iosepa be gabeai edia mauri lalonai idia karaia karadia ita laloa. Idia ruaosi ese edia ruma bese ena namo idia tahua.
10 Aigupito dekenai doe ia vara, unai negai Iosepa be aniani naria gaukarana ia karaia neganai, iena tadikaka ia abidia dae. Ena be idia dekenai ia hahedinaraia lasi ia be daika, to idia vara gaudia ia biagua dalana amo ia ura idia be idia naria namonamo, bona mai edia aniani edia buruka tamana dekenai idia abia giroa totona. Oibe, ena be guna ia idia inai henia, to Iosepa be edia namo totona ia kara. (Genese 41:53–42:8; 45:23) Unai hegeregerena, Iakobo ia mase gwauraia neganai, ena natudia ibounai ia hanamoa. Ena be kerere haida idia karaia dainai hahenamo haida idia abia lasi, to idia ibounai be unai tano dekenai ahuna idia abia. (Genese 49:3-28) Iakobo ese lalokau ia hahedinaraia namo herea!
11, 12. (a) Edena peroveta tauna ena haheitalai ese ia hahedinaraia, ruma bese lalonai ma haida edia namo ita tahua be mai anina bada? (b) Iesu ia gwauraia boio merona ena haheitalai lalonai, tamana ena haheitalai amo dahaka ita dibaia?
11 Iehova be mai ena haheauka ida abidadama lasi Israela besena ia kara henia neganai, iena taunimanima edia namo ia tahua dalana dekenai ma diba haida ia henia. Peroveta tauna Hosea ena ruma bese ena noho dalana ia gaukaralaia amo, Iehova ese ena lalokau ia hahedinaraia. Hosea ena adavana, Gomere, be ia heudahanai momo. Ena be unai kara ia karaia, Iehova ese Hosea ia hadibaia, ia gwau: “Oi lao, oiemu hahine, idau tauna ia sihari henia noho hahine, ma do oi ura henia lou. Inai hahine do oi lalokau henia momokani, lau ese egu bese Israela taudia lau lalokau henia noho hegeregerena. Momokani, idia ese lau idia rakatania, dirava koikoi dekenai idia lao, bona vain huahua, idia hakaukaua gaudia, be unai dirava dekenai idia henia. To lau ese Israela do lau lalokau henidia noho.” (Hosea 3:1) Dahaka dainai unai bamona ia hereva henia? Iehova ia diba ena dala idia rakatania besena huanai, ta ta be iena haheauka dainai edia kara do idia haidaua. Hosea ia gwau: “Inai nega be ia ore neganai, Israela taudia ese Lohiabada Dirava dekenai do idia giroa lou, bona ia sibona dekenai do idia tomadiho. Bona idia ese edia King, Davida ena tubuna do idia kamonai henia. Unai neganai idia ese Lohiabada do idia gari henia, bona ia ese iena harihari gaudia do ia henidia.” (Hosea 3:5) Momokani ruma bese lalonai hekwakwanai ita davaria neganai, unai haheitalai namo hereana ita laloa diba. Ruma bese taudia ma haida edia namo oi tahua noho ese haheauka karana dekenai haheitalai namona do ia hahedinaraia.
12 Iesu ia gwauraia boio merona ena parabole ese iseda ruma bese taudia edia namo ita tahua dalana dekenai, diba haida ia henia. Natuna mero iharuana be ena lebulebu karadia ia rakatania murinai ena noho gabuna dekenai ia giroa lou. Tamana ese mai hebogahisi ida ia kara henia. Ruma bese ia rakatania lasi natuna mero badana ena maumau herevadia dainai, tamana be edena bamona ia kara? Iena natuna mero badana ia hereva henia neganai, ia gwau: “Egu natuna e, oi be lau dekenai oi noho, lau dekenai gau ibounai be oiemu.” Unai haere amo ia dadaraia lasi, to tamana ese ena lalokau ia hahedinaraia. Ma ia gwau: “Namo do ita moale, do ita moale bada herea. Badina be inai oiemu tadina ia mase, to ia mauri lou vadaeni, ia boio, to ita davaria vadaeni.” Unai hegeregerena, ita danu be ma haida edia namo ita tahua be namo.—Luka 15:11-32.
Keristani Kongregesen Lalonai
13, 14. Edena dala ta amo Keristani kongregesen lalonai lalokau ena taravatu badana ita badinaia diba?
13 Ita be Keristani taudia dainai, iseda ura be lalokau ena taravatu badana ita badinaia. (Iamesi 2:1-9) Momokani, reana iseda kongregesen lalonai kohu dalanai ita ida idia hegeregere lasi taudia ita abia dae diba. To ita be taunimanima edia kopina ena kala, kastom, bona tomadiho eiava mauri dalana ita laloa bada, a? Bema unai ia vara, edena dala ai Iamesi ena sisiba ita badinaia diba?
14 Keristani hebou dekenai idia mai taudia ibounai ita welkam henia ese iseda heabidae karana ia hamomokania. Kingdom Hall idia vadivadi henia taudia matamata ita hereva henia neganai, edia gari bona hemarai karana do ia boio diba. Momokani, nega ginigunana Keristani hebou ta idia lao henia taudia haida idia gwau: “Taunimanima ibounai be egu turana bamona lau idia hereva henia. Toana be idia ibounai be lau idia diba vadaeni. Mamina namona lau abia.”
15. Kongregesen lalonai, edena dala ai matamata taudia ita durua diba taunimanima badadia idia hereva henia totona?
15 Kongregesen haida dekenai, hebou ia ore neganai, matamata taudia haida be Kingdom Hall ena lalonai eiava murimuri dekenai idia gini hebou, idia ura lasi taunimanima badadia ida idia hebamo. Unai kara be edena dala namona amo ita hamaoromaoroa diba? Momokani, gau ginigunana be tama sina ese edia natudia be ruma dekenai idia hadibaia, hebou totona idia hegaegaelaidia. (Aonega Herevadia 22:6) Gaukara umui henia idia ese buka bona magasin idia abia hegaegae totona, unai amo ibounai ese hebou dekenai do idia laohaia gaudia ibounai idia abia. Tama sina danu ese edia natudia idia hagoadaia diba Kingdom Hall dekenai buruka bona gorere taudia ida gau haida idia herevalaia totona. Unai bamona taudia dekenai gau ta idia herevalaia ese natudia dekenai mamina namona ia henia diba.
16, 17. Kongregesen lalonai, lo taudia ese matamata taudia edia namo be edena dala ai idia tahua diba?
16 Kongregesen lalonai, lo tadikaka bona taihu be matamata taudia idia hereva henia be namo. (Filipi 2:4) Idia ese hagoadaia dalanai matamata taudia idia hereva henia be namo. Nega momo hebou lalonai mai anina bada hereva haida idia kamonai. Matamata taudia ita nanadaia bema idia ese hebou idia moalelaia bona edena point namodia idia laloa bada bona edia mauri lalonai idia badinaia diba. Matamata taudia be kongregesen ena kahana badana ta dainai, edia kamonai karana totona idia ita laloa bada bona hebou lalonai idia henia haere eiava program lalonai kahana ta idia karaia dainai ita hanamodia be namo. Matamata taudia ese kongregesen lalonai lo taudia ida idia gaukara hebou dalana bona ruma dekenai gaukara maragidia idia karaia dalana ese do ia hahedinaraia, gabeai edia mauri ai maduna badadia idia huaia namonamo diba.—Luka 16:10.
17 Matamata taudia ese maduna idia abia dae dainai, idia haida idia goada idia lao ela bona lauma dalanai edia kara namodia dainai idia hegeregere maduna badadia idia abia totona. Gau ta idia karaia ese idia ia durua danu kara dikadia idia dadaraia totona. (2 Timoteo 2:22) Hesiai tauna ena maduna idia ura abia totona idia gaukara tadikaka ‘edia kara idia tahua guna be namo.’ (1 Timoteo 3:10) Hebou ena kahana idauidau totona idia noho hegaegae, mai ura bada ida haroro gaukara idia karaia, bona danu kongregesen taudia ibounai idia laloa bada, unai ese elda taudia ia durua idia karaia diba gaudia do idia itaia totona, unai amo do idia laloa bema idia dekenai maduna haida idia henia diba.
Taunimanima Ibounai Edia Namo Ita Tahua
18. Hahemaoro ita karaia neganai, dahaka kerere ita dadaraia be namo, bona dahaka dainai?
18 Aonega Herevadia 24:23 ia gwau: “Kota maoromaorona lasi be dika.” Kongregesen lalonai, Dirava amo ia mai aonegana ese elda taudia ia hakaua dainai hahemaoro idia karaia neganai, ta ena toana idia laloa lasi be namo. Iamesi ia gwau: “Dirava dekena amo aonega ia abia tauna ena kara ginigunana be inai: Ia laloa goevagoeva. Ma iena kara haida be inai: Mai ena maino, laloa manada bona gado namo. Ia be mai ena bogahisihisi, bona kara namodia momo ia havaraia noho. Ia be maka tamona dekena amo taunimanima ibounai ia kara henidia, edia toana dekena amo lasi. Ma inai tau be Keristani koikoi tauna lasi.” (Iamesi 3:17) Momokani, elda taudia ese haida edia namo idia tahua noho lalonai, idia naria namonamo edia hetura karana eiava edia hemami ese edia hahemaoro karana ia hadikaia lasi. Salamo torea tauna Asapa ia gwau: “Dirava ese guba ena kota hebou gabuna lalonai, iena gabu dekenai ia gini noho. Guba ena lohia taudia [“lohia bamona taudia,” taunimanima edia hahemaoro taudia ia herevalaia] idia haboua, bona Dirava ese iena kota hereva ia gwauraia noho. Ia gwau, ‘Umui ese kota hereva do umui hagagevaia noho ela bona edena negai? Umui ese kara dika taudia do umui durua noho ela bona edena negai?’ ” (Salamo 82:1, 2) Unai hegeregerena, Keristani elda taudia ese edia turana ta eiava varavara ta idia hahemaoro henia neganai, haida sibona kara namo henia karana idia dadaraia. Unai dala amo kongregesen ena lalo-tamona do idia hagoadaia bona Iehova ena lauma be do ia noho.—1 Tesalonika 5:23.
19. Edena dala haida ai ma haida edia namo ita tahua diba?
19 Iseda tadikaka bona taihu edia namo ita tahua neganai, Paulo ese Tesalonika taudia ia tore henia neganai, ia hahedinaraia lalohadaina ita hahedinaraia danu. Ia gwau: “Ai be Lohiabada ai abidadama henia dainai, ai ese umui danu ai abidadama henia. Ai diba momokani, umui dekenai ai hadibaia hereva be umui karaia noho, bona do umui karaia noho.” (2 Tesalonika 3:4) Haida edia namo ita tahua neganai, edia kerere ita laloa bada lasi. Dala do ita tahua iseda tadikaka ita hanamoa totona, to edia kerere do ita tahua lasi. Paulo ia gwau: “Hesiai tauna ena gaukara lalonai gau badana momokani be inai: Iena biaguna ena ura do ia karaia momokani.” (1 Korinto 4:2) Kongregesen idia naria taudia sibona edia abidadama dainai lasi, to iseda Keristani tadikaka bona taihu ibounai edia abidadama dainai ita lalokau henidia. Unai dainai ita be idia kahirakahira ita lao bona Keristani hetura karana ia hagoadaia. Paulo ena nega lalonai iena tadikaka dekenai ia abia lalohadai bamona ita abia. Idia be ‘ita danu idia gaukara Dirava ena Basileia totona’ bona ita “idia durua bada herea.” (Kolose 4:11) Unai dainai ita ese Iehova ena laloa dalana ita hahedinaraia.
20. Ma haida edia namo idia tahua taudia be dahaka hahenamo haida do idia abia?
20 Momokani, Nehemia ena guriguri bamona ita gwauraia diba, ia gwau: “Egu Dirava e, inai lauegu kara ibounai do oi laloatao, bona idia dainai mani lau do oi hanamoa.” (Nehemia 13:31) Ita moale badina Iehova ese taunimanima edia namo ia tahua! (1 King Taudia 14:13) Ita danu be ma haida ita kara henia neganai, unai bamona ita karaia diba. Unai bamona ita karaia neganai, vaira negai ita do ia ruhaia bona ia mai kahirakahira tanobada matamatana lalonai mauri hanaihanai do ita abia.—Salamo 130:3-8.
Edena Bamona Do Oi Haere?
• Dahaka dainai Iehova ese taunimanima ibounai dekenai namo bada ia hahedinaraia?
• Edena dala ai ma haida edia namo ita tahua diba
• iseda haroro gaukara lalonai?
• iseda ruma bese lalonai?
• iseda kongregesen lalonai?
• iseda hetura karana taunimanima ibounai ida?
[Picture on page 12]
Ena be Iosepa ena tadikaka ese guna ia idia inai henia, to ia ese edia namo ia tahua
[Picture on page 13]
Dagedage karana ese ita ia koua lasi ibounai ita durua totona
[Picture on page 14]
Ena be Iakobo ena natudia be guna idia kara dika, to ia ese idia ibounai ia hanamoa
[Picture on page 15]
Keristani hebou dekenai ibounai ita welkam henia