Abidadama Bona Boga Auka Idia Havaraia Sivaraina Ta—Iehova Ena Witnes Taudia Ukraine Dekenai
APOSETOLO edia negai idia noho Keristani taudia ese dagedage idia davaria hegeregerena, hari Dirava ena taunimanima danu be dagedage idia davaria. (Mataio 10:22; Ioane 15:20) Gabu haida dekenai idia vara dagedage karadia be Ukraine ai bamona lasi, unai tano ai Basileia harorolaia gaukarana be lagani 52 lalodiai gavamani ese idia taravatua.
Lagani 2002 Yearbook of Jehovah’s Witnesses ese unai tano ai idia noho Dirava ena taunimanima edia sivarai ia gwauraia. Unai be dika bada idia davaria tadikakadia edia abidadama, boga auka bona lalo-goada karana ena sivarai. Iehova ena Witnes taudia edia brens opesi Ukraine dekenai ese tanikiu revarevadia idia abia, bona idia haida be henunai idia noho:
“Lau ese lagani 2002 Yearbook lau duahia haorea vadaeni. Ukraine ai umui karaia gaukarana ena sivarai lau duahia neganai lau tai. Lau ura umui lau hadibaia, emui haheitalai namona bona abidadama goadana ese lau ia hagoadaia bada. Lau moale bada badina lauma dalanai ita be ruma bese tamona. Lauegu kudouna ibounai ida umui lau tanikiu henia!”—Andrée, France dekenai.
“Unai lagani 2002 Yearbook dainai umui bona Iehova lau tanikiu henia bada herea. Edia lagani namodia lalonai dibura rumadia bona kamepa lalonai idia noho tadikaka edia ekspiriens momo lau duahia neganai egu matana ranu idia diho. Edia boga auka karana lau ura henia bada. Ena be lagani 27 lalonai lau be Witnes tauna, to unai tadikaka bona taihu amo gau momo lau do dibaia noho. Idia ese egu abidadama eda guba Tamana, Iehova, dekenai idia hagoadaia.”—Vera, guna idia gwauraia Yugoslavia dekenai.
“Mai moale ida inai revareva lau torea, badina emui haheauka bona abidadama unai dagedage laganidia ibounai lalonai be haheitalai namona. Iehova dekenai umui tabekau momokani bona umui abidadama henia noho goadagoada dainai ladana namona umui abia. Danu, hahetoho lalonai emui manau karana ese lau ia hagoadaia dainai, lau diba Iehova ese ena taunimanima ia rakatania lasi. Emui boga auka, goada bona hesiku lasi karadia amo haheitalai namona umui hahedinaraia dainai, emai hekwakwanai maragidia be mai manau ida ai abia dae diba.”—Tuteirihia, French Polynesia dekenai.
“Unai Yearbook lau duahia murinai, umui lau tore henia be namo. Unai hagoadaia ekspiriens ibounai ese egu lalona idia hamarerea bada. Lau heagi ena badina be unai kamonai bona lalo-tamona oreana lalonai lau noho, bona unai orea be mai ena lalokau, ita ia laloa bada bona nega korikori ai goada ia henia Tamana ese ia gunalaia. Lau hebogahisi ena badina be Iehova ena hesiai taudia goadadia momo ese hisihisi bada idia abia bona edia mauri idia haboioa danu. To lau moale danu badina be edia boga auka bona ura bada dainai, taunimanima momo ese hereva momokani idia dibaia bona iseda lalokau Tamana idia dibaia.”—Colette, Netherlands dekenai.
“Lau bona egu adavana ese umui ai tore henia bona ai gwau diba Ukraine ena sivarai Yearbook dekenai ai duahia ese emai lalona ia hamarerea bada. Umui tadikaka ese nega daudau lalonai hisihisi badadia umui haheaukalaia amo haheitalai namona umui hahedinaraia. Aonega Herevadia 27:11 ena hereva hegeregerena, Iehova ia moale badina ia diba abidadama tadikakadia momo herea Ukraine amo be edia abidadama idia rakatania lasi, herevana Diabolo amo idia mai kara dikadia momo herea idia davaria.”—Alan, Australia dekenai.
“Ukraine tadikaka edia sivarai lau duahia neganai egu matana ranu idia diho. Idia ese gau momo idia haheaukalaia—lagani momo lalonai dibura rumadia dekenai idia noho, idia hahisia, dagedage henia, bona edia ruma bese amo idia hapararaia. Lau ura emui kongregesen dekenai hesiai gaukara idia karaia noho tadikaka ibounai lau hadibaia, idia lau lalokau henia bona matauraia bada herea. Edia boga auka bona gini goada karana lau moalelaia. Lau diba Iehova ena lauma helaga be edia goada ena badina. Iehova be ita kahirakahira ia noho, bona ia ura ita ia durua.”—Sergei, Russia dekenai.
“Lau ese lagani 2002 Yearbook lau duahia bona lau tai. Aiemai kongregesen tadikaka bona taihu momo ese umui idia herevalaia. Umui be dava bada gaudia korikoridia. Lau moale badina be lauma dalanai ita be ruma bese badana ta.”—Yeunhee, South Korea dekenai.
“Iehova bona iena Basileia totona umui abidadama, haheauka bona lalokau goadana umui hahedinaraia ena sivarai ese egu lalona ia hamarerea bada. Nega haida, ai ese ai moalelaia ura kwalimuna bona Iehova ese ita totona ia henia lauma aniani momo ai laloa bada lasi. To, umui be unai bamona lasi. Emui abidadama karana ese ai ia durua dainai ai lalo-parara bema iseda Dirava ita tura henia, ia ese ita dekenai goada do ia henia hahetoho idauidau ita haheaukalaia totona.”—Paulo, Brazil dekenai.
“Lagani 2002 Yearbook dekenai emui ekspiriens lau duahia. Unai sivarai ese egu lalona ia hamarerea bada, hegeregere Taihu Lydia Kurdas ena sivarai be hebogahisi gauna momokani. Lau mamia lau be unai taihu ida lau hetura namonamo bamona.”—Nidia, Costa Rica dekenai.
“Hari dina ai, lau be lagani 2002 Yearbook lau duahia haorea. Unai buka lau duahia neganai egu abidadama Iehova dekenai ia hagoadaia. Do lau laloaboio lasi sivaraina be inai, haida be edia lalona dekenai daradara ena uhe idia hadoa dainai hakaua tadikakadia idia laloa kerere. Unai ese lau ia hadibaia, orea idia hakaua tadikakadia edia gaukara lau daradaralaia lasi be namo. Tanikiu bada herea! Unai lauma aniani ese ita ia hagoadaia, bona iseda abidadama tohoa negana totona ita ia hegaegaelaia.”—Leticia, United States dekenai.
“Unai Yearbook namo hereana dainai umui ai tanikiu henia. Pablisa momo edia nega ginigunana iseda tadikaka edia gaukara Ukraine dekenai idia duahia. Unai ese iniseniai idia noho tadikakadia ia hagoadaia. Momo, hegeregere matamata taudia, be edia haroro gaukara idia habadaia. Haida be regula eiava heduru painia gaukara idia hamatamaia. Idia ibounai be taravatu negana lalonai Iehova idia hesiai henia tadikaka bona taihu edia sivarai ese ia hagoadadia.”—Kongregesen Hesiai Komiti tauna ta, Ukraine dekenai.
Tanobada hegegemadai idia noho Iehova ena taunimanima dekenai, iseda tadikaka edia abidadama karana Ukraine dekenai be hagoadaia gauna momokanina. Momokani, lagani ta ta ena Yearbook ena sivarai namodia ita duahia hanaihanai karana be dala namona inai nega dikadia lalonai iseda abidadama bona haheauka karana ita hagoadaia totona.—Heberu 12:1.