Noa Totona Revareva Ta

“NOA e, nega momo lau ese Baibel dekenai oi bona emu ruma bese ese lagatoi umui haginia dalana bena Abata amo umui roho mauri ena sivarai lau duahia.”

Mauri lagani 15 kekenina ta, ladana Minnamaria, ese ena revareva be unai bamona ia hamatamaia, ia be mauri lagani 14 ia lao 21 stiuden totona idia karaia toretore helulu lalonai ia vareai. Unai toretore heluluna be Finnish postal services, the Federation for Finnish Mother Tongue Teachers bona Finnish Literature Society ese idia hegaegaelaia. Idia ura unai toretore helulu lalonai idia vareai stiuden taudia ese edia revareva dekenai, buka ta ena sivarai do idia torea. Anina be idia ese buka ia torea tauna eiava buka ese ia gwauraia tauna ta ena sivarai do idia torea. Tisa taudia ese edia stiuden edia revareva 1,400 mai kahana idia abia hidi bona toretore helulu ena diadi dekenai idia siaia. Diadi ese revareva hereadaena ta idia abia hidi murinai, revareva namodia 10 be grup iharuana ai idia atoa bona revareva namodia ma 10 be grup ihatoina dekenai idia atoa. Minnamaria ia moale badina iena revareva be grup ihatoina dekenai idia atoa.

Dahaka dainai Minnamaria ese Noa, lagani 5,000 bamona gunanai ia noho tauna totona revareva ia torea? Ia gwau: “Lau laloa guna gauna be Baibel. Baibel ese ia gwauraia taudia lau diba namonamo. Edia sivarai be nega momo lau duahia dainai, lau dekenai idia be idia do mauri noho bamona. Noa lau abia hidi badina ena mauri lau hoalaia bona egu mauri dalana amo ia idau.”

Minnamaria be Noa totona ia torea revarevana ena dokonai, ia gwau: “Emu abidadama bona kamonai karana be haheitalai namona. Emu mauri dalana ese Baibel idia duahia taudia ibounai ia hagoadaia edia abidadama be kara amo do idia hahedinaraia.”

Baibel ia duahia kekeni matamata ena revareva ese ia hahedinaraia goevagoeva, Baibel be momokani “ia mauri noho, bona ia be mai ena siahu” matamata bona buruka taudia dekenai.​​—⁠Heberu 4:​12.