Oi ese “Ikoko Matana Oi Moia,” A?

BAIBEL negadiai, taunimanima ese oxgoad​​—⁠au latana ta, nega momo ena dorina be mai auri matana⁠​—⁠idia gaukaralaia kohu huaia bona veria animal idia hakaua totona. Bema au mai matana amo animal idia gwadaia toho loulou to ia raka lasi, dahaka ia vara diba? Unai animal be heduru ia abia lasi to sibona ena tauanina ia hahisia bada sibona.

Mase amo ia toreisi lou tauna Iesu Keriso be tau ta ladana Saulo dekenai ia hedinarai neganai ikoko mai matana (eiava goad) ia herevalaia, unai neganai Saulo be Iesu ena hahediba taudia haida dogoatao totona ia lao noho. Diari ta huanai, Saulo ese Iesu ena gadona ia kamonai ia gwau: “Saulo e, Saulo e, badina dahaka lau dekenai oi dagedage? Oi sibona ikoko matana oi moia, vadaeni oi hisihisi.” Saulo be Keristani taudia ia dagedage henia karana amo Dirava ia tuari henia, dika sibona do ia davaria diba dalana ia badinaia unai.​​—⁠Kara 26:⁠14.

Ita danu ese ‘ikoko matana ita moia’ kava diba, a? Baibel ia gwau “aonega taudia edia hereva” be au ta mai matana bamona, ita ia gwadaia bena dala maorona dekenai ita raka noho totona. (Hadibaia Tauna 12:11) Dirava ena Hereva ena sisiba helagana ese ita ia hagoadaia bona hakaua maoromaoro diba​​—⁠bema ena hereva ita badinaia. (2 Timoteo 3:16) Bema ena gwadaia toho karana ita abia dae lasi, dika sibona ita abia diba.

Saulo ese Iesu ena hereva be ena kudouna dekenai ia atoa, ena mauri dalana ia haidaua, bona lalokau Keristani aposetolo tauna Paulo ai ia lao. Dirava ena sisiba ita badinaia neganai, idia noho hanaihanai hahenamo idauidau do ita abia.​​—⁠Aonega Herevadia 3:​1-6.

[Picture Credit Line on page 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers