Diba Sibona Lasi, to Emui Ura Do Umui Biagua

“Ma diba sibona lasi, to umui ese emui tauanina edia ura do umui biagua namonamo.”​​—⁠2 PETERO 1:​5-8.

 1. Taunimanima be dahaka idia karaia lasi dainai hekwakwanai momo idia davaria?

UNITED States dekenai, drag ania kava karana idia hadokoa totona, matamata taudia idia hagoadaia: “Umui gwau sibona, lasi.” Taunimanima ibounai edia noho do ia namo bema drag ania kava karana, inuinu kekero, aonega lasi eiava matabodaga mauri dalana, bisinesi karadia koikoidia, bona “tauanina ena ura karadia” idia dadaraia! (Roma 13:14) To, unai gaudia dadaraia totona be mai ena hekwarahi, ani?

 2. (a) Baibel lalonai edena haheitalai ese ia hahedinaraia dika dadaraia be mai ena hekwarahi bona ia be gau matamatana lasi? (b) Namona be unai haheitalai ese ita idia hagoadaia dahaka ita karaia totona?

² Goevadae lasi taudia ibounai idia hekwarahi sibona edia ura idia biagua dainai, namona be ita ura ita davaria hekwakwanai idauidau hanaia dalana ita dibaia. Baibel ese guna idia hekwarahi Dirava idia hesiai henia taudia edia sivarai ia gwauraia, idia danu idia hekwarahi kara dika idia dadaraia totona. Davida be Bataseba ida ia heudahanai sivaraina ita laloatao. Unai kara dainai kerere lasi taudia rua idia mase, heudahanai amo idia abia natuna bona Bataseba ena adavana. (2 Samuela 11:​1-​27; 12:​15-​18) Eiava aposetolo Paulo ita laloa, mai hemarai lasi ida ena dika ia gwauraia hedinarai, ia gwau: “Kara namodia lau ura karaia neganai, be lau karaia diba lasi. Bona kara dikadia lau ura lasi karaia neganai, be lau karaia inai.” (Roma 7:19) Nega haida unai bamona hemami oi abia, a? Paulo ma ia gwau: “Momokani, egu kudouna be Dirava ena Taravatu dekenai ia moale bada. To lau davaria, egu lalona dekenai taravatu idauna ta ia gaukara noho. Inai taravatu ese egu lalona ia ura henia Taravatuna ia tuari henia noho. Vadaeni inai taravatu, egu lalona dekenai kara dika ia havaraia gauna ese lau ia guia noho. Lau madi o! Lau be dika momokani inai! Lauegu tauanina ese lau ia hamasea noho, be daika ese lau do ia hamauria?” (Roma 7:​22-24) Baibel lalonai idia noho haheitalai ese iseda lalona idia hagoadaia be namo, ita hesiku lasi sibona eda ura biagua karana ita habadaia totona.

Sibona Eda Ura Biagua Karana amo Gau ta Ita Dibaia

 3. Sibona eda ura ita biagua be ia auka ena badina oi gwauraia hedinarai.

³ Tauanina ena ura biagua karana​—⁠anina be gau ta ita dadaraia dibana​—⁠be 2 Petero 1:​5-7 dekenai abidadama, kara namodia, diba, haheauka, Dirava badinaia karana, tadikaka bogahisihisi henia karana, bona lalokau ida idia gwauraia hebou. Ita be unai kara namodia danu ita vara lasi. Iseda mauri lalonai ita dibaia be namo. Unai kara namodia ita hahedinaraia badabada totona, iseda lalona ita hadaia momokani bona ita gaukara goada. Unai dainai sibona eda ura biagua karana be ia auka, ani?

 4. Dahaka dainai taunimanima momo idia laloa sibona edia ura idia biagua diba, to unai ese dahaka ia hahedinaraia?

⁴ Momokani, taunimanima milioni momo idia laloa sibona edia ura idia biagua diba. Edia mauri lalonai edia ura hegeregerena gau idia karaia, ena be idia diba eiava lasi edia goevadae lasi tauanina ena ura idia badinaia toho, bona unai ese idia bona ma haida dekenai dahaka dika do ia mailaia be idia laloa bada lasi. (Iuda 10) Taunimanima idia ura lasi dika idia dadaraia, unai kara be hari ia vara momo, guna bamona lasi. Unai ese ia hamomokania ita be momokani Paulo ese ia perovetalaia “nega ena dokona” dekenai ita noho, ia gwau: “Metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, . . . do idia lebulebu [sibona edia ura do idia biagua lasi, NW ].”​—⁠2 Timoteo 3:​1-3.

 5. Dahaka dainai Iehova ena Witnes taudia be sibona edia ura biagua karana idia laloa bada, bona hari inai negai edena sisiba be do mai anina?

⁵ Iehova ena Witnes taudia idia diba, sibona edia ura biagua karana be mai ena hekwarahi. Paulo bamona, Dirava hamoalea totona ena taravatu idia badinaia, to edia goevadae lasi tauanina ena ura ese idia ia veria danu kerere idia karaia totona. Unai dainai idaunegai amo idia ura unai hekwarahi amo idia kwalimu dalana idia diba. Lagani 1916 ai, hari oi duahia noho magasin ena kopi gunana ta ese “ita sibona, iseda lalohadai, hereva bona kara ita biagua ena dala maorona” ia herevalaia. Ia gwau Filipi 4:8 ena hereva ita laloatao noho be namo. Ena be Dirava amo ia mai sisibana unai siri dekenai be lagani 2,000 haida gunanai idia torea, to ia be do mai anina. Reana unai buka idia torea negana ai eiava lagani 1916 ai idia badinaia totona be ia auka lasi, to hari be ia auka momokani ita badinaia totona. To, Keristani taudia idia hekwarahi bada tanobada ena ura idauidau idia dadaraia totona, idia diba unai bamona idia karaia neganai, idia hahedinaraia edia Havaraia Tauna ena ura idia badinaia.

 6. Sibona eda ura biagua karana ita hahedinaraia noho lalonai, dahaka dainai ita hesiku be badina lasi?

⁶ Galatia 5:​22, 23 ese tauanina ena ura koua karana ia gwauraia, ia be ‘Lauma Helaga ese ia havaraia’ karana ta. Bema unai kara be “lalokau, moale, maino, haheauka, bogahisihisi, kara maoromaoro, abidadama momokani kara [bona] manau” ida ita hahedinaraia, namo bada do ita davaria. Unai bamona ita karaia neganai, Petero ia hereva bamona, iseda hesiai gaukara Dirava dekenai be ita karaia kava lasi, to ia be mai anina. (2 Petero 1:⁠8) To bema unai kara ita hahedinaraia haraga lasi bona iseda ura hegeregerena ita hahedinaraia badabada lasi, ita hesiku lasi eiava sibona ita gwauraia dika lasi. Reana sikuli dekenai oi itaia vadaeni, stiuden ta be diba ia abia haraga, to ma ta be lasi. Eiava gaukara dekenai tau ta be gau matamatana ta ia dibaia haraga, to ena gaukara turadia haida be lasi. Unai hegeregerena, haida be Keristani karadia idia hahedinaraia karana idia dibaia haraga, to ma haida be unai bamona lasi. Gau badana be Dirava idia hamoalea karadia be iseda goada hegeregerena ita hahedinaraia noho. Unai ita karaia diba bema Iehova ese iena Hereva bona kongregesen amo ia henia heduru ita gaukaralaia namonamo. Iseda tahua gauna ita abia haraga be gau badana lasi, to ita goada ita lao totona ita hekwarahi noho be gau badana.

 7. Dahaka ese ia hahedinaraia sibona eda ura biagua karana be mai anina bada?

⁷ Lauma ese ia havaraia karadia ena lista dekenai, ena be tauanina ena ura koua karana be dokonai ia noho, to unai ese ia hahedinaraia lasi ia be mai anina bada lasi. Ia be mai anina bada. Namona be ita laloatao, “tauanina ena kara” ita dadaraia diba bema dala goevadaena ai iseda ura ita biagua. To, goevadae lasi taudia ese “tauanina ena kara” haida idia karaia diba, hegeregere “heudahanai, kara mirodia, matabodaga, kaivakuku tomadiho henia kara, meamea, heai, mama, badu, sibona ena ura tahua kara, hepapahuahu [bona] orea hapararaia kara.” (Galatia 5:​19, 20) Unai dainai nega ibounai ita hekwarahi be namo, iseda lalona ita hadaia iseda kudouna bona lalona dekenai lalohadai dikadia ita kokia momokani totona.

Haida Idia Hekwarahi Bada

 8. Dahaka gaudia dainai, taunimanima haida idia hekwarahi bada sibona edia ura idia biagua totona?

⁸ Keristani taudia haida idia hekwarahi bada sibona edia ura idia biagua totona, to ma haida dekenai unai be ia auka lasi. Dahaka dainai? Tama sina edia hadibaia karana eiava guna edia mauri lalonai idia davaria gaudia dainai, unai bamona ia vara. Bema sibona eda ura biagua karana ita habadaia bona ita hahedinaraia be hekwakwanai ta lasi ita dekenai, unai be moale gauna. To unai kara hahedinaraia totona idia hekwarahi taudia dekenai hebogahisi bona lalo-parara ita hahedinaraia be namo, ena be bema sibona edia ura biagua lasi karana ese ita dekenai hekwakwanai ia havaraia. Ita be goevadae lasi taudia dainai, ita amo daika ia gwau diba ena kara be maoro sibona?​​—⁠Roma 3:​23; Efeso 4:⁠2.

 9. Haida edia manoka gaudia be dahaka, bona unai manoka karadia be edena negai do idia ore momokani?

⁹ Haheitalaia ta be inai: Reana ita diba iseda Keristani tadikaka haida be kuku eiava “moale karadia” totona drag idia ania karana idia rakatania vadaeni, be reana nega ta ta unai gaudia dekenai edia ura do ia bada. Eiava haida idia hekwarahi aniani bada idia ania lasi eiava kekero muramura idia inua lasi totona. Ma haida idia hekwarahi edia uduna idia naria totona, unai dainai nega momo hereva dekenai idia kerere. Unai bamona manoka karadia ita hanamoa totona, ita hekwarahi bada be namo sibona biagua karana ita hahedinaraia totona. Dahaka dainai? Iamesi 3:2 ia gwau: “Ita ibounai ese nega momo kerere ita karaia. To bema tau ta ese iena hereva dekena amo kerere ta ia karaia lasi, ia be goeva bona namo momokani. Ia ese iena tauanina ibounai ia biagua bona naria diba.” To ma haida be mai edia ura goadana laki gadara idia gadara totona. Eiava ia auka edia badu idia biagua totona. Reana nega sisina daudau murinai, unai gaudia eiava unai bamona manoka karadia haida hanaia diba dalana do idia diba. Ena be hari kara dikadia ita rakatania vadaeni, to ura dikadia be ita goevadae neganai do idia ore momokani. Unai ita naria noho lalonai, sibona eda ura biagua karana ita hahedinaraia, unai ese ita do ia durua kara dika maurina dekenai ita giroa lasi totona. Ita hekwarahi noho lalonai, ta ta ita hagoadaia ita hesiku lasi totona.​​—⁠Kara 14:​21, 22.

10. (a) Dahaka dainai mahuta hebou karana dekenai taunimanima haida be sibona edia ura idia biagua be mai ena hekwarahi? (b) Tadikaka ta be ena mauri lalonai dahaka senisi badana ia karaia? (Rau 6 dekenai ia noho mauana itaia.)

¹⁰ Haida dekenai sibona edia ura biagua karana be ia auka dalana ta be, mahuta hebou urana. Iehova Dirava ese taunimanima ia karaia neganai, mahuta hebou urana be idia lalonai ia atoa. To, haida idia hekwarahi unai ura idia biagua totona, unai dala amo Dirava ena taravatu ida ia hegeregere diba. Edia hekwarahi ia bada momokani diba badina edia mahuta hebou urana ia goada. Matabodaga ia bada tanobadana ai ita noho dainai, gau idauidau ese ita ia veria diba mahuta hebou karana ita karaia totona. Unai ese idia ura lasi idia headava haraga taudia dekenai hekwakwanai ia havaraia diba. Idia ura unai bamona idia noho badina unai amo headava ena maduna ese idia ia koua lasi Dirava idia hesiai henia totona. (1 Korinto 7:​32, 33, 37, 38) To Baibel ena sisiba hegeregerena, hemataurai dalana be “idia headava, namo lasi ura dikadika ese idia ia araia, lahi bamona.” Danu, edia lalona idia hadaia ‘Keristani tauna sibona do idia adavaia,’ Baibel ena sisiba hegeregerena. (1 Korinto 7:​9, 39) Ita diba Iehova be ena kara maoromaoro hakaua herevadia idia ura badinaia dainai ia moale. Edia Keristani tadikaka dekenai unai be moale gauna, badina idia be kara maoromaoro taravatudia idia badinaia tomadiho taudia momokani ida idia hebou.

11. Ia ura ia headava to ia do karaia diba lasi tadikaka ta eiava taihu ta, be edena dala ai ita durua diba?

¹¹ Bema bamona namona ta oi davaria diba lasi be edena bamona? Tau ta ia ura headava, to ia do karaia diba lasi dainai, ena lalo-hisihisi mani oi laloa! Ia be bamona namona ia do tahua noho lalonai, reana ia itaia iena turadia idia headava bona idia moale. Unai bamona idia laloa taudia haida dekenai, kopina gadaralaia karana mirona be ia karaia loulou hekwakwanai ta ai ia lao diba. To, Keristani tauna ta ia ura lasi kara goeva ia ura hahedinaraia totona ia hekwarahi noho tauna ena lalona ia hamanokaia. Ita ese lalo-hisihisi ita havaraia diba bema inai bamona henanadai ita henia kava, “Oi be edena negai do oi headava?” Reana unai be ia hadikaia totona ita gwauraia lasi, to namona be iseda malana ita biagua, unai amo sibona eda ura biagua karana ita hahedinaraia! (Salamo 39:⁠1) Namona be iseda huanai kara goeva idia karaia noho headava lasi taudia ita hanamoa. Ta ena lalona hamanokaia herevana ita gwauraia lasi, to ita hekwarahi hagoadaia herevadia ita gwauraia totona. Hegeregere, bema idia lo vadaeni taudia be aniani ania totona eiava Keristani taudia ida hebamo namona moalelaia totona idia hebou, headava lasi taudia ita boiria diba.

Sibona Eda Ura Biagua Karana Headava Lalonai

12. Dahaka dainai idia headava taudia danu ese sibona edia ura idia biagua be namo?

¹² Ta ia headava neganai, unai ese mahuta hebou dekenai sibona ena ura biagua karana ia kokia lasi. Hegeregere, tau ena ura mahuta hebou dekenai be hahine ena amo ia idau momokani. Eiava ta ena tauanina ia goada lasi dainai nega haida mahuta hebou be ia auka eiava do idia karaia diba lasi. Reana guna idia ta ena mauri lalonai ia vara gaudia dainai, idia ta do ia davaria inai sisiba ia badinaia be ia auka: “Tau ese iena adavana dekenai headava kara do ia henia, hahine ese danu iena adavana dekenai headava kara do ia henia.” Bema unai bamona ia vara, reana idia ta be sibona ena ura ia biagua be namo. To idia ruaosi ese Paulo ena lalokau sisibana headava taudia dekenai idia laloa be namo, ia gwau: “Umui ta ta dekenai headava kara do umui koua lasi. To bema umui laloa tamona, headava kara karaia lasi, guriguri goadalaia totona, unai be ia namo. To nega daudau lasi, headava kara do umui karaia lou. Badina be sedira emui haheauka be hegeregere lasi, bona Satani ena dibagani ese umui do ia abia garina.”​​—⁠1 Korinto 7:​3, 5.

13. Sibona edia ura biagua totona idia hekwarahi taudia, be edena dala ai ita durudia diba?

¹³ Headava taudia do idia moale diba bema idia ese mahuta hebou karana dekenai, sibona edia ura biagua karana maorona idia hahedinaraia. Danu, unai kara dekenai sibona edia ura biagua totona idia hekwarahi noho tadikaka dekenai, lalo-parara idia hahedinaraia be namo. Ita laloaboio lasi, Iehova dekenai ita guriguri iseda tadikaka dekenai lalo-parara, gari lasi mamina, bona goada ia henia sibona edia ura idia biagua totona bona dala idia tahua ura dikadia idia hanaia totona.​​—⁠Filipi 4:​6, 7.

Ta Ta Durua Noho

14. Dahaka dainai iseda tadikaka be mai hebogahisi bona lalo-parara ida ita kara henidia be namo?

¹⁴ Keristani tadikaka haida idia hekwarahi kara ta dekenai sibona edia ura idia biagua totona, to ita dekenai be ia auka lasi, nega haida unai ita lalo-pararalaia totona be auka. To taunimanima edia kara be idauidau. Haida be edia hemami ese ia biagua, haida be lasi. Haida idia davaria sibona idia biagua diba, idia dekenai sibona edia ura biagua karana be hekwakwanai badana lasi. To ma haida be idia hekwarahi bada. To, laloatao, ia hekwarahi noho tauna be tau dikana lasi. Iseda tadikaka dekenai lalo-parara bona hebogahisi ita hahedinaraia be namo. Sibona edia ura biagua karana habadaia totona idia hekwarahi taudia dekenai, hebogahisi ita hahedinaraia noho neganai, iseda moale do ia bada. Unai be Iesu ena hereva Mataio 5:7 dekenai ita itaia diba.

15. Dahaka dainai sibona eda ura biagua karana dekenai, Salamo 130:3 ena hereva be ita ia hagoadaia?

¹⁵ Keristani tauna ta be nega haida Keristani kara ia hahedinaraia lasi dainai, namo lasi ia ita laloa kerere. Sibona eda ura ita biagua lasi bona ita moru neganai Iehova ese unai ia itaia, to ita moale diba badina ita moru lasi negadia ia itaia danu, ena be iseda tadikaka ese unai idia itaia lasi. Salamo 130:3 ena hereva ita laloatao karana ese ita ia hagoadaia momokani, ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?”

16, 17. (a) Sibona eda ura biagua karana dekenai, edena dala ai Galatia 6:​2, 5 ena hereva ita badinaia diba? (b) Sibona eda ura biagua karana dekenai gabeai dahaka do ita herevalaia?

¹⁶ Iehova ita hamoalea totona, ita ta ta ese sibona eda ura biagua karana ita habadaia be namo, to ita diba momokani iseda Keristani tadikaka ese ita idia durua diba. Ita ta ta ese sibona iseda maduna ita huaia lalonai, ita idia hagoadaia ta ta ita durua manoka gaudia ita hanaia totona. (Galatia 6:​2, 5) Haida ese ita idia koua gabu haida dekenai do ita lao lasi, gau haida ita itaia lasi eiava do ita karaia lasi, unai bamona tama o sina, eiava turana ita lalodia bada be namo. Idia ese ita idia durua noho sibona eda ura biagua karana ita hahedinaraia totona!

¹⁷ Keristani taudia momo be sibona eda ura biagua karana dekenai ita herevalaia vadaeni gaudia dekenai idia lalo-tamona, to reana idia laloa edia mauri lalonai gau momo idia hanamoa be namo. Idia ura sibona edia ura biagua karana do idia hahedinaraia badabada, goevadae lasi taudia ese do idia karaia diba hegeregerena. Oi be unai bamona oi laloa, a? Dahaka oi karaia diba inai Dirava ena lauma ena huahua oi habadaia totona? Bona oi be Keristani tauna dainai, unai bamona oi karaia ese edena bamona oi ia durua diba, nega daudau lalonai do oi abia gaudia oi abia totona? Mani stadi hereva gabena dekenai unai do ita itaia.

Oi Laloatao, A?

Dahaka Dainai Sibona Eda Ura Biagua Karana be . . .

• mai anina bada Keristani taudia ese idia hahedinaraia totona?

• haida dekenai mai ena hekwarahi?

• headava lalonai idia hahedinaraia be namo?

• kara ta, haida ita durua idia hahedinaraia totona?

[Box/Picture on page 16]

Dika Dadaraia Karana Ia Dibaia

Germany dekenai ia noho Iehova ena Witnes tauna ta be teknisen gaukara ia karaia. Iena gaukara be televisen bona reidio edia program 30 mai kahana edia heau dalana ia naria. Kerere haida idia vara neganai, ia ese unai program ia itaia be namo ena kerere ia davaria totona. Ia gwau: “Toana be nega momo kerere be nega kererena ai idia vara, dagedage bona mahuta hebou karana idia hedinarai negadia ai. Unai laulau dikadia be egu lalona dekenai dina momo lalonai idia noho bema lasi pura momo lalonai, idia be lauegu harana dekenai idia kamokau bamona.” Ia gwau unai ese ena lauma dalana ia hadikaia: “Lau badu haraga, unai dagedage laulaudia dainai sibona biagua karana lau hahedinaraia be ia auka. Unai mahuta hebou laulaudia ese lau bona egu adavana huanai heiriheiri ia havaraia. Dina ta ta lau hekwarahi bada. Unai dika ese lau ia halusia lasi totona, egu lalona lau hadaia gaukara matamata lau tahua totona, ena be ena davana be maragi. Daudau lasi ta lau davaria. Lauegu ura gauna lau abia.”

[Pictures on page 5]

Baibel stadi amo ita abia dibana ese ita ia durua sibona eda ura ita biagua totona