Laloa Dobu Karana be Moale Gauna
TAUNIMANIMA haida dekenai laloa dobu karana be anina lasi. Bona idia laloa unai bamona idia karaia be auka. To unai bamona taudia be laloa dobu karana ena namo idia diba neganai, idia mamia idia be mai anina bada karana ta idia reaia. (Filipi 4:8) Momokani, laloa dobu karana ese ita ia durua Iehova ita dibaia, bona iena kara namodia, hoa dalanai ia havaraia gaudia, iena ura, bona palani namodia ita laloa bada totona. Dahaka dainai?
Iehova Dirava be iseda Lohia Tauna Badana bona ia gaukara noho iena palani hagugurudia totona. (Ioane 5:17) Ia be hanaihanai ia gaukara, to ena hesiai taudia ta ta ese idia laloa gaudia Ia laloa bada danu. Davida be unai ia diba bona lauma helaga ese ia hasiahua dainai inai ia torea: “Lohiabada e, oi ese egu lalona oi tahua vadaeni, lau oi diba momokani vadaeni. Egu kara ibounai oi diba vadaeni. Oi be daudau herea dekenai amo egu laloa ibounai oi diba.”—Salamo 139:1, 2.
Matamanai, reana ta ese Salamo torea tauna ena hereva do ia laloa kerere. Reana do ia laloa, ‘Ena be Dirava be “daudau herea,” to egu lalohadai dikadia ia diba.’ Oibe, namona be ita diba iseda lalona dekenai idia noho lalohadai dikadia be Dirava ia diba. Unai ese ita ia durua lalohadai dikadia ita dadaraia totona, bona unai bamona lalohadai ita abia neganai, Dirava dekenai ita gwauraia hedinarai be namo. Bona ita diba momokani Iesu ena mauri davalaia boubouna amo iseda dika do ia gwauatao. (1 Ioane 1:8, 9; 2:1, 2) To danu, do ita laloatao Iehova ese ia idia tomadiho henia taudia edia kara namodia sibona ia laloa. Bema mai eda ura ida ena kara namodia ita laloa, unai ia itaia bona ia laloa bada.
Reana oi henanadai, “Iehova ese ia idia tomadiho henia taudia milioni momo edia lalohadai namodia ia laloa bada, a?” Oibe. Iehova ese ia lalodia bada. Iesu ese manu maragidia ia herevalaia dalana amo ia hahedinaraia Iehova ese ita ia laloa bada, ia gwau: “Umui ese manu maragidia momo edia davana umui hanaia.” (Luka 12:6, 7) Manu maragidia ese Iehova idia laloa diba lasi, to Ia ese idia ia laloa bada. Unai ese ia hahedinaraia Ia ese taunimanima ia laloa bada bona Ia idia laloa neganai, Iehova be unai kara ia moalelaia! Oibe, Davida bamona, mai lalogoada ida ita guriguri diba, ita gwau: “Lohiabada e , oi be lauegu Nadi Gini Gabuna, bona egu Hamauria Tauna. . . . Lauegu kudouna ena laloa, be do idia namo, oiemu vairana dekenai.”—Salamo 19:14.
Iehova ese ena hesiai taudia edia laloa dobu karana ia laloa bada, peroveta tauna Malaki ena hereva amo unai ita dibaia. Iseda nega ia perovetalaia neganai, ia gwau: “Gabeai Lohiabada dekenai idia gari henia taudia ese idia ta ta dekenai idia herevahereva, bona Lohiabada ese edia hereva ia kamonai. Vadaeni Lohiabada ese guba dekenai oda ia gwauraia, bona buka ta lalonai be Lohiabada idia gari henia taudia, bona Lohiabada idia matauraia [“laloa,” NW ] noho taudia edia ladana idia torea.” (Malaki 3:16) Iehova be iseda lalohadai ia diba, unai ita laloa neganai ita ia durua laloa dobu karana ita laloa bada totona. Unai dainai, namona be salamo torea tauna ena hereva ita laloa noho, ia gwau: “Oiemu gaukara ibounai do lau laloa noho, bona oiemu siahu karadia danu do lau laloa.”—Salamo 77:12.