Ma Haida ese Ita Idia Laloa Dalana be mai Anina Bada, A?
KAHIRAKAHIRA taunimanima ibounai idia ura ma haida amo hanamoa herevadia idia abia. Unai bamona herevadia ese ita idia hamoalea diba, badina ita mamia gau ta ita karaia namonamo. Danu, ita ura kara ma haida ita hanamoa. To, bema haida ese ita idia hanamoa lasi, ita moale lasi. Bema ta ese iseda kara ia gwauraia dika eiava ita ia gwau henia, iseda hemami ia dika. Iseda laloa dalana lasi, to ma haida ese ita idia laloa dalana be mai anina bada.
Namo lasi haida ese ita idia laloa dalana ita laloa maragi. Haida ese eda kara idia tahua neganai, unai ese ita ia durua diba danu. Ma haida edia hakaua hereva maoromaorodia ita badinaia neganai, unai ese ita ia durua kara maoromaoro ita karaia totona. (1 Korinto 10:31-33) To, nega momo taunimanima edia lalohadai be kerere. Mani oi laloa, dubu gunalaia taudia bona ma haida ese Iesu idia laloa kerere bona “idia boiboi, idia gwau: ‘Oi hasatauroa, oi hasatauroa!’ ” (Luka 23:13, 21-25) Nega haida, mama eiava bese inai henia karana dainai ita idia laloa kerere neganai, unai ita laloa lasi. To, gau badana be aonega ita gaukaralaia bona ma haida edia lalohadai ita matauraia.
Daika Ena Lalohadai be mai Anina Bada?
Tomadiho momokani lalonai, ita ura iseda turadia ese ita idia lalonamo henia. Idia haida be iseda Witnes ruma bese taudia bona iseda Keristani tadikaka bona taihu. (Roma 15:2; Kolose 3:18-21) Tadikaka bona taihu edia lalokau, hemataurai bona edia “hagoadaia herevadia” be mai anina bada ita dekenai. (Roma 1:11, 12, NW ) Mai ‘manau ida, nega ibounai inai bamona do ita laloa, haida be idia namo herea, to ita be namo lasi.’ (Filipi 2:2-4) Ma danu, ita “idia hakaua taudia”—kongrigeisen elda taudia unai—edia lalonamo ita tahua bona laloa bada.—Heberu 13:17.
Danu, iseda “ladana be do ia namo, ekalesia lasi taudia edia vairana dekenai.” (1 Timoteo 3:7) Witnes lasi varavara, gaukara turadia, bona dekena taudia ese ita idia matauraia be namo herea! Bona ita haroro henia taudia dekenai kara namodia ita hahedinaraia be namo, unai amo idia ese Basileia sivaraina do idia kamonaia. Bema taunimanima idia diba ita be kara mirodia ita karaia lasi bona ita be kara momokani taudia, idia ese Dirava do idia hanamoa. (1 Petero 2:12) To, ma haida hamoalea totona ita kara koikoi lasi bona Baibel ena hakaua herevadia ita utua be namo lasi. Namona be ita laloparara taunimanima ibounai do ita hamoalea lasi. Iesu ia gwau: “Bema umui be tanobada ena taudia momokani neganai, tanobada taudia ese umui do idia lalokau henia. To umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.” (Ioane 15:19) Ita idia dagedage henia taudia ese ita do idia matauraia totona, dahaka ita karaia be namo?
Dagedage Taudia ese Ita Idia Matauraia Dalana
Iesu ia gwau: “Lauegu ladana dainai taunimanima ibounai ese do idia badu henia umui dekenai. To do ia haheauka lao ela bona dokona tauna be do ia mauri.” (Mataio 10:22) Nega haida, unai badu karana dainai taunimanima ese ita hadikaia herevadia do idia gwauraia. Gavamani taudia haida be ita idia inai henia dainai, idia gwau ita be “gavamani hadikaia” eiava “gwau-edeede” oreana. Dagedage taudia ma haida idia gwau, ita be kerere havaraia oreana bona ita idia koua be namo. (Kara 28:22) Nega haida unai bamona dagedage karadia ita hanaia diba. Edena dala ai? Aposetolo Petero ena sisiba ita badinaia dalana amo. Ia gwau: “Bema haida ese emui abidadama bona lalona namo totona umui idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.” (1 Petero 3:15) Danu, iseda “hereva be maoromaoro dainai, tau ta ese oi do ia gwauraia kerere diba lasi. Bona oi idia ura henia lasi taudia be do idia hemarai, badina be iseda dika ta do idia herevalaia diba lasi.”—Tito 2:8.
Ena be iseda ladana hadikaia karana ita hamaoromaoroa toho, to bema ita idia hahisia, ita lalometau lasi be namo. Haida ese Iesu, Dirava ena Natuna goevadaena, idia gwauraia Dirava ena ladana ia hadikaia, gavamani ia gwau-edeede henia, bona lauma dikadia edia gaukara ia durua tauna. (Mataio 9:3; Mareko 3:22; Ioane 19:12) Taunimanima ese aposetolo Paulo ena ladana idia hadikaia danu. (1 Korinto 4:13) To Iesu bona Paulo ese unai hereva idia laloa lasi bona edia gaukara idia goadalaia. (Mataio 15:14) Idia diba edia inai taudia ese do idia lalonamo henidia lasi, badina “Satani ese tanobada taudia ibounai ia gunalaia noho.” (1 Ioane 5:19) Hari inai negai, ita danu be unai bamona hahetoho ita davaria. Iseda inai taudia ese ita samania hereva koikoidia idia gwauraia neganai, ita gari lasi be namo.—Mataio 5:11.
Lalohadai Namodia
Taunimanima edia lalohadai bona ita totona idia kamonai sivaraidia be idauidau. Haida ese ita idia hanamoa, bona ma haida ese ita idia hadikaia. To Baibel ena hakaua herevadia ese ita ia gimaia dainai, ita moale bona maino ai ita noho be namo.
Aposetolo Paulo ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, Dirava ena hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia. Unai hereva momokani dainai, Dirava ena tau ena goada be hegeregere momokani, vadaeni kara namodia ibounai do ia karaia diba, mai kwalimu danu.” (2 Timoteo 3:16, 17) Gau ibounai lalonai Dirava ena Hereva ita badinaia neganai, Iehova Dirava bona iena Natuna, Iesu Keriso ese nega ibounai ita do idia lalonamo henia. Iehova bona Iesu ese ita idia laloa dalana be gau badana. Idia ese ita idia laloa dalana ese ia hahedinaraia ita be edena bamona taudia. Oibe, edia lalonamo karana dainai do ita mauri.—Ioane 5:27; Iamesi 1:12.
[Blurb on page 14]
“Haida edia hanamoa herevadia dainai lau hemarai, badina lauegu lalona dekenai lau gwau ma haida ese lau idia hanamoa be namo.”—INDIAN POET RABINDRANATH TAGORE
[Pictures on page 15]
Tadikaka bona taihu edia lalohadai ita tahua be namo
[Picture Credit Line on page 14]
Culver Pictures