Dirava ese Guba Gaudia Bona Tanobada Gaudia Do Ia Haboua

“Dirava ena ura namona be . . . gau iboudiai be Keriso lalonai do ia haboudia lou, guba gaudia bona tanobada gaudia danu.”—EFESO 1:9, 10, NW.

1. Iehova ena ura guba bona tanobada totona be dahaka?

MAINO guba bona tanobada ai! Unai be maino Diravana Iehova ena ura. (Heberu 13:20) Aposetolo Paulo amo iena ura ia hahedinaraia, Ia ura “gau iboudiai be Keriso lalonai do ia haboudia lou, guba gaudia bona tanobada gaudia danu.” (Efeso 1:9, 10, NW ) Unai siri lalonai inai hereva, “Keriso lalonai do ia haboua” ena anina be dahaka? Baibel ia diba momo tauna J.B. Lightfoot, ia gwau: “Unai hereva ese ia hahedinaraia, tanobada bona guba ai idia noho gaudia ibounai be lalotamona ai do idia noho, heiriheiri eiava taunimanima hapararaia gaudia ta be lasi, to gau ibounai be Keriso dainai do idia lalotamona. Kara dika bona mase, lalohisihisi bona mauri lalonai kwalimu lasi karana be do idia ore.”

Guba Gaudia

2. Dirava ese do ia haboua “guba gaudia” be daidia?

² Aposetolo Petero ese Keristani taudia edia helaro namo hereana ia herevalaia neganai, ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13) “Guba matamata” anina be Mesia Basileiana unai. Paulo ese Efeso taudia ia tore henidia neganai, ia herevalaia “guba gaudia” be “Keriso lalonai do idia haboua.” Dirava ese tanobada amo taunimanima haida sibona ia abia hidi, Keriso ida guba dekenai idia lohia totona. (1 Petero 1:3, 4) Unai 144,000 horoa Keristani taudia be “taunimanima ibounai edia huanai dekena amo Dirava ese idia ia hoia vadaeni,” bona idia be Keriso ida iena guba Basileiana lalonai do idia lohia hebou.—Apokalupo 5:9, 10; 14:3, 4; 2 Korinto 1:21; Efeso 1:11; 3:6.

3. Ena be horoa taudia haida be tanobada dekenai idia do noho, to edena bamona idia be ‘guba dekenai lohia dagina idia abia vadaeni’?

³ Horoa Keristani taudia be lauma helaga amo idia vara lou bona Iehova ena lauma natudia ai idia lao. (Ioane 1:12, 13; 3:5-7) Bona idia be Iesu ena tadikaka danu. (Roma 8:15; Efeso 1:5) Unai dainai, ena be tanobada ai idia do noho, to Baibel ia gwau idia be ‘Dirava ese Keriso danu ia hatoredia isi, vadaeni guba dekenai lohia dagi idia abia, Keriso danu.’ (Efeso 1:3; 2:6) Guba dekenai unai dagi idia abia badina “Lauma Helaga idia abia vadaeni, unai dainai idia diba momokani, Dirava ese ia gwauhamata iena taudia do ia henidia gaudia be dohore idia abia.” (Efeso 1:13, 14; Kolose 1:5) Unai taudia be “guba gaudia,” edia namba be Iehova ese ia gwauraia vadaeni bona idia ibounai do ia haboua.

Haboua Gaukarana Ia Hamatamaia

4. Edena negai bona edena dala ai “guba gaudia” idia haboua matamaia?

⁴ Iehova ena palani hegeregerena, guba gaudia haboua gaukarana be “nega korikori” ai ia hamatamaia. (Efeso 1:10) Unai be Pentekoste 33 C.E. ai ia vara. Unai dina ai, aposetolo bona hahediba tatau bona hahine latanai lauma helaga ia diho. (Kara 1:13-15; 2:1-4) Unai ese ia hamomokania taravatu matamata be unai nega ai ia gaukara matamaia, bona Keristani kongrigeisen bona “Dirava ena Israela” danu be unai negai idia vara.—Galatia 6:16; Heberu 9:15; 12:23, 24.

5. Dahaka dainai bese matamatana ta ese Israela bese korikorina ena gabu ia abia?

⁵ Dirava ese Israela bese korikorina ida ia karaia gwauhamatana amo “bese helagana” ta—guba ai hesiai gaukara do idia karaia besena unai—ia havaraia lasi. (Esodo 19:5, 6) Iesu ese Iuda tomadiho gunalaia taudia ia hamaoroa: “Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.” (Mataio 21:43) Horoa taudia be lauma Israela besena lalonai idia noho, bona idia be gwauhamata matamatana lalonai idia vareai. Aposetolo Petero be idia dekenai ia gwau: “Dirava ese umui ia abia hidi vadaeni, umui be iena bese, umui be King ena hahelagaia taudia, bese helagana, bona Dirava ena orea korikori taudia. Dirava ese umui ia abia hidi, iena hoa kara badadia do umui gwauraia hedinarai. Badina be ia ese dibura dekena amo umui ia boiria, vadaeni iena diari namo bada herea lalonai do umui noho. Gunaguna umui be bese lasi taudia, to harihari umui be Dirava ena bese.” (1 Petero 2:9, 10) Israela bese korikorina be Iehova ena gwauhamata besena lasi. (Heberu 8:7-13) Iesu ese ia perovetalaia bamona, Iehova ese Mesia Basileiana ena hahenamo be idia amo ia kokia bona lauma Israela, 144,000 taudia dekenai ia henia.—Apokalupo 7:4-8.

Basileia Gwauhamatana Lalonai Idia Vareai

6, 7. Iesu be ena tadikaka ida dahaka gwauhamata ia karaia bona unai ena anina ita dekenai be dahaka?

⁶ Iesu ese Memorial ia hamatamaia neganai, kamonai aposetolo taudia ia hamaoroa: “Metau bona dibagani be lau dekenai idia ginidae negadia lalonai, umui ese lau umui badinaia noho, lau umui rakatania lasi. Unai dainai, egu Tamana ese Basileia ta ia henia lau dekenai hegeregerena, lau danu Basileia ta lau henia inai, umui dekenai. Vadaeni lauegu Basileia lalonai, egu pata dekenai do umui aniani, bona do umui inuinu, bona terona ena latanai do umui helai, vadaeni Israela iduhu 12 dekenai do umui kota henia.” (Luka 22:28-30) Unai nega ai, Iesu ese iena lauma tadikaka—144,000 taudia—ida unai gwauhamatana ia karaia. Idia be Dirava ‘do idia badinaia ela bona mase’ bona do idia kwalimu.—Apokalupo 2:10; 3:21.

⁷ Tanobada dekenai mauri hanaihanai abia urana be unai orea maragi taudia dekenai ia noho lasi. Idia be Keriso ida guba dekenai do idia lohia, terona latanai do idia helai bona taunimanima do idia hahemaoro henia. (Apokalupo 20:4, 6) Namona be horoa taudia sibona ia herevalaia siridia bona mamoe idaudia ese paraoa bona uaina idia abia lasi ena badina ita tahua.—Ioane 10:16.

8. Horoa taudia ese paraoa idia ania karana amo dahaka idia hahedinaraia? (Rau 15 dekenai ia noho maua itaia.)

⁸ Horoa taudia be Keriso ese ia abia hisihisina idia abia bona idia ura Keriso ia mase bamona idia mase. Paulo be unai orea tauna ta dainai, ia gwau ia noho hegaegae ena ura gaudia ia dadaraia, unai amo ‘Keriso do ia abia momokani,’ bona ia ‘ura bada Keriso bona iena toreisi lou siahuna do ia diba, ia abia hisihisi ia danu do ia abia.’ Oibe, Paulo ia ura Keriso ia mase bamona do ia mase. (Filipi 3:8, 10) Horoa Keristani taudia momo danu be Iesu ese ia abia hisihisi bamona idia abia.

9. Memorial paraoana ese dahaka ia laulaulaia?

⁹ Iesu ese Lohiabada ena Anibou ia hamatamaia neganai, ia gwau: “Umui abia, lauegu tauanina be inai.” (Mareko 14:22) Ia ese ena tauanina korikorina, kahirakahira do idia botaia bona haberoa gauna ia herevalaia. Idia hatubua lasi paraoana ese unai tauanina ia laulaulaia be maoro. Dahaka dainai? Badina Baibel lalonai, idia hatubua paraoa ese kara dika ia laulaulaia. (Mataio 16:4, 11, 12; 1 Korinto 5:6-⁠8) Iesu be goevadae bona ena tauanina dekenai kara dika ta be lasi. Unai tauanina do ia henia taunimanima edia kara dika davana karaia totona. (Heberu 7:​26; 1 Ioane 2:2) Unai ia karaia dainai, herevana guba dekenai do idia lao eiava tanobada paradaisona dekenai do idia noho, Keristani taudia ibounai ese namo do idia davaria.—Ioane 6:51.

10. Memorial ena uaina idia inua taudia be edena dala ai ‘Keriso ena rarana idia inua bamona’?

¹⁰ Paulo be horoa Keristani taudia ese Memorial dekenai idia inua uaina ia herevalaia, ia gwau: “Anibou Helaga ita ania neganai, kapusi dekena amo Dirava ita hanamoa. Bona unai kapusi dekena amo ita inua neganai, Keriso ena rarana ita inua hebou, ani?” (1 Korinto 10:16) Edena dala ai uaina idia inua taudia be ‘Keriso ena rarana idia inua bamona’? Idia be Iesu idia durua lasi mauri davalaia boubouna idia henia totona, badina idia be kara dika taudia bona ta ese idia ia hoia lou be namo. To, Keriso ena rarana idia abidadama henia dainai, Dirava ese edia kara dika ia gwauatao, bona ia gwauraidia kara maoromaoro taudia bona guba dekenai mauri do idia abia. (Roma 5:8, 9; Tito 3:4-⁠7) Keriso ese ena rarana amo ia ida idia lohia 144,000 taudia edia kara dika ia hagoevaia bona “helaga taudia” ai ia halaodia. (Heberu 10:29; Daniela 7:18, 27; Efeso 2:19) Oibe, Keriso ena rarana amo ia ese ‘taunimanima ia hoidia, Dirava ena taudia do idia lao totona. Bese ibounai, gado ibounai, hanua ibounai, bona kopina idauidau taudia ibounai ia hoidia. Bona idia ia haboua, vadaeni idia be Basileia ta. Bona Dirava ena hahelagaia taudia ai ia halaodia vadaeni, bona idia ese tanobada do idia gunalaia.’—Apokalupo 5:9, 10.

11. Memorial ena uaina inua karana ese dahaka ia laulaulaia?

¹¹ Iesu ese Memorial ia hamatamaia neganai, uaina kapusi be aposetolo taudia dekenai ia henia bona ia gwau: “Umui ibounai umui inua. Inai be lauegu rarana, maino karaia ena rara, taunimanima momo totona do ia bubua, dika gwauatao totona.” (Mataio 26:27, 28) Dirava bona Israela besena huanai idia karaia taravatu gwauhamatana be boromakau bona nanigosi edia rara ese idia hamomokania hegeregerena, Iesu ena rarana ese Iehova bona Lauma Israela edia huanai idia karaia gwauhamata matamatana ia hamomokania. Unai be Pentekoste 33 C.E. ai ia vara. (Esodo 24:5-8; Luka 22:20; Heberu 9:14, 15) Horoa Keristani taudia ese uaina idia inua neganai idia hahedinaraia, idia be gwauhamata matamatana lalonai idia vareai bona ena namo be hari idia abia noho.

12. Horoa taudia idia bapatiso neganai, edena dala ai idia be ‘Keriso Iesu danu idia hakapua tamona, bona Iesu danu idia mase’?

¹² Horoa taudia ese uaina idia inua neganai, gau ta idia laloa danu. Iesu ese ena kamonai hahediba taudia ia hamaoroa: “Dahaka lau inua be umui danu do umui inua, bapatiso idia henia lau dekenai, be do idia henia umui dekenai danu.” (Mareko 10:38, 39) Aposetolo Paulo be gabeai ia hahedinaraia Keristani taudia be ‘idia bapatiso neganai, Keriso Iesu danu idia hakapua tamona, bona idia be Iesu danu idia mase.’ (Roma 6:3) Horoa taudia edia mauri lalonai, idia ese sibona edia namo idia tahua lasi. Edia mase be boubou gauna bamona, badina tanobada ai mauri hanaihanai do idia abia lasi. Horoa Keristani taudia be Dirava idia badinaia ela bona idia mase bena lauma taudia bamona idia toreisi lou bona guba ai Keriso ida idia lohia neganai, Keriso ena mase lalonai edia bapatiso idia abia haorea unai.—2 Timoteo 2:10-12; Roma 6:5; 1 Korinto 15:42-44, 50.

Uaina Bona Paraoa Abia Karana

13. Dahaka dainai tanobada helarona idia abia taudia ese Memorial ena paraoa bona uaina idia abia lasi, to Memorial dekenai idia lao?

¹³ Ita herevalaia vadaeni gaudia dainai horoa taudia sibona ese paraoa bona uaina idia abia be maoro. To tanobada helarona idia abia taudia ese unai idia abia be maoro lasi. Tanobada helarona idia abia taudia idia diba idia be horoa taudia lasi, bona danu idia diba idia be Iehova ese Iesu Keriso ida do idia lohia taudia ida ia karaia gwauhamata matamatana lalonai idia noho lasi. Unai “kapusi” ese gwauhamata matamatana ia laulaulaia dainai, unai gwauhamata lalonai idia noho taudia ese paraoa bona uaina idia abia. To tanobada paradaisona ai, Basileia henunai mauri goevadaena do idia abia taudia, be idia bapatiso neganai, Keriso danu idia hakapua lasi bona ia danu idia mase lasi. Unai dainai bema paraoa bona uaina idia abia, idia dekenai ia maoro lasi gauna idia karaia unai. Memorial dekenai idia lao bona uaina bona paraoa idia abia lasi, to mai hemataurai ida idia itaia sibona. Iehova ese iena Natuna amo idia totona ia karaia gaudia, hegeregere Keriso ena rara amo edia dika ia gwauatao dainai idia tanikiu henia bada.

14. Horoa taudia be paraoa bona uaina idia abia karana ese edena bamona idia ia hagoadaia?

¹⁴ Keriso ida guba dekenai do idia lohia orea maragi taudia makaia gaukarana be kahirakahira do ia ore. Horoa taudia be Memorial ena paraoa bona uaina idia abia karana ese lauma dalanai idia ia hagoadaia, unai do idia karaia ela bona idia mase, bena guba dekenai do idia daekau. Idia mamia momokani idia bona edia horoa tadikaka bona taihu be tamona badina idia be Keriso ena tauanina ena kahana taudia. Paraoa bona uaina idia abia neganai, idia laloatao, mai abidadama ida Dirava do idia hesiai henia ela bona idia mase.—2 Petero 1:10, 11.

“Tanobada Gaudia” Haboua

15. Daidia be horoa Keristani taudia idia durudia?

¹⁵ Lagani 1935 ai, “orea maragi” lalonai idia noho lasi “mamoe idaudia,” tanobada ai mauri hanaihanai do idia abia taudia unai, be horoa taudia idia durudia matamaia. (Ioane 10:16; Luka 12:32; Sekaraia 8:23) Idia be Keriso ena tadikaka ena turadia ai idia lao, unai dainai idia durudia “Basileia ena Sivarai Namona” be bese ibounai dekenai idia harorolaia totona. (Mataio 24:14; 25:40) Keriso ese bese idauidau kota henia totona ia mai neganai, idia be ena “mamoe” do ia gwauraidia bona ena “idiba kahana” dekenai do ia atodia. (Mataio 25:33-36, 46) Keriso ena rarana idia abidadama henia dainai, idia be “hisihisi bada herea” amo do idia roho mauri hutuma bada herea taudia ai do idia lao.—Apokalupo 7:9-14.

16. “Tanobada gaudia” ena orea lalonai daidia idia noho, bona edena dala ai idia ibounai be ‘Dirava ena natudia’ ai do idia lao?

¹⁶ Aneru ese Satani ena tanobada do ia hadikaia lai idia dogoatao noho ela bona 144,000 taudia ibounai be maka idia abia. (Apokalupo 7:1-4) Keriso bona ia ida do idia lohia king bona hahelaga taudia edia Lagani 1,000 Lohia Negana ai, do idia toreisi lou taudia momo herea be hutuma bada taudia do idia bamodia. (Apokalupo 20:12, 13) Dala do ia kehoa, idia be Mesia King, Keriso Iesu, ena lohia henunai do idia noho ela bona hanaihanai. Lagani 1,000 murinai, “tanobada gaudia” ibounai be hahetoho ginigabena do idia abia. Dirava do idia badinaia noho taudia be ‘Dirava ena natudia’ ai do idia lao.—Efeso 1:10; Roma 8:21; Apokalupo 20:7, 8.

17. Iehova ena ura be edena dala ai do ia guguru?

¹⁷ Iehova ese ena “palani” amo iena ura do ia hagugurua. Anina be “gau iboudiai be Keriso lalonai do ia haboudia lou, guba gaudia bona tanobada gaudia danu.” Guba bona tanobada ai idia noho taudia be maino ai do idia noho, bona mai moale ida Palani Karaia Tauna Badana, Iehova, ena lohia siahuna henunai do idia noho.

18. Horoa taudia bona mamoe idaudia be edena dala ai Memorial amo namo idia abia?

¹⁸ Horoa taudia ena orea maragina bona mamoe idaudia milioni momo herea be April 12, 2006 ai do idia hebou, unai be hagoadaia bada gauna! Keriso ena mase ena Memorial do idia karaia, Iesu ena oda hegeregerena: “Inai bamona do umui karaia, lau dekenai do umui laloa totona.” (Luka 22:19) Namona be Memorial dekenai idia lao taudia be Iehova ese ena Natuna lalokauna, Keriso Iesu amo, idia totona ia karaia gaudia idia laloa be namo.

Riviu

• Iehova ena ura be dahaka guba gaudia bona tanobada gaudia totona?

• “Guba gaudia” be daidia, bona Dirava ese edena bamona idia ia haboua?

• “Tanobada gaudia” be daidia, bona edia helaro be dahaka?

[Box on page 15]

“Keriso Ena Tauanina”

Korinto Ginigunana 10:16, 17 ai, Paulo ese Keriso ena tadikaka ia hereva henia neganai, ia ese inai hereva “tauanina” ia gaukaralaia. Ia gwau: “paraoa ita makohia neganai, Keriso ena tauanina ita ania hebou, ani? Ita be momo herea, to paraoa be tamona sibona. Unai dainai ita be tauanina tamona, badina be paraoa tamona ita ania.” Horoa Keristani taudia ese Memorial dekenai paraoa idia ania neganai, idia hahedinaraia idia be horoa taudia ma haida ida idia lalotamona, idia be tauanina ta bamona bona Keriso be unai tauanina ena Kwarana.—Mataio 23:10; 1 Korinto 12:12, 13, 18.

[Pictures on page 15]

Dahaka dainai horoa taudia sibona ese paraoa bona uaina idia abia?

[Picture on page 17]

Iehova ena palani amo, guba bona tanobada taudia ibounai be mai lalotamona ida do idia noho