Iehova Ena Hereva be Ia Mauri Noho

Iobu Bukana Ena Hereva Badadia

BESE kwarana tauna Iobu be Usu dekenai ia noho, hari unai gabu be Arabia dekenai. Unai negai, Israela taudia momo be Aigupito dekenai idia noho. Ena be Iobu be Israela tauna lasi, to ia ese Iehova Dirava ia tomadiho henia. Baibel ese Iobu be inai bamona ia gwauraia: “Tanobada dekenai ia be tau ta ese ia hereaia lasi, ani? Ia be kerere ta lasi, bona kara maoromaoro tauna. Ia ese lau Dirava dekenai ia gari, bona kara dika dekena amo ia siri momokani.” (Iobu 1:⁠8) Iobu be reana Iehova ena hesiai taudia rua, Iakobo ena natuna Iosepa bona peroveta tauna Mose edia nega huanai ia noho.

Iobu bukana ia torea tauna Mose, be lagani 40 lalonai Midiana, Usu kahirakahira tanona dekenai ia noho neganai, reana Iobu ena sivarai ia kamonai. Israela taudia be lagani 40 lalonai tano gagaena dekenai idia loaloa bena Usu hanua kahirakahira idia noho neganai, reana Mose ese Iobu ena lagani ginigabedia lalonai idia vara gaudia edia sivarai ia kamonai.a Iobu ia mamia hisihisina idia torea namo herea dainai, unai sivarai be mai anina bada. Unai buka ese inai henanadai haida ia haerelaia: Dahaka dainai taunimanima namodia be hisihisi idia abia? Dahaka dainai Dirava ese kara dika ia koua lasi? Goevadae lasi taudia ese Dirava idia badinaia noho diba, a? Iobu bukana be Dirava ena lauma helaga amo idia torea dainai, ena sivarai be ia mauri noho bona ia be mai ena siahu hari inai negai danu.​—⁠Heberu 4:⁠12.

“LAUEGU VARA DINANA LAU GWAURAIA DIKA”

(Iobu 1:1–3:⁠26)

Dina ta Satani ese Iobu ena Dirava badinaia karana ia tohoa. Iehova ese unai ia koua lasi bona Satani ese Iobu dekenai dika idauidau ia havaraia. To Iobu ese ‘Dirava ena ladana ia hadikaia’ lasi.​—⁠Iobu 2:⁠9.

Iobu ena turana toi idia lao Iobu ena “lalona do idia hagoadaia” totona. (Iobu 2:11) Ia ida idia helai bona hereva ta idia gwauraia lasi, ela bona Iobu ia hereva, ia gwau: “Lauegu vara dinana lau gwauraia dika.” (Iobu 3:⁠3) Ia ura ia be “tanobada ena diari idia itaia lasi” natudia eiava ia vara neganai ia mase beibi ta bamona.​—⁠Iobu 3:​11, 16.

Baibel Henanadaidia Edia Haere:

1:4​—⁠Iobu ena natudia ese vara dinadia idia moalelaia, a? Lasi. Haida idia laloa idia ese vara dinadia idia moalelaia, badina Baibel haida idia gwau idia ese aria ta idia karaia “ta ta sibodia edia dina dekenai.” Heberu gado herevadia “dina” bona “vara dinana” edia anina be idau. (Genese 40:20) Iobu 1:4 ai inai hereva “dina” idia gaukaralaia neganai, idia ese dina ia daekau bona dina ia diho negana idia herevalaia. Iobu ena natudia 7 be lagani ta ta ai dina 7 lalonai aria ta idia karaia. Unai dina ta ta ai, natuna mero ta ta ese edia ruma ta ta dekenai unai aria idia karaia.

1:6; 2:1​—⁠Daidia be Iehova ena vairanai idia hedinarai? Iehova vairanai idia hedinarai taudia be Dirava ena Natuna tamona, Hereva; abidadama anerudia; Satani Diabolo bona ena gwau-edeede anerudia. (Ioane 1:​1, 18) Satani bona ena demoni be guba dekenai idia noho ela bona lagani 1914 ai, Dirava ese ena Basileia ia haginia neganai, tanobada dekenai idia ia negea diho. (Apokalupo 12:​1-12) Iehova vairanai idia hedinarai neganai, Iehova ese unai ia koua lasi, badina unai amo Ia ese aneru ma haida vairanai Satani ese ia havaraia hepapahuahu herevana ia gwauraia diba.

1:7; 2:2​—⁠Iehova sibona ese Satani ia hereva henia, a? Iehova ese aneru ia hereva henia dalana be Baibel ese ia gwauraia lasi. To, peroveta tauna Mikaia ese matahanai ta amo aneru ta ia itaia Iehova ida ia herevahereva. (1 King Taudia 22:​14, 19-23) Toana be Iehova be aneru ma ta amo Satani ia hereva henia lasi, to Ia sibona ese Satani ia hereva henia.

2:9​—⁠Iobu ena adavana ese Iobu ia hamaoroa, Dirava do ia gwauraia dika neganai, Iobu ena adavana ena hemami be edena bamona? Iobu ena adavana be Iobu ia mamia hisihisina ia mamia danu. Ia itaia ena adavana be gorere dikana ese ia hahisia bada neganai, reana ia lalohisihisi bada. Ia ese ena lalokau natudia ia haboioa danu. Reana unai gau ibounai idia vara bona ia lalohisihisi bada dainai, ia ese mai anina bada gauna, edia hetura karana Dirava ida ia laloa bada lasi.

Ita Dibaia Gaudia:

1:​8-11; 2:​3-5. Iobu ena sivarai ese ia hahedinaraia bamona, ta ese Dirava ia badinaia totona, namona be Iehova ia hesiai henia mai ura maorona ida bona ena kara bona hereva danu idia maoro be gau badana.

1:​21, 22. Nega namodia bona nega dikadia ai, Iehova ita badinaia noho neganai, ita hamomokania Satani be koikoi tauna.​—⁠Aonega Herevadia 27:⁠11.

2:​9, 10. Iobu bamona, namona be iseda abidadama ia goada, ena be ruma bese taudia ese ita abia dae lauma gaudia idia laloa bada lasi eiava ita idia doria iseda abidadama ita rakatania totona.

2:13. Iobu ena turadia toi ese Dirava bona ena gwauhamata herevadia amo Iobu idia hagoadaia lasi, badina idia ese lauma gaudia idia laloa bada lasi.

‘EGU LALOA MAOROMAORO DO LAU GWAURAIA NOHO!’

(Iobu 4:1–31:⁠40)

Iobu ena turadia toi ese Iobu idia samania koikoi idia gwau, ia ese kara dika badana ta ia karaia dainai, Dirava ese ia panisia. Elipasa ia hereva guna. Unai murinai Biledada be hemataurai lasi dalanai ia hereva. Bena Sopara ese Iobu ia hahemaoro henia.

Iobu ese ena vadivadi taudia edia koikoi herevadia ia abia dae lasi. Iobu be ia dekenai ia vara hisihisi ena badina ia lalopararalaia lasi dainai, sibona ena kara maoromaoro ia hamomokania toho. To, Iobu ese Iehova ia lalokau henia, bona ia gwau: “Harihari ia lao bona do lau mase, egu laloa maoromaoro . . . do lau gwauraia noho.”​—⁠Iobu 27:⁠5.

Baibel Henanadaidia Edia Haere:

7:1​—⁠Dahaka dainai Iobu ia gwau ena noho be “davana totona idia gaukara auka taudia edia noho bamona”? Iobu ia lalometau bada herea dainai, ia laloa ena mauri be gaukara aukana bamona. Iobu ese ta be mase guria gabuna dekenai ia noho ela bona ia toreisi lou negana, be davana totona gaukara aukana idia karaia taudia edia mauri ida ia hahegeregerea.

7:​9, 10; 10:21; 16:22​—⁠Iobu ena hereva ese ia hahedinaraia ia be toreisi lou ia abidadama henia lasi, a? Iobu be vaira nega ai ia dekenai do idia vara gaudia ia herevalaia. Vadaeni, ena hereva ena anina be dahaka? Anina ta be, bema ia mase, iena negai idia noho taudia ese ia do idia itaia lasi. Edia matana ai, Iobu be iena ruma dekenai do ia giroa lou lasi bona ia do idia laloaboio ela bona Dirava ese ia makaia negana ai do ia toreisi lou. Danu, Iobu ena hereva ena anina ma ta be, taunimanima be sibodia edia siahu amo mase gurina idia rakatania diba lasi. Iobu be vaira negai do ia vara toreisi lou ia abidadama henia bona Iobu 14:​13-15 ese unai ia hamomokania.

19:20 (NW )​—⁠Iobu ena hereva, “lauegu isena ena kopina amo lau roho mauri” ena anina be dahaka? Ita diba isena be kopina lasi. Unai dainai Iobu ese unai hereva ia gwauraia neganai, anina be ia abia hahetoho amo ia roho mauri neganai ia ese ena gau ibounai ia halusia.

Ita Dibaia Gaudia:

4:​7, 8; 8:​5, 6; 11:​13-15. Namo lasi ita laloa, metau ia davaria tauna be ia hadoa gauna ena anina ia abia noho bona Dirava ena lalonamo ia abia lasi.

4:​18, 19; 22:​2, 3. Ma ta ita sisiba henia neganai, namona be Baibel ita gaukaralaia, to sibona eda lalohadai ita gwauraia lasi.​—⁠2 Timoteo 3:⁠16.

10:⁠1. Iobu be ia badu dainai, ia laloa Dirava ese ia dekenai unai hisihisi ibounai ia havaraia. Hisihisi ita davaria neganai, namo lasi ita badu, badina ita ese Satani ena hepapahuahu herevana ita lalopararalaia.

14:​7, 13-15; 19:25; 33:24. Satani ese ita ia dibagania neganai, toreisi lou helarona ese ita ia hagoadaia diba.

16:5; 19:⁠2. Namona be iseda hereva ese ma haida ia hagoadaia, to namo lasi ma haida ia habadua.​—⁠Aonega Herevadia 18:⁠21.

22:​5-7. Bema oi kamonai herevadia dainai ta oi sisiba henia, to ena kerere hamomokania gauna ta be lasi, unai ese lalohisihisi ia havaraia diba.

27:2; 30:​20, 21. Goevadae lasi taudia ese Dirava badinaia karana idia hahedinaraia diba. Iobu ia laloa Dirava ese ena hisihisi ia havaraia dainai, Dirava ia gwauraia dika.

27:⁠5. Dirava badinaia karana be ta ese Dirava ia lalokau henia karana amo ia vara dainai, Iobu sibona ese ena Dirava badinaia karana ia hadikaia diba. Unai dainai namona be Iehova dekenai iseda lalokau ita habadaia.

28:​1-28. Taunimanima be tanobada ena dava bada nadidia idia noho gabudia idia diba. Unai nadi do idia tahua noho ela bona tano henunai momokani dekenai idia diho lao. To, Dirava ena aonega be Iehova gari henia karana amo ita davaria diba.

29:​12-15. Namona be dabu taudia dekenai hebogahisi-mai-lalokauna ita hahedinaraia.

31:​1, 9-28. Iobu ese ita dekenai haheitalai namona ia hahedinaraia, ia ese ta hauraia kava karana, heudahanai, hebogahisi lasi ida ma haida kara henia karana, kohu laloa bada karana, bona kaivakuku tomadiho henia karana ia dadaraia.

“TANO KAHU, BONA LAHI KAHU DANU DEKENAI, LAUEGU LALONA LAU GIROA MOMOKANI”

(Iobu 32:1–42:⁠17)

Tau matamata Elihu be idia badinai ia helai bona mai boga-auka ida edia hepapahuahu herevadia ibounai ia kamonai. Bona mai gari lasi ida ia hereva bona Iobu bona ena turadia toi edia lalohadai kereredia ia hamaoromaoroa.

Elihu ena hereva ia hadokoa neganai, Iehova be lai gubana amo ia hereva. Ia ese Iobu ena hisihisi ena badina ia herevalaia lasi. To, Siahu Ibounai Diravana ese Iobu dekenai henanadai haida ia henia, unai amo Iena siahu bona aonega bada ia hahedinaraia. Iobu ia diba ia be laloparara lasi dalanai ia hereva, unai dainai ia gwau: “Harihari tano kahu, bona lahi kahu danu dekenai, lauegu lalona lau giroa momokani inai.” (Iobu 42:⁠6) Iobu ena hahetoho ibounai idia ore murinai, Iehova ese ia hanamoa.

Baibel Henanadaidia Edia Haere:

32:​1-3​—⁠Elihu be edena negai ia mai bona ia helai gabuna dekenai ia helai? Elihu be Iobu bona ena turadia toi ese idia gwauraia herevadia ibounai ia kamonai. Unai dainai reana ia be Iobu bona ena turadia toi idia do herevahereva lasi neganai, ia mai bona edia hereva ia kamonai diba gabuna dekenai ia helai.​—⁠Iobu 3:​1, 2.

34:7 (NW )​—⁠Edena dala ai Iobu be “ia dekenai idia gwauraia samania herevadia ia kamonai sibona, tau ta ese ranu ia inua” hegeregerena? Iobu ia lalohisihisi bada dainai, ia mamia ena turadia toi ese ia idia hevasehalaia, to ia laloparara lasi idia ese Iehova idia hevasehalaia noho. (Iobu 42:⁠7) Unai dainai, ia be ia dekenai idia gwauraia samania herevadia ia kamonai sibona, tau ta ese mai moale ida ranu ia inua hegeregerena.

Ita Dibaia Gaudia:

32:​8, 9. Namo lasi ita gwau taunimanima badadia sibona be mai edia aonega. Ita ibounai ita aonega diba, bema Dirava ena Hereva bona ena lauma ena hakaua dalana ita lalopararalaia.

34:36. Bema hahetoho badana ta ita davaria, iseda Dirava badinaia karana be do ia hedinarai.

35:⁠2. Elihu ia do hereva lasi neganai, ia kamonai namonamo guna, unai amo idia hepapahuahulaia gauna ia lalopararalaia diba. (Iobu 10:7; 16:7; 34:⁠5) Unai dainai, Keristani elda taudia ese ta idia do sisiba henia lasi neganai, namona be unai hekwakwanai ena badina idia tahua guna bona idia lalopararalaia.​—⁠Aonega Herevadia 18:⁠13.

37:14; 38:1–39:30. Iehova ena hoa karadia ese ena siahu bona aonega idia hahedinaraia. Bema unai gaudia ita laloa, unai ese ita do ia hamanaua bona do ita diba ita sibona iseda ura be anina bada lasi, to Iehova ena lohia siahuna hamomokania karana be mai anina bada.​—⁠Mataio 6:​9, 10.

40:​1-4. Bema ita mamia ita be Siahu Ibounai Diravana do ita maumauraia, namona be ‘hereva ma ta do ita gwauraia lasi.’

40:15–41:34. Behemoto (hipopotomas) bona Leviatano (huala) edia goada be bada herea! Dirava ita hesiai henia noho totona, gau badana be unai goada bada animal ia Havaraia Tauna ita noia ita dekenai goada do ia henia.​—⁠2 Korinto 4:⁠7.

42:​1-6. Iobu ese Iehova ena hereva ia kamonai bona ena siahu ia laloa lou karana ese ia durua ‘Dirava ia itaia,’ eiava dibaia totona. (Iobu 19:26) Bena ena lalohadai ia haidaua. Baibel amo iseda lalohadai kererena idia hamaoromaoroa neganai, namona be iseda kerere ita lalopararalaia bona iseda lalohadai ita haidaua.

“Iobu Ena Haheauka” Karana Tohotohoa

Iobu ena buka ese ia hahedinaraia goevagoeva Dirava ese taunimanima edia hisihisi idauidau ia havaraia lasi, to Satani ese ia havaraia. Dirava ese tanobada dekenai idia vara hisihisi ia koua lasi karana ese ita ta ta dekenai dala ia kehoa, Iehova ena lohia siahuna ena kahanai ita gini bona iseda abidadama ita hamomokania totona.

Iobu bamona, Iehova idia lalokau henia taudia ibounai ese hahetoho do idia davaria. Iobu ena sivarai amo ita diba momokani ita davaria hahetoho idauidau ita haheaukalaia diba. Ita ia hadibaia ita davaria hekwakwanai be do idia noho hanaihanai lasi. Iamesi 5:11 ia gwau: “Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani?” Iobu ese Dirava ia badinaia momokani dainai, Iehova ese ia hanamoa. (Iobu 42:​10-17) Ita vairanai helaro namona ia noho, unai be mauri hanaihanai tanobada Paradaisona ai! Iobu hegeregerena, namona be iseda lalona ita hadaia Dirava do ita badinaia noho totona.​—⁠Heberu 11:⁠6.

[Footnote]

[Pictures on page 18]

“Iobu ena haheauka” karana amo dahaka ita dibaia?