Iehova ese Ena Mamoe Naria Taudia Ia Hadibaia
“Lohiabada ese aonega, be oi dekenai ia henia noho, bona iena uduna dekena amo, diba bona laloa kehoa [“laloparara,” BHğ] idia mai noho.”—AONEGA HEREVADIA 2:6.
1, 2. Dahaka dainai tadikaka ese kongrigeisen hesiai taudia bona elda taudia edia maduna idia tahua be namo?
LAGANI 7 lalonai elda gaukarana ia karaia tadikaka ladana Nick ia gwau: “Elda maduna lau abia neganai, lau moale bada. Lau itaia unai be dala hereadaena Iehova lau hesiai henia karana lau habadaia totona. Iehova ese lau totona ia karaia gaudia ibounai dainai, Ia lau tanikiu henia be namo. Elda taudia ese lau idia durua hegeregerena, lau danu lau ura kongrigeisen taudia lau durua.” Nick ia moale, to gau haida ia lalohekwarahilaia danu. Ia gwau: “Elda maduna lau abia neganai, egu mauri lagani be 30 ia do abia lasi, bona lau laloa egu laloparara bona aonega be hegeregere lasi kongrigeisen lau naria namonamo totona.”
2 Iehova ese ia abia hidi mamoe naria taudia idia moale ena badina be momo. Aposetolo Paulo be Efeso elda taudia idia moale ena badina ia herevalaia neganai, Iesu ena hereva ia gwauraia lou: “Henia kara ena moale be bada, abia kara ena moale be maragi.” (Kara 20:35) Kongrigeisen hesiai taudia eiava elda taudia ai idia lao taudia be dala idauidau amo kongrigeisen bona Iehova dekenai edia henia karana idia hahedinaraia diba. Hegeregere, kongrigeisen hesiai taudia bona elda taudia be idia gaukara hebou. Danu, hesiai taudia be nega bada idia henia mai anina bada gaukaradia momo idia karaia totona. Hesiai taudia be Dirava bona edia dekena taudia idia lalokau henia dainai, unai mai anina bada gaukarana idia karaia.—Mareko 12:30, 31.
3. Dahaka dainai haida idia laloa idia hegeregere lasi kongrigeisen ena maduna haida idia abia totona?
3 To bema tadikaka ta ia laloa ia hegeregere lasi kongrigeisen hesiai tauna o elda tauna ena maduna ia abia be edena bamona? Nick bamona, reana ia laloa iena aonega bona laloparara be hegeregere lasi kongrigeisen ia naria namonamo totona. Bema oi be bapatiso tadikaka, emu lalohadai be unai bamona danu, a? Momo be unai bamona idia laloa danu. Badina Iehova ese ena mamoe naria taudia be, Iena mamoe oreana idia kara henia hegeregerena edia davana do ia henia. Iesu ia gwau: “Gau momo ia dekenai do idia henia tauna dekena amo, be gau momo do idia tahua. Bona gau momo ia dekenai idia henia do ia naria totona tauna, be henia lou neganai, unai tau dekena amo gau momo do idia tahua.”—Luka 12:48.
4. Edena dala ai Iehova be ia abia hidi mamoe naria taudia ia durua?
4 Iehova ia ura kongrigeisen hesiai taudia bona elda taudia be sibona edia maduna idia huaia, a? Lasi, Iehova ena heduru namona dainai, idia be edia maduna idia huaia bona idia karaia namonamo diba. Stadi ginigunana bamona, Iehova ena lauma huahua ese kongrigeisen hesiai taudia o elda taudia ia durua, Iehova ena mamoe idia naria namonamo totona. (Kara 20:28; Galatia 5:22, 23) Ma danu, Iehova ese idia dekenai aonega, diba, bona laloparara ia henia. (Aonega Herevadia 2:6) Edena bamona Iehova be unai ia karaia? Namona be Iehova ese ia abia hidi mamoe naria taudia ia hadibaia daladia toi ita herevalaia.
Lo Elda Taudia Edia Hadibaia Karana
5. Dahaka dainai Petero bona Ioane be mamoe naria taudia namodia?
5 Sanhedrin dekenai, tanobada ena aonega bada diadi taudia idia gwau, Petero bona Ioane “ruaosi be sikuli bada lasi bona aonega bada lasi taudia.” Petero bona Ioane be toretore bona duahiduahi idia diba, to rabi taudia edia sikuli dekenai Baibel idia stadilaia lasi. To, idia bona diba tahua taudia ma haida be hahediba taudia namodia, badina edia hereva idia kamonai taudia momo be Keristani taudia ai idia lao. Dahaka dainai unai aposetolo taudia be hadibaia taudia namodia? Diadi taudia be Petero bona Ioane edia hereva idia kamonai murinai idia diba idia ruaosi be “Iesu ena bamona taudia.” (Kara 4:1-4, 13) Oibe, idia be lauma helaga idia abia. (Kara 1:8) To, taunimanima ibounai—lauma dalanai idia matakepulu diadi taudia danu—idia itaia diba, unai aposetolo taudia be Iesu ese ia hadibaia. Iesu be tanobada ai ia noho neganai, ia ese aposetolo taudia dekenai mamoe haboua gaukarana bona kongrigeisen naria dalana ia hadibaia.—Mataio 11:29; 20:24-28; 1 Petero 5:4.
6. Iesu bona Paulo ese ma haida dekenai dahaka idia hadibaia?
6 Iesu ia toreisi lou murinai, ia abia hidi mamoe naria taudia ia hadibaia noho. (Apokalupo 1:1; 2:1–3:22) Hegeregere, Iesu be Paulo ia abia hidi bona ia hadibaia. (Kara 22:6-10) Paulo be Iesu ena hadibaia dalana ia laloa bada bona ma elda haida dekenai ia hadibaia. (Kara 20:17-35) Hegeregere, Paulo be ena nega bona goada bada ia henia Timoteo ia hadibaia, Dirava ena hesiai gaukara lalonai ‘gaukara namona momokani tauna do ia lao’ bona ‘do ia hemarai lasi’ totona. (2 Timoteo 2:15) Paulo be Timoteo ena turana namona ai ia lao. Matamanai, Paulo ese Timoteo ia herevalaia neganai, ia gwau: “Mero ese iena tamana ia durua bamona, ia ese lau ia durua vadaeni. Sivarai Namona dainai ai ruaosi ai gaukara hebou vadaeni.” (Filipi 2:22) Paulo ia ura lasi Timoteo eiava ma haida idia laloa, idia be Paulo ena hadibaia taudia. Lasi, to ia ese tadikaka ia hagoadaia Keriso idia tohotohoa totona, ia sibona ese Keriso ia tohotohoa hegeregerena.—1 Korinto 11:1.
7, 8. (a) Daika ena ekspiriens ese ia hahedinaraia elda taudia be Iesu bona Paulo hegeregerena? (b) Edena negai elda taudia ese tadikaka namodia idia hadibaia be namo?
7 Iesu bona Paulo hegeregerena, lo elda taudia be tadikaka idia hadibaia bona anina namona idia havaraia vadaeni. Chad ena ekspiriens mani ita laloa. Ia be tomadiho dalanai ia parara ruma bese lalonai ia tubu daekau, to vanegai ia be elda maduna idia henia. Ia gwau: “Idia hanaia laganidia lalonai, lo elda taudia haida be lau idia durua lauma dalanai lau goada lau lao totona. Egu tamana be Witnes lasi tauna dainai, unai elda taudia be lau idia laloa bada bona lauma dalanai idia be egu tamana bamona. Idia ese nega idia atoa haroro gaukara lalonai lau idia hadibaia totona, bona gabeai, kongrigeisen maduna ta lau abia neganai, elda tauna ta be lau dekenai unai maduna huaia dalana ia hadibaia.”
8 Chad ena ekspiriens ese ia hahedinaraia, laloparara elda taudia be tadikaka namodia idia hadibaia guna ela bona idia hegeregere kongrigeisen hesiai taudia bona elda taudia ai idia lao totona. Dahaka dainai? Badina Baibel ena hahegani be inai: Tadikaka be kongrigeisen hesiai taudia eiava elda taudia ai idia do lao lasi neganai, namona be lauma dalanai idia goada bona kara maoromaoro taravatudia idia badinaia guna. Bona ‘edia kara do idia tahua guna be namo.’—1 Timoteo 3:1-10.
9. Lo elda taudia edia maduna be dahaka, bona dahaka dainai?
9 Namona be elda taudia ese tadikaka idia hadibaia guna, bena edia kara idia tahua o test diba. Haheitalai be inai: Bema tisa ese stiuden dekenai idia hadibaia lasi gaudia be sikuli ena eksam pepana ai idia torea, oi laloa stiuden tauna be test dekenai do ia kwalimu, a? Lasi. Unai dainai, hadibaia karana be mai anina bada. Idia gaukara goada tisa taudia be stiuden taudia idia hadibaia neganai, idia ura stiuden be eksam ai do idia kwalimu bona idia dibaia gaudia do idia gaukaralaia. Unai hegeregerena, bema elda taudia idia gaukara goada tadikaka idia hadibaia namonamo, tadikaka be kongrigeisen hesiai taudia bona elda edia kara namodia do idia hahedinaraia. Elda taudia idia ura lasi unai maduna idia henia kava, to idia ura tadikaka be mamoe oreana idia naria namonamo diba. (2 Timoteo 2:2) Momokani, bema tadikaka idia ura kongrigeisen hesiai taudia bona elda taudia ai idia lao, namona be idia hekwarahi kongrigeisen hesiai taudia bona elda edia taravatu idia hagugurua totona. (Tito 1:5-9) To, bema lo elda taudia be mai edia ura ida kongrigeisen ena maduna idia tahua tadikaka idia hadibaia, unai tadikaka be lauma dalanai do idia goada idia lao haraga diba.
10, 11. Edena dala ai elda taudia ese ma haida idia hadibaia maduna haida idia abia totona?
10 Edena dala ai lo elda taudia be ma haida dekenai kongrigeisen naria dalana idia hadibaia diba? Gau badana be, elda taudia ese tadikaka idia laloa bada—nega ibounai haroro gaukara lalonai idia gaukara hebou bona idia durudia ‘hereva momokani do idia hadibaia maoromaoro’ dalana idia hanamoa totona. (2 Timoteo 2:15) Lo elda taudia be unai tadikaka dekenai ma haida durua karana ena moale bona elda taudia idia mamia moalena—lauma dalanai tahua gaudia idia atoa bona abia ena moale—idia herevalaia. Ma danu, elda taudia be heduru herevadia idia henia neganai, idia hahedinaraia edena dala ai tadikaka ta be haheitalai namona ia lao diba mamoe oreana dekenai.—1 Petero 5:3, 5.
11 Tadikaka ta be kongrigeisen hesiai tauna ta ai ia lao neganai, lo elda taudia ese idia hadibaia noho be namo. Lagani 50 bamona lalonai elda gaukarana ia karaia tadikaka Bruce ia gwau: “Lau ura kongrigeisen hesiai tauna matamatana ida lau helai bona hesiai tauna mai ena kamonai bona mai ena kara maoromaoro ena sisiba ai kikilaia hebou. Danu, iena gaukara idia herevalaia revareva ai duahia, bona lau ura ia lau durua ela bona ena gaukara ia manadalaia.” Kongrigeisen hesiai tauna ese ena gaukara ia manadalaia murinai, elda taudia ese ia dekenai mamoe naria gaukara idia hadibaia be namo. Bruce ma ia gwau: “Lau bona hesiai tauna ta be mamoe vadivadi henia gaukara ai karaia neganai, ia lau durua siri haida ia abia hidi do ai vadivadi henia tadikaka eiava ruma besena ai hagoadaia totona. Kongrigeisen hesiai tauna be elda tauna namona ai ia lao totona, ta ena kudouna do ia hamarerea Baibel siridia gaukaralaia dalana ia dibaia be namo.”—Heberu 4:12; 5:14.
12. Edena dala ai lo elda taudia ese elda matamatadia idia hadibaia diba?
12 Danu, elda matamatadia be lo elda taudia edia hadibaia karana amo namo bada idia abia. Tadikaka Nick ia gwau: “Lo elda taudia rua edia hadibaia karana be lau ia durua bada. Idia be gaukara idauidau karaia dalana idia lalopararalaia. Ena be egu hereva idia abia dae lasi, to nega momo mai haheauka ida egu hereva idia hakala henia bona lalohadailaia. Elda taudia ese mai hemataurai bona manau ida tadikaka bona taihu idia kara henidia amo gau momo lau dibaia. Idia gwau hekwakwanai lau hamaoromaoroa eiava ta lau hagoadaia neganai, namona be Baibel lau gaukaralaia namonamo.”
Baibel Ena Hadibaia Karana
13. (a) Edena dala ai tadikaka ta be mamoe naria tauna namona ai ia lao diba? (b) Dahaka dainai Iesu ia gwau: “Lauegu hadibaia herevadia be lauegu lasi”?
13 Momokani, Baibel ena taravatu, hakaua herevadia, bona haheitalai ese elda tauna ia durua diba, bena “do ia hegeregere momokani, gau ibounai ia abia hegaegae gaukara namodia ibounai karaia totona.” (2 Timoteo 3:16, 17, NW ) Tadikaka ta be mamoe naria tauna namona ai ia lao diba bema Baibel ia diba bona ia gaukaralaia namonamo, herevana sikuli namona ta dekenai ia lao eiava lasi. Iesu ena haheitalai mani ita laloa. Iesu be elda tauna hereadaena bona ena diba, laloparara, bona aonega be bada; to ia be Iehova ena mamoe ia hadibaia neganai, ia sibona ena aonega dekenai ia tabekau lasi. Ia gwau: “Lauegu hadibaia herevadia be lauegu lasi, to lau ia siaia Diravana ena.” Dahaka dainai Iesu be ena guba Tamana ia hanamoa? Iesu ia gwau: “Sibona ena ura herevadia ia gwauraia tauna be sibona dekenai hanamoa dala ia tahua.”—Ioane 7:16, 18.
14. Edena dala ai elda taudia be sibona edia ladana idia abia isi lasi?
14 Dirava idia badinaia elda taudia idia ura lasi sibona edia ladana idia abia isi. Idia be sibona edia aonega amo lasi, to Baibel amo sisiba bona hagoadaia herevadia idia henia. Elda taudia idia diba edia maduna be mamoe idia durua ‘Keriso ena laloa idia abia’ totona. (1 Korinto 2:14-16) Hegeregere, bema elda ta be headava taudia edia hekwakwanai ia hamaoromaoroa toho, to Baibel ena hakaua herevadia eiava “hesiai tauna mai ena kamonai, bona mai ena kara maoromaoro” ena sisiba ia gaukaralaia lasi, be edena bamona? (Mataio 24:45) Reana ia be kastom karadia do ia kikilaia momo, bona ena diba be hegeregere lasi unai hekwakwanai ia hamaoromaoroa totona. Momokani, kastom karadia haida be kerere lasi, bona reana elda tauna be guna unai hekwakwanai ia davaria danu. To, bema elda tauna be taunimanima edia lalohadai o kastom ia dadaraia, bona mamoe ia hagoadaia Iesu ena gadona bona Iehova ena hereva idia kamonai henia, mamoe be namo bada do idia abia.—Salamo 12:6; Aonega Herevadia 3:5, 6.
“Hesiai Tauna mai Ena Kamonai, Bona mai Ena Kara Maoromaoro” Ena Hadibaia Karana
15. Dahaka gaukara be Iesu ese hesiai tauna oreana dekenai ia henia, bona dahaka dainai idia kwalimu noho?
15 Mamoe naria taudia, hegeregere Petero, Ioane, bona Paulo be Iesu ese ia gwauraia “hesiai tauna mai ena kamonai, bona mai ena kara maoromaoro” ena orea taudia. Idia be Iesu ena horoa tadikaka tanobada dekenai—guba ai Keriso ida do idia lohia helarona idia abia taudia unai. (Apokalupo 5:9, 10) Hari inai nega dokonai, tanobada ai, Keriso ena horoa tadikaka edia namba be ia maragi noho. To, Iesu ia henia gaukarana—dokona negana lalonai Basileia sivarai namona harorolaia gaukarana—be tanobada hegegemadai ia lao vadaeni. Bona hesiai tauna oreana be idia kwalimu noho! Dahaka dainai? Badina idia ese “mamoe idaudia” idia hadibaia, haroro bona hadibaia gaukarana idia durua totona. (Ioane 10:16; Mataio 24:14; 25:40) Hari, mamoe idaudia mai edia kamonai be unai gaukara ena kahana badana idia karaia noho.
16. Edena dala ai hesiai tauna oreana be idia abia hidi taudia idia hadibaia?
16 Edena dala ai hesiai tauna oreana be tadikaka idia hadibaia? Aposetolo edia negai, hesiai tauna oreana be tatau haida idia gaukaralaia mamoe naria taudia idia hadibaia bona abia hidi totona, unai amo idia hadibaia taudia be kongrigeisen taudia do idia hadibaia. (1 Korinto 4:17) Hari danu be unai bamona. Hakaua Oreana—hesiai tauna oreana ena gwaukau elda taudia unai—be tatau haida ia gaukaralaia, tanobada hegegemadai kongrigeisen hesiai taudia bona elda tausen momo idia abia hidi bona hadibaia. Ma danu, Hakaua Oreana ese ia hegaegaelaia sikuli amo Brens Komiti taudia, loaloa naria taudia, elda taudia, bona hesiai taudia idia hadibaia edena dala ai mamoe idia naria namonamo totona. Hakaua Oreana edia sisiba ma haida be revareva, Gima Kohorona, bona buka idauidau, hegeregere Iehova Ena Ura Ia Karaia Orea bukana,a ai idia halasia.
17. (a) Edena dala ai Iesu be hesiai tauna oreana ia abidadama henia? (b) Edena dala ai mamoe naria taudia be hesiai tauna oreana idia abidadama henia?
17 Iesu be hesiai tauna oreana ia abidadama henia bona ia abia hidi ena “kohu ibounai” tanobada dekenai ia naria totona. (Mataio 24:47) Mamoe naria taudia danu be hesiai tauna oreana idia abidadama henia dainai, Hakaua Oreana amo idia mai sisiba herevadia idia badinaia. Oibe, elda taudia ese ma haida idia hadibaia, bona elda taudia be Baibel bona hesiai tauna oreana edia hadibaia dalana idia badinaia neganai, mamoe oreana lalonai lalotamona ia noho. Ita moale bada badina Iehova be tatau haida ia hadibaia, Keristani kongrigeisen taudia ta ta idia naria namonamo totona!
[Footnote]
a Iehova ena Witnes taudia ese idia karaia.
Edena Bamona Do Oi Haere?
• Edena dala ai lo elda taudia ese ma haida idia hadibaia?
• Dahaka dainai elda taudia be sibona edia aonega amo idia hadibaia lasi?
• Edena dala ai bona dahaka dainai elda taudia be hesiai tauna oreana idia abidadama henia?
[Pictures on page 24, 25]
Keristani elda taudia ese tadikaka matamatadia idia hadibaia
[Pictures on page 26]
“Hesiai tauna mai ena kamonai, bona mai ena kara maoromaoro” ese elda taudia hadibaia gaudia momo idia hegaegaelaia