Ena Abidadama ese Ma Haida Ia Hagoadaia

LAGANI 1992, December ai Silvia ia vara neganai, ia be gorere lasi kekeni maragina ta. To Silvia ena mauri lagani be rua neganai, doketa idia davaria ia be mai ena gorere ta (cystic fibrosis). Unai gorere dainai ia hahodi namonamo lasi, bona ia aniani neganai ena bogana ia hisihisi. Silvia ena gorere dainai, dina ta ta ai muramura idauidau 36 ia inua, spray muramura ta ia gaukaralaia ia hahodi namonamo totona, bona ena tauanina durua totona heduru ma haida ia abia danu. Ena baragi ena kahana ta ia dika dainai, gau badana be oksijen botol be ia badinai ia noho eiava ia lao gabudia dekenai ia abia lao danu.

Silvia ena sinana, Teresa, ia gwau: “Silvia ese ena gorere ia haheaukalaia karana lau hoalaia. Baibel ia diba dainai, ia be mai ena abidadama goadana. Unai abidadama ese ia ia durua ena tauanina ena hisihisi bona lalometau ia haheaukalaia totona. Silvia be hanaihanai Iehova ena gwauhamata, tanobada matamata totona ia laloa, unuseniai gorere taudia ibounai do idia namo lou.” (Apokalupo 21:⁠4) Nega haida ena ruma bese taudia idia lalometau neganai, Silvia ena kiri toana ese edia lalona ia hagoadaia. Iena ruma bese taudia ia hamaorodia: “Tanobada matamata lalonai, do ita abia hahenamo idauidau ese hari ita abia hisihisi ibounai do ia hereaia momokani.”

Silvia be hanaihanai ma haida dekenai Dirava ena Hereva ia harorolaia, bona ia hereva henia taudia be Silvia ena moale toana idia itaia. Canary Islands ai, Silvia ia noho kongrigeisen ena tadikaka bona taihu be Silvia ena haere idia kamonai bona hebou dekenai tok ia henia neganai, idia moale bada. Bona hebou ta ta murinai, Silvia ia ura Kingdom Hall dekenai ia noho, ena Keristani tadikaka bona taihu ia hereva henidia totona. Ia be herevahereva momo bona moale kekenina dainai, kongrigeisen taudia ese ia idia lalokau henia.

Ena tamana Antonio ia gwau: “Silvia amo mai anina bada gauna ta ita dibaia. Ena be mauri lalonai hekwakwanai ita davaria, to mauri be Dirava amo ia mai harihari gauna dainai, ita moalelaia be namo.” Silvia bamona, Dirava ena hesiai taudia ibounai​—⁠matamata bona buruka​—⁠be mai edia ura bada ida tanobada matamatana idia naria, unai nega ai “ta . . . do ia gwau lasi, ‘Lau be gorere.’ ”​—⁠Isaia 33:⁠24.

[Picture on page 31]

Silvia be ruma hahinena dekenai Baibel siri ta ia hahedinaraia bona ena sinana be ena oksijen botol ia dogoatao