Vadivadi ta Dainai, Ta ese Ena Mauri Ia Haidaua

IEHOVA ENA WITNES kekeni rua ese tau ta idia vadivadi henia murinai, unai tau be revareva ta amo ia gwau: Lau ura bada egu ruma bese taudia lau hamaoroa, Dirava ese ‘aneru’ rua ia siaia lau idia vadivadi henia totona. Wiki haida gunanai, ena hahine ia mase, idia be lagani 45 lalonai idia headava. Unai dainai ia lalometau bada. Iena natuna mero bona kekeni ese ia idia hagoadaia, to ena natudia be gabu daudau ai idia noho. Turana eiava dekena tauna ta ese ia idia vadivadi henia lasi.

Unai tau ese taihu matamata rua ia hamaoroa, “Dirava lau guriguri henia lasi, badina lau mamia ia be lau kahirakahira ia noho lasi.” To, unai taihu matamata rua be ia idia hebogahisi henia dainai, Baibel ia herevalaia pepapepa ta ladana, Helaro Namona Mase Taudia Totona be Ia Noho, A? be unai tau dekenai idia henia. Unai pepapepa ia duahia bona unai ese ena lalona ia hagoadaia bada.

Dina haida murinai, unai taihu rua be unai tau idia vadivadi henia lou. Idia laloatao nega ginigunana ai ia idia vadivadi henia neganai, ia lalohisihisi bada, unai dainai idia ura ia idia itaia lou. Unai tau ia gwau, “Lau hoa bada badina lau idia diba lasi taudia rua ese egu namo idia laloa.” Baibel amo idia herevalaia gaudia ese ena lalona ia hagoadaia. Unai taihu rua idia gwau do idia giroa lou. Unai tau be ia moale bada dainai, ataiai ia noho sivaraina be Iehova ena Witnes taudia edia Kingdom Hall ta dekenai ia siaia.

Unai tauna ia ura ena gabu ia haidaua, bona ena natuna kahirakahira ia noho, to ia do lao lasi neganai, ia be Iehova ena Witnes taudia edia Keristani hebouna ta dekenai ia lao, bona unai taihu matamata ta ese ia ia boiria ena ruma bese ida idia aniani hebou totona. Unai tau ia gwau: “Egu gabu do lau rakatania, to unai taihu rua edia kara bona edia dubu be do lau laloaboio lasi, bona idia totona do lau guriguri. Hari egu kara lau haidaua bona lau guriguri momo, badina unai kekeni matamata rua ese lau idia durua bona idia lau tanikiu henia bada.”