Oi be “Gado Goevadaena” Oi Herevalaia Namonamo, A?

Oi be “Gado Goevadaena” Oi Herevalaia Namonamo, A?

“Lau ese bese idauidau edia gado do lau haidaua, gado goevadaena do lau henidia; bena idia ibounai ese Iehova ena ladana do idia hanamoa, bona iena hesiai gaukara be mai edia lalotamona ida do idia karaia.”—SEP. 3:9, BHğ.

1. Iehova ese dahaka harihari gauna namona ia henia ita dekenai?

GADO be taunimanima edia harihari gauna lasi, to ia be Iehova ena harihari gauna. (Eso. 4:11, 12) Ia ese Adamu dekenai diba ia henia, unai amo ia hereva sibona lasi, to hereva matamatadia ia havaraia diba. (Gen. 2:19, 20, 23) Unai be harihari gauna namona! Unai gauna dainai, taunimanima be edia guba Tamana Iehova idia hereva henia bona Iena ladana hereadaena idia hanamoa diba.

2. Dahaka dainai taunimanima be gado tamona ai idia hereva lasi?

² Adamu ena murinai idia noho taudia edia “gado be tamona, edia hereva danu be hegeregere.” (Gen. 11:1) To, gwau-edeede tauna Nimiroda ena negai, taunimanima momo be Iehova ena dala idia badinaia lasi. Idia ibounai be gabu ta—gabeai idia gwauraia Babela—dekenai idia haboua, badina idia ura gabu tamona dekenai idia noho. Vadaeni kohoro badana ta idia haginia, Iehova idia hanamoa totona lasi, to idia sibona edia ladana idia habadaia totona. Unai dainai, Iehova ese unai gwau-edeede taudia edia gado ia haidaua bona idia be gado idauidau ai idia hereva. Momokani, unai ese daradara ia havaraia dainai, idia be tanobada ena kahana ibounai dekenai idia lao.—Genese 11:4-8 duahia.

3. Babela dekenai, Iehova ese gwau-edeede taudia edia gado ia haidaua neganai, dahaka ia vara?

³ Hari inai negai, tanobada hegegemadai taunimanima be gado idauidau 6,800 mai kahana idia gaukaralaia noho. Unai gado ta ta be mai edia herevalaia dalana o grama. Unai ese ia hahedinaraia, Iehova Dirava ese Nimiroda ena negai idia noho taudia edia gado ia haidaua neganai, toana be edia gado gunana be edia lalona amo ia kokia momokani. Bena Ia ese edia lalona dekenai hereva matamata ia atoa bona gado herevalaia dalana o grama ia haidaua. Unai dainai, unai gabu ladana idia gwauraia Babela, anina be daradara! (Gen. 11:9) Momokani, Baibel sibona be taunimanima edia gado ia idau ena badina ia gwauraia.

Gado Goevadaena Bona Matamatana

4. Iseda nega totona, Iehova be dahaka ia perovetalaia?

⁴ Dirava ese Babela dekenai gado ia haidaua karana be Baibel dekenai ita duahia neganai ita hoa. Unai hegeregerena, hari inai negai, Iehova be hoa gauna ta bona mai anina bada gauna ta ia havaraia noho. Iehova be peroveta tauna Sepanaia amo ia gwau: “Lau ese bese idauidau edia gado do lau haidaua, gado goevadaena do lau henidia; bena idia ibounai ese Iehova ena ladana do idia hanamoa, bona iena hesiai gaukara be mai edia lalotamona ida do idia karaia.” (Sep. 3:9, BHğ) Unai “gado goevadaena” be dahaka, bona edena dala ai ita herevalaia namonamo diba?

5. Gado goevadaena be dahaka, bona unai gado matamata dainai dahaka ia vara?

⁵ Unai gado goevadaena be Baibel lalonai ia noho hereva momokani, unai be Iehova Dirava bona Iena ura ia herevalaia. Danu, ia be Dirava ena Basileia ena hereva momokani, unai Basileia ese Iehova ena ladana do ia hahelagaia, iena lohia siahuna ena maoro ia hamomokania, bona kamonai taudia dekenai noho hanaihanai hahenamo do ia mailaia. Unai gado goevadaena dainai dahaka do ia vara? Baibel ia gwau, taunimanima be “Iehova ena ladana do idia noinoi henia” bona “mai edia lalotamona ida” do idia hesiai henia. Unai gado goevadaena dainai taunimanima be Iehova ena ladana idia hanamoa bona lalotamona ai idia noho, Babela dekenai be unai bamona ia vara lasi.

Gado Goevadaena Dibaia

6, 7. (a) Gado ta dibaia karana dekenai dahaka be gau badana? Gado goevadaena dibaia karana be unai bamona danu, a? (b) Hari ita be dahaka do ita herevalaia?

⁶ Tau ta ia ura gado ma ta ia diba neganai, hereva matamatadia ia laloatao sibona be hegeregere lasi. To danu, unai gado matamata idia herevalaia dalana ia dibaia be gau badana. Gado ma ta dekenai taunimanima edia hereva dalana bona hevaseha herevadia be ia idau. Hereva matamata ta oi gwauraia maoro totona, malana gaukaralaia namonamo karana be gau badana. Baibel ena hereva momokani ena gado goevadaena ita dibaia neganai be unai bamona. Baibel ena hahediba hereva badadia ita diba sibona be hegeregere lasi. To, unai gado goevadaena ita diba namonamo totona, iseda laloa dalana ita haidaua be gau badana.—Roma 12:2; Efeso 4:23 duahia.

⁷ Dahaka ese ita do ia durua hereva momokani ena gado goevadaena ita lalopararalaia sibona lasi, to ita herevalaia namonamo totona? Taunimanima be gado ta idia dibaia totona, idia be kara haida idia karaia. Namona be unai kara ita herevalaia, bona ita itaia edena dala ai unai kara ese ita ia durua gado goevadaena ita dibaia totona.

Gado Goevadaena Herevalaia Namonamo

8, 9. Dahaka ita karaia be namo gado goevadaena ita dibaia totona, bona dahaka dainai unai be mai anina bada?

⁸ Kamonai namonamo. Matamanai, reana ta be gado matamata ena hereva ena anina do ia lalopararalaia lasi. (Isa. 33:19) To, taunimanima ese unai gado idia herevalaia dalana ia kamonai namonamo neganai, ia be hereva ta ta bona gwauraia dalana do ia lalopararalaia matamaia. Unai hegeregerena, Baibel ia gwau: “Hereva momokani, ita kamonai vadaeni gauna, do ita dogoatao bona badinaia be namo. Namo lasi ita manokalaia, do ita boio garina.” (Heb. 2:1) Iesu be iena murinai idia raka taudia ia hadibaia loulou, ia gwau: “Mai ena taiana tauna be do ia kamonai.” (Mat. 11:15; 13:43; Mar. 4:23; Luka 14:35) Oibe, hereva momokani ena gado goevadaena ‘ita kamonai bona ena anina ita lalopararalaia.’—Mat. 15:10, NW; Mar. 7:14.

⁹ Ita kamonai namonamo totona, iseda lalona ita biagua be mai anina bada. (Luka 8:18) Keristani heboudia ai, ita be tok ia henia tadikaka ena hereva ita kamonai namonamo eiava gau ma haida ita laloa? Gau badana be, iseda lalona ita biagua bona tok ita kamonai namonamo. Unai bamona ita karaia lasi neganai, tok ena anina do ita lalopararalaia lasi.—Heb. 5:11.

10, 11. (a) Kamonai namonamo karana sibona lasi, to dahaka ita karaia danu be namo? (b) Gado goevadaena ita herevalaia namonamo totona, dahaka danu ita karaia be namo?

¹⁰ Gado idia diba taudia tohotohoa. Nega momo tisa ese gado matamata idia dibaia stiuden taudia ia hagoadaia, gado idia diba taudia edia hereva dalana idia kamonai namonamo sibona lasi, to edia hereva dalana idia tohotohoa danu. Unai ese stiuden taudia ia durua taunimanima idia laloparara dalanai gado idia herevalaia totona. Unai hegeregerena, hereva momokani ena gado goevadaena idia “hadibaia” namonamo taudia ita tohotohoa be namo. (2 Tim. 4:2) Haida edia heduru oi tahua. Ta ese emu kerere ta ia hamaoromaoroa neganai, mai moale ida ena heduru oi abia dae.—Heberu 12:5, 6, 11 duahia.

¹¹ Gado goevadaena ita herevalaia namonamo totona, hereva momokani ita abia dae bona ma haida dekenai ita hadibaia sibona be hegeregere lasi. To danu, Dirava ena taravatu bona hakaua herevadia hegeregerena ita noho be namo. Unai bamona ita karaia totona, ma haida ita tohotohoa be namo. Anina be edia abidadama bona lalogoada ita tohotohoa. Namona be Iesu ena mauri dalana ibounai ita tohotohoa danu. (1 Kor. 11:1; Heb. 12:2; 13:7) Bema unai ita karaia loulou, Dirava ena taunimanima huanai maino do ia noho, bona gado goevadaena tamona do ita herevalaia.—1 Kor. 4:16, 17.

12. Edena dala ai laloatao karana ese gado matamata idia dibaia taudia ia durua diba?

¹² Laloatao karana. Gado matamata idia dibaia stiuden taudia ese hereva matamatadia idauidau idia laloatao be namo. Unai hegeregerena, gado goevadaena idia dibaia Keristani taudia ese gau momo idia laloatao be namo. Momokani, Baibel buka edia ladadia ita laloatao be namo herea. Haida idia gwau idia be Baibel ena siri haida edia hereva idia laloatao toho. Ma haida be Basileia anedia, Israela ena iduhu 12, aposetolo taudia 12 edia ladadia, bona lauma helaga ena huahua ta ta edia ladadia idia laloatao toho. Idaunegai, Israela taudia momo be Salamo ena hereva idia laloatao. Iseda negai, mauri lagani 6 merona ta be Baibel siri ibounai 80 mai kahana ia laloatao. Namona be laloatao karana ita gaukaralaia namonamo, ani?

13. Dahaka dainai hereva gwauraia loulou karana be mai anina bada?

¹³ Hereva gwauraia loulou karana ese ita ia durua hereva ta ita laloatao totona, bona iseda Keristani hadibaia gaukarana lalonai unai be mai anina bada. Petero ia gwau: “Inai gaudia umui diba vadaeni, bona Dirava ena hereva momokani lalonai umui gini goada noho. To lau laloa inai hereva umui dekenai do lau hamaoroa lou nega ibounai, do umui laloaboio garina.” (2 Pet. 1:12) Dahaka dainai hereva momokani ita dekenai idia hadibaia loulou be namo? Badina unai ese iseda laloparara karana ia habadaia, diba ia habadaia, bona ita ia hagoadaia Iehova ita badinaia noho totona. (Sal. 119:129) Dirava ena taravatu bona hakaua herevadia ita riviulaia loulou karana ese ita ia durua sibona eda kara ita tahua bona ita “kamonai kava lasi” totona. (Iam. 1:22-25) Bema hereva momokani ita riviulaia loulou lasi, gau ma haida ese iseda kudouna do ia veria bona gado goevadaena do ita herevalaia lasi.

14. Gado goevadaena ita stadilaia neganai, dahaka ese ita do ia durua?

¹⁴ Duahia hedinarai. (Apok. 1:3, NW ) Stiuden haida be gado matamata idia dibaia totona, buka ta be edia lalona dekenai idia duahia bamona. To, unai ese idia ia durua sisina. Unai dainai, hereva momokani ita stadilaia neganai, nega haida ita duahia hedinarai be namo. Salamo torea tauna ia gwau: “Ma inai taudia ese, Lohiabada ena Taravatu dekenai idia moale, bona Lohiabada ena Taravatu idia laloa [“duahia gado maragina ai,” NW ], dina bona hanuaboi ibounai lalonai.” (Sal. 1:2) Momokani, hereva duahia hedinarai karana ese ita do ia durua, ita duahia gauna ita laloatao totona. Heberu gado herevana idia hahanaia “duahia gado maragina ai” be laloa dobu karana hegeregerena. Ita duahia gaudia ita laloatao totona, laloa dobu karana be mai anina bada. Nega ita atoa ita stadilaia gauna ita laloa dobu totona, a? Baibel ita duahia murinai, ita duahia gauna ita laloa dobu be namo.

15. Edena dala ai gado goevadaena ena “grama” ita stadilaia diba?

¹⁵ Grama stadilaia. Nega haida ita dibaia gado matamata ena grama ita stadilaia be namo. Unai ese ita ia durua gado ena taravatu ita diba totona, unai amo dala maorona ai gado matamata ita herevalaia namonamo diba. Gado ta ta be mai edia grama hegeregerena, gado goevadaena o Baibel ena hereva momokani be mai ena grama o “hadibaia dalana.” (2 Tim. 1:13, NW ) Unai “hadibaia dalana” ita badinaia be namo.

16. Dahaka hekwakwanai ita hanaia be namo, bona edena bamona unai ita karaia diba?

¹⁶ Diba abia noho. Ta be gado matamata ia dibaia bona ia herevalaia namonamo diba, to gabeai unai gado ia gaukaralaia noho lasi. Gado goevadaena idia herevalaia taudia dekenai unai hekwakwanai ia vara diba. (Heberu 5:11-14 duahia.) Dahaka ese ita ia durua diba unai hekwakwanai ita hanaia totona? Namona be mai iseda ura ida hereva matamata ma haida ita dibaia noho. Baibel ia gwau: “Keriso ena hadibaia hereva, diba hamatamaia gaudia ita rakatania. Bona iena hereva badadia do ita tahua. Sivarai Namona ena hadibaia hereva, diba hamatamaia gaudia, hegeregere kara dika dekena amo lalona giroa, bona Dirava abidadama henia, inai gaudia sibona do ita gwauraia lou, gwauraia lou, be hegeregere lasi. Ma bapatiso, imana kwarana dekenai atoa, mase dekena amo toreisi lou, bona kara dika ena kota henia hanaihanai, unai be hadibaia hereva, hamatamaia gaudia sibona.”—Heb. 6:1, 2.

17. Dahaka dainai hanaihanai sibona eda stadi ita karaia be mai anina bada? Haheitalai gwauraia.

¹⁷ Stadi negadia abia hidi. Hanaihanai nega kwadogi lalonai oi stadi ena namo be bada, to nega ta ta ai nega bada lalonai oi stadi ena namo be maragi. Sibona emu stadi oi karaia negadiai, namona be emu tauanina ia hesiku lasi bona lalona veria gauna ta ia noho lasi. Gado matamata dibaia karana be hegeregere uda badana lalonai raka dalana oi karaia bamona. Bema nega ibounai unai dala dekenai oi raka lao raka mai, vadaeni do oi hekwarahi lasi. To bema unai dala oi gaukaralaia momo lasi, uda ese unai dala do ia koua lou. Momokani, namona be nega ibounai ita stadi! (Dan. 6:16, 20) Baibel ena hereva momokani ena gado goevadaena oi herevalaia neganai, namona be oi guriguri, oi hesiku lasi, bona nega ibounai oi noho hegaegae.—Efe. 6:18.

18. Dahaka dainai gado goevadaena be nega ibounai ita gaukaralaia be namo?

¹⁸ Herevalaia noho. Gado matamata idia dibaia taudia haida be idia ura lasi gado matamata idia herevalaia, badina idia hemarai o idia ura lasi hereva kerere idia gwauraia. To unai ese idia do ia koua gado matamata idia dibaia namonamo totona. Gado matamata idia dibaia stiuden taudia dekenai, unai gado herevalaia loulou karana be mai anina bada. Unai bamona idia karaia neganai, idia be unai gado do idia manadalaia. Unai hegeregerena, hereva momokani ena gado goevadaena be nega ibounai ita gaukaralaia be namo. Baibel ia gwau: “Iseda kudouna ena abidadama dekena amo Dirava ena vairanai do ita maoromaoro, bona inai abidadama be iseda uduna dekenai ita gwauraia hedinarai, be mauri do ita davaria.” (Roma 10:10) Bapatiso negana ai iseda abidadama ita “gwauraia hedinarai” sibona lasi, to nega ibounai—haroro gaukara lalonai danu—Iehova ena ladana ita herevalaia be namo. (Mat. 28:19, 20; Heb. 13:15) Iseda Keristani hebou ai hereva kwadogidia bona taunimanima idia lalopararalaia dalanai hereva momokani ena gado goevadaena ita herevalaia.—Heberu 10:23-25 duahia.

Mai Lalotamona ida Gado Goevadaena Gaukaralaia Iehova Hanamoa Totona

19, 20. (a) Iehova ena Witnes taudia be dahaka gaukara namona idia karaia noho? (b) Emu lalona oi hadaia dahaka oi karaia totona?

¹⁹ Bema lagani 33 C.E. ai, Sunday daba ena Sivan 6 ai, oi be Ierusalema dekenai oi noho be moale bada gauna! Unai daba ai, nain o’klok ia do abia lasi neganai, ruma ta ena atai daiutuna ai idia hebou taudia be hoa dalanai “gado idauidau dekenai idia hereva.” (Kara 2:4) Hari inai negai, Dirava ena hesiai taudia dekenai be unai bamona ia vara lasi. (1 Kor. 13:8) To, Iehova ena Witnes taudia ese Basileia ena sivarai namona be gado idauidau 430 mai kahana ai idia harorolaia noho.

²⁰ Ita moale badina herevana edena gado ai ita hereva, to ita be mai lalotamona ida Baibel ena hereva momokani ena gado goevadaena ita herevalaia diba! Unai be Babela ai ia vara gauna amo ia idau. Iehova ena taunimanima be mai lalotamona ida Iena ladana idia hanamoa. (1 Kor. 1:10) Namona be iseda lalona ita hadaia, tanobada hegegemadai iseda tadikaka bona taihu danu mai lalotamona ida gado goevadaena ita dibaia bona herevalaia namonamo noho, iseda guba Tamana Iehova ita hanamoa totona.—Salamo 150:1-6 duahia.

Edena Bamona Do Oi Haere?

• Gado goevadaena be dahaka?

• Gado goevadaena ita herevalaia namonamo totona, dahaka ita karaia be namo?

• Dahaka ese ita do ia durua gado goevadaena ita herevalaia namonamo totona?

[Box on page 23]

Gado Goevadaena Herevalaia Namonamo Karana Hanamoa Daladia

◆ kamonai namonamo.

Luka 8:18; Heb. 2:1

◆ gado idia diba taudia tohotohoa.

1 Kor. 11:1; Heb. 13:7

◆ laloatao karana bona hereva gwauraia loulou karana.

Iam. 1:22-25; 2 Pet. 1:12