Maria be Dirava Ena Ura Ia Karaia

NEGA ta ai, Iesu be haroro gaukara ia karaia lalonai, hutuma huana amo hahine ta ia boiboi: “Oi ia havaraia, bona oi dekenai rata ia henia hahine be mai moale bada.” Unai negai Iesu ia gwau taunimanima ese ena sinana Maria idia tomadiho henia be namo, a? Lasi, to ia gwau: “Gau badana momokani be inai, Dirava ena hereva idia kamonaia bona idia badinaia taudia be idia moale bada.”​​—⁠Luka 11:​27, 28.

Iesu be ia murinai idia raka taudia o ma haida ia hamaoroa ena sinana idia tomadiho henia be namo, a? Lasi. To, momo ese Maria idia tomadiho henia be edena bamona? Namona be taunimanima ese Maria idia herevalaia daladia haida bona Baibel ena lalohadai ita itaia.

“Hahine Ibounai Edia Huanai Oi Sibona be Namo Herea!”

Nega ta ai, aneru Gabriela be Maria ia hadibaia, ia be Dirava ena ura gauna ta do ia karaia. Ia ese Maria ia hanamoa, ia gwau: “Kekeni e, namo do oi davaria, badina Lohiabada be oi danu ia noho, bona oi ia hanamoa bada herea vadaeni.” (Luka 1:​28) Daudau lasi murinai, Elisabeta be Maria ia hanamoa, ia gwau: “Hahine ibounai edia huanai oi sibona be namo herea! Oi ese do oi havaraia merona danu be do ia namo bada herea!” (Luka 1:​42) Gabriela bona Elisabeta edia hereva ese idia hahedinaraia, idia be Maria idia tomadiho henia, a?

Lasi. Ena be Katolik taudia be Maria idia guriguri henia neganai Luka 1:​28, 42 ena hereva idia gaukaralaia, to Baibel be Maria guriguri henia karana ia kikilaia lasi. Baibel ese ia hahedinaraia Gabriela bona Elisabeta be Maria idia guriguri henia lasi, to ia idia hanamoa badina Mesia do ia havaraia. Danu, Iesu ena hahediba taudia edia noinoi dainai, Iesu be idia dekenai guriguri dalana ia hadibaia neganai, ia be ena Tamana sibona guriguri henia karana ia herevalaia. Unai guriguri ena hamatamaia herevana be inai: “Aiemai Tamana e, guba dekenai oi noho.”​​—⁠Mataio 6:⁠9.

Lohia Hahinena

Momo ese idia abia dae hahediba hereva badana ta be inai: Maria be “guba ena Kwini.” To, Baibel ese Maria be unai bamona ia herevalaia lasi. Ia hahedinaraia gauna be inai: Dirava ena guba gavamani lalonai Maria be mai ena gaukara. Unai gaukara be dahaka?

Iesu ese ia hahedinaraia, ena hahediba taudia haida be ia ida ena Basileia lalonai do idia lohia hebou. (Luka 22:​28-​30) Iesu ese idia dekenai siahu do ia henia, vadaeni idia be “Dirava ena hahelagaia taudia” ai do idia lao bona “tanobada do idia gunalaia.” (Apokalupo 5:​10) Baibel ese ia hahedinaraia, toana be Maria danu be unai gaukara badana do ia durua. Unai be edena bamona ita herevalaia diba?

Mani oi laloa: Iesu ia mase murinai, Maria be Iesu ena tadina bona hahediba taudia ida “nega momo guriguri totona idia haboua.” Unai hebou dekenai idia noho taudia be 120 bamona, “hahine haida danu idia dekenai idia haboua.” (Kara 1:​12-​15) Baibel ia gwau, “Pentekoste ena dina ia ginidae neganai, Iesu idia abidadama henia taudia ibounai gabu tamona dekenai idia haboua,” bona Dirava ese ena lauma helaga ia bubua neganai, idia be gado idauidau ai idia hereva.​​—⁠Kara 2:​1-4.

Maria bona hahine ma haida be unai lauma helaga ena hahenamo idia abia, bona unai ese ia hahedinaraia idia danu be Iesu ena guba Basileia lalonai do idia lohia. Unai dainai, ita gwau diba hari inai nega lalonai, Maria be Iesu ida guba dekenai idia noho. (Roma 8:​14-​17) Maria bona Iesu ida do idia lohia taudia ma haida ese Dirava ena ura do idia karaia daladia haida mani ita itaia.

Gaukara Namodia Do Idia Karaia

Baibel bukana Apokalupo ia gwau, taunimanima 144,000 be mase amo idia toreisi lou bona guba dekenai idia daekau neganai, idia be hahelaga taudia, hahemaoro taudia, bona king taudia ai do idia lao bona Iesu ida do idia gaukara hebou. (Apokalupo 14:​1, 4; 20:​4, 6) Iesu ena boubou gauna dainai, unai hahelaga taudia be taunimanima ibounai do idia durua Iehova idia tura henia, kara namodia idia karaia, bona idia goevadae totona. (Apokalupo 21:​1-4) Iehova idia tomadiho henia taudia ibounai dekenai, unai be moale negana bona hahenamo badana!a

Idaunegai bona hari inai negai, Maria be Dirava ena ura ia karaia. Iena manau, abidadama, kamonai karana, sinana ena maduna ia huaia namonamo karana, bona hisihisi momo ia haheaukalaia karana ita tohotohoa be namo. Maria ita matauraia bada be maoro, badina ia be Mesia ia havaraia hahinena bona taunimanima durua gaukarana do ia karaia ela bona hanaihanai.

To Maria amo ita dibaia gauna hereadaena be inai: Ia bona Dirava idia abidadama henia taudia ma haida be dirava ma haida idia tomadiho henia lasi, to Iehova idia tomadiho henia. Maria bona guba ai Keriso ida do idia lohia taudia ma haida be idia boiboi: “Helai gabuna badana dekenai ia helai Diravana [Iehova], bona Mamoe ena Natuna [Iesu Keriso] be, hanamoa, bona hairai, bona mataurai, bona siahu do idia abia, ela bona hanaihanai.”​​—⁠Apokalupo 5:​13; 19:⁠10.

[Footnote]

[Blurb on page 10]

Maria ena manau, abidadama, bona kamonai karana ita tohotohoa be maoro