Ekskius Herevadia Iehova ese Edena Bamona Ia Lalodia?

TAU ia gwau, “Oi ese oi karaia lau dekenai hahine ese unai au huahua lau dekenai ia henia, bona lau ania.” Hahine ia gwau, “Gaigai ese lau dekenai ia koikoi, bona lau ania.” Unai hereva be Adamu bona Heva ese Dirava dekenai idia gwauraia. Unai nega amo ema bona hari taunimanima be ekskius herevadia idia gwauraia.​—⁠Gen. 3:​12, 13.

Adamu bona Heva be mai edia ura ida idia gwau-edeede dainai Iehova ese ia kota henidia karana amo ia hahedinaraia, edia ekskius herevadia ia abia dae lasi. (Gen. 3:​16-19) Ita gwau diba Iehova ese ekskius hereva ibounai ia abia dae lasi, a? Eiava ekskius mai edia badina maorodia ia abia dae? Bema oibe, ekskius mai edia badina maorodia bona ekskius mai edia badina maorodia lasi edia idau be edena bamona ita dibaia? Unai ita haerelaia totona, namona be ekskius ena anina ita tahua guna.

Inai hereva ekskius idia gaukaralaia, gau ta idia karaia vadaeni, o idia karaia lasi, o do idia karaia lasi ena badina idia hahedinaraia totona. Ta be ekskius herevana ia gwauraia, kerere ta ena badina maorona ia hahedinaraia, bona ia hahedinaraia ia sori momokani, unai amo idia hebogahisi henia bona ena dika idia gwauatao diba. To, Adamu bona Heva dekenai ia vara hegeregerena, ta ese ekskius herevana ia gwauraia amo ia karaia kererena ena badina korikorina ia hunia. Nega momo ekskius be unai bamona idia gaukaralaia dainai, taunimanima ese idia abia dae haraga lasi.

Dirava ena hesiai gaukara dekenai ekskius herevadia ita gwauraia neganai, namona be ita naria namonamo ‘lalohadai koikoi amo ita sibona ita koia’ garina. (Iam. 1:​22, NW ) Unai dainai, namona be Baibel ai haheitalai bona hakaua herevadia haida ita itaia, unai ese ita do ia durua ‘Lohiabada ia ura henia karadia ita tahua’ totona.​—⁠Efe. 5:⁠10.

Dirava Ia Ura Do Ita Karaia Gaudia

Ita be Iehova ena taunimanima dainai, Baibel ai idia noho hahegani idauidau ita badinaia be namo. Hegeregere, Keriso ena hahegani, “do umui lao, bese ibounai be diba tahua taudia do umui halaoa” be Keriso murinai idia raka taudia momokanidia ese idia badinaia noho. (Mat. 28:​19, 20) Unai hahegani ita badinaia be mai anina bada, badina aposetolo Paulo ia gwau: “Sivarai Namona lau harorolaia lasi neganai, madi, lau be dika momokani!”​—⁠1 Kor. 9:⁠16.

To, lagani daudau lalonai ita stadi henia taudia haida be idia hemarai dainai, idia ura lasi Dirava ena Basileia ena sivarai namona idia harorolaia. (Mat. 24:14) Ma haida be guna haroro gaukara idia karaia, to hari unai gaukara idia karaia lasi. Dahaka badina haida dainai haroro gaukara idia karaia lasi? Idaunegai Iehova ena hahegani idia ura lasi badinaia taudia be Ia ese edena bamona ia kara henidia?

Dirava ese Ia Abia Dae Lasi Ekskius Herevadia

“Haroro gaukara lau karaia be auka.” Idia gari momo taudia dekenai, haroro gaukara idia karaia be auka. To, Iona ena haheitalai amo do ita dibaia gauna mani ita laloa. Iehova ese gaukara aukana ta ia henia​—⁠ia hamaoroa Nineva taudia be dika do idia davaria ena sivarai do ia harorolaia. Ita laloparara dahaka dainai Iona ia ura lasi unai gaukara ia karaia. Nineva be Asuria ena hanua badana, bona Asuria taudia be dagedage bada taudia. Reana Iona ia laloa: ‘Unai taudia huanai edena bamona do lau haroro? Lau dekenai dahaka do idia karaia?’ Daudau lasi murinai, ia heau. To, Iehova ese Iona ena ekskius karana ia abia dae lasi. Ia ese Iona dekenai gaukara ia henia lou, Nineva taudia ia haroro henia totona. Unai negai, Iona be mai gari lasi ida ena hesiai gaukara ia hagugurua, bona Iehova ese ia hanamoa.​—⁠Iona 1:​1-3; 3:​3, 4, 10.

Bema oi laloa sivarai namona harorolaia gaukarana oi karaia be auka, namona be oi laloatao “Dirava ese gau ibounai ia karaia diba.” (Mar. 10:27) Namona be oi diba momokani Iehova ena heduru oi noia noho neganai, Ia ese oi do ia hagoadaia bona oi do ia hanamoa bema mai gari lasi ida haroro gaukara oi karaia.​—⁠Luka 11:​9-13.

“Lau ura lasi haroro gaukara lau karaia.” Bema mai kudouna ibounai ida haroro gaukara oi karaia lasi, dahaka do oi karaia be namo? Iehova be kara ta do ia karaia emu ura ia habadaia totona. Paulo ia gwau: “Dirava ese umui emui lalona dekenai ia gaukara noho. Ia ese ura namodia bona goada umui dekenai ia henia noho, vadaeni iena ura karadia do umui karaia.” (Fili. 2:13) Unai dainai, Iehova oi noia oi ia hagoadaia ena ura oi karaia totona. King Davida be unai bamona ia karaia. Iehova ia noia: “Oiemu hereva momokani ena dala dekenai, lau do oi hakaua.” (Sal. 25:​4, 5) Oi danu, bema mai momokani ida Iehova oi guriguri henia, vadaeni Ia ese oi do ia durua ia moalelaia karadia oi karaia totona.

Nega haida ita hesiku o lalomanoka neganai, namona be sibona ita doria hebou ita lao henia eiava haroro gaukara ita karaia totona. Bema unai bamona ita karaia, ita gwau diba unai be Iehova lalokau henia lasi karana, a? Lasi. Idaunegai Dirava ena hesiai taudia haida danu be idia hekwarahi Dirava ena ura idia karaia totona. Hegeregere, Paulo ia gwau ia be ‘iena tauanina ia botaia,’ Dirava ena hahegani ia badinaia totona. (1 Kor. 9:​26, 27) Ena be sibona ita doria haroro gaukara ita karaia totona, to ita diba Iehova be ita do ia hanamoa. Dahaka dainai? Iehova ita lalokau henia dainai Iena ura ita karaia. Unai bamona ita karaia neganai, ita ese Satani ena hereva, Dirava ena hesiai taudia be hahetoho lalonai Ia do idia rakatania herevana unai, ita haerelaia.​—⁠Iobu 2:⁠4.

“Lau bisi bada.” Bema oi laloa oi bisi bada dainai haroro gaukara oi karaia lasi, namona be emu mauri lalonai mai anina bada gaudia oi laloa lou. Iesu ia gwau: “Dirava ena Basileia . . . do umui tahua guna.” (Mat. 6:33) Unai hakaua herevana oi badinaia totona, emu noho dalana oi haidaua o moale karadia dekenai oi haorea negana oi gaukaralaia haroro gaukara oi karaia totona. Oibe, moale karadia bona sibona emu ura gaudia ma haida be edia gabu korikori ai oi atoa, to unai gaudia dainai haroro gaukara oi karaia lasi be ekskius maorona lasi. Dirava ena hesiai taudia edia mauri lalonai Basileia ena gaukara idauidau idia atoa guna.

“Lau be hegeregere lasi.” Reana oi laloa oi be hegeregere lasi sivarai namona oi harorolaia totona. Baibel negadiai Iehova ena hesiai taudia haida idia laloa idia be hegeregere lasi Iehova ese ia henia gaukara idauidau idia karaia totona. Mose ena haheitalai oi laloa. Iehova ese gaukara ta ia henia neganai, Mose ia gwau: “Lauegu Lohiabada e, lau be hereva dekenai egu malana be ia haraga lasi, guna ia mai bona harihari lau dekenai oi hereva neganai danu. Badina lau be hereva goada lasi tauna, egu malana danu ia haraga lasi, hereva dekenai danu lau daradara.” Ena be Iehova ese ia hagoadaia, to Mose ia gwau: “Egu Lohiabada e, mani emu kara idau tauna ta do oi siaia.” (Eso. 4:​10-13) Iehova be dahaka ia karaia?

Iehova be Mose dekenai unai gaukara ia henia. To, Iehova ese Arona ia abia hidi Mose ia durua unai gaukara idia karaia totona. (Eso. 4:​14-17) Danu, Iehova be Mose ia hagoadaia bona ia durua ena hesiai gaukara ia hagugurua totona. Hari inai negai, namona be oi abia dae Iehova be tadikaka taihu do ia gaukaralaia oi idia durua, emu haroro gaukara oi karaia totona. Gau badana be, Baibel ese ita ia hadibaia, Iehova be ita do ia durua unai amo do ita hegeregere ita dekenai ia henia gaukarana ita karaia totona.​—⁠2 Kor. 3:5; maua ladana, “Egu Mauri Lalonai Lau Moalelaia Bada Laganidia,” itaia.

“Ta ese egu lalona ia hahisia.” Ta be tadikaka o taihu ta ese ena lalona ia hahisia dainai, haroro gaukara o kongrigeisen heboudia dekenai ia lao lasi. Unai badina dainai hesiai gaukara ia karaia lasi bona ia laloa Iehova ese unai ia abia dae. Vaia, ta ese iseda lalona ia hahisia neganai, ita moale lasi, to unai badina dainai hesiai gaukaradia ita karaia lasi be ekskius maorona, a? Paulo bona Banaba be idia lalotamona lasi dainai idia huanai “hepapahuahu badana ia vara” bona reana unai murinai ta ta dekenai idia moale lasi. (Kara 15:​39, NW ) To unai ia vara dainai edia haroro gaukara idia hadokoa, a? Lasi.

Unai hegeregerena, bema tadikaka o taihu ta ese oi ia hahisia, namona be oi laloatao oi emu inai tauna be emu Keristani tadikaka lasi, to Satani, bona ia ura oi ia hamorua. To, bema oi be ‘emu abidadama dekenai do oi gini goada,’ Diabolo do ia kwalimu lasi. (1 Pet. 5:​8, 9; Gal. 5:15) Unai bamona abidadama oi hahedinaraia neganai, do oi “lalohisihisi lasi.”​—⁠Roma 9:​33, NW.

Iseda Goada Ia Hegeregere Lasi Neganai, Dahaka Do Ita Karaia?

Ekskius hereva idauidau idia gwauraia taudia edia haheitalai ese ia hahedinaraia goevagoeva, Baibel ia gwau lasi Iehova ia henia hahegani idauidau​—⁠sivarai namona harorolaia gaukarana danu​—⁠dekenai ekskius herevadia ita gwauraia. To, reana badina maorodia haida dainai haroro gaukara ita karaia be hegeregere lasi. Reana Baibel ese ia gwauraia maduna haida ita huaia dainai, nega bada ita atoa lasi haroro gaukara ita karaia totona. Danu, reana nega haida ita hesiku o gorere dainai, ita hegeregere lasi Iehova ena hesiai gaukara ita habadaia totona. To, Baibel ese ita ia hagoadaia, Iehova be iseda kudouna ena ura ia diba bona ia laloparara iseda goada be mai ena hetoana.​—⁠Sal. 103:14; 2 Kor. 8:⁠12.

Unai dainai, namona be ita naria namonamo ita sibona o ma haida ita hahemaoro henia lasi. Aposetolo Paulo ia gwau: “Oi be daika, bona ma ta ena hesiai tauna oi hahemaoro henia? Iena biaguna sibona ese do ia abia hidi bema ia be do ia gini eiava do ia moru.” (Roma 14:​4, NW ) Iseda noho dalana be ma haida ida ita hahegeregerea lasi, to namona be ita laloatao “ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.” (Roma 14:12; Gal. 6:​4, 5) Guriguri amo Iehova ita noia bona iseda ekskius herevadia edia badina korikori ita gwauraia neganai, ita ta ta ita ura mai “lalomamina” goevana ida unai ita karaia.​—⁠Heb. 13:​18, NW.

Iehova Hesiai Henia Karana Dekenai Ita Moale Ena Badina

Ita ibounai be mai moale ida Iehova ita hesiai henia, badina Iena taravatu be hanaihanai idia maoro bona ita badinaia diba, herevana eda noho daladia be idauidau. Dahaka dainai unai bamona ita hereva?

Baibel ia gwau: “Bema dika ese taunimanima namodia ia hadikaia, bona bema oi be mai oiemu dala do oi durudia neganai, oiemu durua do oi koua lasi.” (Aon. 3:27) Unai siri dekenai Dirava ena ura be dahaka? Iehova be oi ia hamaoroa lasi, emu goada be emu tadikaka ida oi hahegeregerea, to namona be emu goada hegeregerena ai Ia oi hesiai henia. Oibe, ita ta ta​—⁠herevana eda tauanina ia manoka o goada​—⁠be mai kudouna ibounai ida Iehova ita hesiai henia diba.​—⁠Luka 10:27; Kol. 3:⁠23.

[Box/​Picture on page 14]

“Egu Mauri Lalonai Lau Moalelaia Bada Laganidia”

Ena be iseda lalona o tauanina ena goada be hegeregere lasi, to namo lasi ita gwau unai ese ita ia koua haroro gaukara ita karaia totona. Canada ai, tadikaka ta ladana, Ernest dekenai ia vara gauna ita laloa.

Ernest be ia hereva namonamo lasi bona ia hemarai. Ena doruna dekenai bero badana ta ia davaria murinai, ena konstraksen gaukara amo ia doko. Ena be unai bero ia davaria, to unai ese ia koua lasi ena haroro gaukara ia habadaia totona. Kongrigeisen heboudia ai heduru painia taudia hagoadaia herevana ese ena lalona ia veria unai gaukara ia karaia totona. To, ia mamia ia be hegeregere lasi unai bamona hesiai gaukara ia karaia totona.

Ia ura ia tohoa iena goada be hegeregere heduru painia do ia karaia o lasi, unai dainai aplikeisen ia atoa heduru painia be hua ta lalonai ia karaia totona. Ia moale bada, badina unai gaukara ia hagugurua. Bena sibona ia laloa, ‘Lau diba inai gaukara be do lau karaia lou lasi.’ Ena hereva ia hamomokania totona, ia be aplikeisen ia atoa lou, hua ma ta lalonai heduru painia ia karaia totona, bona unai ia hagugurua.

Ernest be lagani ta lalonai heduru painia gaukara ia karaia, to ia gwau: “Lau diba regula painia gaukara lau karaia diba lasi.” Ena hereva ia hamomokania totona, ia be aplikeisen ia atoa, regula painia gaukara do ia karaia. Lagani ta lalonai regula painia gaukara ia hagugurua neganai, ia moale bada. Ena lalona ia hadaia regula painia gaukara ia karaia noho totona, bona mai moale ida unai gaukara be lagani rua lalonai ia karaia ela bona ena bero ena hisihisi ia bada dainai ia mase. To, ia do mase lasi neganai, nega momo ia idia vadivadi henia taudia be mai tai ida ia hereva henia: “Iehova hesiai henia totona painia gaukara lau karaia laganidia be egu mauri lalonai lau moalelaia bada laganidia.”

[Picture on page 13]

Haroro gaukara ia koua gaudia idauidau ita hanaia diba

[Picture on page 15]

Iehova ia moale bema eda noho dalana hegeregerenai Ia ita hesiai henia mai kudouna ibounai ida