Mauri Sivaraina
Dirava Ena “Imana Idibana ai Moale Gaudia Idia Noho”
Lois Didur ese ia sivarailaia
‘Dahaka dainai inai abia hidi lau karaia?’ Reana nega haida oi be unai bamona oi henanadai. Lagani 50 lalonai ful-taim hesiai gaukara lau karaia, bona lau itaia Iehova ena imana idibana amo gau namodia lau davaria. Mani unai lau herevalaia.
LAU be lagani 1939 ai lau vara, bona egu taihudia foa bona tadina mero ida Saskatchewan, Canada dekenai ai bada. Ai be farm maurina ai moalelaia. Dina ta, Iehova ena Witnes taudia be egu tamana idia haroro henia neganai, idia lau nanadaia bema Dirava be mai ena ladana. Idia ese Salamo 83:18 ai Iehova ena ladana idia hahedinaraia. Unai nega amo lau ura Dirava bona ena Hereva lau diba.
Unai negadiai, farm ai idia noho natudia be greid 1 ia lao 8 idia karaia. Sikuli idia lao totona hosi idia guia o kilomita momo idia raka. Sikuli tisa taudia be famili ta ta ida idia noho. Bona lagani ta, emai tisa matamata ladana John Didur be ai ida ia noho.
Lau diba lasi John be Dirava ena Hereva ia ura henia tauna. Nega ta lau be komiunis bona sosolis gavamani lau hanamoa badina egu tamana be unai gavamani ia durudia, to John ia gwau: “Tau ta be maoro lasi taunimanima ia lohiaia totona. Dirava sibona be mai ena maoro.” Unai nega amo mai anina bada gaudia momo ai kikilaia hebou.
John be lagani 1931 ai ia vara, bona tuari ese taunimanima edia mauri ia hadikaia sivarai momo ia kamonai. Lagani 1950 ai, dubu gunalaia taudia be Korea ai ia vara tuarina idia durua dainai, John be ia daradara bona idia ia nanadaia. Ibounai idia gwau Keristani taudia idia tuari be maoro. Gabeai, John ese Iehova ena Witnes taudia ia nanadaia danu. Baibel amo idia hahedinaraia Keristani taudia ginigunadia be tuari lalonai idia vareai lasi. Lagani 1955 ai John ia bapatiso bona lau be 1956 ai lau bapatiso. Ai ruaosi emai ura be Iehova do ai hesiai henia, bona July 1957 ai, ai headava.—Sal. 37:3, 4.
Lagani ta ta ena hebouhebou be July ai ai abia, bona unai negadiai emai headava dinana ai laloatao danu. Ai moale badina headava idia matauraia taudia momo huanai ai noho. Lagani 1958 ai intanesinol hebouhebou ginigunana dekenai ai lao. Wiki ta lalonai ai ibounai faiv be motuka amo ai lao New York City. Dinai ai heau, to hanuaboi ai palai ruma lalonai ai mahuta. Bethlehem, Pennsylvania ai, tadikaka ta ai hedavari henia. Ena be ai ia diba lasi to ena ruma dekenai ai ia abia dae! Iena heabidae karana dainai, New York City dekenai ai ginidae neganai, emai dabua bona toana be ia goeva. Unai hebouhebou ese ai ia durua emai hesiai gaukara ai moalelaia totona! Oibe, Salamo torea tauna ena hereva bamona, Iehova ena “imana idibana ai moale gaudia idia noho hanaihanai.”—Sal. 16:11, BHğ.
PAINIA GAUKARA
Lagani 1959 ai, Saskatchewan dekenai painia gaukara ai karaia bona treila maragina ta dekenai ai noho. Ai be ororo ataiai ai noho dainai gabu daudaudia ai itaia diba. Unai gabu daudaudia haida be emai haroro teritori.
Dina ta, brens opesi amo revareva ta ai abia. John be trakta ia hanamoa noho lalonai, ia dekenai unai revareva lau abia lao. Ai idia hadibaia Red Lake, Ontario dekenai spesel painia gaukara do ai karaia. Unai gabu ai diba lasi dainai mapu dekenai ai tahua.
Red Lake be emai hanua amo ia idau! Unuseniai uda badadia bona golo maini kahirakahira taoni maragidia idia noho. Dina ginigunana ai, noho gabuna ai tahua bona hahine ta ai hereva henia lalonai, kekeni maragi ta ia kamonai bona ena sinana ia hadibaia. Edia ruma dekenai ai idia abia dae bona ruma henunai ia noho daiutu maragina ta dekenai ai mahuta. Daba ai, ruma ta mai ena daiutu rua ai davaria. Unuseniai ranu bona kohu ta be lasi, to lahi karaia gabuna ta sibona. Sekenhen amo kohu haida ai hoia bona emai ruma ai hanamoa.
Ai noho gabuna ai kongrigeisen be lasi. Maini ai idia gaukara taudia momo be Europe amo idia mai, bona ai idia noia edia gado Baibel do ai mailaia. Daudau lasi, ai be Baibel stadi 30 ai karaia. Hua siks lalonai kongrigeisen maragina ta ai hamatamaia.
Ai stadi henia hahinena ta ena tau be ena pris ia rini henia. Ia ura pris ese do ia hahedinaraia ai hadibaia herevadia be koikoi. Pris ia gwau, ai ese Toi Tamona bona gau ma haida ai hadibaia be namo. Hahine ese Katolik edia Baibel ia abia bona pris ia hamaoroa Baibel amo ena hereva do ia hamomokania. To pris ese teibolo dekenai Baibel ia negea bona ia gwau ena hereva ia hamomokania be anina lasi. Ia raka neganai, Ukraine gado ai ia gwau, edia ruma amo ai do idia lulua bona abia dae lou lasi. To, ia diba lasi John be Ukraine gado ia diba! Unai hahine ena tau be pris ena kara dainai, gabeai Baibel ia stadilaia matamaia.
Daudau lasi murinai, Red Lake ai rakatania badina John be sekit gaukara ena treinini do ia abia. Lagani ta murinai, distrik hebouhebou ta ai John be bapatiso tok ia henia neganai, unai hahine ena adavana be do idia bapatiso taudia huanai ia helai!
SEKIT GAUKARA
Sekit gaukara ai karaia neganai, ai moale badina ruma bese idauidau ida ai noho. Idia momo be emai tura namodia ai idia lao. Nega ta, ai noho rumana ai ruma lalona hasiahua gauna be lasi. Daba maragi ai, taihu burukana ta be emai daiutu ia vareai bona lahi ia karaia emai daiutu ia hasiahua totona. Gabeai, ai digu totona disi ta dekenai ranu siahu ia mailaia. Iena kara namodia amo gau momo lau dibaia.
Sekit gaukara ese lau ia durua Iehova kahirakahira lau lao totona. Emai teritori ta be Alberta ena Not Kahanai ia noho maini taoni ta, bona unuseniai taihu ta ia noho. Iehova ena orea be edena bamona ia hahedinaraia unai taihu ia laloa bada? Hua siks murinai, unuseni ai lao bona wiki ta ia ida ai haroro bona hebou ai karaia, kongrigeisen badadia dekenai ai karaia bamona. Unai ese ai ia hadibaia Iehova ese ena mamoe maragidia ta ta ia lalokau henia.
Edia ruma dekenai ai idia abia dae tadikaka taihu momo ida ai tore heheni. John ese lau ia henia harihari gauna ginigunana lau laloatao; ia be boksi hairaina ta, bona revareva torea pepadia amo ia honu. Unai pepa amo emai turadia ai tore henidia, bona unai kara ai moalelaia. Unai boksi hairaina lau do dogoatao noho.
Toronto ai sekit gaukara ai karaia lalonai, Canada ena Betele amo tadikaka ta ese ai ia rini henia bona ai ia nanadaia bema ai ura Betele gaukara ai karaia. Bona ia ura kerukeru haere do ai henia!
BETELE GAUKARA
Asainmen idauidau ai, Iehova ena imana amo ia mai hahenamo idauidau ai itaia. Lagani 1977 ai, Betele dekenai ai vareai neganai, Iehova be ai ia hanamoa noho. Horoa taudia haida ida ai gaukara hebou dainai idia ta ta ai diba namonamo, bona ai itaia idia be Dirava ena Hereva idia laloa bada.
Betele maurina ai moalelaia. Hegeregere, hari emai dabua be sutkeisi lalonai lasi to doroa lalonai ai atoa, bona kongrigeisen tamona ai bamoa. Egu Betele gaukara lau karaia, to nega haida Betele idia vadivadi taudia lau abia loaloa danu, bona unai lau moalelaia. Idia dekenai Betele ena gaukara lau herevalaia, edia lalohadai lau kamonai, bona edia henanadai lau haerelaidia.
Lagani 1997 ai John idia boiria Patterson, New York dekenai Brens Komiti Edia Sikuli do ia lao. Unai murinai, ai idia nanadaia bema ai ura Ukraine dekenai ai lao. Ai idia hamaoroa ai laloa namonamo bona gurigurilaia. Hanuaboi ai emai lalona ai hadaia unai asainmen do ai abia dae.
ASAINMEN MATAMATA—UKRAINE
Lagani 1992 ai, St. Petersburg, Russia ena intanesinol hebouhebou dekenai ai lao. Bona lagani 1993 ai, Kiev, Ukraine ena intanesinol hebouhebou dekenai ai lao. Unai hebouhebou ese emai lalokau Eastern Europe tadikaka dekenai ia hagoadaia. Lviv, Ukraine ai, ruma gunana ta ena stori iharuana dekenai ai noho. Windo amo uma maragina ta bona kokoroku haida ai itaia danu. Toana be ai be Saskatchewan farm dekenai ai noho. Ai ibounai 12 be unai ruma dekenai ai noho. Daba ibounai motuka amo ai lao Betele dekenai ai gaukara totona.
Emai asainmen matamata be edena bamona ai laloa? Tadikaka taihu momo be guna hekwakwanai idia davaria, gavamani ese edia haroro gaukara ia taravatua bona dibura dekenai idia atodia. Edia huanai ai helai neganai ai mamia edia abidadama ese aiemai ia hereaia. Idia ai hanamoa neganai, idia gwau, “Iehova totona unai ai karaia.” Bona idia gwau Iehova be hanaihanai idia ia durua. Hari danu bema ta ena kara namo dainai oi tanikiu henia, do idia gwau, “Iehova oi tanikiu henia,” badina idia diba gau namodia ibounai be ia amo.
Ukraine ai, momo be hebou lao totona hora ta mai kahana idia raka, bona unai be nega namona ta ta idia hagoadaia totona. Lviv ai, kongrigeisen 50 mai kahanai idia noho, 21 be Kingdom Hall badana ta idia gaukaralaia. Sunday ta ta, tadikaka taihu momo be hebou dekenai idia mai, bona idia ai itaia neganai ai moale.
Tadikaka taihu be idia manau bona idia ura ma haida idia durua dainai, idia ai tura henia be auka lasi. Edia gado lau laloparara namonamo lasi neganai idia hesiku lasi, bona edia matana amo lau diba idia ura lau idia durua.
Lagani 2003 ai, Kiev ena intanesinol hebouhebou ta dekenai tadikaka edia abidadama heheni karana ai itaia. Trein steiseni dekenai ai noho neganai, kekeni maragi ta ia mai bona ia gwau, “Lau boio bona lau diba lasi egu tubuna hahine be edeseni.” Ia gari lasi bona ia tai lasi. Ia be emai lapel kadi ia itaia bona ia diba ai be Witnes taudia. Sekit tauna ta ena hahine ese steidiam ai ia noho Boio Gaudia Dipatmen dekenai ia hakaua lao. Daudau lasi murinai ena tubuna ia davaria. Lau hoa badina ena be hutuma huanai ia boio, to unai kekeni maragi ia gari lasi.
May 2001 ai, Ukraine ena brens opesi matamata ai hahelagaia neganai, tano idauidau amo tadikaka taihu momo idia mai. Sunday dabai, steidiam ta ai spesel tok ai kamonai murinai, tadikaka taihu momo herea idia lao Betele idia itaia totona. Unai lau laloaboio diba lasi! Lau moale badina tadikaka taihu be hemataurai karana idia hahedinaraia. Unai ese lau ia durua Dirava hesiai henia karana amo lau abia hahenamodia lau laloa bada totona.
SENISI BADANA TA
Lagani 2004 ai, doketa idia davaria John be mai ena kensa gorere. Unai dainai Canada dekenai ai lao heduru ia abia totona. Kemoterapi muramura idia henia to ena tauanina be ia goada lasi dainai, pura haida lalonai ICU wodi dekenai ia noho. Ena be ia hereva diba lasi, to ena matana amo ia hahedinaraia ia idia vadivadi henia tadikaka taihu dekenai ia moale.
To madi, ena gorere ia bada dainai November 27, 2004 ai, ena matana ia hakapua. Lau mamia egu tauanina ena kahana ta ia boio bamona. Lau bona John be Iehova ai hesiai henia hebou dainai lau moale bada. Hari dahaka do lau karaia? Egu lalona lau hadaia Ukraine dekenai lau giroa lou totona. Lau mamia Betele famili bona kongrigeisen taudia be lau idia lalokau henia.
Emai mauri lalonai ai karaia abia hidi dainai ai lalohisihisi lasi. Tura namodia ai davaria bona emai mauri ai moalelaia. Lau diba Iehova ena kara namodia momo do lau dibaia noho, bona lau ura ia lau hesiai henia ela bona hanaihanai, badina Iehova ena “imana idibana ai moale gaudia” momo lau davaria noho.
[Blurb on page 6]
“Emai mauri lalonai ai karaia abia hidi dainai ai lalohisihisi lasi”
[Picture on page 3]
Emai headava dinana
[Picture on page 4]
Red Lake, Ontario ai lau spesel painia
[Picture on page 5]
Lagani 2002, Ukraine ai, John ida