Lagani 50 Lalonai Arctic Circle Kahirakahira Ai Painia

AI BE biru taudia, bona Northern Ostrobothnia, Finland dekenai ai noho, bona emai famili lalonai natudia ibounai be ten. Ai maragi neganai, Tanobada Tuarina Iharuana ia vara. Ena be tuari gabuna be emai gabu amo ia daudau, to tuari ese ia havaraia dika ai mamia danu. Hanuaboi ta ai, Oulu bona Kalajoki siti idia bomua, bona lahi ese guba ia hadiaria dainai, ena kala be kakakaka. Emai tama sina ese ai idia hadibaia, bema tuari peleini be guba dekenai ai itaia, karaharaga ai komu be namo. Emai kakana roboana, Tauno, be ai dekenai paradaiso ai hisihisi be lasi sivaraina ia gwauraia neganai, ai ura sivarai ma haida ai kamonai.

Tauno ena mauri lagani be 14 neganai, Bible Student taudia ese idia halasia bukadia ia duahia, bona hereva momokani ia dibaia. Tanobada Tuarina Iharuana ia matamaia neganai, ia be Baibel amo ia dibaia gaudia dainai, ia ura lasi ami dekenai ia vareai. Unai dainai, dibura ruma ai idia lokaia, bona idia hahisia. To, unai ese Tauno ia hagoadaia Iehova ia hesiai henia noho totona. Dibura amo idia ruhaia neganai, ena haroro gaukara ia habadaia. Unai nega aukadia ai, Tauno ena haheitalai namona ai itaia dainai, ai ura emai hanua kahirakahira ai Iehova ena Witnes taudia edia hebou dekenai ai lao. Danu, moni gaukara ai karaia bona moni ai haboua, unai amo hebouhebou badadia dekenai ai lao diba. Emai neiba taudia edia dabua ai turia, oniani ai hadoa bona au huahua maragidia ai gogoa. Emai uma gaukara be momo dainai, ai haida be hebouhebou ai lao guna, bona ma haida be gabeai idia lao.

Iehova bona ena ura ai dibaia dainai, Ia ai lalokau henia bada bona ai ruaosi be lagani 1947 ai, ai bapatiso. (Unai neganai Annikki ena mauri lagani be 15, bona Aili ena mauri lagani be 17.) Emai kakana, Saimi danu be lagani 1947 ai ia bapatiso. Danu, Linnea, emai kakana ma ta ai stadi henia. Ia bona ena famili be Iehova ena Witnes taudia ai idia lao danu. Ai bapatiso murinai, emai lalona ai hadaia laga-ani painia (heduru painia ) gaukara ai karaia totona.

FUL-TAIM HESIAI GAUKARA AI HAMATAMAIA

Lagani 1955 ai, not kahana ena siti ta ladana, Kemi dekenai ai lao. Herevana ful-taim moni gaukara ai karaia, to ai ura ai painia danu. To, ai laloa bema ful-taim moni gaukara ai rakatania, emai moni do ia hegeregere lasi emai bili ai pei totona. Ai laloa moni haida ai haboua guna be namo. Unai neganai, ataiai ai herevalaia painia taihu ena hereva amo ai laloparara ai painia diba. Ai diba ai sibona o emai famili dekenai ai tabekau lasi be namo, to namona be ai abia dae momokani Iehova be ai do ia naria.

Unai negai, ai haboua monina be hegeregere hua rua lalonai ai painia totona. Unai dainai, May 1957 ai, aplikeisen ai atoa hua rua Pello dekenai do ai painia totona. Matamanai ai daradara sisina. To hua rua murinai, ai haboua monina ia ore lasi. Unai dainai, aplikeisen ai atoa ma hua rua ai painia totona. To, unai hua rua murinai, emai moni ia ore lasi. Unai neganai, ai diba momokani Iehova be ai ia naria. Ai be lagani 50 ai painia vadaeni, bona unai moni ia do ore lasi! Ai mamia Iehova be emai imana ia dogoatao, bona ia gwau: “Do umui gari lasi, lau ese umui do lau durua.”​—⁠Isa. 41:13.

Lagani 1958 ai, emai sekit naria tauna ese ai ia noia not kahanai ia noho hanua ladana, Sodankylä dekenai ai lao ai spesel painia totona. Unai negai, taihu tamona sibona be unuseniai ia noho. Ia be dala idauna ta amo hereva momokani ia dibaia. Iena natuna merona be ena klas taudia ida Finland ena siti badana, Helsinki dekenai idia lao. Idia loaloa lalonai, taihu burukana ta ese unai mero dekenai Gima Kohorona ta ia henia, bona ia hamaoroa ena sinana dekenai do ia henia. Iena sinana be unai magasin ia duahia neganai, maoromaoro ia diba unai be Baibel ena hereva momokani.

Unai gabu ai somil ta ia noho bona unuseniai au badadia idia utua bona timba idia karaia. Ai be unai somil ena ataiai ia noho daiutu ta ai rentaia bona unuseniai hebou ai karaia. Matamanai, ai ruaosi, taihu ta bona ena natuna kekeni sibona ai hebou, bona wiki ta ta ena hebou sediual ai idia noho gaudia ai duahia. Gabeai, Iehova ena Witnes taudia ida ia stadi tauna ta be gaukara totona unai somil dekenai ia mai. Ena famili ida hebou idia mai, bona gabeai ia bona ena adavana idia bapatiso. Unai murinai, unai tadikaka ese emai hebou ia hakaua. Unai somil dekenai idia gaukara tatau haida danu be hebou idia mai, bona gabeai hereva momokani idia abia dae. Daudau lasi murinai, emai grup be kongrigeisen ta ai ia lao.

NOT KAHANAI AI HARORO BE MAI ENA HEKWARAHI

Ai haroro totona gabu daudaudia ai lao. Siahu negadiai, ai raka, emai basikele ai gaukaralaia, bona bouti amo ai lao kamonai taudia ai tahua totona. Emai basikele be heduru gaudia. Ai gaukaralaidia hebouhebou ai lao bona emai tama sina ai vadivadi henia totona, ena be gabu daudau ai idia noho. Keru negadiai, daba momokani basi dekenai ai guia bona hanua ta ai lao, bena ruma-ta-ruma-ta ai haroro gaukara ai karaia. Hanua ta ai haorea murinai, hanua ma ta ai lao. Nega haida sinou be bada herea, bona dala idia koua. Bema ta ia raka guna bona aena ena maka ia noho, vadaeni unai maka ai badinaia. To, bema sinou ia diho lou, vadaeni iena aena makana do ia koua. Siahu negana ia giroa lou neganai, sinou ia veve bona tano ia paripari dainai, ai raka be mai ena hekwarahi.

Keru o sinou negadiai keru dabuadia ai karaia. Hegeregere, vulu stockings, soksi rua o toi, bona buti latadia ai karaia. To, nega haida ai raka neganai, sinou be emai buti lalonai idia vareai. Ruma ta ena vada dekenai ai ginidae neganai, emai buti ai kokia bona sinou ai kokia guna. Danu, emai kouti latadia edia dorina be sinou ese ia hapariparia bona idia auka. Dina ta ai be kilomita 11 ai raka ela bona ruma ta dekenai ai ginidae neganai, ruma hahinena ia gwau: ‘Emui abidadama ia goada momokani, badina ena be weda ia dika to umui mai.’

Nega haida hanua taudia haida edia ruma ai ai noho. Adorahi ai, taunimanima ai noidia edia ruma ai do ai mahuta totona. Ena be idia be kohu momo lasi, to idia be heabidae taudia. Ai dekenai mahuta gabuna bona aniani idia henia. Nega momo, animal edia kopina latanai ai mahuta. To, ruma haida dekenai daiutu namodia dekenai ai mahuta. Hegeregere, hahine ta ese ena ruma badana dekenai ai ia abia dae, bona ai ia henia daiutu lalonai bedi namo hereana ta mai ena hetaru kurokurodia dekenai ai mahuta. Nega momo ai idia abia dae ruma besedia ida Baibel ai kikilaia ela bona hanuaboi momokani. Ruma ta ai, tau ta bona ena adavana be kahana ta ai idia mahuta, bona ai be ma kahana ta dekenai ai mahuta. Idia be henanadai momo idia henia dainai, Baibel ai herevalaia ela bona daba momokani.

EMAI HARORO GAUKARA AI MOALELAIA

Lapland be gabu hairaina. To, ai dekenai Iehova idia abia dae taudia be hairai momokani. Ai haroro henia taudia haida be tatau, idia be au utua totona Lapland dekenai idia mai. Nega haida ruma tamona lalonai tatau momo ai davaria, bona ai haroro henidia. Unai tatau idia moale badina Baibel ena sivarai idia kamonai, bona emai buka bona magasin idia duahia.

Ai be ekspiriens namodia momo ai davaria. Hegeregere, dina ta ai leiti dainai PMV ai reaia. Unai dainai, PMV ma ta dekenai ai guia bona hanua ma ta dekenai ai lao. Unai be nega ginigunana unai hanua dekenai ai lao, to ruma ginigunana ai karaia neganai, hahine matamata ta ai davaria bona ia gwau, ‘Namo herea umui mai, badina lau be umui lau naria noho.’ Ai be unai hahine ena kakana ai stadi henia, bona ia ese ena kakana ia hamaoroa ai do ia noia, unai dina ai ia do ai vadivadi henia totona. To, iena kakana be ai ia hadibaia lasi. Ai ese unai hahine matamata bona ena varavara ida stadi ai hamatamaia. Gabeai, idia ibounai 12 be nega tamona ai stadi henia. Unai nega amo, unai famili taudia momo be Iehova ena Witnes taudia ai idia lao.

Lagani 1965 ai, ai idia noia saut kahanai ia noho hanua ladana, Kuusamo ena kongrigeisen ai lao totona. Unai nega ai, pablisa be momo lasi. Matamanai, unai teritori dekenai ai haroro be auka. Momo be mai edia dubu dainai, idia ura lasi unuseni ai haroro. To momo be Baibel idia matauraia. Unai dainai taunimanima ai tura henia matamaia, bena lagani rua bamona murinai, Baibel stadi ai hamatamaia be auka lasi.

AI DO HARORO NOHO

Hari, ena be emai goada ia hegeregere lasi dina ibounai ai haroro totona, to dina ta ta ai haroro. Hari, ai hekwarahi lasi emai teritori badadia dekenai ai haroro totona, badina Aili be motuka ia taria diba. Emai lalana ese Aili ia hagoadaia motuka taria sikuli dekenai ia lao, bona lagani 1987 ai, ena mauri lagani be 56 neganai, laiseni ia abia. Danu, hari ai be emai Kingdom Hall matamatana murinai idia karaia ruma dekenai ai noho.

Ai moale badina Finland ena not kahanai idia noho taudia momo be hereva momokani idia abia dae. Iniseniai ai painia matamaia neganai, pablisa be momo lasi. To hari, sekit tamona lalonai kongrigeisen haida idia noho. Nega momo hebouhebou badadia bona maragidia ai lao neganai, ta be ai dekenai do ia mai, ena ladana ia gwauraia, bona ai do ia hadibaia, ia maragi neganai ai be iena famili ta ida ai stadi. Momokani, Dirava ese emai gaukara ia hanamoa!​—⁠1 Kor. 3:6.

Lagani 2008 ia abia neganai, ai be lagani 50 lalodiai spesel painia gaukara ai karaia vadaeni. Iehova ai tanikiu henia, badina iena hesiai gaukara ai karaia noho totona ta ta ai hagoadaia heheni. Emai mauri lalonai moni o kohu momo ai haboua lasi, to hanaihanai gau ta dekenai ai dabu lasi. (Sal. 23:1) Hari ai laloparara, matamanai painia gaukara ai daradaralaia be anina lasi! Idia hanaia laganidia lalonai, Iehova be ena gwauhamata hegeregerena ai ia hagoadaia. Ia gwau: “Lau ese umui do lau hagoadaia, bona umui do lau durua. Lau ese umui do lau naria, bona umui do lau hamauria.”​—⁠Isa. 41:10.