Haroro Gaukara Be Hanuaboi Ena Paripari Bamona

ISEDA haroro gaukara be mai anina bada. To taunimanima be unai idia lalopararalaia lasi. Ena be idia ura Baibel ena hereva idia kamonai, to idia dekenai Baibel stadilaia karana be anina lasi.

Gavin be kongrigeisen heboudia ia lao, to ia ura lasi Baibel ia stadilaia. Ia gwau: “Egu diba Baibel dekenai be bada lasi, bona lau ura lasi ma haida be unai idia diba. Lau ura lasi ta ese lau ia hakaua kerere, bona tomadiho ta lau badinaia.” Dahaka oi laloa? Oi laloa Gavin be Baibel stadi do ia abia dae lasi, a? Baibel ese ta ena mauri ia hanamoa daladia mani oi laloa. Iehova ese ena taunimanima ia hamaoroa, ia gwau: “Lauegu hadibaia hereva, be hanuaboi ena paripari bamona do ia hedinarai, medu maragina rei matamata ena latanai bamona.” (Deu. 31:19, 30; 32:2) Hanuaboi ena paripari ena haheitalaia amo do ita diba edena dala ai iseda haroro gaukara amo “taunimanima idauidau” ita durua diba.​—1 Tim. 2:3, 4.

HARORO GAUKARA BE HANUABOI ENA PARIPARI BAMONA​—EDENA DALA AI?

Ia be medu maragina rei latanai bamona. Hanuaboi ena paripari be hodahoda paraka ese ia havaraia. Iehova ena hereva be “hanuaboi ena paripari bamona.” Edena dala ai? Ia ese ena taunimanima ia hereva henia neganai, ia be mai manau ida ia hereva. Ita ese Iehova ita tohotohoa diba, bema ma ta ena lalohadai ita matauraia. Bona henanadai amo idia ita durua edia lalohadai idia herevalaia totona. Unai ita karaia neganai, do idia ura kamonai, bona iseda haroro gaukara ese namo do ia havaraia.

Ia ese gabu ia haparakaia. Iseda haroro gaukara ese namo ia havaraia diba, bema ita davaria taudia edia ura ita habadaia. Tadikaka Chris be ia ura Gavin ida Baibel ia stadilaia, to ia doria lasi stadi ia abia dae totona. Ia ese dala idauidau ai Gavin ia durua, Baibel ena hereva ia abia dae totona. Gavin ia hamaoroa, Baibel be mai ena hereva badana. Bema unai hereva badana ia dibaia, ia ese iseda hebou do ia lalopararalaia. Bena Chris ia gwau, Baibel ena peroveta herevadia idia guguru dainai, ia abia dae Baibel ena hereva be momokani. Unai ese dala ia kehoa peroveta herevadia idia herevalaia totona. Unai herevahereva karana ese Gavin ia hamoalea, bena stadi ia abia dae.

Ia ese tubutubu gaudia ia hatubua. Israela ena siahu negana ai, medu be hua haida lalonai ia diho lasi. Bema hanuaboi ena paripari be lasi, tubutubu gaudia idia kakoro bona idia mase. Iehova ia peroveta iseda nega ai, taunimanima be “Lohiabada ena hereva” totona do idia ranu mase. (Amo. 8:11) Ia gwauhamata, horoa taudia be “mamoe ma haida” ida Basileia ena sivarai namona idia harorolaia neganai, idia be Iehova “ese ia siaia hanuaboi ena paripari namona bamona.” (Mika 5:7; Ioa. 10:16) Ita harorolaia sivaraina be hanuaboi ena paripari bamona, badina ma haida ia durua.

Iehova amo ia mai hahenamo ta. (Deu. 33:13) Kamonai taudia dekenai iseda haroro gaukara be hahenamo ta. Gavin be unai hahenamo ia abia. Iena stadi amo iena henanadai ibounai edia haere ia abia. Ia bapatiso, bona hari ia bona ena adavana, Joyce, be mai moale ida Basileia ena sivarai namona idia harorolaia.

HARORO GAUKARA LALOA BADA

Hanuaboi ena paripari ita laloa neganai, unai ese do ia durua haroro gaukara ita laloa bada totona. Edena dala ai? Ranu sisina ese kahana ta sibona ia haparia, to hanuaboi ena paripari ese tano ibounai ia haparia diba. Unai hegeregerena, reana do ita laloa ita karaia haroro gaukara be anina lasi. To ita be Iehova ena hesiai taudia ma haida ida ita gaukara “bese ibounai” ita haroro henia totona. (Mat. 24:14) Ma haida dekenai ita harorolaia sivaraina be Iehova ena harihari gauna, ani? Ia be hanuaboi ena paripari bamona, ma haida ia hamoalea bona ia hamauria!