Karoa 24

Iesu be Tanobada ai Ia Mai ena Badina

IESU mai ena hahediba taudia hani ida be Kaperanaum dekenai idia noho dinana ai ia bisi bada herea. Kaperanaum taudia ese edia gorere taudia iboudiai idia mailaidia ia hamauridia totona, unai dainai ia gaukara ela bona adorahi momokani neganai.

Dabai, ia do dibura neganai, Iesu ia toreisi, taunimanima lasi gabuna dekenai ia lao, unuseniai ena Tamana ia guriguri henia. Petro bona ma haida idia toreisi neganai, Iesu idia itaia lasi dainai idia lao tahua.

Idia davaria neganai, Petro ia gwau: “Taunimanima ibounai idia tahua oi.” Kaperanaum taudia idia ura Iesu be idia dekenai do ia noho. Iena heduru idia laloa bada! To Iesu be tanobada dekenai ia mai ena badina badana be, hoa dalana amo taunimanima do ia hamauridia totona, a?

Iesu ia gwau: “Namo ita lao hanua haida, unuseni lau ura haroro karaia, badina inai totona lau mai.” Ena be hanua taudia idia gwau idia ura Iesu be idia dekenai do ia noho, to ia hamaorodia, ia gwau: “Lau be Dirava ena Basileia ena Sivarai Namo hanua idauidau dekenai do lau harorolaia, lau ia siaia badina be unai.”

Oibe, Iesu ia mai tanobada dekenai Dirava ena Basileia harorolaia totona, badina Basileia ese ena Tamana ena ladana do ia hanamoa bona taunimanima edia gorere iboudiai do ia haoredia. To unai hoa karadia amo ia hamomokania Dirava ese ia siaia. Unai hegeregerena, idaunegai Mose ese hoa karadia ia karaia neganai, ia hahedinaraia ia be Dirava ena hesiai tauna.

Iesu be hanua idauidau ai haroro totona Kaperanaum ia rakatania neganai, Petro, Andrea, Ioane bona Iakobo ese idia bamoa. Pura ta ia lao vadaeni, Iesu ese ia boiridia ia ida do idia gaukara hebou totona.

Iesu be ena hahediba taudia hani ida Galilea ai idia haroro loaloa neganai, edia gaukara ese anina bada ia havaraia! Suria tanona ibounai dekenai danu taunimanima ese ena kara idia herevalaia. Galilea, Iudea, bona Ioridane Sinavaina unai kahana amo taunimanima hutuma ese Iesu bona ena hahediba taudia idia gavaia. Mareko 1:​35-39; Luka 4:​42, 43; Mataio 4:​23-25; Esodo 4:​19, 30, 31.

▪ Iesu be hoa karadia momo Kaperanaum ai ia karaia, bena dabai dahaka ia karaia?

▪ Dahaka dainai Iesu ia mai tanobada, bona ena hoa karadia ese dahaka idia hamomokania?

▪ Iesu be Galilea ai ia haroro loaloa neganai, daidia ese idia bamoa, bona iena kara dainai dahaka ia vara?