Galilea Ai Ena Haroro Gaukara Ia Habadaia

Kaperanauma ai, Iesu bona ena hahediba taudia 4 be idia bisi bada. Adorahi kahanai, Kaperanauma taudia ese ia dekenai gorere taudia idia mailaia, ia hanamodia totona. Iesu be nega lasi, ia sibona ia noho totona.

Daba momokani ai, gabu ia do dibura lalonai, Iesu ia toreisi bona ruma ia rakatania. Taunimanima lasi gabuna ta dekenai ia lao, ena Tamana ia guriguri henia totona. To ia noho daudau lasi, badina “Simona bona hahediba taudia ma haida” idia itaia Iesu ia noho lasi neganai, ia idia tahua, reana Simona, unai be Petero, ese ia gunalaidia, badina Iesu be iena ruma ai ia noho.​—Mareko 1:36; Luka 4:38.   

Iesu idia davaria neganai, Petero ia gwau: “Ibounai be oi idia tahua noho.” (Mareko 1:37) Kaperanauma taudia idia ura Iesu do ia noho. Ia karaia gaudia idia laloa bada dainai, “idia mai bona ia idia koua toho idia do ia rakatania lasi.” (Luka 4:42) To Iesu be tanobada dekenai ia mai hoa karadia ia karaia totona, a? Bona iena gaukara be Kaperanauma sibona dekenai do ia karaia, a? Ia be dahaka ia gwau?

Iesu ese ena hahediba taudia ia hamaoroa: “Gabu ma ta dekenai ita lao, kahirakahira idia noho taoni dekenai, unuseniai lau haroro totona, lau mai ena badina be unai.” Danu, ia idia ura koua taudia dekenai ia gwau: “Siti ma haida dekenai Dirava ena Basileia ena sivarai namona lau harorolaia danu be namo, unai karaia totona Dirava ese lau ia siaia.”​—Mareko 1:38; Luka 4:43.

Oibe, Iesu be tanobada dekenai ia mai ena badina badana be, Dirava ena Basileia do ia harorolaia. Unai Basileia ese ena Tamana ena ladana do ia hahelagaia bona taunimanima edia hekwakwanai ibounai do ia haorea. Iesu ese hoa karadia amo ia hamomokania ia be Dirava ese ia siaia. Unai hegeregerena, idaunegai Mose ese hoa karadia amo ia hahedinaraia ia be Dirava ese ia siaia.​—Esodo 4:1-9, 30, 31.

Vadaeni Iesu be Kaperanauma ia rakatania, siti ma haida dekenai ia haroro totona, bona ena hahediba taudia 4 be ia ida idia lao. Idia be Petero bona iena tadikaka Andrea, bona Ioane bona iena tadikaka Iamesi. Wiki gunanai, unai hahediba taudia ginigunadia be Iesu ese ia boiria ia idia bamoa totona.

Iesu bona ena hahediba taudia 4 edia haroro gaukara Galilea dekenai ese anina namona ia havaraia! Oibe, momo ese Iesu ena sivarai idia kamonai. “Iena sivarai be Suria ena gabu ibounai dekenai idia kamonai,” Dekapoli ena siti 10, bona Ioridane Sinavai ena kahana dekenai danu. (Mataio 4:24, 25) Unai gabu idauidau bona Iudea amo hutuma be Iesu bona ena hahediba taudia murinai idia raka. Momo be ia dekenai gorere taudia idia mailaia. Iesu ese ia gwau henidia lasi, to gorere taudia ia hanamoa bona demoni ese idia biagua taudia amo lauma dikadia ia lulua.