Karoa 120

Magu Lalonai Ia Gorea

GETESEMANE dekenai aposetolo ese Iesu idia heautania mai edia gari ida, to gabeai Petro bona Ioane idia giroa bona Iesu idia tahua. Ana ese Iesu be Hahelaga Tauna Badana Kaiafa dekenai ia siaia lao neganai, Petro bona Ioane ese idia gavaia badina be edia Biaguna dekenai do ia vara gauna idia laloa momo dainai, to mai padadia idia gavaia haida ese do idia hamasedia garina.

Kaiafa ena ruma badana dekenai idia ginidae neganai, magu ena iduara idia kehoa Ioane ena, badina be hahelaga tauna badana ia diba ia. To Petro be murimuri ai ia gini. Nega sisina murinai Ioane ia lou mai, magu ena iduara naria kekenina ia hereva henia, bena Petro ia hakaua vareai.

Hahelaga tauna badana ena gaukara taudia bona ena hesiai taudia idia keru dainai lahi idia karaia. Iesu ena kota herevana ia naria noho neganai, Petro be idia ida ia helai hebou ena kopina hasiahua totona. Lahi ena diari ai ia helai noho neganai, iduara naria kekenina ese ena toana ia itaia namonamo, bena ia hereva henia, ia gwau: “Inai, oi danu Iesu, Galilea tauna, ena durua tauna ta, ani?”

Petro ia gari badina unai kekeni ia diba ia be daika, unai dainai Iesu ia gorea; ia gwau: “Lasi, inai tau lau diba lasi, bona oiemu hereva anina lau diba lasi.”

Bena Petro ia raka oho, iduara badibadinai ia lao. Unuseniai, kekeni ma ta ese ia itaia bena ia dekenai idia gini taudia ia hamaorodia, ia gwau: “Inai tau danu be Iesu, Nasareta tauna, ena durua tauna ta.” Bena Petro ese ia gorea lou, ia gwau: “Unai tau be lau diba lasi momokani.”

Unai murinai Petro be magu lalonai ia do noho, to ia hehuni bamona. Daba matanai kokoroku ena tai ese ia hahoaia reana. Magu ataiai ruma lalonai Iesu idia kota henia noho. Kota ena uitnesi taudia idia mai idia lao neganai Petro bona magu lalonai idia naria noho taudia oredia ese idia itadia.

Hora ta gunanai kekeni ta ese Petro ia gwauraia Iesu ena bamona ta. Hari, unai gabu ai idia gini taudia haida be Petro dekenai idia lao, idia gwau: “Momokani, oi be idia edia turana ta, badina be oiemu gado ese ia hedinaraia.” Malako, Petro ese ena taiana ia utua oho tauna, ena varavarana ta ia gwau: “Iesu danu uma gabu dekenai oi lau itaia, a?”

Mai ena badu ida Petro ia gwau: “Momokani, unai tau be lau diba lasi.” Iena hereva do idia abia dae totona, ia hamaorodia bema iena hereva be momokani lasi, dika bada do ia davaria.

Petro ese Iesu ia gorea lou unai, nega ihatoina, bena kokoroku ia tai. Unai negai Iesu be ruma lalona amo ia raka lasi, dehe ai ia gini bona Petro ia raraia. Kara haraga Petro ese Iesu ena hereva ia laloa, hora haida gunanai atai daiutuna lalonai ia gwauraia herevana unai: “Kokoroku nega rua ia do boiboi lasi, nega toi do oi hereva, oi diba lasi lau.” Petro ia lalo-metau bada herea ena kerere dainai, unai dainai magu amo ia raka lao murimuri dekenai bona ia tai dikadika.

Unai kerere be edena bamona ia vara diba? Petro ia laloa lauma dalanai ia goada, be edena bamona nega kwadogina lalonai nega toi ena Biaguna ia gorea diba? Idia vara gaudia ese Petro idia hahoaia. Haida ese hereva momokani idia hagagevaia, bona Iesu idia gwauraia kara dika rohoroho tauna. Maoro gauna idia gwauraia kerere, bona kara maoromaoro tauna idia gwauraia kara kerere tauna. Unai kerere idia vara dainai Petro ia laloa namonamo diba lasi, bena taunimanima garidia ia gari dainai Iesu ia badinaia lasi. Madi gabeai unai ia lalohisihisilaia bada. Namona be ita naria namonamo unai bamona do ita hekwakwanai na garina! Mataio 26:​57, 58, 69-75; Mareko 14:​30, 53, 54, 66-72; Luka 22:​54-62; Ioane 18:​15-18, 25-27.

▪ Edena bamona Petro bona Ioane be hahelaga tauna badana ena magu lalonai idia vareai?

▪ Petro bona Ioane be magu lalonai idia noho neganai, dahaka ia vara ruma lalonai?

▪ Nega hida kokoroku ia tai, bona nega hida Petro ese Iesu ia gorea?

▪ Dahaka ia vara dainai Petro ia gwau ia diba lasi Iesu?