Tuari Koudia Dalana be Lasi Eiava?

TUARI sivaraidia be niusi ai ita kamonai loulou bona unai ese iseda lalodia idia hametaudia, ani? Reana oi henanadai, dahaka dainai tuari gaudia idia gaukaralaidia, hepapahuahu koudia totona. Taunimanima be maino dalana do idia davaria lasi, a?

Toana be tuari koudia dalana davaria be auka herea. Lagani 1900 murina amo bese idauidau iboudiai be tuari totona idia hegaegae, tatau milion milion idia lao tuari, bona siti handred handred idia hadikadia ore. Taunimanima aladia mase karadia hadokodia dalana idia do davaria lasi. Tuari gaudia hoihoilaidia karadia amo moni momo idia abia, unai dainai tuari oreadia idauidau do idia tuari noho.

Tuari gaudia edia siahu idia habadaia neganai, idia hadikalaidia taudia idia momo daekau. Tanobada Ibounai Tuarina Ginigunana ai idia tuari taudia 65 milion amo 37 milion mai kahana idia mase eiava bero idia davaria. Lagani 30 bamona murinai, atom bomu rua ese Japan taudia 150,000 idia hamasedia. Unai murinai, ena be tanobada ibounai lalonai nega tamona idia tuari lasi, to tuari ai taunimanima idia hamasedia noho, idia 10 10 amo 8 8 be tuari taudia lasi.

Hoa gauna be inai: Unai ala-ala ia vara, tuari koudia daladia idia tahudia goadagoada negana lalonai. America bona Russia idia inai heheni karana be vanegai ia doko dainai, idia laloa tanobada oromana matamatana mai mainona do ia vara. To, tanobada hegegemadai maino havaraia dalana be idia do davaria lasi. Dahaka dainai?

Mauri Durua Karana A?

Tanobada besedia edia sivarai torea taudia haida bona edia kara tahua taudia haida idia gwau tuari be namo, badina be unai dala amo goada taudia sibodia idia kwalimu bena idia noho diba. Friedrich von Bernhardi ese unai bamona lalohadaina ia abia dae dainai, lagani 1914 ai ia gwau idia tuari ‘edia mauri, edia noho hebou dalana bona edia kara hanamodia totona.’ Ena lalohadai be tuari ese taunimanima manokadia o bese manokadia ia haoredia, bena goadadia sibodia idia noho.

Unai bamona lalohadaina ese tuari ai edia adavadia o edia tamadia idia mase taudia milion milion edia lalodia ia hagoadadia diba lasi. Kara maoromaoro ura henia taudia ese idia abia dae diba lasi, bona tuari sivaraidia ese idia hamomokania lasi. Masinigani bona bomu ese manoka taudia sibodia lasi to goada taudia danu nega tamona idia hamasedia ore.

Adolf Hitler ena lalohadai be tuari amo sibona ena bese do ia hagoadadia ela bona bese iboudiai do idia hereadia. Ena buka ladana Mein Kampf ai ia gwau: “Tuari hanaihanai karana amo taunimanima idia goada idia lao, bona maino hanaihanai sibona ai idia ore. . . . Goada taudia ese manoka taudia do idia biagudia be namo.” Hitler ese taunimanima ia hanamodia lasi, to milion milion ia hamasedia ore bona tano badana ta ia hadikaia.

Vadaeni, bema tuari be mauri durua gauna lasi, dahaka ese taunimanima ia doridia, sibodia do idia hadikadia ore totona? Dahaka siahu ese bese idauidau ia doridia, “dagedage taudia edia kara” do idia karaia totona?a Maino havaraia dalana idia koua gaudia haida be henuai ai toredia.

Tuari Havaraia Karadia

Edia bese idia heagilaidia. Nega momo politikol taudia bona ami biagudia ese edia bese heagilaidia herevadia amo tuari idia havaradia. Tuari momo idia karadia, “bese edia namo” gimaia totona eiava “bese edia ladadia matauraia karana” naria totona. Bese heagilaia lalohadaina idia goadalaia neganai, idia gwau do idia tuari be namo, edia inai taudia ese do idia tuari henidia guna garina.

Bese idauidau idia inai heheni. Tuari momo idia vara, badina be bese idauidau eiava iduhu idauidau be lagani momo herea lalodiai idia inai heheni dainai. Bosnia ai, Liberia ai, bona Somalia ai idia vara tuaridia be unai bamona.

Idia gaukara helulu. Tanobada Ibounai Tuarina Ginigunana ia do vara lasi neganai, Europe ena gavamani badadia ese ami badadia idia haginidia. Germany bona Britain ese tuari sisimadia idia karadia helulu. Unai tuari ai idia vareai besedia badadia ta ta iboudiai be guna idia laloa tuari amo edia siahu bona edia kohu o moni do idia habadadia diba. Unai dainai tuari totona idia hegaegae.

Tomadiho oreadia idauidau idia inai heheni. Bese idauidau idia tuari heheni, badina ta be edia tomadiho be idauidau. Lebanon bona Northern Ireland ai tuari idia vara bona India bona Pakistan idia tuari heheni, badina be tomadiho oreadia idauidau idia inai heheni dainai.

Lauma ta ese tuari ia havaradia. Baibel ese ia hahedinaraia “inai tanobada ena dirava,” Satana Diabolo, be hari ia gaukara goadagoada. (2 Korinto 4:4) Ia badu dikadika bona ena “nega be ia kwadogi,” unai dainai tuari ia havaradia, tanobada ena hisihisi habadaia totona.​—Apokalupo 12:12.

Inai gau, tuari havaradia gaudia, kokidia dalana be haraga lasi. Lagani 2,000 mai kahana gunanai, Plato ia gwau, “Mase taudia sibodia be tuari edia dokona idia itaia vadaeni.” Iena hereva be momokani a, bona unai dainai ita abia dae be namo a? Eiava tuari do idia vara lou lasi negana do ita helarolaia be mai badina a?

[Footnotes]

[Picture Credit Line on page 2]

Cover: John Singer Sargent’s painting Gassed (detail), Imperial War Museum, London

[Picture Credit Line on page 3]

Instituto Municipal de Historia, Barcelona