Dirava Ena Lohia Dalana Idia Gwauraia Hedinarai Keristani Taudia
“Iena hoa kara badadia do umui gwauraia hedinarai. Badina be ia ese dibura dekena amo umui ia boiria, vadaeni iena diari namo bada herea lalonai do umui noho.”—1 PETERO 2:9.
KERISTANI tomadiho dalana be do lasi neganai, taunimanima momo ese Iehova idia gwauraia hedinarai goadagoada, idia gwau ia mo sibona be Dirava momokanina. (Heberu 11:4–12:1) Edia abidadama ia goada dainai, Iehova ena taravatu idia badinaia mai edia gari lasi bona tomadiho dalana maorona idia rakatania lasi. Iehova ena lohia siahuna tanobada ai bona guba ai be idia gwauraia hedinarai goadagoada.—Salamo 18:21-23; 47:1, 2.
2 Keristani tomadiho dalana be do lasi negana lalonai, witness tauna ginigabena bona hereadaena be Ioane Bapatiso. (Mataio 11:11) Ia ese Abi-Hidi Tauna ena mai ia gwauraia hedinarai, bona taunimanima ia hamaorodia Iesu be gwauhamata Mesiana. (Ioane 1:29-34) Iesu be Iehova ena Witness tauna hereadaena, “Dirava ena hereva ia gwauraia maoromaoro tauna.” (Apokalupo 3:14) Israela besena ese Iesu ia dadaraia dainai, Iehova ese unai bese ia dadaraia, bena bese matamatana, Dirava ena lauma Israelana, be ena hereva hamomokania besena ai ia halaoa. (Isaia 42:8-12; Ioane 1:11, 12; Galatia 6:16) Israela perovetalaia herevana gunana ta be Petero ese ia gwauraia bona ia hahedinaraia unai hereva be mai anina “Dirava ena Israela,” Keristani ekalesiana, dekenai; ia gwau: “To Dirava ese umui ia abia hidi vadaeni, umui be iena bese, umui be King ena hahelagaia taudia, bese helagana, bona Dirava ena orea korikori taudia. Dirava ese umui ia abia hidi, iena hoa kara badadia do umui gwauraia hedinarai. Badina be ia ese dibura dekena amo umui ia boiria, vadaeni iena diari namo bada herea lalonai do umui noho.”—1 Petero 2:9; Esodo 19:5, 6; Isaia 43:21; 60:2.
3 Petero ena hereva ese idia hahedinaraia Dirava ena Israela ena gaukara badana be Iehova ena hairai do idia gwauraia hedinarai. Iseda nega lalonai, witness taudia ‘hutuma bada herea’ ese unai lauma besena idia bamoa bona Dirava ena hairai idia gwauraia hedinarai danu. Taunimanima iboudiai do idia kamonai totona, idia boiboi badabada, idia gwau: “Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.” (Apokalupo 7:9, 10; Isaia 60:8-10) Dirava ena Israela bona ena bamona taudia ese edia haroro gaukarana be edena bamona idia hagugurua diba? Edia abidadama bona edia kamonai amo.
Witness Taudia Koikoidia
4 Abidadama tauna mai ena kamonai ese Dirava ena taravatu ia badinadia hanaihanai. Iesu ese unai ena anina bada ia hahedinaraia, Iuda ena tomadiho gunalaia taudia ia herevalaia neganai. Idia gwau idia be “Mose ena taravatu anina idia gwauraia noho.” Idia ese danu misinari taudia idia siaidia, idau tomadiho taudia edia lalona do idia ania totona. To, Iesu ese ia hamaorodia, ia gwau: “Davara bona tanobada umui hanaia, lalona giroa tauna tamona sibona do umui abia totona. Umui abia, vadaeni ia be [gehena] ena natuna umui halaoa, vadaeni ia ese umui emui dika ia hanaia momokani.” Unai tomadiho taudia be witness taudia koikoidia—idia hekokoroku, idia koikoi, bona idia be mai edia lalokau lasi. (Mataio 23:1-12, 15) Nega ta Iesu ese Iuda taudia haida ia hamaoroa, ia gwau: “Umui be emui tamana Satani dekena amo umui mai, bona umui ura emui tamana ena ura dikadia do umui karaia.” Dahaka dainai ia ese Dirava ena abi-hidi besena taudia haida be unai bamona ia hereva henidia? Badina be Iehova ena Witness tauna hereadaena ena hereva idia kamonai henia lasi dainai.—Ioane 8:41, 44, 47.
5 Unai hegeregerena, Iesu ena nega amo ema bona hari, Kerisendom ena taunimanima milioni momo herea idia gwau idia be iena hahediba taudia. To, Iehova ena ura idia karaia lasi, unai dainai Iesu ia gwau ia diba lasi idia. (Mataio 7:21-23; 1 Korinto 13:1-3) Kerisendom ese misinari taudia ia siaia lao, bona idia momo be lalo-momokani taudia. To, idia ese taunimanima idia hadibadia, Toi Tamona diravana, kara dika taudia be hel ena lahi lalonai ia gabudia diravana, do idia tomadiho henia, bona edia hereva idia abia dae taudia momo edia kara ese idia hahedinaraia idia be Keristani taudia lasi. Hegeregere, Africa tanona ladana Rwanda ai, Roman Katolik misinari taudia ese anina bada idia havaraia. To vanegai, Rwanda ena Katolik taudia be unuseniai ia vara tuarina lalonai idia tuari mai edia lalona ibounai ida. Unai misinari gaukara gabuna ena huahua ese ia hahedinaraia Kerisendom ena haroro taudia ese Keristani dalana korikorina idia hadibadia lasi.—Mataio 7:15-20.
Dirava Ena Taravatu Badinadia
6 Sibodia idia gwauraia Keristani taudia edia kara dika dainai, taunimanima ese “hereva momokani ena dala” idia gwauraia dika. (2 Petero 2:2) Keristani korikori tauna be Dirava ena taravatu hegeregeredia ia noho. Ia henaohenao lasi, ia hereva koikoi lasi, ia kara koikoi lasi, bona ia lebulebu lasi. (Roma 2:22) Ena dekena tauna ia alaia mase lasi. Keristani tataudia ese edia famili idia naria mai edia lalokau ida. Edia adavadia ese unai naria gaukarana idia durua mai edia hemataurai ida. Tama sina ese edia natudia idia hadibaia loulou, unai amo idia hahegaegaedia, do idia bada neganai lo Keristani taudia ai do idia lao. (Efeso 5:21–6:4) Momokani, ita ibounai ita goevadae lasi bona ita kara kerere. To Keristani korikori tauna ese Baibel ena taravatu ia matauraidia bona ia badinadia toho mai ena momokani ida. Taunimanima ese ena kara idia itaia bona ena kara ese ia hadibadia namonamo. Nega haida, hereva momokani be guna idia inai henia taudia ese Keristani tauna ta ena kara namo idia itaia dainai idia helalo-kerehai.—1 Petero 2:12, 15; 3:1.
7 Iesu ese Keristani karana ena anina badana ta ia hahedinaraia, inai bamona ia hereva neganai: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Satani ena tanobada ena toana be inai bamona: “Idia be dika idauidau ibounai dekenai idia honu, kara gagevagageva, kara dika, taunimanima alaia, heatu, koikoi kara, taunimanima hadikaia laloa. Danu idia ese kohu momo taudia idia mama henia. Taunimanima edia dika idia kikilaia momo. Haida idia herevalaia neganai, ta ta edia ladana idia hadikaia, Dirava dekenai idia badu henia, idia badu kava, idia hekokoroku, bona idia laloa momo edena bamona dika ma haida do idia karaia. Edia tamana bona sinana dekenai idia kamonai henia lasi.” (Roma 1:29, 30) Unai bamona taudia bogaragidiai, orea ta tanobada hegegemadai ia noho, ena toana korikori be lalokau; unai ese Dirava ena lauma ena gaukara ia hahedinaraia goevagoeva. Iehova ena Witness taudia edia orea be unai.—1 Petero 2:17.
Witness Taudia be Baibel Tahua Taudia
8 Toa namona ai do ia lao totona, namona be Keristani tauna ese Iehova ena taravatu maorodia ia diba bona ia ura henidia, bona inai tanobada ena kara gageva ia inai henia momokani. (Salamo 97:10) Taunimanima edia lalona ania totona, tanobada ese sibona ena lalohadai ia gwauraia hedinarai momo, bona ena lalohadai ita dadaraia be auka. (Efeso 2:1-3; 1 Ioane 2:15, 16) Dahaka ese ita ia durua diba, lalohadai maorona do ita dogoatao totona? Baibel tahua namonamo loulou karana ese. Salamo 119 torea tauna ia gwau loulou Iehova ena Taravatu ia ura henia. “Dina ena hora ibounai lalonai” ia duahia bona ia laloa noho. (Salamo 119:92, 93, 97-105) Unai dainai, ia gwau: “Lau ese koikoi lau ura henia lasi momokani, mai egu badu danu, to oiemu taravatu lau lalokau henia noho.” Inai danu, ena lalokau bada dainai kara ia karaia. Ia gwau: “Dina ta ta lalonai, nega 7 lau ese oiemu ladana lau hanamoa noho, oiemu kota maoromaoro dainai.”—Salamo 119:163, 164.
9 Unai hegeregerena, bema Dirava ena Hereva ita tahua loulou bona ita laloa noho, unai ese iseda lalona do ia hamarerea, bona ita do ia doria, Iehova do ita “hanamoa”—do ita gwauraia hedinarai—loulou, “dina ta ta lalonai, nega 7” do ita gwauraia. (Roma 10:10) Unai hegeregerena, salamo ginigunana torea tauna ia gwau Iehova ena hereva ia laloa loulou tauna be ‘sinavai badinai idia hadoa auna bamona, ena huahua atoa neganai, ia ese anina ia atoa bada herea. Ena raurau danu do idia kakoro lasi. Ena gaukara ibounai be ena anina ia vara, bona mai ena kwalimu danu.’ (Salamo 1:3) Aposetolo Paulo danu ese Dirava ena Hereva ena siahu ia gwauraia, ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, Dirava ena hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia. Unai hereva momokani dainai, Dirava ena tau ena goada be hegeregere momokani, vadaeni kara namodia ibounai do ia karaia diba, mai kwalimu danu.”—2 Timoteo 3:16, 17.
10 Lagani 1900 amo ema bona hari, tomadiho taudia momokani idia momo daekau haraga ese ia hahedinaraia Iehova ese ia hanamodia. Momokani, hari inai negai Dirava ena lohia dalana idia gwauraia hedinarai taudia ese edia lalona ai Iehova ena taravatu ura henia urana idia habadaia. Salamo torea tauna hegeregerena, unai ura dainai Iehova ena taravatu idia badinaia bona “dina bona hanuaboi” ai iena hairai idia gwauraia hedinarai mai edia momokani ida.—Apokalupo 7:15.
Iehova Ena Siahu Karadia
11 Aposetolo edia negai, lauma helaga ese Keristani witness taudia mai edia kamonai ia hasiahua dainai, hoa karadia idia karaia, bona unai ese ia hamomokania idia gwauraia hedinarai herevadia be momokani. Ioane Bapatiso be dibura rumana ai ia noho neganai, ena hahediba taudia haida be Iesu dekenai ia siaidia, inai do idia nanadailaia totona: “Do ia mai Tauna be oi, o idau tauna ta do ai naria?” Iesu ia haere neganai, oibe eiava lasi ia gwauraia lasi. To ia gwau: “Umui lao, umui kamonai, umui itaia karadia be Ioane dekenai do umui hamaoroa. Matakepulu taudia edia matana idia kehoa, aena dika taudia idia raka, lepera taudia idia goeva, taia kudima taudia idia kamonai, mase taudia idia toreisi lou, bona ogogami taudia ese Sivarai Namona idia abia dae. Bema tau ta be lau dekenai ia daradara sisina lasi, unai tau be do ia moale bada.” (Mataio 11:3-6) Unai siahu karadia ese Ioane idia hadibaia Iesu be “do ia mai Tauna” korikorina.—Kara 2:22.
12 Unai hegeregerena, Iesu murinai idia raka taudia haida ese gorere taudia idia hanamoa bona mase taudia idia hatorea isi. (Kara 5:15, 16; 20:9-12) Unai hoa karadia be Dirava ena amo ia mai toana ta bamona, idia dainai ia hahedinaraia. (Heberu 2:4) Bona unai kara ese Iehova ena siahu bada herea idia hahedinaraia. Hegeregere, Satani, “tanobada ena lohia,” be momokani mai ena siahu taunimanima do ia hamasea. (Ioane 14:30; Heberu 2:14) To Petero ese hahine ta mai ena kamonai ladana Doreka be mase amo ia hatorea isi neganai, unai be Iehova ena siahu amo sibona ia karaia diba, badina be Ia mo sibona be mai ena siahu mauri do ia henia lou.—Salamo 16:10; 36:9; Kara 2:25-27; 9:36-43.
13 Hari inai negai, unai bamona hoa karadia be idia vara lasi. Edia anina idia havaraia vadaeni. (1 Korinto 13:8) To, edia sivarai be Baibel lalonai ia do noho, bona unai kara idia itadia taudia momo ese unai sivarai idia hamomokania vadaeni. Hari inai negai Keristani taudia ese unai sivarai idia gwauraia hedinarai neganai, unai hoa karadia ese Iehova ena siahu idia do hamomokania noho. (1 Korinto 15:3-6) Ma danu, Isaia ena nega lalonai, Iehova ia gwau iena peroveta herevadia maorodia ese idia hamomokania Ia be Dirava momokanina. (Isaia 46:8-11) Baibel ena peroveta herevadia momo, Dirava ese ena lauma amo ia havaraia herevadia, edia anina be hari inai negai idia vara—haida edia anina be Keristani ekalesiana dekenai ia vara. (Isaia 60:8-10; Daniela 12:6-12; Malaki 3:17, 18; Mataio 24:9; Apokalupo 11:1-13) Unai peroveta herevadia edia anina ia vara ese ia hahedinaraia ita be “nega ena dokona” lalonai ita noho, bona danu ia hamomokania Iehova mo sibona be Dirava momokanina.—2 Timoteo 3:1.
14 Iehova ese ena orea taudia dainai kara badadia bona hoa karadia ia do karaia noho. Iehova ena lauma ese Baibel ena hereva momokani ia hadiaria bada noho. (Salamo 86:10; Apokalupo 4:5, 6) Tanobada hegegemadai momo be Iehova ena orea lalonai idia vareai noho; unai ese ia hahedinaraia ‘nega korikori ia ginidae dainai inai kara ia havaraia haraga.’ (Isaia 60:22) Dina gabedia lalonai, dagedage bada be tano idauidau lalonai ia vara neganai, Iehova ena orea taudia be mai edia boga auka ida idia haheauka diba, badina be lauma helaga ese ia hagoadadia dainai. (Salamo 18:1, 2, 17, 18; 2 Korinto 1:8-10) Oibe, Iehova ena Witness taudia sivaraina hari inai negai ese ia hamomokania Iehova be Atai Herea Lohiabadana.—Sekaraia 4:6.
Sivarai Namona Do Idia Harorolaia
15 Iehova ese Israela besena ia abia hidi, iena hereva be bese iboudiai vairadiai do ia hamomokania totona. (Isaia 43:10) To, ia ese Israela taudia haida mo ia hagania do idia lao bona Israela lasi taudia do idia haroro henia, bona nega momo unai be Iehova ena hahemaoro herevadia do idia gwauraia hedinarai totona. (Ieremia 1:5; Iona 1:1, 2) To, peroveta herevadia Heberu Revarevadia lalonai ese idia hahedinaraia, nega do ia ginidae bena Iehova ese bese idauidau be dala badana ta amo do ia kara henidia, bona Dirava ena lauma Israelana ena amo unai ia karaia vadaeni. (Isaia 2:2-4; 62:2) Iesu be guba dekenai ia do daekau lasi neganai, ia murinai idia raka taudia ia hagania, ia gwau: “Umui lao, bese ibounai be diba tahua taudia do umui halaoa.” (Mataio 28:19) Iesu be “Israela besena ena mamoe idia boio sibona dekenai” ia lao, to ia murinai idia raka taudia be ia siaia “bese ibounai” dekenai, “tanobada ena kahana ibounai” lalonai. (Mataio 15:24; Kara 1:8) Ia ura taunimanima iboudiai ese Keristani haroro herevana do idia kamonai.
16 Paulo ese ia hahedinaraia unai ia lalo-pararalaia goevagoeva. Lagani 61 C.E. lalonai, inai bamona ia hereva diba: “Tanobada ibounai ese Sivarai Namona ena hahenamo idia davaria.” Sivarai namona be bese tamona eiava orea tamona, hegeregere “aneru ia tomadiho henia” oreana, dekenai idia harorolaia lasi. Lasi, “tanobada ibounai dekenai [idia] harorolaia.” (Kolose 1:6, 23; 2:13, 14, 16-18) Unai dala amo, Dirava ena Israela ese ena gaukara ia hagugurua. ‘Dirava ese ia abia hidi, iena hoa kara badadia do ia gwauraia hedinarai. Badina be ia ese dibura dekena amo ia boiria, vadaeni iena diari namo bada herea lalonai do ia noho.’
17 To, aposetolo edia negai idia karaia haroro gaukarana ese ma haida be dina gabedia lalonai do idia karaia gaukarana ena toana ia hahedinaraia mo. Iesu ese iseda nega ia perovetalaia, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14; Mareko 13:10) Unai peroveta herevana ena anina be ia vara, a? Oibe, ia vara. Lagani 1919 ai, sivarai namona be dala maragina ai idia harorolaia matamaia, to hari inai negai, tano 230 bona ma haida lalonai idia harorolaia. Paraka gabudia ai bona siahu gabudia ai idia harorolaia. Tano badadia ai idia haroro, bona motumotu daudaudia idia tahua, idia noholaia taudia do idia haroro henia totona. Heiriheiri bada bogaraginai, hegeregere Bosnia bona Herzegovina lalonai ia vara tuarina ai, sivarai namona idia harorolaia noho. Aposetolo edia negai hegeregerena, haroro gaukarana ese huahua ia havaraia “tanobada ibounai dekenai.” Sivarai namona be “tanobada ibounai dekenai” idia harorolaia. Unai dainai dahaka ia vara? Gau ginigunana be, Dirava ena Israela taudia oredia be “bese ibounai, gado ibounai, hanua ibounai, bona kopina idauidau taudia ibounai” amo idia gogodia vadaeni. Iharuana be, ‘hutuma bada herea’ taudia milioni milioni be “bese idauidau, iduhu idauidau, kopina idauidau, bona gado idauidau” amo idia gogodia matamaia. (Apokalupo 5:9; 7:9) Mataio 24:14 ena anina be dala badana ai ia vara noho.
18 Sivarai namona be tanobada hegegemadai idia harorolaia ese ia hamomokania Iesu be mai ena pavapava dagina ida ia ginidae vadaeni. (Mataio 24:3) Bona, “tanobada ena anina” idia utua dalana badana be unai, badina be unai dala amo taunimanima idia hakaudia lao hamauridia gauna korikorina tamona dekenai, Iehova ena Basileia unai. (Apokalupo 14:15, 16) Keristani taudia momokanidia sibodia ese sivarai namona idia harorolaia; unai mai anina bada gaukarana dainai taunimanima idia diba daidia be Keristani momokani taudia bona daidia be Keristani koikoi taudia. (Malaki 3:18) Unai dala ai, unai gaukara ese haroro taudia bona edia hereva idia abia dae taudia danu ia hamauria. (1 Timoteo 4:16) Gau badana be inai: Sivarai namona harorolaia gaukarana ese Iehova Dirava, unai gaukara ia haheganilaia, idia karaia taudia ia durua, bona ena anina ia havaraia Diravana, ia hanamoa.—2 Korinto 4:7.
19 Unai dainai aposetolo Paulo ia gwau: “Bema Sivarai Namona lau harorolaia lasi neganai, madi, lau be dika momokani!” (1 Korinto 9:16) Hari inai negai Keristani taudia edia lalohadai be iena hegeregerena. Dirava ida ‘ena gaukara karaia hebou’ bona inai tanobada diburana lalonai hereva momokani ena diari halasia gaukarana, be hahenamo ta bona maduna badana ta. (1 Korinto 3:9; Isaia 60:2, 3) Lagani 1919 ai idia karaia gaukarana be maragi, to hari inai negai unai gaukara be ia bada ia lao momokani. Keristani taudia kahirakahira milioni ima ese lagani ta ta lalonai hora bilioni ta mai kahana lalodiai Dirava ena lohia dalana idia gwauraia hedinarai bona hahemauri sivaraina be taunimanima idia hadibalaia. Iehova ena ladana hahelagaia gaukarana be mai ena moale bada! Hari ita be 1996 ena hesiai laganina lalonai ita vareai neganai, namona be iseda lalona ita hadaia auka, iseda gaukara do ita hesikulaia lasi. To, namona be Paulo ena hereva Timoteo dekenai do ita badinaia; ia gwau: “Sivarai Namona do oi harorolaia goadagoada.” (2 Timoteo 4:2) Unai bamona ita karaia noho lalonai, mai eda lalona ibounai ida Iehova ita noia iseda hekwarahi do ia hanamoa noho.
Oi Laloatao A?
◻ Israela ena gabunai daidia be Iehova ena “hereva hamomokania taudia” ai idia lao, idau bese taudia dekenai?
◻ Edena dala ai Keristani taudia edia kara ese edia haroro gaukarana ia durua?
◻ Dahaka dainai Keristani Witness taudia ese Baibel idia tahua bona ena hereva idia laloa loulou be gau badana?
◻ Iehova ena Witness taudia sivaraina hari inai negai ese edena dala ai ia hamomokania Iehova be Dirava momokani?
◻ Sivarai namona harorolaia gaukarana dainai dahaka ia vara?
[Study Questions]
1. Keristani negana be do lasi neganai, witness taudia ese Iehova be edena bamona idia gwauraia hedinarai?
2. (a) Daika be Iehova ena Witness tauna hereadaena? (b) Israela ena gabunai daidia be Iehova ena hereva hamomokania besena ai idia lao? Unai be edena bamona ita diba?
3. Dirava ena Israela bona ‘hutuma bada herea’ edia gaukara badana be dahaka?
4. Dahaka dainai Iesu ena negai idia noho Iuda taudia be witness taudia koikoidia?
5. Edena bamona ita diba Kerisendom ese Dirava idia gwauraia hedinarai maoromaoro lasi?
6. Taunimanima hadibaia karana ai, edena dala ai kara namo be mai anina bada?
7. Dahaka dainai Keristani taudia idia lalokau heheni be mai anina bada?
8, 9. (a) Salamo torea tauna ese Dirava ena Taravatu ia tahua bona ia laloa loulou; unai ese edena bamona ia hagoadaia? (b) Baibel tahua bona laloa noho karadia ese edena dala ai ita idia hagoadaia, Iehova do ita gwauraia hedinarai noho totona?
10. Inai dina gabedia lalonai ia hedinarai goevagoeva Iehova ena orea taudia be edena bamona?
11, 12. Iesu bona ia murinai idia raka taudia edia hoa karadia ese dahaka idia hahedinaraia?
13. (a) Baibel ese ia gwauraia hoa karadia ese Iehova ena siahu be edena dala ai idia do hamomokania? (b) Peroveta herevadia edia anina ia vara; unai ese edena dala badana amo Iehova ena Dirava dagina ia hamomokania?
14. Iehova ena Witness taudia sivaraina hari inai negai ese edena dala ai ia hamomokania Iehova be Atai Herea Lohiabadana?
15. Keristani ekalesiana ia hagania daidia do idia haroro henia?
16. Aposetolo edia negai Keristani ekalesiana ese dahaka gaukara ia karaia guguru, bona unai orea ena gaukara ena bada be edena bamona?
17. Mataio 24:14 ena anina be edena dala badana ai ia vara noho?
18. Sivarai namona tanobada hegegemadai harorolaia gaukarana amo dahaka ia vara?
19. Keristani taudia be hesiai laganina matamatana lalonai idia vareai dainai, idia iboudiai idia hagoadaia edia lalona be edena bamona do idia hadaia auka?
[Pictures on page 15]
Sivarai namona idia koua lasi, to hari idia ese “tanobada ibounai dekenai” idia harorolaia noho