Iehova Ena Ura Idia Karaia

Aonega Hahinena ese Kerere Badana Ia Koua

AONEGA hahinena be tau dikana ia adavaia​—⁠unai be Abigaila bona Nabala edia noho. Abigaila be “mai ena aonega, bona mai ena hairaina danu.” To, Nabala be “mai ena dagedage, bona kara dika tauna.” (1 Samuela 25:⁠3) Edia kara bona lalohadai be idauidau tau bona hahine dekenai ia vara drama dainai, edia ladadia ita davaria Baibel lalonai. Dahaka dainai unai ia vara mani ita laloa.

Kara Namo Ia Laloa Lasi

Lagani 1,100 B.C.E. murinai, Davida idia horoa vadaeni, Israela ena king dagina do ia abia totona; to lohia gaukara ia karaia lasi, ia heau lao. Ia lohia noho king, Saulo, ia ura do ia hamasea, unai dainai Davida ia loa kava. Ia bona ena bamoa taudia 600 be Parana ena taunimanima noho lasi gabuna, Iuda ena saut kahanai bona Sinai ena tano gagaena kahirakahira, dekenai roho mauri gabuna idia davaria.​—⁠1 Samuela 23:13; 25:⁠1.

Unuseniai idia noho neganai, mamoe naria taudia idia hedavari henia, edia biaguna tauna ena ladana be Naboto. Unai Kaleba iduhuna amo taga tauna be mai ena mamoe 3,000, bona nanigosi 1,000. Ena mamoe edia huina be Karamele dekenai ia utua, unai hanua be Heberona ena saut kahanai bona reana Parana amo ena daudau be kilomita 40 sibona.a Davida bona ena tatau ese Nabala ena mamoe naria taudia idia durua unai tano gagaena dekenai idia loaloa henaohenao taudia amo edia mamoe idia gimaia.​—⁠1 Samuela 25:​14-​16.

To unai idia karaia lalonai, mamoe huina utua negana ia matamaia Karamele dekenai. Unai be moale neganai, biru taudia be uma ena anina idia gogoa negana hegeregerena. Unai be hariharibada negana danu, bona mamoe biagua taudia ese edia durua taudia dekenai davana namona idia henia. Unai dainai Davida be Karamele dekenai tatau 10 ia siaia, Nabala amo aniani idia noia edia mamoe gimaia davana abia totona neganai, Davida ena kara be maoro.​—⁠1 Samuela 25:​4-9.

To Nabala ese hariharibada karana ia hahedinaraia lasi vaitani. Mai hemataurai lasi ida ia gwau: “Davida be daika?” Unai murinai ia gwau Davida bona ena orea taudia be biaguna tauna dekena amo idia heau boio igui hesiai taudia sibona bamona, bona ia nanadaia, ia gwau: “Egu paraoa, bona ranu, bona vamu, lau alaia gaudia, lauegu mamoe huina utua taudia edia aniani totona gaudia, do lau abia, bona umui dekenai do lau henia, a? Lasi momokani! Umui mai gabuna danu daika ia diba?” Davida ia kamonai neganai, ena tatau ia oda henia, ia gwau: “Umui emui tuari kaia umui abia hegaegae tuari totona.” Tatau 400 bamona be tuari totona idia hegaegae.​—⁠1 Samuela 25:​10-​13.

Abigaila Ena Aonega Karana

Abigaila, Nabala ena adavana, ese unai hereva dika henia karana ia dibaia. Reana guna danu Nabala totona maino karaia hahinena bamona ia kara. To herevana, hari Abigaila ia kara haraga. Nabala ia hamaoroa lasi, to gau haida ia haboua​—⁠mamoe ima bona aniani momo danu​—⁠bona tano gagaena dekenai ia lao Davida hedavari henia totona.​—⁠1 Samuela 25:​18-​20.

Abigaila ese Davida ia itaia neganai, maoromaoro iena aena badinai ia tui diho. Ia noinoi, “Egu lohia e, inai dagedage tauna Nabala do oi laloa lasi.” “Egu lohia e, mani emu kara inai lau mailaia harihari gauna do oi abia dae, bona oiemu murinai idia raka noho orea taudia dekenai do oi henia.” Ma ia gwau: “Haida edia kerere davana [Nabala ena] oi henia lasi . . . oiemu lalonai do ia hisihisi lasi, bona do oi hemarai lasi.” Abigaila ese Davida ia hamaoroa bema ia kara haraga, gabeai unai kara do ia lalo-hisihisilaia.​—⁠1 Samuela 25:​23-​31.

Davida ese Abigaila ena hereva ia kamonai henia. Ia hereva henia, ia gwau: “Oiemu laloa maoro dainai Dirava lau tanikiu henia! Bona oi danu lau tanikiu henia, badina hari dina lau ese ala-ala do lau karaia, bona lau sibona ese Nabala ena kerere davana do lau henia, to oi ese inai bamona laloa oi hadokoa. . . . Bema lau dekenai oi mai haraga lasi, daba do ia ginidae lasi neganai, Nabala ena hesiai tauna ta be mai mauri danu do ia noho lasi.”​—⁠1 Samuela 25:​32-​34.

Ita Dibaia Gaudia

Inai Baibel sivarai ia hahedinaraia Dirava ia gari henia hahinena be, bema ia hegeregere neganai, namo ia havaraia totona kara ta ia karaia be maoro. Abigaila ese ena tau, Nabala, ena ura ia badinaia lasi, to Baibel ese ena kara ia gwauraia dika lasi. Lasi, ia hanamoa bona ia gwau ia be aonega bona laloa namonamo hahinena. Gau dikana ta ia vara lasi totona, Abigaila ese kara ta ia karaia bona taunimanima momo ia hamauria.

Ena be Dirava ia gari henia hahinena be hanaihanai ia hahedinaraia ena adavana henunai ia noho, to bema ena tau be taravatu maorodia ia hamakohia, ena hakaua ia badinaia lasi be maoro. To momokani, namona be mai “lalo manau, bona dagedage lasi ida” ia karaia bona ia ura ia sibona ia abia hidi, ia hekokoroku, eiava ia gwau-edeede dainai ia karaia lasi. (1 Petero 3:⁠4) To, namo lasi Dirava ia gari henia hahinena ia mamia ta ese ia doria Dirava ena taravatu hamakohia o aonega lasi momokani karana ia karaia totona. Momokani, Abigaila ena sivarai ese Baibel lalonai hahine be igui hesiai hahine sibona idia gwauraia taudia edia hereva ia hakoikoia.

Unai sivarai ese ita dekenai tauanina ena ura koua karana ia hadibaia danu. Nega haida, Davida ese unai kara ia hahedinaraia badabada. Hegeregere, ia ura Davida ia alaia tauna, King Saulo, ia hamasea lasi, ena be dala ia noho bona Saulo ena mase ese Davida dekenai maino ia henia diba. (1 Samuela 24:​2-7) To Nabala ese Davida ia gwau dika henia neganai, ena kara be idau, Davida ia hoa bada herea bona haraga ia gwauhamata davana do ia henia. ‘Tau ta ese idia dekenai ia kara dika henia neganai, iena kara dika davana do idia henia lasi’ Keristani taudia dekenai unai be sisiba namona. Nega idauidau ibounai, Paulo ena sisiba idia badinaia be namo: “Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.”​—⁠Roma 12:​17-​19.

[Footnote]

[Picture on page 15]

Abigaila ese Davida dekenai harihari gaudia ia mailaia