Memero Kekeni E, Tama Sina Umui Kamonai Henidia

“Memero bona kekeni e, umui emui tamana bona sinana do umui kamonai henia. Lohiabada lalonai badina kara maorona be unai.”​​—⁠EFESO 6:​1, BHğ.

 1. Kamonai karana ese edena dala ai oi ia gimaia diba?

ISEDA matana amo ita itaia ori koremadia idia haboua bona iseda taiana amo guba ena boiboi ita kamonai. Bona lai goadana ia toa. Oibe, Dirava be ‘mai hoa danu iseda tauanina ia karaia.’ (Salamo 139:14) Iseda tauanina ese unai dala idauidau amo ita idia hadibaia karana idia lalopararalaia taudia idia diba medu bona lai badana mai ena kevaru do ia mai. Bona dika ia havaraia diba. Unai dainai, gabu namona ta dekenai idia heau lao. Ita haida be iseda tauanina ese ita ia hadibaia karana ita kamonaia dainai, hari ita mauri noho. To, haida be idia kamonai lasi dainai idia mase.

 2. Dahaka dainai natudia ese hadibaia hereva idia abia be namo, bona dahaka dainai edia tama sina do idia kamonai henia?

² Umui matamata taudia be do umui davaria hekwakwanai gaudia dainai hadibaia hereva umui abia be namo, bona unai be emui tama sina edia maduna. Reana, oi do laloatao emu tama o sina ia gwau: “Lahi oi gadaralaia lasi, oi do ia gabua garina.” “Ia aru goadagoada sinavai badinai oi gini lasi, oi moru garina.” “Dala oi hanaia gwauraia neganai, kahana kahana oi itaia guna.” Madi, natudia haida be bero idia davaria eiava idia mase badina hadibaia hereva idia kamonai lasi. Oiemu tama sina oi kamonai henidia be “kara maorona.” Unai be aonega karana danu. (Aonega Herevadia 8:​33) Baibel siri ma ta ia gwau, inai kara be iseda Lohiabada Iesu Keriso ia “ura henia.” Oibe, Dirava ia ura oiemu tama sina do oi kamonai henidia.​​—⁠Kolose 3:​20, BHğ; 1 Korinto 8:⁠6.

Kamonai Karana Ena Hahenamo

 3. Ita momo dekenai “mauri korikori” be dahaka, bona edena bamona natudia be unai idia abia diba?

³ Oiemu tama sina oi kamonai henidia karana ese oi ia gimaia “inai tanobada ena mauri dekenai,” bona danu dala ia kehoa gabeai “mauri korikori” oi davaria totona. (1 Timoteo 4:8; 6:​19; BHğ) Ita momo dekenai unai “mauri korikori” be mauri hanaihanai tanobada matamatana dekenai, Dirava ese iena taravatu idia badinaia taudia ibounai dekenai unai gwauhamata ia karaia. Ena taravatu badana ta be: “ ‘Emui tamana bona sinana do umui matauraia.’ Inai be Buka Helaga ena Taravatu mai ena gwauhamata ginigunana. Badina be inai bamona umui karaia neganai, gwauhamata be inai: ‘Mauri namona do umui abia, bona emui mauri do ia daudau tanobada dekenai.’ ” Unai dainai, emu tama sina oi kamonai henia neganai, do oi moale. Oiemu vaira negana do oi lalohekwarahilaia lasi, to mai moale ida paradaiso tanobadana ai mauri hanaihanai do oi abia!​—⁠Efeso 6:​2, 3.

 4. Natudia be edena dala ai Dirava idia matauraia diba bona namo idia abia?

⁴ Emui tama sina umui kamonai henidia neganai idia umui matauraia unai, bona unai amo umui ese Dirava umui matauraia danu, badina ia gwau unai bamona do umui karaia. Bona namo umui davaria danu. Baibel ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho.” (Isaia 48:17; 1 Ioane 5:⁠3) Kamonai karana umui hahedinaraia dainai, dahaka namo umui davaria? Emui tama sina idia moale, bona dala idauidau amo edia lalonamo do idia hahedinaraia neganai, umui danu do umui moale. (Aonega Herevadia 23:​22-​25) To, mai anina bada gauna be, emui kamonai karana ese emui guba Tamana ia hamoalea, bona oi do ia hanamoa! Iesu ia gwau Dirava ena “ura be nega ibounai lau karaia.” Namona be ita itaia Iehova ese edena dala ai Iesu ia hanamoa bona ia gimaia.​​—⁠Ioane 8:​29.

Iesu​​—⁠Gaukara Namonamo Tauna

 5. Dahaka dainai ita gwau diba Iesu be gaukara namonamo tauna?

⁵ Iesu be Maria ena natuna roboana. Ena ubua tamana, Iosepa be kapenta tauna. Iosepa ese Iesu dekenai kapenta gaukara ia hadibaia bona ia be kapenta tauna ai ia lao. (Mataio 13:55; Mareko 6:3; Luka 1:​26-​31) Oi laloa Iesu be edena bamona kapenta tauna ai ia lao? Guna, guba dekenai ia do noho bona hoa dalanai Dirava ese rami-hebou kekenina Maria ena bogana lalonai ia do atoa lasi neganai, Iesu ia gwau: “Unai neganai lau be Dirava ena badibadinai lau noho, gaukara karaia [“namonamo,” NW ] tauna bamona. Dina ibounai Dirava be lau dekenai ia moale.” Iesu be guba dekenai gaukara namona ia karaia dainai Iehova ese ia lalonamo henia. Oi laloa Iesu be tanobada dekenai ia noho neganai, ia hekwarahi gaukara namonamo tauna ai ia lao totona, a?​​—⁠Aonega Herevadia 8:​30; Kolose 1:​15, 16.

 6. (a) Dahaka dainai ita gwau diba Iesu be mero maragi neganai, ruma gaukara ia karaia? (b) Natu ese edena dala ai Iesu idia tohotohoa diba?

⁶ Baibel ia hahedinaraia hegeregerena natudia idia ura idia gadara, bona Iesu be mero maragi neganai, ia gadara danu. (Sekaraia 8:5; Mataio 11:​16, 17) To, Iesu ena tama sina be taga bada lasi taudia bona ia be mero roboana dainai, ena be tamana ese kapenta gaukara ia hadibaia, to Iesu be ruma gaukara ma haida ia karaia danu. Gabeai, Iesu be haroro tauna ai ia lao bona unai ia karaia totona ena nega bada ia henia bona gau haida ia reaia danu. (Luka 9:​58; Ioane 5:​17) Oi be Iesu ena kara oi tohotohoa diba, a? Oiemu tama sina be oi idia hamaoroa emu daiutu oi hagoevaia bona gaukara ma haida oi karaia totona, a? Oi idia hagoadaia Keristani heboudia dekenai do oi lao bona oi abidadama henia gaudia be ma haida dekenai oi harorolaia totona, a? Bema Iesu be ena tama sina ese idia hamaoroa unai gaudia do ia karaia, oi laloa Iesu be dahaka do ia karaia?

Ia be Baibel Ia Stadilaia Namonamo Bona Tisa Namona Ta

 7. (a) Iesu be daidia ida Pasova totona idia lao? (b) Iesu be edeseniai idia davaria bona unuseniai dahaka ia karaia?

⁷ Israela besedia edia tatau bona memero ibounai be lagani ta lalonai aria toi idia karaia neganai, dubu helaga dekenai idia lao Iehova idia tomadiho henia totona. (Deuteronomi 16:16) Iesu ena mauri lagani be 12 neganai, iena ruma bese ibounai be Pasova totona Ierusalema dekenai idia lao​​—⁠iena tadina bona taihuna ibounai danu. Reana, Iesu ena ruma bese ida idia raka hebou taudia be Maria ena kakana, Salome bona ena adavana Sebedeo bona edia natudia Iamesi bona Ioane, gabeai idia be Iesu ena hahediba taudia ai idia lao.a (Mataio 4:​20, 21; 13:​54-​56; 27:56; Mareko 15:40; Ioane 19:25) Idia giroa lou neganai, Iosepa bona Maria idia laloa Iesu be iena varavara haida danu ia raka, unai dainai idia laloa bada lasi. To dina toi murinai, Iosepa bona Maria ese “Dubu Helaga lalonai idia davaria, hadibaia taudia edia huanai ia helai, edia hereva ia kamonai, bona ia henanadaia danu, idia dekenai.”​​—⁠Luka 2:​44-​46.

 8. Iesu be Dubu Helaga dekenai dahaka ia karaia, bona dahaka dainai taunimanima idia hoa?

⁸ Iesu be edena dala ai hadibaia taudia ia henanadai henidia? Iesu be gau haida dekenai ia daradara eiava diba abia totona, tomadiho hadibaia taudia ia nanadaia lasi. To, unai siri lalonai idia gaukaralaia Greek herevana ese ia hahedinaraia, idia ese Iesu idia nanadaia bona Iesu danu be edia diba ia tahua bona idia ia hadibaia totona idia dekenai henanadai ia henia. Oibe, ena be Iesu be mero maragina sibona, to ia be Baibel ia diba momo bona tomadiho hadibaia taudia be ia dekenai idia hoa! Baibel ia gwau: “Iena hereva idia kamonai taudia ibounai be iena diba bona iena haere dekenai idia hoa bada.”​​—⁠Luka 2:​47.

 9. Edena dala ai Baibel stadilaia karana dekenai Iesu oi tohotohoa diba?

⁹ Oi laloa dahaka dainai ena be Iesu be mero maragi sibona, to iena diba Baibel dekenai be bada bona hadibaia taudia be idia hoa? Oibe, iena tama sina be Dirava idia gari henia taudia dainai, Iesu be do maragi negana amo Dirava ena hereva idia hadibaia. (Esodo 12:​24-​27; Deuteronomi 6:​6-9; Mataio 1:​18-​20) Danu, Iosepa ese Iesu be dubu dekenai ia abia lao bona Baibel idia duahia bona herevalaia neganai ia kamonai. Oi danu emu tama sina be oi ida Baibel idia stadilaia bona Keristani heboudia dekenai oi idia abia lao, a? Edia hekwarahi oi abia dae, Iesu ese iena tama sina edia ia abia dae hegeregerena, a? Oi dibaia gaudia be ma haida dekenai oi herevalaia, a?

Iesu be Iena Tama Sina Ia Kamonai Henia

10. (a) Dahaka dainai Iosepa bona Maria be Iesu ena noho gabuna idia diba be namo? (b) Iesu ese natudia totona dahaka haheitalai namona ia hahedinaraia?

¹⁰ Iosepa bona Maria be dina toi murinai Dubu Helaga lalonai Iesu idia davaria neganai, edia hemami be edena bamona? Oibe, edia lalohekwarahi ia ore. To, Iesu ia hoa badina iena tama sina be idia diba lasi ia be edeseniai ia noho. Idia ruaosi idia diba ia be Dirava ena natuna. Bona danu, ena be idia laloparara momokani lasi, to reana idia diba Iesu be taunimanima ia Hamauria Tauna bona Dirava ena Basileia ena Lohia Tauna ai do ia lao. (Mataio 1:​21; Luka 1:​32-​35; 2:​11) Unai dainai Iesu ese idia ia nanadaidia: “Dahaka dainai lau umui tahua? Umui diba lasi egu Tamana ena ruma be lauegu noho ruma, a?” Iesu be ena tama sina ida Nasareta dekenai idia giroa lou bona Baibel ia gwau, “ia kamonai henia idia dekenai.” Danu, “iena sinana ese inai hereva ibounai ia laloatao.”​​—⁠Luka 2:​48-​51.

11. Iesu ena kamonai karana amo dahaka oi dibaia?

¹¹ Iesu oi tohotohoa bona emu tama sina oi kamonai henidia be auka lasi, a? Eiava oi laloa emu tama sina be hari tanobada ena mauri idia diba lasi bona oiemu diba ese edia diba ia hanaia, a? Momokani, reana oi be gau idauidau hegeregere, mobile phone, kompiuta bona gau matamatadia momo oi gaukaralaia diba. To Iesu oi laloa, hadibaia taudia be “iena diba bona iena haere dekenai idia hoa bada.” Iesu ena diba ese oiemu diba ia hanaia, ani? To, Iesu be iena tama sina ia kamonai henidia. Oibe, reana nega haida edia abia hidi karana ta dekenai ia lalotamona lasi, to ia do mero maragi neganai, Iesu be ena tama sina “ia kamonai henia.” Iesu ena haheitalai amo dahaka oi dibaia?​​—⁠Deuteronomi 5:​16, 29.

Kamonai Karana be mai Ena Hekwarahi

12. Kamonai karana ese edena bamona oi ia hamauria diba?

¹² Nega haida kamonai karana be auka, hegeregere lagani haida gunanai kekeni maragidia rua ese dala badana idia heau hanaia ena sivarai ese ia hahedinaraia. John be nesehanai dekenai ia raka lao neganai, unai kekeni rua ese idia boiria idia ida ia lao totona. To, John ia ura lasi neganai, kekeni ta ese ia hauraia ia gwau, “E itaia, ia gari!” John ia gari lasi, to ia gwau, “Egu sinana ena hereva do lau badinaia.” John be ataiai nesehanai dekenai ia raka noho lalonai, motuka taea edia regena ia kamonai bona ia itaia unai kekeni rua be motuka ta ese ia bampaia. Kekeni ta be maoromaoro ia mase, to ma ta be bero dikana ia abia dainai, aena idia utua oho. Unai kekeni edia sinana be ia hamaorodia vadaeni nesehanai dekenai do idia raka hanaia. Gabeai, edia sinana ese John ena sinana ia hereva henia ia gwau: “Bema idia be oiemu natuna mero ia kamonai bamona idia kamonai, inai dika do ia vara lasi.”​​—⁠Efeso 6:⁠1.

13. (a) Dahaka dainai emui tama sina umui kamonai henidia be maoro? (b) Edena nega ai natudia ese tama sina idia kamonai henia lasi be maoro?

¹³ Dahaka dainai Dirava ia gwau: “Memero bona kekeni e, umui emui tamana bona sinana do umui kamonai henia”? Badina emui tama sina umui kamonai henia neganai, umui be Dirava umui kamonai henia unai. Bona danu, emu tama sina edia diba be bada. Hegeregere, ataiai aksiden ia do vara lasi neganai, lagani 5 gunanai, John ena sinana ena turana ena natuna mero ta be unai dala badana ia hanaia lalonai motuka ese ia bampaia! Momokani, tama sina kamonai henia be nega haida ia auka, to Dirava ia gwau unai do umui karaia. To, bema umui emui tama sina, eiava ma haida ese umui idia hamaoroa hereva koikoi do umui gwauraia, umui henaohenao eiava Dirava ia ura henia lasi karana ta do umui karaia, umui ese ‘Dirava umui kamonai henia be namo, taunimanima umui kamonai henia be dika.’ Unai dainai Baibel ia gwau “emui tamana bona sinana do umui kamonai henia” murinai, ia gwau “Lohiabada lalonai.” Unai anina be bema tama sina edia hereva be Dirava ena taravatu ida ia hegeregere, oi kamonai henidia be maoro.​—⁠Kara 5:⁠29.

14. Iesu be goevadae tauna dainai ia kamonai be auka lasi, to dahaka dainai kamonai karana ia dibaia?

¹⁴ Oi laloa bema oi be goevadae tauna​​—⁠Iesu bamona, “kara dika lasi, kerere ta lasi” bona “kara dika taudia bamona lasi”​​—⁠reana do ia auka lasi emu tama sina oi kamonai henidia totona, ani? (Heberu 7:​26) Bema oi be goevadae tauna, kara dika do oi karaia lasi. (Genese 8:​21; Salamo 51:⁠5) To, ena be Iesu be goevadae tauna, ia danu be kamonai karana ia dibaia. Baibel ia gwau: “Iesu be Dirava ena Natuna, to ia ese hisihisi ia abia, bona unai hisihisi ese Dirava kamonai henia dalana ia hadibaia.” (Heberu 5:⁠8) Iesu be guba dekenai kamonai karana ia dibaia be anina lasi, to tanobada ai hisihisi amo edena dala ai kamonai karana ia dibaia?

15, 16. Iesu be edena dala ai kamonai karana ia dibaia?

¹⁵ Iehova ena hakaua henunai, Iosepa bona Maria ese Iesu idia naria bona gimaia dainai dika ta ia davaria lasi. (Mataio 2:​7-​23) To gabeai, Iehova ese Iesu amo ena gimaia siahuna ia kokia. Iesu ena tauanina ia hisihisi bona ia lalohisihisi bada neganai, “Dirava ia guriguri henia, mai taitai bona mai matana ranu danu.” (Heberu 5:⁠7) Edena nega ai unai bamona ia karaia?

¹⁶ Iesu ena tanobada maurina ena dokona ai, Satani ese iena abidadama ia tohoa neganai, Iesu be unai bamona ia karaia. Ia laloparara ia be kara dika tauna bamona do idia hamasea bona ia lalohisihisi, badina unai ese iena Tamana ena ladana do ia hadikaia. Unai nega ai, “ia guriguri goadagoada [Getesemane umana lalonai], ela bona iena kopina ia siahu ranuna be rara bamona ia moru tano dekenai.” Hora haida murinai, satauro ai idia kokoa ena hisihisi mamina be dika momokani dainai, mai taitai danu ia boiboi. (Luka 22:​42-​44; Mareko 15:34) “Unai hisihisi ese Dirava kamonai henia dalana ia hadibaia” bona unai ese ena Tamana ena lalona ia hamoalea. Hari, Iesu be guba dekenai bona kamonai karana ita hahedinaraia totona ita hekwarahi neganai, ia ese iseda hisihisi mamina ia diba.​​—⁠Aonega Herevadia 27:11; Heberu 2:​18; 4:​15.

Kamonai Karana Ia Dibaia

17. Matahakani ita abia neganai, dahaka ita laloa be namo?

¹⁷ Emu tama sina be oi idia matahakani henia neganai, idia hahedinaraia oi idia lalokau henia bona emu namo idia laloa bada. Baibel be inai henanadai ia henia: “Edena mero be iena tamana ese ia matakani henia lasi?” Bema oiemu tama sina be oi idia matahakani henia lasi, madi unai ese ia hahedinaraia idia be oi idia lalokau henia lasi, ani? Unai hegeregerena, Iehova be oi ia lalokau henia dainai, matahakani ia henia. “Tamana ese metau bona hisihisi ita dekenai ia henia neganai, iseda lalona idia hisihisi, bona ita be moale lasi. To gabeai, inai matakani ese idia ia hamaoromaoroa vadaeni taudia ese, kara maoromaoro ena davana namona, mai maino danu do idia davaria.”​​—⁠Heberu 12:​7-​11.

18. (a) Matahakani be dahaka ia hahedinaraia? (b) Matahakani ese haida dekenai dahaka namo ia havaraia?

¹⁸ Iesu ia gwau idaunega Israela ena king ta, aonega bada tauna, be tama sina edia matahakani karana ia herevalaia. Solomona ia gwau: “Iena natuna ia kwadia lasi tauna ese, iena natuna ia hadikaia noho, to iena natuna ia lalokau henia tauna ese, iena natuna ia matakani henia noho.” Danu, Solomona ia gwau tama sina ese natudia dekenai mai lalokau ida matahakani idia henia neganai, edia natuna be mase dekena amo do idia hamauria. (Aonega Herevadia 13:24; 23:​13, 14; Mataio 12:42) Keristani taihu ta ia laloatao ia maragi negana ai, hebou gabuna ai ia helai namonamo lasi bona regerege ia karaia neganai, ena tama ia gwau ruma dekenai idia giroa lou neganai do ia panisia. Hari, mai hebogahisi ida ena tamana ia laloa badina tamana ese mai lalokau ida ia matahakani henia dainai, ia durua mauri dalana namona ia badinaia totona.

19. Dahaka dainai emu tama sina oi kamonai henia be namo?

¹⁹ Bema oiemu tama sina be lalokau dalanai oi idia matahakani henia, anina be oi idia lalokau henia bona oi moale be namo. Oi kamonai henidia, iseda Lohiabada Iesu ese Iosepa bona Maria ia kamonai henidia hegeregerena. To, gau badana be oi kamonai henidia, badina emu guba Tamana, Iehova Dirava, ia ura unai bamona do oi karaia. Unai amo namo do oi davaria bona “mauri namona do umui abia, bona emui mauri do ia daudau tanobada dekenai.”​—⁠Efeso 6:​2, 3.

[Footnote]

Edena Bamona Do Oi Haere?

• Natudia be edia tama sina idia kamonai henidia neganai, dahaka namo do idia davaria?

• Iesu be mero maragi neganai, edena dala ai ia be haheitalai namona ena tama sina ia kamonai henia karana dekenai?

• Iesu be edena dala ai kamonai karana ia dibaia?

[Picture on page 14]

Iesu, ena mauri lagani 12, be Baibel ia diba momo

[Picture on page 16]

Iesu be edena dala ai hisihisi amo kamonai karana ia dibaia?