Dahaka Dainai Ita “Gima Noho” be Namo?

 1. Mani oi hahedinaraia dahaka dainai ita ese nega bona idia vara gaudia ita laloa be mai anina bada? (Laulau ginigunana herevalaia.)

HEBOUHEBOU gabuna ai, bema TV ai ia hedinarai klok dekenai ita itaia sekeni haida murinai hebou do ia matamaia neganai, eda helai gabudia ita abia unai amo program do ia hamatamaia miusiki ita moalelaia diba. Unai be nega namona Watchtower okestra oreana edia miusiki namona ita kamonai henia bona mai anina bada gauna be iseda lalona bona kudouna ita hegaegaelaia unai tok namodia do ita kamonai henidia totona. To, bema haida be idia laloa namonamo lasi bona idia herevahereva noho bona idia diba lasi program be ia heau vadaeni be edena bamona? Toana be idia gima lasi, hebou ena nega bona idia vara gaudia idia laloa lasi, hegeregere seamani be platfom ai ia helai, miusiki ia matamaia bona tadikaka taihu be idia helai vadaeni. Unai ese ita ia durua diba do ia vara mai anina bada gauna ena nega ita laloa bada totona. Unai mai anina bada gauna dainai ita gima be gau badana. Unai be dahaka?

 2. Dahaka dainai Iesu ese ena hahediba taudia ia hamaoroa idia “gima noho” totona?

² Iesu Keriso ese “inai nega oromana ena dokona ena toana” ia herevalaia neganai, ena hahediba taudia ia sisiba henia ia gwau: “Umui gima noho bona umui noga noho, badina Dirava ese ia abia hidi negana be umui diba lasi.” Unai murinai Iesu ese idia ma ia hadibaia lou, ia gwau: “Umui gima noho.” (Mat. 24:3; Mareko 13:32-37 duahia.) Mataio bukana ese danu ia hahedinaraia Iesu be ena murinai idia raka taudia dekenai unai sisiba ia gwauraia, ia gwau: “Do umui gima noho, badina emui Lohiabada ia mai dinana be umui diba lasi. Do umui noho hegaegae, badina umui laloa lasi horana ai, taunimanima ena Natuna do ia mai.” Ma ia gwau: “Do umui gima noho, badina dina eiava hora be umui diba lasi.”​—Mat. 24:42-44; 25:13.

 3. Dahaka dainai Iesu ena sisiba ita laloa bada?

³ Ita be Iehova ena Witnes taudia bona Iesu ena sisiba ita laloa bada. Ita diba ita be “dokona negana” ai ita noho bona “hisihisi badana” be kahirakahira do ia mai. (Dan. 12:4; Mat. 24:21) Ita itaia tanobada hegegemadai, lalometau ia havaraia tuari idauidau idia vara, matabodaga karadia bona kara dika ia bada daekau, tomadiho momo lalonai daradara ia vara, hitolo bada, gorere idauidau, bona tano mareremarere idia vara noho. Bona ita itaia gabu ibounai dekenai Iehova ena taunimanima ese Basileia sivarai namona idia harorolaia noho. (Mat. 24:7, 11, 12, 14; Luka 21:11) Ita be mai moale ida Lohiabada ena mai bona Dirava ena ura do ia guguru negana ita naria noho.​—Mar. 13:26, 27.

 4. (a) Edena dala ai ita abia dae hari Iesu be Aramagedono ena matamaia negana ia diba? (b) Herevana hisihisi badana ena matamaia negana ita diba lasi, to dahaka ese unai ia hamomokania?

⁴ Ita diba hebouhebou iboudiai be mai edia hamatamaia negana. To, hisihisi badana do ia matamaia negana, laganina, dinana bona horana be ita gwauraia diba lasi, ena be ita hekwarahi bada unai ita dibaia totona. Iesu be tanobada ai ia noho neganai, ia gwau: “Unai dina bona hora be tau ta ia diba lasi, guba anerudia idia diba lasi, Natuna danu be ia diba lasi, to Tamana sibona.” (Mat. 24:36) To Keriso be guba ai siahu ia abia Satani ena tanobada ia tuari henia totona. (Apo. 19:11-16) Unai ese ia hahedinaraia hari Iesu ia diba edena nega ai Aramagedono do ia vara. To ita be ita diba lasi. Unai dainai, hisihisi badana ita naria lalonai, ita gima noho be namo. Iehova be unai nega ia diba. Danu dokona do ia ginidae negana ia diba namonamo. Iehova be hisihisi badana do ia matamaia negana ia duahia vadaeni, bona unai be “do ia vara momokani.” (Habakuku 2:1-3 duahia.) Edena dala ai unai ita diba?

 5. Hanaihanai Iehova ena peroveta herevadia be nega korikori ai idia guguru. Haheitalai ta gwauraia.

⁵ Iehova ena peroveta herevadia be edia nega korikori dekenai idia guguru noho! Israela taudia be Aigupito amo ia ruhadia neganai, unai nega ia gaukaralaia dalana mani ita laloa. Lagani 1513 B.C.E. ena Nisan 14 dinana ai, Mose ia gwau: “Lagani 430 ia ore dinana momokani neganai, Lohiabada ena orea ibounai be Aigupito tano dekena amo idia raka siri.” (Eso. 12:40-42) Lagani 1943 B.C.E. ai, Iehova ese Aberahamo ida edia kontraka idia karaia neganai, unai “lagani 430” ia matamaia. (Gal. 3:17, 18) Gabeai, Iehova ese Aberahamo ia hamaoroa, ia gwau: “Momokani, oiemu tubuna be idau tano dekenai dohore idia noho, idau taudia bamona. Unuseni hesiai gaukara davana lasi do idia karaia, bona hisihisi do idia abia lagani 400 dekenai.” (Gen. 15:13; Kara 7:6) Lagani 1513 B.C.E. ai, Isamaela ese Isako ia kirikirilaia bona Israela taudia be Aigupito amo idia heau mauri. Bena lagani 1913 B.C.E. ai, unai “lagani 400” ena hisihisi badana ia matamaia. (Gen. 21:8-10; Gal. 4:22-29) Oibe, Iehova ese lagani 400 gunanai, ena taunimanima edia roho mauri dinana ia abia hidi!

 6. Dahaka dainai ita abia dae momokani Iehova ese ena taunimanima do ia hamauria?

⁶ Aigupito amo idia heau mauri taudia huanai ia noho tauna, Iosua, ese Israela taudia ia hadibaia lou, ia gwau: “Umui ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.” (Ios. 23:2, 14) Unai dainai ita abia dae Iehova ese hisihisi badana dekenai ita do ia hamauria gwauhamatana be do ia vara momokani. To, bema ita ura inai tanobada oromana dikana amo ita roho mauri, ita gima noho be gau badana.

7, 8. (a) Baibel negadiai, gima tauna ena gaukara be dahaka, bona unai amo dahaka ita dibaia? (b) Dahaka ia vara diba bema gima tauna ia mahuta? Haheitalai gwauraia.

⁷ Baibel negadiai idia gima taudia edia sivarai ese ita ia hadibaia ita gima noho be gau badana. Unai negai, siti badadia hegeregere, Ierusalema be magu badadia ese idia hagegea. Unai magu ese hanua taudia be henaohenao taudia amo ia gimaia bona danu gima taudia ia durua unai amo idia ese gabu ibounai idia itaia diba. Dina bona hanuaboi lalonai, gima taudia be unai magu badadia latanai bona geiti dekenai idia gini. Unai amo idia ese hanua taudia do idia hadibaia diba bema dika ta ia mai noho. (Isa. 62:6) Namona be gima tauna be ia noga bona gabu ia itaia namonamo, badina unai be mase bona mauri gaukarana.​—Ese. 33:6.

⁸ Histori ia torea Iuda tauna, Josephus, ena toretore lalonai ia hahedinaraia, lagani 70 C.E. ai, Roma ena tuari taudia be Ierusalema ena magu bona Antonia Kohorona idia hagegea, badina Ierusalema ena gima taudia be idia mahuta. Unuseniai, Roma taudia be dubu helaga lalonai idia vareai bona lahi amo idia gabua, guna Ierusalema bona Iuda besena ese idia davaria lasi hisihisi badana ia vara.

 9. Hari inai negai taunimanima momo be dahaka idia diba lasi?

⁹ Hari inai negai, tano momo be “gima taudia” idia gaukaralaia noho bamona​—idia haida be tano ena boda dekenai idia loaloa taudia bona sekuriti kamera idia gaukaralaia. Idia ese edia tano idia hadikaia diba vareai kava taudia bona edia inai taudia idia tahua. To, idia be taunimanima bona edia gavamani ese idia havaraia diba dika gaudia sibona idia koua diba. Idia diba lasi Keriso henunai, Dirava ena guba Basileia gavamanina ia noho bona gaukara idauidau ia karaia bona gabeai bese ibounai do ia hahemaoro henia. (Isa. 9:6, 7; 56:10; Dan. 2:44) To, ita be ita gima bona eda abidadama ita hagoadaia, bena hahemaoro dinana ia ginidae neganai, ita hegaegae vadaeni.​—Sal. 130:6.

10, 11. (a) Dahaka dekenai ita naria namonamo be namo bona dahaka dainai? (b) Edena bamona oi diba Diabolo ese taunimanima edia lalona ia veria Baibel ena peroveta herevadia idia dadaraia totona?

¹⁰ Mani oi laloa gima tauna be hanuaboi ibounai lalonai ena gima gabunai ia gini. Unai dainai ia hesiku bada bona ena gima negana ia ore gwauraia neganai, ia laloa ia mahuta be namo. Unai hegeregerena, inai nega oromana ena dokona ia do ginidae lasi neganai, iseda gima karana do idia hadikaia gaudia momo do idia vara. Bema ita gima lasi, dika bada do ita davaria. Iseda gima bona noga karana idia hadikaia diba gaudia toi mani ita herevalaia.

¹¹ Diabolo ese taunimanima be Dirava amo ia hakaua kerere. Iesu be kahirakahira do ia mase neganai, ia ese nega toi ena hahediba taudia dekenai inai “tanobada ena lohia tauna” ia herevalaia. (Ioa. 12:31; 14:30; 16:11) Iesu ia diba Diabolo ese taunimanima edia lalona ia hadiburaia, unai amo idia be Dirava ena peroveta herevana, vaira nega totona karaharaga lalohadaina idia abia lasi. (Sep. 1:14) Satani ese tomadiho koikoi ia gaukaralaia taunimanima edia lalona ia veria totona. Ma haida danu oi herevahereva neganai unai oi dibaia, a? Inai nega oromana ena dokona ia mai noho bona hari Keriso be Dirava ena Basileia ia lohiaia herevana idia diba lasi totona, Diabolo ese abidadama lasi taudia “edia lalona ia hadiburaia” vadaeni, a? (2 Kor. 4:3-6) Nega hida oi kamonai taunimanima idia gwau, “lau ura lasi”? Nega momo, inai nega ena dokona ita herevalaia neganai, idia laloa bada lasi.

12. Dahaka dainai Diabolo ena koikoi karadia ita dadaraia be namo?

¹² Namo lasi ma haida edia kamonai lasi karana ese emu gima karana ia hadikaia. Inai oi diba badina, Paulo ese ena tadikaka ia tore henia neganai, ia gwau: “Umui diba namonamo, Iehova ena dina be do ia mai,” bona ma ia gwau, “henaohenao tauna be hanuaboi ai ia mai bamona.” (1 Tesalonika 5:1-6 duahia.) Iesu ese ita ia hadibaia, ia gwau: “Umui hegaegae noho, badina umui laloa lasi horana ai taunimanima ena Natuna do ia mai.” (Luka 12:39, 40) Satani ese taunimanima momo do ia koia bona do idia abia dae “maino bona noho namo” ia vara vadaeni. Idia do ia hakaua kerere, bena do idia laloa tanobada oromana be ia dika lasi. Ita be edena bamona? Bema ita “noga noho bona iseda laloa maoromaoro karana ita dogoatao noho,” unai hahemaoro dinana ai, do ita “hoa lasi, henaohenao tauna be dina ena diari dekenai ia hoa bamona.” Unai dainai, namona be dina ta ta ai Dirava ena Hereva ita duahia bona Iehova ese ita dekenai ia herevalaia gaudia ita laloa dobu.

13. Edena dala ai tanobada ena lalohadai ese taunimanima ia hakaua kerere, bona edena dala ai unai ita dadaraia diba?

¹³ Tanobada ena lalohadai ese taunimanima edia abidadama ia hadikaia noho. Taunimanima momo be edia dina ta ta mauri lalonai idia karaia gaudia dekenai idia bisi dainai, “Dirava dibaia totona” idia be nega lasi. (Mat. 5:3) Idia be mai ura bada ida tanobada ena kohu, “tauanina ena ura, matana ese idia ura henia gaudia” unai, idia tahua. (1 Ioa. 2:16) Danu televisen, muvi bona miusiki dainai, momo be ‘moale karadia idia ura henia bada,’ bona lagani ta ta ai, unai bamona hahetoho be idia bada idia lao noho. (2 Tim. 3:4) Unai dainai Paulo ese Keristani taudia ia hamaoroa, “tauanina ena ura karaia totona [idia] palani guna lasi,” badina unai ese edia abidadama ia hadikaia diba.​—Roma 13:11-14.

14. Luka 21:34, 35 ai dahaka sisiba ia noho?

¹⁴ Namona be tanobada ena lalohadai ita dadaraia, bona iseda mauri ai Dirava ena lauma ena hakaua dalana ita abia dae, unai amo Iehova ese vaira nega totona ia gwauraia gaudia ita lalopararalaia.^[1] (1 Kor. 2:12) Namo lasi ita laloa gau ma ta ese iseda abidadama do ia hadikaia lasi, to dina ta ta ai ita karaia gaudia ese iseda abidadama idia hadikaia diba, bema unai gaudia dekenai nega bada ita atoa. (Luka 21:34, 35 duahia.) Ita gima noho dainai haida ese ita do idia hevasehalaia, to namo lasi unai ese iseda gima noho karana ia hadikaia. (2 Pet. 3:3-7) To, namona be hanaihanai iseda kongrigeisen heboudia ai iseda tadikaka taihu ita bamoa, badina unuseniai Dirava ena lauma ia noho.

15. Petero, Iamesi, bona Ioane dekenai dahaka ia vara, bona edena dala ai ita dekenai unai ia vara diba?

¹⁵ Iseda goevadae lasi tauanina dainai do ia auka ita noga noho totona. Iesu ia diba goevadae lasi taudia be tauanina ena ura kereredia do idia badinaia. Iesu ena hanuaboi ginigabena ai ia vara gauna mani oi laloa. Dirava ia badinaia noho totona, iena guba Tamana ena heduru ia noia be namo. Unai dainai Petero, Iamesi, bona Ioane ia hadibaia, ia guriguri negana ai idia “gima noho” be namo. To idia be do ia vara gauna idia laloa bada lasi. Idia ese edia Biaguna idia gimaia lasi, to edia tauanina ia manoka bona idia mahuta. Danu, ena be Iesu be ia hesiku bada, to ia noga noho bona ena Tamana ia guriguri henia. Iena bamodia be unai idia karaia danu be namo.​—Mar. 14:32-41.

16. Iesu ena hereva Luka 21:36 hegeregerena, ita “gima noho” totona, dahaka ita karaia be namo?

¹⁶ Getesemane umana ai Iesu idia do dogoatao lasi neganai, ia ese ena hahediba taudia ia hamaoroa Iehova idia guriguri henia goadagoada be namo. (Luka 21:36 duahia.) Unai dainai ita noga noho totona, ita danu ita guriguri noho be gau badana.​—1 Pet. 4:7.

17. Edena bamona ita hahedinaraia ita be vaira nega totona ita hegaegae?

¹⁷ Iesu ia gwau dokona negana be ‘ita laloa lasi horana ai’ do ia mai, unai dainai hari ita mahuta lasi, bona Satani, ena tanobada, bona iseda goevadae lasi tauanina ena ura gaudia idauidau ita dadaraia be namo. (Mat. 24:44) Baibel be Dirava bona Keriso ese vaira nega ai do idia karaia gaudia bona do ita noga noho dalana ia gwauraia. Namona be Iehova ita dibaia noho, iseda hetura karana ia ida ita hagoadaia, bona Basileia ita atoa guna. Dokona negana ai idia vara gaudia ita lalodia be namo, unai amo vaira negana totona do ita hegaegae. (Apok. 22:20) Iseda mauri ita haboioa diba!