Ta Ta Hagoadaia Karana “Do Ita Habadaia Noho”

 1. Dahaka dainai Aposetolo Paulo ese Heberu Keristani taudia ia hadibaia ta ta hagoadaia karana ‘do idia habadaia noho’?

Dahaka dainai ma haida hagoadaia karana ita habadaia be namo? Aposetolo Paulo be Heberu Keristani taudia ia tore henidia neganai, ena badina ia gwauraia. Ia gwau: “Namona be ta ta ibounai do ita laloa bona do ita hagoadaia, ita lalokau heheni bona kara namodia ita karaia totona. Bona iseda hebou karana ita rakatania lasi, vaia haida ese idia karaia bamona, to do ita hagoadaia heheni, bona unai kara do ita habadaia noho, badina umui itaia unai dina be ia kahirakahira noho.” (Heb. 10:24, 25) Lagani faiv lalonai, Ierusalema ai idia noho Keristani taudia idia diba “Iehova ena dina” be ia kahirakahira noho, bona Iesu ese ia gwauraia toa danu idia itaia. (Kara 2:19, 20; Luka 21:20-22) Lagani 70 C.E. ai, Iehova ena dina ia ginidae. Iehova ena hahemaoro herevana hegeregerena, unai dina ai Roma tuari taudia ese Ierusalema idia hadikaia.

 2. Dahaka dainai hari ta ta hagoadaia karana ita laloa bada be namo?

² Hari, ita diba momokani Iehova ena dina “badana mai garina” be ia kahirakahira vadaeni. (Ioe. 2:11, NWT) Peroveta tauna Sepanaia ia gwau: “Iehova ena dina badana be ia kahirakahira! Oibe, ia be kahirakahira bona ia mai haraga noho!” (Sep. 1:14, NWT) Unai peroveta herevana be hari iseda nega ia herevalaia danu. Iehova ena dina be kahirakahira dainai, Paulo ese ita ia hadibaia “namona be ta ta ibounai do ita laloa bona do ita hagoadaia, ita lalokau heheni bona kara namodia ita karaia totona.” (Heb. 10:24) Unai dainai namona be iseda tadikaka taihu ita lalodia bada, bona hekwakwanai negadiai, idia ita hagoadaia be namo.

 3. Ta ta hagoadaia karana dekenai aposetolo Paulo ena hereva be dahaka? (Laulau ginigunana itaia.)

³ Baibel ia gwau: “Lalohekwarahi ese ta ena lalona ia hametaua, to hereva namona ese ta ena lalona ia hamoalea.” (Aon. 12:25, NWT) Ita ibounai dekenai unai be momokani. Unai dainai dina ta ta ai hagoadaia herevadia ita abia be namo. Paulo ese ia hahedinaraia, bema oi be ma haida oi hagoadaia, oi sibona oi hagoadaia danu be namo. Roma ai idia noho Keristani taudia dekenai ia gwau: “Lau ura bada umui lau itaia, bona Dirava amo ia mai harihari gauna be umui dekenai lau henia, do umui gini goada totona. Eiava do ita hagoadaia heheni, umui emui abidadama amo lau umui hagoadaia bona egu abidadama amo umui lau hagoadaia.” (Roma 1:11, 12) Oibe, Paulo be nega momo tadikaka ia hagoadadia, to ia danu ese sibona ia hagoadaia be namo.​—⁠Roma 15:30-32 duahia.

4, 5. Hari, daidia ita hagoadaia diba, bona dahaka dainai?

⁴ Sibodia edia ura idia dadaraia bona Dirava ena hesiai gaukara idia karaia taudia ita hanamoa be namo. Idia haida be abidadama painia taudia. Momo be sibona edia ura idia dadaraia painia gaukara idia karaia totona. Misinari taudia, sekit naria taudia bona edia adavadia, bona brens ofesi o remote trensleisen ofesi dekenai idia gaukara taudia danu. Idia be sibona edia ura idia dadaraia, unai amo nega bada idia henia Dirava hesiai henia totona. Unai dainai hagoadaia herevadia idia abia be namo. Danu guna ful-taim hesiai gaukara idia karaia bona hari danu idia ura unai gaukara idia karaia, to badina haida dainai edia hesiai gaukara idia hamaragia taudia ita hagoadaia diba.

⁵ Tadikaka bona taihu haida be singul maurina idia noholaia badina idia ura Baibel ai ia noho herevana, “Lohiabada lalonai sibona” headava idia badinaia. Idia ita hagoadaia diba. (1 Kor. 7:39) Unai hegeregerena, idia gaukara goada hahinedia be edia adavadia ese idia dekenai hanamoa herevadia idia gwauraia neganai, idia moale. (Aon. 31:28, 31) Danu, dagedage eiava gorere idia haheaukalaia Keristani taudia ita hagoadaia. (2 Tes. 1:3-5) Iehova bona Keriso be hanaihanai unai abidadama hesiai taudia idia hagoadadia.​—⁠2 Tesalonika 2:16, 17 duahia.

 6. Isaia 32:1, 2 ese ia herevalaia elda taudia edia gaukara be dahaka?

⁶ Isaia 32:1, 2 duahia. Iesu Keriso ese ena horoa tadikaka bona mamoe ma haida amo “lohia” taudia ia gaukaralaia, hari inai negai idia lalometau bona hisihisi idia mamia tadikaka taihu idia hagoadaia totona. Unai be maoro, badina elda taudia be ma haida edia abidadama idia “biagua” lasi, to tadikaka taihu edia namo totona idia ida idia “gaukara hebou” be namo.​—⁠2 Kor. 1:24.

7, 8. Edena dala ai elda taudia be edia hereva sibona lasi, to edia kara amo ma haida idia hagoadaia diba?

⁷ Aposetolo Paulo ena haheitalai ita tohotohoa be namo. Tesalonika Keristani taudia be dagedage idia davaria neganai, idia dekenai ia gwau: “Umui ai lalokau henia dainai, ai moale umui dekenai sivarai namona ai harorolaia, to unai sibona lasi, ai be mai moale ida emai mauri danu ai henia umui ai durua totona, badina umui be emai lalokau taudia.”​—⁠1 Tes. 2:8.

⁸ To nega haida hagoadaia herevana sibona be hegeregere lasi. Unai dainai Paulo ese Efeso elda taudia ia hamaoroa, ia gwau: “Gau ibounai lalonai umui dekenai lau hahedinaraia, namona be umui gaukara goada bona manoka taudia umui durua. Bona Lohiabada Iesu ena hereva umui laloatao be namo, ia gwau, ‘Henia kara ena moale be bada, to abia kara ena moale be maragi.’” (Kara 20:35) Paulo be ena hereva amo tadikaka ia hagoadaia sibona lasi, to ia ura ‘idia totona gau ibounai do ia henia bona sibona ia henia momokani.’ (2 Kor. 12:15) Unai hegeregerena, elda taudia ese edia hereva amo tadikaka taihu idia hagoadaia sibona lasi, to namona be edia kara amo idia hahedinaraia idia lalodia bada.​—⁠1 Kor. 14:3.

 9. Edena dala ai elda taudia ese mai lalokau ida sisiba idia henia diba?

⁹ Ta ta hagoadaia karana be ta sisiba henia karana danu, to elda taudia ese Baibel ai idia noho haheitalai idia tohotohoa, mai lalokau ida sisiba idia henia totona. Iesu ia mase bona ia toreisi lou murinai, unai kara ia hahedinaraia. Asia Minor ai idia noho Kongrigeisen haida ia sisiba henidia, to ia karaia dalana mani ita laloa. Efeso, Peregamo bona Tuatira kongrigeisen ia hanamoa, bena unai murinai idia ia sisiba henia. (Apok. 2;1-5, 12, 13, 18, 19) Laodikea kongrigeisen taudia dekenai ia gwau: “Lau ura henia taudia ibounai lau sisiba henia bona lau matahakani henia. Unai dainai oi gaukara goada bona oi helalo-kerehai.” (Apok. 3:19) Namona be elda taudia ese sisiba idia henia neganai Keriso ena haheitalai idia tohotohoa.

10. Edena dala ai ita ibounai ese ta ta ita hagoadaia diba?

¹⁰ Ma haida hagoadaia karana be elda taudia sibona edia gaukara lasi. Paulo ese Keristani taudia ibounai ia hagoadaia, ma haida dekenai ‘hereva namodia do idia gwauraia, unai amo edia hereva idia kamonai taudia do idia hagoadaia.’ (Efe. 4:29) Namona be ita noho hegaegae ma haida durua daladia ita laloa totona. Paulo ese Heberu Keristani taudia ia sisiba henidia, ia gwau: “Idia manoka imadia bona idia goada lasi tuidia do umui hagoadaia, bona emui aena edia raka daladia do umui hamaoromaoroa noho, unai amo ia dika aena be do ia dika momokani lasi, to do ia namo lou.” (Heb. 12:12, 13) Ita ibounai, matamata taudia danu, ese iseda hereva amo ta ta ita hagoadaia diba.

11. Marthe be edena dala ai heduru ia abia?

¹¹ Taihu ta ladana, Marthe,a be lagani daudau lalonai ia lalometau bada. Ia gwau: “Dina ta heduru totona lau guriguri bona unai dina ai, taihu burukana ta ida lau hedavari, ia ese lau dekenai lalokau bona hebogahisi ia hahedinaraia, unai heduru be nega korikori ai lau abia. Taihu burukana ese lau dekenai ena ekspiriens ia gwauraia. Ia davaria hahetoho be lau abia hahetoho hegeregerena, unai dainai lau mamia lau be sibona lasi.” Reana unai taihu burukana ia diba lasi to ena hagoadaia herevana ese Marthe ia durua bada.

12, 13. Filipi 2:1-4 ena sisiba be edena dala idauidau ai ita badinaia diba?

¹² Paulo ese Filipi kongrigeisen ia sisiba henia, ia gwau: “Bema umui huanai inai gaudia hegeregere, Keristani hagoadaia karana, mai lalokau ida ta hagoadaia karana, ta ta laloa karana, lalokau bona hebogahisi idia noho, vadaeni egu moale be do ia bada, badina emui lalona be tamona, emui lalokau be tamona, umui be tauanina tamona bamona, bona lalohadai tamona umui dogoatao. Namo lasi umui badu eiava sibona umui abia isi, to mai manau ida do umui laloa ma haida ese umui idia hereaia, umui sibona emui namo do umui laloa lasi, to ma haida edia namo danu do umui laloa.”​—⁠Fili. 2:1-4.

¹³ Oibe, namona be iseda tadikaka bona taihu ita hagoadaia, bona ita gaukara goada idia dekenai, “mai lalokau ida ta hagoadaia karana,” “ta ta laloa karana” bona “lalokau bona hebogahisi” ita hahedinaraia totona.

14. Edena dala ta ai ma haida ita hagoadaia diba?

¹⁴ Guna ita durua taudia be hari edia abidadama dekenai idia goada noho bona edia sivarai ita kamonai neganai unai ese ita ia hagoadaia diba. Aposetolo Ioane dekenai unai ia vara, ia gwau: “Lau kamonai egu natudia be hereva momokani ai idia raka noho neganai, lau moale bada bona moale ta ese unai moale ia hereaia lasi.” (3 Ioa. 4) Painia taudia momo ese unai idia hamomokania diba, badina idia kamonai lagani gunadia ai hereva momokani dekenai idia durudia taudia haida be hari idia goada noho, bona reana painia gaukara idia karaia, unai ese idia ia hagoadaia diba. Danu ia lalomanoka painia ta dekenai guna ia davaria moalena ita gwauraia lou neganai, unai ese ia do ia hagoadaia.

15. Edena dala ma ta ai edia hesiai gaukara idia karaia noho taudia ita hagoadaia diba?

¹⁵ Sekit naria taudia momo idia gwau, idia bona edia adavadia be idia vadivadi henia kongrigeisen ta amo, tanikiu leta kwadogina ta idia abia neganai, unai ese idia ia hagoadaia bada. Elda, misinari, painia bona Betele taudia be hekwakwanai momo idia davaria to edia hesiai gaukara idia karaia noho, iseda hanamoa herevadia ese idia ia hagoadaia diba.

16. Dahaka kara ese ta ia hagoadaia diba?

¹⁶ Bema ita laloa ta ita hagoadaia diba lasi badina ita be herevahereva momo lasi taudia, unai be lalohadai kererena. Ta hagoadaia totona be ia auka lasi​—⁠reana emu kiri toana sibona be hegeregere. Bema oi ia itaia bona kiri toana ia hahedinaraia lasi, anina be ia be mai ena hekwakwanai ta, bona emu kamonai karana ese ia do ia hagoadaia.​—⁠Iam. 1:19.

17. Tadikaka matamata ta be ia lalohisihisi neganai, edena dala ai heduru ia abia?

¹⁷ Tadikaka matamata ta ladana Henri, ena varavara taudia haida bona ena tamana, ia be elda ta, be kongrigeisen amo idia atodia siri neganai, ia lalohisihisi bada. Sekit naria tauna ta ese Henri ia hagoadaia totona, kofi inua sitoa ta dekenai ia hakaua lao bona unuseniai ena lalohekwarahi gaudia ibounai ia kamonai. Edia herevahereva murinai, Henri ia laloparara ena famili ia durua orea dekenai idia giroa lou dala tamona be, iena abidadama dekenai ia gini goada be namo. Henri ese Salamo 46; Sepanaia 3:17; bona Mareko 10:29, 30 ia duahia neganai ena lalona ia goada.

18. (a) King Solomona be dahaka ia gwau? (b) Bona aposetolo Paulo be dahaka ia gwau?

¹⁸ Marthe bona Henri edia sivarai ese ia hahedinaraia, idia lalohisihisi tadikaka taihu ita hagoadaia diba. King Solomona ia gwau: “Nega maorona ai ia gwauraia herevana ese namo bada ia havaraia! Ta ese oi ia itaia bona ia moale neganai, unai ese oi ia hamoalea. Sivarai namona ese ta dekenai goada ia henia.” (Aon. 15:23,30, NWT) Danu, Gima Kohorona eiava iseda websait ai idia noho gaudia duahia karana ese lalometau tauna ia hagoadaia diba. Paulo ese ia hahedinaraia, lalometau taudia ida Basileia anedia ita abia hebou karana be hagoadaia dalana ta. Ia gwau: “Umui ta ta do umui hadibaia bona sisiba henia noho mai salamo ida, Dirava hanamoa anedia bona tomadiho ane hairaidia ida. Bona emui kudouna ai Iehova dekenai ane do umui abia.”​—⁠Kol. 3:16; Kara 16:25.

19. Dahaka dainai hari ta ta hagoadaia heheni karana be mai anina bada, bona dahaka ita karaia be namo?

¹⁹ Iehova ena dina be ia kahirakahira noho dainai, namona be ta ta hagoadaia karana “do ita habadaia noho.” (Heb. 10:25) Paulo ese iena nega ai idia noho Keristani taudia ia hagoadaia hegeregerena, hari danu, namona be “[ita] durua heheni bona hagoadaia heheni noho, hari [ita] karaia noho bamona.”​—⁠1 Tes. 5:11.