Iehova Tohotohoa Goada Ia Henia Diravana

 1. Tau bona hahine ginigunadia idia kara dika murinai, Iehova be dahaka helaro ia gwauraia?

TAU bona hahine ginigunadia idia kara dika negana amo ema bona hari, Iehova ese ia hamomokania ia be goada ia henia Diravana. Eden ai Adamu bona Heva idia gwau-edeede murinai, Ia ese Adamu ena bese dekenai helaro abia dalana ia henia. Unai be mauri ena dokona lasi. Taunimanima ese inai peroveta herevana Genese 3:15 ai idia lalopararalaia neganai, helaro idia abia, daudau lasi “idaunegai gaigaina,” Satani Diabolo, bona ena kara dika ibounai be Dirava ese do ia haorea vaitani.​—⁠Gen. 3:15; Apok. 12:9; 1 Ioa. 3:8.

 2. Edena dala ai Iehova ese Noa ia hagoadaia?

² Kara dika tanobadana ai, Iehova ena hesiai tauna Noa bona ena ruma bese sibona be Iehova idia tomadiho henia. Dagedage bona matabodaga taudia huanai ia noho dainai reana Noa ia lalomanoka diba. (Gen. 6:4, 5, 11; Iuda 6) To Iehova ese ia hagoadaia dainai ia gaukara goada ‘Dirava . . . ida ia raka’ totona. (Gen. 6:9) Iehova ese Noa ia hadibaia ia be kara dika taudia ibounai do Ia haorea, bona ia hamaoroa dahaka ia karaia be namo, unai amo ena ruma bese ida do idia roho mauri totona. (Gen. 6:13-18) Iehova be Noa dekenai ia hamomokania ia be goada henia Diravana.

 3. Iosua be dahaka hagoadaia herevana ia abia? (Laulau ginigunana herevalaia.)

³ Gabeai, Dirava ese Iosua dekenai gaukara badana ta ia henia, Gwauhamata Tanona ai Dirava ena taunimanima do ia hakaua vareai totona. Anina be unai tano ai idia vareai totona, ia be tuari orea goadadia ida do ia tuari bona do ia halusidia. Unai dainai Iosua be ia gari diba. Iehova be unai ia diba dainai, Mose ia hamaoroa Iosua do ia hagoadaia totona. Dirava ia gwau: “Iosua oi abia hidi gunalaia tauna ai ia lao bona ia oi hagoadaia, badina ia ese inai taunimanima be do oi itaia tanona lalonai do ia hakaudia vareai.” (Deu. 3:28, NWT) Iosua be ena gaukara ia do hamatamaia lasi neganai, Iehova ese ia hagoadaia, ia gwau: “Hari oi lau hagania lou, ‘Do oi boga-auka bona goada. Do oi gari lasi, badina oi lao gabudia ibounai dekenai Iehova emu Dirava be oi ida.’” (Ios. 1:1, 9, NWT) Unai ese Iosua ia hagoadaia bada!

4, 5. (a) Iehova ese Keristani ginigunadia dekenai dahaka hagoadaia hereva ia henia? (b) Iehova ese edena bamona ena Natuna ia hagoadaia?

⁴ Iehova ese taunimanima ta ta sibona ia hagoadaia lasi, to orea ta bamona idia ibounai ia hagoadaia danu. Iuda taudia be igui hesiai taudia bamona Babulonia ai idia noho neganai, peroveta herevadia amo Iehova ese idia ia hagoadaia, ia gwau: “Do umui gari lasi, lau be umui dekenai lau noho! Lau be umui emui Dirava, gau ta ese umui do ia hagaria lasi. Lau ese umui do lau hagoadaia, bona umui do lau durua. Lau ese umui do lau naria, bona umui do lau hamauria.” (Isa. 41:10) Keristani ginigunadia hegeregerena, Dirava ese hari ena taunimanima ia hagoadaia noho.​—⁠2 Korinto 1:3,4 duahia.

⁵ Iesu be ena Tamana ese ia hagoadaia danu. Iesu be bapatiso ia abia neganai guba amo gado regena ta ia kamonai, ia gwau: “Inai be egu Natuna, egu lalokau, ia lau lalonamo henia.” (Mat. 3:17) Momokani, Iesu be tanobada ai iena hesiai gaukara ia karaia neganai reana unai hereva ese ia hagoadaia!

 6. Edena dala ai talent parabolena ese iseda abidadama ia hagoadaia?

⁶ Iesu be ena Tamana ena haheitalai ia tohotohoa. Iesu ese ia herevalaia talent parabolena amo, inai nega oromana ena dokona ia perovetalaia, unai ese taunimanima edia abidadama ia hagoadaia. Unai parabole ai, biaguna ese ena hesiai taudia ta ta ia hamaoroa, ia gwau: “Namo herea, oi be igui hesiai tauna namona! Mai kamonai ida gau haida oi naria vadaeni. Unai dainai lau ese oi do lau abia hidi gau momo oi naria totona. Emu biaguna ida do oi moale hebou.” (Mat. 25:21,23) Unai be hagoadaia hereva namona mai abidadama ida Iehova ita hesiai henia noho totona!

 7. Iesu be iena aposetolo taudia bona Petero dekenai dahaka hagoadaia herevana ia henia?

⁷ Nega momo Iesu ena aposetolo taudia ese idia huanai daika be bada idia hepapahuahulaia. To Iesu be mai lalonamo ida idia ia hagoadaia, hesiai taudia ai idia lao totona idia manau be namo, lohia taudia bamona idia kara lasi. (Luka 22:24-26) Petero be nega momo Iesu ia hahekwakwanaia. (Mat. 16:21-23; 26: 31-35, 75) Iesu ese Petero ia dadaraia lasi, to ia hagoadaia bona ia hamaoroa ena tadikakadia ia hagoadaia totona.​—⁠Ioa. 21:16.

 8. Hesekaia be edena dala ai tuari biagudia bona Iuda taudia ia hagoadaia?

⁸ Idaunegai, Iehova ena Natuna be tanobada dekenai ia do mai lasi bona ma haida hagoadaia karana ena haheitalai ia do hahedinaraia lasi neganai, Iehova ena abidadama hesiai taudia idia laloparara, ma haida hagoadaia karana be mai anina bada. Asuria ena tuari taudia idia mai neganai, Hesekaia ese ena tuari biagudia bona Iuda taudia ia haboua ia hagoadadia totona. Bona “ena hereva ese taunimanima ibounai ia hagoadaia.”​—⁠2 Sivarai 32:6-8 duahia.

 9. Ma haida hagoadaia dalana dekenai Iobu bukana amo dahaka ita hadibaia?

⁹ Ena be Iobu danu ese goada ia abia be namo, to ia ese “lalogoada henia taudia dikadia” toi amo, ma haida hagoadaia dalana ia hadibaia. Ia hamaorodia bema idia be ia bamona hisihisi idia mamia, ia gwau: “Egu uduna dekena amo, lau ese umui do lau hagoadaia diba, Bona egu hereva ese emui hisihisi idia hamaragia diba.” (Iobu 16:1-5) Dokonai, Elihu bona Iehova ese Iobu idia hagoadaia.​—⁠Iobu 33:24, 25; 36:1, 11; 42:7, 10.

10, 11. (a) Dahaka dainai Iepeta ena natuna kekeni ese hagoadaia herevadia ia abia be namo? (b) Daidia danu ese hari, hagoadaia herevadia idia abia be namo?

¹⁰ Idaunegai ia vara haheitalai ma ta be Iepeta ena natuna kekeni. Iepeta be Amono taudia tuari henia totona ia do lao lasi neganai, Iehova dekenai ia gwauhamata, bema tuari lalonai ia kwalimu bona hanua dekenai ia giroa mai, bona ia hedavari henia totona ia raka-lasi tauna ginigunana be Iehova dekenai do ia henia, anina be ena mauri ibounai lalonai dubu helaga ai Iehova do ia hesiai henia. Unai ia vara, ruma amo ia raka-lasi tauna ginigunana, be iena natuna kekeni tamona, ena tamana ia hedavari henia totona. Iepeta ia lalohisihisi bada. To ena gwauhamata ia badinaia, bona ena natuna kekeni be Silo dekenai ia siaia lao ena mauri ibounai lalonai palai dubu dekenai ia gaukara totona.​—⁠Gun. 11:30-35.

¹¹ Iepeta dekenai unai be abia hidi badana. Reana ena natuna kekeni danu be ia lalohisihisi, to mai ura bada ida ena tamana ena ura ia badinaia. (Gun. 11:36, 37) Do ia headava lasi, natuna ia havaraia diba lasi, bona edia iduhu ladana bona ahuna abia tauna be lasi. Ta be ia dekenai lalona hagoadaia herevadia ia henia be namo. Baibel ia gwau: “Kara ta Israela dekenai ia vara, gauna be inai: Lagani ta ta ibounai, Israela kekeni ese dina 4 lalonai, edia gabu idia rakatania, bona Iepeta, Gileada tauna, ena natuna kekeni totona idia taitai.” (Gun. 11:39, 40) Idia headava lasi Keristani taudia be edia singul maurina idia gaukaralaia “Lohiabada ena gaudia” idia laloa bada totona, idia ita hanamoa bona hagoadaia be namo, ani?​—⁠1 Kor. 7:32-35.

12, 13. Edena bamona Petero ese ena tadikaka ia hagoadaia?

¹² Iesu ena hanuaboi ginigabena ai, aposetolo Petero ia hamaoroa, ia gwau: “Simona e, Simona e, itaia! Satani ia gwau ia ura umui ia abia bona witi bamona umui do ia hapararaia. To oi dainai lau guriguri goadagoada emu abidadama do oi rakatania lasi, bona oi, oi helalo-kerehai neganai, emu tadikaka do oi hagoadaia.”​—⁠Luka 22:31, 32.

¹³ Keristani kongrigeisen ginigunana ai Petero ia hamomokania ia be du goadana ta. (Gal. 2:9) Pentekoste negadiai bona nega ma haida ai, ena haheitalai namodia amo ena tadikaka ia hagoadaia. Nega daudau ia karaia hesiai gaukara be kahirakahira ia ore neganai, ena Keristani tadikaka ia tore henidia, ia gwau: “Inai revareva kwadogina lau torea, unai amo umui lau hagoadaia bona lau gwau diba, inai be Dirava ena hebogahisi hereadaena momokani. Ia lalonai umui gini goada.” (1 Pet. 5:12) Unai nega amo ema bona hari, Dirava ena lauma helaga amo Petero ese ia torea revareva ibounai be Keristani taudia ia hagoadaia. Kahirakahira, Iehova ena gwauhamata ibounai do idia guguru dainai, ita naria noho lalonai ta ta ita hagoadaia be namo!​—⁠2 Pet. 3:13.

14, 15. Edena dala ai aposetolo Ioane ia torea revarevadia ese Keristani taudia ibounai ia hagoadaia?

¹⁴ Keristani kongrigeisen ginigunana lalonai aposetolo Ioane danu be du goadana ta. Ioane bukana ese Iesu ena hesiai gaukara ia sivarailaia, bona unai ese Keristani taudia ginigunadia ia hagoadaia bada​—⁠hari inai negai danu. Ioane bukana sibona ai, Iesu ena hereva, lalokau be iena hahediba taudia edia toa badana, ia noho.​—⁠Ioane 13:34, 35 duahia.

¹⁵ Ioane ese ia torea revareva toi ai mai anina bada herevadia idia noho. Bema iseda kara dika dainai ita lalohisihisi, Ioane ena hereva ese ita do ia hagoadaia, ia gwau: “Iesu ena rara ese kara dika ibounai amo ita ia hagoevaia.” (1 Ioa. 1:7) Bona hanaihanai iseda kudouna be ita ia gwauraia dika neganai, inai siri ese ita do ia hagoadaia, ia gwau: “Dirava be iseda kudouna ia hereaia.” (1 Ioa. 3:20) Ioane sibona be inai ia torea: “Dirava be lalokau.” (1 Ioa. 4:8, 16) Ena revareva iharuana bona ihatoina be Keristani taudia ia hanamodia badina “hereva momokani lalonai idia raka noho.”​—⁠2 Ioa. 4; 3 Ioa. 3, 4.

16, 17. Aposetolo Paulo ese Keristani ginigunadia dekenai dahaka hagoadaia herevana ia henia?

¹⁶ Aposetolo edia negai, aposetolo Paulo be hanaihanai ena tadikaka ia hagoadadia. Keristani ginigunadia edia negai, aposetolo taudia momo be Ierusalema ai idia noho, hakaua oreana be unuseni idia noho. (Kara 8:14; 15:2) Iudea ai idia noho Keristani taudia be Keriso idia harorolaia badina Iuda taudia edia tomadiho ese taunimanima dekenai Dirava be tamona lalohadaina idia hadibaia noho. To, lauma helaga ese aposetolo Paulo ia siaia Grik bona Roma tanodia ai ia haroro totona. Badina idia be dirava idauidau idia tomadiho henia.​—⁠Gal. 2:7-9; 1 Tim. 2:7.

¹⁷ Paulo be gabu idauidau ia lao, Iuda-lasi taudia edia gabu ai Keristani kongrigeisen ia haginia totona, hari inai negai unai hanua ladadia be Turkey, Greece bona Italy. Unai Keristani kongrigeisen matamatana be heduru idia abia be namo, badina ‘edia tano taudia amo dagedage idia davaria’ noho. (1 Tes. 2:14) Lagani 50 C.E. bamona ai, Paulo ese Tesalonika ai ia noho kongrigeisen matamatana ia tore henia, ia gwau: “Emai guriguri lalonai umui ibounai ai herevalaia neganai, hanaihanai Dirava ai tanikiu henia, badina ai ese emui abidadama karadia, lalokau dainai umui karaia gaukara  . . . emui haheauka karana be hanaihanai ai laloa.” (1 Tes. 1:2, 3) Danu idia ia hagoadaia, ia gwau: “Umui durua heheni bona hagoadaia heheni noho.”​—⁠1Tes. 5:11.

18. Aposetolo edia negai idia noho hakaua oreana ese edena dala ai Filipo idia hagoadaia?

¹⁸ Aposetolo edia negai idia noho hakaua oreana ese gunalaia taudia bona Keristani taudia ibounai idia hagoadaia. Evanelia tauna Filipo ese Samaria taudia dekenai Keriso ia harorolaia neganai, hakaua oreana ese ena gaukara idia hanamoa. Idia ese Petero bona Ioane idia siaia kamonai matamata taudia totona idia guriguri, unai amo idia ese lauma helaga idia abia diba. (Kara 8:5,14-17) Hakaua oreana ena heduru dainai, Filipo bona ena hahediba taudia matamatadia be goada idia abia!

19. Hakaua oreana ese idia siaia revareva be edena dala ai Keristani kongrigeisen taudia ia hagoadaia?

¹⁹ Unai murinai hakaua oreana idia hebou, Iuda-lasi taudia ese edia kopina idia utua be namo eiava lasi karana idia herevalaia totona. Badina Mose ena taravatu henunai, Iuda taudia sibona ese unai idia badinaia. (Kara 15:1, 2) Lauma helaga ena heduru bona Baibel siri edia badina idia lalopararalaia murinai, gunalaia taudia ese abia hidi idia karaia unai taravatu badinaia karana be gau badana lasi, bona kongrigeisen ibounai dekenai revareva idia torea unai lalohadai matamatana idia hadibaia totona. Hakaua oreana ena gwaukau taudia idia siaia kongrigeisen ta ta dekenai unai revareva idia henia totona. Dahaka namo ia havaraia? Unai revareva “idia duahia murinai, unai hereva ese idia ia hagoadaia dainai idia moale.”​—⁠Kara 15:27-32.

20. (a) Hari, Hakaua Oreana ese ita ibounai dekenai dahaka hagoadaia herevadia ia henia? (b) Vaira wiki ena stadi ese dahaka henanadai do ia haerelaia?

²⁰ Hari, Iehova ena Witnes taudia ena Hakaua Oreana ese Betele taudia, spesel ful-taim hesiai gaukara idauidau idia karaia taudia, bona tanobada hegegemadai tadikaka taihu ibounai idia hagoadaia. Unai dainai Keristani ginigunadia edia negai ia vara hegeregerena​—⁠hagoadaia hereva ita moalelaia! Danu, Lagani 2015 ai, Hakaua Oreana ese buklet ladana Iehova Dekenai Oi Giroa Lou idia halasia, bona unai buklet ese tanobada hegegemadai taunimanima momo ia hagoadaia bada. To, Iehova tohotohoa ma haida hagoadaia karana be hakaua taudia sibona edia gaukara, a? Vaira wiki ena stadi ese unai henanadai ena haere do ia herevalaia.