Ta Ta Dekenai Noho Hanaihanai Lalokauna Hahedinaraia

1-2. Dahaka dainai, ta ta dekenai noho hanaihanai lalokauna ita hahedinaraia?

BADINA namodia dainai ta ta dekenai noho hanaihanai lalokauna ita hahedinaraia. Unai gaudia be dahaka? Baibel ai inai aonega herevadia ese unai ia haerelaia: “Namo lasi lalokau bona abidadama oi rakatania. . . . Vadaeni Dirava bona taunimanima edia vairanai, lalonamo do oi abia bona laloa kehoa do oi hahedinaraia.” “Lalokau tauna be sibona dekenai namo ia havaraia.” ‘Bema ta be kara maoromaoro bona lalokau ia hahedinaraia, . . . mauri do ia abia.’​—Aon. 3:3, 4; 11:17, ftn.; 21:21.

² Unai aonega herevadia ese noho hanaihanai lalokauna do ita hahedinaraia ena badina toi ia herevalaia. Ginigunana be, noho hanaihanai lalokauna ita hahedinaraia neganai, Dirava vairanai ita be mai anina bada. Iharuana be, noho hanaihanai lalokauna ita hahedinaraia neganai, namo ita davaria. Hegeregere, ma haida ida hetura karana namona ita moalelaia. Ihatoina be, noho hanaihanai lalokauna ita hahedinaraia neganai, nega vairai hahenamo idauidau do ita abia. Momokani, badina namodia dainai Iehova ena hereva ita badinaia: “Mai lalokau bona hebogahisi ida ta ta umui kara henia.”​—Sek. 7:9.

 3. Inai atikol ai, edena henanadai do ita tahua?

³ Inai atikol ai, henanadai edia haere do ita tahua. Daika dekenai noho hanaihanai lalokauna ita hahedinaraia diba? Ruta bukana amo noho hanaihanai lalokauna dekenai dahaka ita dibaia? Edena dala ai noho hanaihanai lalokauna ita hahedinaraia diba? Noho hanaihanai lalokauna idia hahedinaraia taudia be dahaka namo idia davaria?

 4. Edena dala ai Iehova ita tohotohoa bona noho hanaihanai lalokauna ita hahedinaraia? (Mareko 10:29, 30)

⁴ Atikol 44 ai ita herevalaia hegeregerena, Iehova be ia idia lalokau henia bona hesiai henia taudia sibona dekenai ena noho hanaihanai lalokauna ia hahedinaraia. (Dan. 9:4) Ita ura ‘Dirava ita tohotohoa, badina ita be iena lalokau natudia.’ (Efe. 5:1) Unai dainai, ita ura kongrigeisen ai iseda tadikaka taihu dekenai noho hanaihanai lalokauna ita hahedinaraia.​—Mareko 10:29, 30 duahia.

5-6. Dahaka dainai gaukara tauna be unai kampani ai ia gaukara noho?

⁵ Noho hanaihanai lalokauna ena anina ita lalopararalaia neganai, iseda tadikaka taihu dekenai unai kara do ita hahedinaraia noho. Unai ita lalopararalaia totona, mani inai haheitalai ita laloa.

⁶ Kampani ta dekenai lagani momo ia gaukara tauna ta mani ita laloa. Ia gaukara laganidia ibounai lalonai, reana ia ese kampani ena bosi ta ia hedavari henia lasi. Reana nega momo unai kampani ena taravatu idauidau dekenai ia lalotamona lasi. Ia be unai kampani ia ura henia lasi, to ia gaukara badina ena mauri durua totona pei ia abia diba. Ia be unuseniai do ia gaukara noho ela bona ia doko, eiava moni gaukara namona ta ia davaria.

7-8. (a) Dahaka ese ta ia durua noho hanaihanai lalokauna ia hahedinaraia totona? (b) Dahaka dainai Ruta bukana ena kahana haida ita stadilaia be namo?

⁷ Noho hanaihanai lalokauna bona unai gaukara tauna ena hemami edia idau oi itaia diba, a? Gaukara tauna be unai kampani dekenai ia gaukara noho, badina unai amo moni ia abia diba. To Baibel ai, dahaka dainai Dirava ena taunimanima huanai noho hanaihanai lalokauna idia hahedinaraia? Ta ese idia ia doria eiava idia ura gau ta idia abia dainai lasi, to edia kudouna amo idia ura unai idia karaia totona. Mani Davida ena haheitalai ita laloa. Ena be Ionatana ena tamana ia ura Davida ia hamasea, to ia be ena kudouna amo ia ura dainai ena turana namona Ionatana dekenai noho hanaihanai lalokauna ia hahedinaraia. Ionatana ia mase bona lagani haida murinai, Davida be Ionatana ena natuna Mefiboseta dekenai unai lalokau ia hahedinaraia noho.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Baibel ai Ruta bukana ena kahana haida ita stadilaia neganai, noho hanaihanai lalokauna ita dibaia namonamo. Unai buka ese ia sivarailaia taudia ta ta amo noho hanaihanai lalokauna dekenai dahaka ita dibaia? Edena dala ai ita dibaia gaudia be iseda kongrigeisen ai ita badinaia diba?b

 9. Dahaka dainai Naomi ia laloa Iehova ese ia hahisia noho?

⁹ Ruta bukana ai, Naomi, ena ravana Ruta, bona Dirava gari henia tauna Boasi edia sivarai ita duahia, Boasi be Naomi adavana ena varavara. Israela ai, hitolo bada ia vara dainai Naomi, ena adavana bona natudia memero rua be Moaba dekenai idia lao. Unuseniai, Naomi ena adavana ia mase. Ena natudia memero rua idia headava, to madi, idia ruaosi idia mase danu. (Ruta 1:3-5; 2:1) Unai gaudia dainai Naomi ia lalomanoka momokani, bona ia badu dainai ia laloa Iehova ese ia hahisia noho. Mani Naomi ese Dirava ia laloa dalana ita itaia. Ia gwau: “Iehova ese lau ia rakatania.” “Siahu Ibounai Diravana ese egu mauri lalonai lalohisihisi bada ia havaraia.” Ma danu ia gwau: “Iehova ese lau ia dadaraia bona Siahu Ibounai Diravana ese lau dekenai dika ia mailaia.”​—Ruta 1:13, 20, 21.

10. Iehova be Naomi dekenai dahaka ia karaia?

¹⁰ Iehova be Naomi dekenai dahaka ia karaia? Naomi ia rakatania lasi. Bona ia dekenai hebogahisi ia hahedinaraia. Iehova ia laloparara “aonega tauna be ta ese ia hahisia neganai kerere ia karaia diba.” (Had. 7:7) To, ta ese Naomi ia durua be namo, unai amo do ia diba Iehova ese ia rakatania lasi. Dirava be dahaka heduru ia henia? (1 Sam. 2:8) Ia ese Ruta ia gaukaralaia bona Naomi dekenai noho hanaihanai lalokauna ia hahedinaraia. Ruta be mai ura bada bona hebogahisi ida Naomi ia durua, unai amo ena lalohisihisi ia hanaia bona ia diba Iehova ese ia lalokau henia noho. Ruta ena haheitalai amo dahaka ita dibaia?

11. Dahaka dainai tadikaka taihu be mai ura ida lalohisihisi taudia idia durua?

¹¹ Noho hanaihanai lalokauna dainai lalohisihisi taudia ita durua. Ruta ese Naomi ia durua hegeregerena, kongrigeisen ai tadikaka taihu momo be mai ura ida lalohisihisi taudia idia durua noho. Oibe, idia ese edia tadikaka taihu idia lalokau henia dainai, dala idauidau ai heduru idia henia. (Aon. 12:25; 24:10) Aposetolo Paulo ese ita ia hagoadaia unai bamona ita karaia totona, ia gwau: “Lalometau taudia do umui hagoadaia, manoka taudia do umui durua bona ibounai dekenai do umui haheauka.”​—1 Tes. 5:14.

12. Ia lalometau tadikaka o taihu ita durua dala namona ta be dahaka?

¹² Ia lalometau tadikaka o taihu ita durua dala namona ta be, ia hereva neganai ita kamonai namonamo bona ita hamaoroa ia ita lalokau henia. Iehova ena hesiai tauna ta ita durua karana be Dirava ese ia itaia. (Sal. 41:1) Aonega Herevadia 19:17 ia gwau: “Dabu tauna dekenai hebogahisi ia hahedinaraia tauna be Iehova dekenai ia henitorehai, bona ia karaia gaudia dainai Dirava ese davana namona do ia henia.”

13. Edena dala ai Ruta be Oropa bamona lasi, bona edena dala ai Ruta be noho hanaihanai lalokauna ia hahedinaraia? (Rau 1 ena laulau itaia.)

¹³ Naomi ena adavana bona ena natuna rua idia mase murinai, idia vara gaudia amo noho hanaihanai lalokauna ita lalopararalaia namonamo. Naomi ia kamonai “Iehova ese iena taunimanima ia hanamoa lou bona idia dekenai aniani ia henia” neganai, ia ura ena hanua dekenai ia giroa lou. (Ruta 1:6) Ena ravana hahine rua idia ura ia ida do idia lao. To dala huanai, Naomi ese idia ia noia Moaba dekenai idia giroa lou totona. Dahaka ia vara? Baibel ia gwau: “Oropa ese ena ravana ia kisi henia bona ia lao. To Ruta ese Naomi ia badinaia noho.” (Ruta 1:7-14) Oropa be Naomi ena hereva ia kamonai bona ia giroa lou. Ena be Ruta ia giroa lou diba, to Naomi dekenai noho hanaihanai lalokauna ia hahedinaraia bona ia ura ia ida ia noho. (Ruta 1:16, 17) Oibe, Ruta be Naomi ia badinaia noho, badina ia ura unai bamona ia karaia. Bona noho hanaihanai lalokauna ia hahedinaraia. Unai sivarai amo dahaka ita dibaia?

14. (a) Edena dala ai tadikaka taihu momo be Ruta idia tohotohoa? (b) Heberu 13:16 hegeregerena, edena dala ai Dirava ita hamoalea diba?

¹⁴ Noho hanaihanai lalokauna dainai gau ma haida ita karaia diba. Idaunegai bamona, hari tadikaka taihu momo be ta ta dekenai noho hanaihanai lalokauna idia hahedinaraia, ena be haida be idia hedavari henia lasi. Hegeregere, idia kamonai gabu haida ai disasta ia vara neganai, karaharaga heduru henia dalana idia tahua. Bona kongrigeisen ai ta be moni ena hekwakwanai ia davaria neganai, idia ura unai tauna idia durua haraga. Aposetolo edia negai Makedonia taudia bamona, tadikaka taihu be heduru ma haida idia henia danu. Idia ese unai idia karaia totona edia nega bona kohu idia gaukaralaia. (2 Kor. 8:3) Oibe, ma haida dekenai unai lalokau idia hahedinaraia neganai, Iehova ia moale bada!​—Heberu 13:16 duahia.

15-16. Edena dala ai Ruta ia ura Naomi dekenai heduru ia henia noho?

¹⁵ Ruta ese Naomi ia durua dalana amo gau namodia momo do ita dibaia. Mani unai gaudia haida ita herevalaia.

¹⁶ Heduru oi henia noho. Ruta be ena ravana ia noia ia ida Iuda dekenai do idia lao neganai, matamanai Naomi ese unai ia abia dae lasi. To Ruta ia hesiku lasi. Unai amo dahaka ia vara? “Naomi ia itaia Ruta be ia ura dikadika ia ida ia lao, unai dainai ia hamaoroa lou lasi ia giroa totona.”​—Ruta 1:15-18

17. Dahaka ese ita do ia durua ita hesiku haraga lasi totona?

¹⁷ Ita dibaia gauna: Lalometau taudia durua totona ita haheauka, bona idia ita durua noho be gau badana. Hekwakwanai ia davaria taihu ta be reana matamanai do ia ura lasi iseda heduru ia abia dae.c To, noho hanaihanai lalokauna dainai, ia do ita durua noho. (Gal. 6:2) Ita ura iseda heduru ia abia dae bona ia ita hagoadaia.

18. Dahaka ese Ruta ia hahisia bada?

¹⁸ Namo lasi ita lalohisihisi. Naomi bona Ruta be Betelehema dekenai idia ginidae neganai, Naomi be ena tura gunadia ia davaria lou. Idia ia hamaoroa: “Lau lao neganai lau be lau hegeregere, to Iehova ese lau be imana kavakava ia siaia giroa.” (Ruta 1:21) Ruta be unai hereva ia kamonai neganai, mani ena hemami oi laloa! Ia be Naomi ia durua totona dala idauidau ia tahua, hegeregere, ia ida ia taitai, ia hagoadaia, bona dina momo lalonai ia ida idia raka. Ena be unai gaudia ia karaia, to Naomi ia gwau: “Iehova ese lau be imana kavakava ia siaia giroa.” Unai hereva amo Naomi ese ia hahedinaraia ena badinai ia gini hahinena, Ruta, ena heduru ia laloa bada lasi. Reana unai ese Ruta ia hahisia bada! To, Naomi ia rakatania lasi.

19. Edena dala ai lalometau taudia dekenai heduru ita henia noho?

¹⁹ Ita dibaia gauna: Ena be dala idauidau ita tahua ia lalometau taihu ita durua totona, to ia gwauraia herevana ta ese reana iseda lalona ia hahisia diba. To namo lasi ita lalohisihisi. Namona be ia lalometau taihu ita durua noho, bona Iehova ita noia ita ia durua unai taihu hagoadaia daladia ita tahua totona.​—Aon. 17:17.

20. Dahaka ese Ruta ia hagoadaia, Naomi ia durua noho totona?

²⁰ Nega maorona dekenai hagoadaia hereva gwauraia. Ruta be Naomi dekenai noho hanaihanai lalokauna ia hahedinaraia, to Ruta ia ura ma haida ese ia idia hagoadaia be namo. Bona Iehova ese Boasi ia gaukaralaia Ruta ia hagoadaia totona. Boasi be Ruta dekenai ia gwau: “Mani Iehova ese emu kara dainai oi ia hanamoa, bona namona be Iehova, Israela ena Dirava ese oi dekenai davana hereadaena ia henia, badina iena apena henunai hunia gabuna oi tahua.” Unai hereva namodia ese Ruta ia hagoadaia. Bona Boasi dekenai ia gwau: “Oi ese lau oi durua bona egu lalona oi hagoadaia.” (Ruta 2:12, 13) Boasi ese nega maorona ai Ruta ia hagoadaia dainai, Naomi ia durua noho.

21. Isaia 32:1, 2 hegeregerena, elda taudia be ta ta idia laloa bada dainai dahaka idia karaia?

²¹ Ita dibaia gauna: Ita ese ma haida dekenai noho hanaihanai lalokauna ita hahedinaraia, to nega haida ita ura haida ese ita idia hagoadaia danu. Boasi ia itaia Ruta ese Naomi ia kara namo henia noho dainai, ia hanamoa. Hari danu, elda taudia idia itaia kongrigeisen ai tadikaka taihu ese ma haida idia durua neganai, idia hanamodia. Nega maorodia ai unai bamona hanamoa herevadia ese tadikaka taihu do ia hagoadaia, ma haida idia durua noho totona.​—Isaia 32:1, 2 duahia.

22-23. Edena dala ai Naomi ena laloa dalana ia idau, bona dahaka dainai? (Salamo 136:23, 26)

²² Gabeai, Boasi ese Ruta bona Naomi dekenai aniani ia henia. (Ruta 2:14-18) Boasi ena harihari bada karana dainai, Naomi be dahaka ia karaia? Naomi ia gwau: “Namona be Iehova ese ia hanamoa, badina ia ese idia mauri taudia bona mase taudia dekenai lalokau ia hahedinaraia.” (Ruta 2:20a) Naomi ena laloa dalana ia idau, ani? Guna, Naomi be mai lalohisihisi ida ia gwau: “Iehova ese lau ia dadaraia,” to hari mai moale ida ia gwau: “Iehova ese . . . lalokau ia hahedinaraia.” Dahaka dainai Naomi ena lalohadai ia idau?

²³ Naomi ia laloparara Iehova be ia ia rakatania lasi. Iehova ese Ruta ia gaukaralaia, Iuda amo idia giroa lalonai Naomi do ia durua totona. (Ruta 1:16) Danu, Naomi ia laloparara Iehova ese Boasi ia gaukaralaia ia bona Ruta durua totona. (Ruta 2:19, 20b) Reana Naomi ia laloa, ‘Hari lau laloparara, Iehova ese lau ia rakatania lasi. Idia vara gaudia ibounai lalonai, ia be lau ida ia noho!’ (Salamo 136:23, 26 duahia.) Ruta bona Boasi be idia hesiku lasi Naomi idia durua totona unai dainai Naomi ia moale bada! Naomi ese Iehova ia hesiai henia lou dainai, idia toi edia moale mani ita laloa.

24. Dahaka dainai noho hanaihanai lalokauna ita hahedinaraia noho?

²⁴ Ruta bukana ai noho hanaihanai lalokauna dekenai dahaka ita dibaia? Noho hanaihanai lalokauna dainai, idia lalometau tadikaka bona taihu dekenai ita hesiku haraga lasi. Danu, unai kara dainai, do ita ura dala idauidau ita tahua idia ita durua totona. Bona noho hanaihanai lalokauna idia hahedinaraia taudia dekenai elda taudia be nega maorona ai hagoadaia herevadia idia henia be namo. Ita itaia ma haida ese Iehova idia hesiai henia lou neganai, ita moale bada. (Kara 20:35) Dahaka dainai noho hanaihanai lalokauna ita hahedinaraia noho? Ita ura Iehova ita tohotohoa bona ia ita hamoalea, badina Iena “lalokau be bada herea.”​—Eso. 34:6; Sal. 33:22.