Hari Inai Negai Ita Noga Noho be Gau Badana!

“Namo ita mahuta lasi, haida idia mahuta bamona. To namo ita noga noho, ita laloa goada noho.”​—⁠1 TESALONIKA 5:⁠6.

1, 2. (a) Pompeii bona Herculaneum be edena bamona hanuadia? (b) Pompeii bona Herculaneum dekenai idia noho taudia momo be edena toa idauidau idia laloa lasi, bona unai dainai dahaka ia vara?

APOSETOLO edia negai, taga bada hanuadia rua, Pompeii bona Herculaneum, be Vesuvius Ororona kahirakahira idia noho. Unai gabu be taga bada Roma taudia ese idia ura henia laga-ani gabudia. Edia drama karaia rumadia lalonai taunimanima tausen mai kahana idia helai diba, bona Pompeii dekenai ia noho drama rumana be taoni taudia, kahirakahira ibounai idia vareai diba. Pompeii hanua idia geia taudia idia davaria guna unai gabu dekenai bia inua gabudia 118 idia noho, idia haida be laki gadara eiava matabodaga karaia gabudia. Ruma ena haba dekenai idia atoa laulaudia bona gau ma haida ese idia hahedinaraia, unai gabu dekenai matabodaga bona kohu tahua karadia be bada.

² August 24, 79 C.E. ai, Vesuvius Ororona ia pou. Lahi ororodia idia stadilaia taudia idia laloa unai ororo be nega ginigunana ia pou bona nadi bona lahi kahuna be unai hanua rua latanai idia moru diho neganai, unai ese hanua taudia ia koua momokani lasi dainai idia heau mauri diba. Momokani, toana be momo idia heau mauri. To, unai dika idia laloa maragi eiava idia vara toa idauidau idia laloa lasi taudia be idia heau lasi. Bena, hanuaboi 12 o’klok bamona, hodahoda, kahu, bona nadi mai siahudia be Herculaneum hanuana lalonai ia diho mai bona hanua lalonai idia do noho taudia ibounai ia hamasea. Daba ai, Pompeii dekenai unai bamona dika ta ia vara danu bona taunimanima ibounai ia hamasea. Unai bamona dika ia vara badina unai hanua taudia ese idia vara toa idauidau idia laloa lasi dainai!

Iuda Taudia Edia Nega Ena Dokona

 3. Ierusalema idia hadikaia ore karana bona Pompeii bona Herculaneum idia ore dalana be edena dala ai idia hegeregere?

³ Pompeii bona Herculaneum hanuadia idia ore dalana dikana be lagani nain gunanai Ierusalema idia hadikaia ore ena dika ese ia hanaia, ena be unai hanua dekenai ia vara dika be taunimanima ese idia havaraia. Buka haida ese idia hahedinaraia, “guna idia vara gaudia ibounai lalonai ia be hanua idia koua hegege karana dikana ta,” ia dainai Iuda taudia milioni ta mai kahana idia mase. To, Pompeii bona Herculaneum dekenai idia vara dika hegeregeredia, Ierusalema idia do hadikaia ore lasi neganai, toa haida idia vara guna.

 4. Iesu be ena murinai idia raka taudia dekenai nega ta ena dokona ia kahirakahira ia hadibaia totona, edena toa ia perovetalaia, bona aposetolo edia negai unai hereva be edena dala ai ia guguru?

⁴ Iesu Keriso ese unai hanua idia hadikaia ore karana ia perovetalaia, bona ia gwau unai dika ia do vara lasi neganai, gau haida do idia vara guna​—⁠hegeregere tuari, hitolo bada, tano mareremarere, bona taravatu utua karadia. Peroveta koikoi taudia do idia gaukara goada, to taunimanima haida ese tanobada ibounai dekenai sivarai namona do idia harorolaia. (Mataio 24:​4-7, 11-14) Ena be Iesu ena hereva be dala badana ai hari inai negai do ia guguru, to unai negai dala maragina ai ia guguru danu. Sivarai gunadia ese Iudea dekenai ia vara hitolo bada ia gwauraia. (Kara 11:28) Histori toretore tauna Josephus ese ia hahedinaraia, nega sisina ia noho bena Ierusalema do idia hadikaia neganai, tano mareremarere ta ia vara. Ierusalema ena dokona ia kahirakahira neganai, gwau-edeede karadia, Iuda politikol oreadia huanai tuari heheni karadia idia vara, bona Iuda bona Idau Bese taudia idia noho hanuadia haida lalonai taunimanima momo idia aladia mase. To, Basileia ena sivarai namona be ‘tanobada ibounai dekenai idia harorolaia.’​—⁠Kolose 1:⁠23.

5, 6. (a) Edena peroveta herevadia Iesu ese ia gwauraia be lagani 66 C.E. ai ia guguru? (b) Ierusalema be lagani 70 C.E. ai ia moru neganai, dahaka dainai taunimanima momo herea idia mase?

⁵ Gabeai, lagani 66 C.E. ai, Iuda taudia ese Roma idia gwau-edeede henia. Cestius Gallus be ena tuari taudia ia hakaua lao, Ierusalema idia hagegea gwauraia neganai, Iesu ena murinai idia raka taudia ese Iesu ena hereva idia laloatao: “Tuari orea ese Ierusalema do idia koua hagegea do umui itaia, vadaeni do umui diba, iena dokona ia kahirakahira vadaeni. Unai neganai Iudea dekenai idia noho taudia be ororo dekenai do idia heau lao, bona hanua lalonai idia noho taudia be do idia heau murimuri dekenai, bona gunika dekenai idia noho taudia be hanua dekenai do idia raka vareai lasi.” (Luka 21:​20, 21) Nega ia ginidae Ierusalema idia rakatania totona​—⁠to edena dala ai? Bena Gallus ena tuari taudia be Ierusalema idia rakatania haraga, unai ese dala ia kehoa Ierusalema bona Iudea dekenai idia noho Keristani taudia ese Iesu ena hereva idia badinaia bona ororo dekenai idia heau mauri totona.​—⁠Mataio 24:​15, 16.

⁶ Lagani foa idia ore murinai, Pasova ena nega ai, Roma tuari taudia be Jeneral Titus, Iuda ena gwau-edeede karana ia ura haorea momokani tauna, ena hakaua henunai idia giroa lou. Iena ami taudia ese Ierusalema idia hagegea bona “magu idia karaia,” unai amo heau mauri dalana be lasi. (Luka 19:​43, 44) Ena be Iuda taudia ese tuari ena sivarai idia kamonai, to Roma Basileiana ena gabu ibounai dekenai idia noho Iuda taudia hutuma be Pasova totona Ierusalema dekenai idia lao. Unai neganai, unai hanua amo idia raka-lasi dalana be lasi. Josephus ena hereva hegeregerena, Roma taudia ese Ierusalema idia hagegea neganai, idia mase taudia momo be unai vadivadi taudia.a Ierusalema be gabeai ia moru neganai, Roma Basileiana dekenai idia noho Iuda taudia ibounai 7,000,000 bamona amo 1,100,000 bamona idia mase. Ierusalema bona ena dubu idia hadikaia ore neganai, Iuda gavamanina bona edia tomadiho oreana, Mose ena taravatu amo idia haginia gauna, idia haorea.b​—⁠Mareko 13:​1, 2.

 7. Ierusalema idia hadikaia ore neganai, dahaka dainai abidadama Keristani taudia idia roho mauri?

⁷ Lagani 70 C.E. ai, Iuda Keristani taudia be idia mase diba eiava Ierusalema dekenai idia noho taudia oredia ida igui hesiai taudia bamona idia abia lao diba. To, idaunegai sivaraidia ese idia hamomokania, idia be Iesu ese lagani 37 gunanai ia henia sisiba herevana idia badinaia. Hanua idia rakatania bona idia giroa lou lasi.

Aposetolo amo Idia Mai Sisiba Herevadia

 8. Petero be dahaka ia lalo-pararalaia, bona edena hereva Iesu ese ia gwauraia be ia laloatao?

⁸ Hari, unai dika ia hanaia dika bada hereana ta ia mai noho, ia ese inai tanobada dikana ibounai do ia haorea. Lagani siks idia do noho bena Ierusalema idia hadikaia ore neganai, aposetolo Petero ese ia henia sisiba herevadia be mai anina bada iseda negai idia noho Keristani taudia dekenai danu: Gima noho! Petero ia itaia Keristani taudia edia ‘lalona do ia hagoadaia’ be gau badana, unai amo ‘Lohiabada ena taravatu’ do idia dadaraia lasi. (2 Petero 3:​1, 2) Petero ese Keristani taudia idia gima totona ia hagoadadia neganai, reana Iesu ena hereva, dina haida ia do mase lasi lalonai Iena hahediba taudia dekenai ia gwauraia herevana, ia laloatao: “Umui naria namonamo, umui noga noho, badina be inai gaudia idia mai nega umui diba lasi.”​—⁠Mareko 13:⁠33.

 9. (a) Haida be reana edena laloa dalana dikana idia abia diba? (b) Dahaka dainai unai bamona lalohadai be dika momokani?

⁹ Hari, haida be mai hevaseha ida idia henanadai, idia gwau: “Iesu ia gwauhamata, do ia giroa mai, a? Edeseni ia noho?” (2 Petero 3:​3, 4) Ia hedinarai goevagoeva, unai taudia idia laloa Dirava ese tanobada ia karaia negana amo ema bona hari gau ta ia idau lasi. Unai bamona laloa dalana be mai ena dika. Daradara karana ese iseda karaharaga lalohadaina ia hamanokaia diba, bona ita do ia veria lao sibona eda ura gaudia ita tahua totona. (Luka 21:34) Ma danu, Petero ese ia hahedinaraia, unai bamona taudia ese Noa ena negai ia vara Abata Badana, tanobada dikana ibounai ia haorea gauna unai, idia laloaboio. Momokani, tanobada be unai negai ia idau momokani!​—⁠Genese 6:​13, 17; 2 Petero 3:​5, 6.

10. Petero ese edena hereva amo idia haheauka lasi taudia ia hagoadaia?

¹⁰ Petero ese ena revareva idia duahia taudia ia durua haheauka karana idia habadaia totona, nega momo Dirava be maoromaoro kara ta ia karaia lasi ena badina be idia dekenai ia hadibaia. Gau ginigunana be, Petero ia gwau: “Lohiabada ena vairana dekenai, dina tamona be lagani 1000 bamona, bona lagani 1000 be dina tamona bamona.” (2 Petero 3:⁠8) Iehova be ia noho hanaihanai dainai, gau ibounai ia laloa namonamo diba bona nega maorona ia abia hidi kara ta ia karaia totona. Bena, Petero ese Iehova ena ura ia hahedinaraia, Iena ura be taunimanima ibounai idia helalo-kerehai be namo. Dirava ena haheauka dainai taunimanima momo idia mauri diba, to bema Dirava be idaunegai kara ta ia karaia, unai taudia idia mase vadaeni. (1 Timoteo 2:​3, 4; 2 Petero 3:⁠9) To, Iehova ena haheauka dainai ita gwau lasi kara ta do ia karaia lasi. Lasi. Petero ia gwau, “Lohiabada ena Dina be do ia ginidae, henaoa tauna ia ginidae bamona.”​​—⁠2 Petero 3:​10.

11. Dahaka ese ita do ia durua lauma dalanai ita noga noho totona, bona unai be edena dala ai Iehova ena dina do ia haharagaia diba?

¹¹ Petero ese ia hahegeregerea gaudia ita laloa be gau badana. Henaohenao taudia dogoatao be auka dainai, nega ta ta ai ia mahuta gima tauna ese do ia itaia lasi, to hanuaboi ibounai lalonai ia gima tauna ese henaohenao tauna do ia itaia diba. Gima tauna be edena bamona ia noga noho diba? Gima tauna do ia noga bema ia raka loaloa, to do ia noga lasi bema ia helai. Unai hegeregerena, lauma dalanai goada noho karana ese Keristani taudia do ia durua idia noga noho totona. Unai dainai, Petero ese ita ia hagoadaia ‘do ita helaga be namo, bona Dirava do ita badinaia namonamo.’ (2 Petero 3:11) Unai bamona kara ese ita ia durua ‘Iehova ena dina ena ginidae ita laloa noho’ totona. Momokani, Iehova ena sediual ita haidaua diba lasi. Ia abia hidi negana dekenai iena dina do ia mai. To nega do ia heau haraga ela bona unai dina ia ginidae, bema iena hesiai gaukara dekenai ita bisi bada.​—⁠1 Korinto 15:⁠58.

12. Edena bamona ita ta ta ese Iehova ena haheauka amo namo ita abia diba?

¹² Unai dainai, bema ta ia laloa Iehova ena dina ia mai haraga lasi, namona be Petero ena sisiba ia badinaia, mai haheauka ida Iehova ese ia abia hidi negana ia naria. Momokani, Iehova ena haheauka dainai ia noho negana be aonega dalanai ita gaukaralaia diba. Hegeregere, mai anina bada Keristani kara idauidau ita habadaia diba bona taunimanima momo dekenai sivarai namona ita harorolaia danu. Bema ita noga noho, inai nega ena dokona ai, ita be ‘mai goevagoeva bona kerere lasi danu Dirava ena vairanai do ita noho bona Dirava danu mai maino danu do ita noho.’ (2 Petero 3:​14, 15) Unai be hahenamo badana momokani!

13. Paulo ese Tesalonika Keristani taudia dekenai edena hereva ia gwauraia bona hari inai negai unai be maoro?

¹³ Paulo ena revareva ginigunana Tesalonika Keristani taudia dekenai ia torea neganai, ia ese noga noho karana ia herevalaia danu. Ia sisiba henidia, ia gwau: “Namo ita mahuta lasi, haida idia mahuta bamona. To namo ita noga noho, ita laloa goada noho.” (1 Tesalonika 5:​2, 6) Hari, inai tanobada ibounai ena dokona ia mai kahirakahira lalonai, unai sisiba ita badinaia be gau badana! Iehova ena hesiai taudia be lauma gaudia idia laloa bada lasi taudia ese idia hahonua tanobadana ai idia noho dainai, unai ese idia ia hadikaia diba. Unai dainai, Paulo ese ia sisiba henidia, ia gwau: “Gau badana be, ita ese abidadama bona lalokau do ita atoa, iseda kemena ena dabua aukana bamona. Ma ita be namo Dirava ena hamauria do ita naria, mai laloa goada danu, inai kara ita atoa, iseda tuari kwara gauna aukana bamona.” (1 Tesalonika 5:⁠8) Hanaihanai Dirava ena Hereva stadilaia karana bona hebou dekenai iseda tadikaka edia hebamo ese ita do ia durua Paulo ena sisiba ita badinaia bona iseda karaharaga lalohadaina ita dogoatao totona.​—⁠Mataio 16:​1-3.

Milioni Momo Idia Gima Noho

14. Dahaka ese ia hahedinaraia hari inai negai momo ese Petero ena sisiba, noga noho karana dekenai, idia badinaia?

¹⁴ Hari inai negai, Dirava ena lauma amo ia vara hagoadaia herevana, noga noho karana dekenai, be momo ese idia badinaia, a? Oibe. Lagani 2002 ena hesiai laganina ai, pablisa ibounai 6,304,645​—⁠pesen 3.1 amo lagani 2001 ena namba ia hanaia⁠—ese idia hamomokania lauma dalanai idia noga dainai, hora 1,202,381,302 idia haorea, ma haida dekenai Dirava ena Basileia idia herevalaia totona. Idia dekenai, unai gaukara be mai anina bada gauna. Ia be edia mauri ena kahana badana ta. Idia momo edia laloa dalana be El Salvador taudia rua, Eduardo bona Noemi, ese idia hahedinaraia.

15. Edena ekspiriens El Salvador amo ese ia hahedinaraia, momo be lauma dalanai idia noga noho?

¹⁵ Lagani haida gunanai, Eduardo bona Noemi be Paulo ena hereva idia laloa, ia gwau: “Inai tanobada, hari ia noho toana bamona, be kahirakahira do ia ore.” (1 Korinto 7:31) Edia mauri dalana idia haidaua bona ful-taim painia gaukara lalonai idia vareai. Nega ia hanaia lalonai, dala idauidau momo ai hahenamo idia abia bona sekit bona distrik naria gaukara danu idia karaia. Ena be Eduardo bona Noemi be hekwakwanai badadia idia davaria, to idia diba momokani ful-taim hesiai gaukara totona tauanina dalanai mauri namona idia rakatania neganai, idia ese abia hidi maorona idia karaia. El Salvador dekenai idia noho pablisa taudia 29,269 edia huanai, momo be unai bamona sibona edia ura idia dadaraia​—⁠painia taudia 2,454 danu⁠—bona pesen 2 amo lagani gunana ena pablisa ena namba idia hanaia ena badina ta be unai.

16. Côte d’Ivoire dekenai, tadikaka matamatana ta ese edena bamona laloa dalana ia hahedinaraia?

¹⁶ Côte d’Ivoire dekenai, unai bamona laloa dalana be brens opesi ia tore henia Keristani tauna matamatana ta ese ia hahedinaraia: “Lau be hesiai tauna ta. To lau be tadikaka lau hamaoroa diba lasi painia gaukara idia karaia totona, badina haheitalai namona lau hahedinaraia lasi. Unai dainai moni bada gaukarana lau rakatania bona hari sibona egu gaukara ta lau karaia, unai dainai nega bada ia noho haroro gaukara lau karaia totona.” Côte d’Ivoire dekenai idia painia taudia 983 amo unai tau matamatana be idia ta, bona lagani gunanai edia pablisa ibounai be pesen 5 amo ia bada daekau 6,701.

17. Edena dala ai Witnes kekeni matamatana ta Belgium dekenai be ia hahedinaraia, lalo-dika henia kava karana dainai ia gari lasi?

¹⁷ Belgium ena Basileia pablisa taudia 24,961 be hekwakwanai idia davaria noho badina taunimanima ese idia haheauka henidia lasi, idia lalo-dika henidia kava, bona idia dadaraia kava. To, idia gaukara goadagoada bona idia gari lasi. Sikuli ena klas ta dekenai Iehova ena Witnes taudia idia gwauraia hehuni oreana bona Witnes kekenina ta, ena mauri lagani be 16, ia kamonai neganai, gwaumaoro totona ia noia bema ia ese Iehova ena Witnes taudia idia abia dae gaudia ia herevalaia diba. Jehovah’s Witnesses​​—⁠The Organization Behind the Name vidio bona Iehova Ena Witnes Taudia​​—⁠Idia be Daidia? buklet ia gaukaralaia Witnes taudia edia sivarai momokanina ia hahedinaraia totona. Ia hahedinaraia herevadia idia moalelaia bada, bona murina pura dekenai stiuden taudia be test ta idia abia, bona idia abia henanadai ibounai be Iehova ena Witnes taudia edia Keristani tomadihona ia herevalaia.

18. Dahaka ese ia hamomokania ena be moni ena hekwakwanai ia vara, to pablisa taudia Argentina bona Mozambique dekenai be Iehova ena hesiai gaukara idia hadokoa lasi?

¹⁸ Inai nega dokona ai, Keristani taudia ese hekwakwanai badadia idia davaria. To, idia ura lasi unai ese edia gaukara ia hadikaia. Ena be momo idia diba, moni dalanai Argentina be mai ena hekwakwanai, to lagani gunanai Witnes taudia edia namba ia daekau 126,709 dekenai. Mozambique ena gabu momo dekenai taunimanima momo be idia do ogogami. To, 37,563 be haroro gaukara idia karaia, unai be pesen 4 amo ia bada. Albania dekenai taunimanima momo edia mauri be ia auka, to unai tano ena pablisa taudia edia namba be pesen 12 amo ia bada daekau 2,708 dekenai. Ia hedinarai goevagoeva, Iehova ena hesiai taudia ese Basileia idia atoa guna neganai, Iena lauma helaga amo ia hanamodia, noho dala aukadia ese unai ia koua lasi.​—⁠Mataio 6:⁠33.

19. (a) Dahaka ese ia hahedinaraia, Baibel ena hereva momokani totona idia hitolo mamoe bamona taudia momo idia do noho? (b) Lagani ena ripoti dekenai edena sivarai ma haida ese idia hahedinaraia, Iehova ena hesiai taudia be lauma dalanai idia noga noho? (Rau 20-23 dekenai ia noho maua itaia.)

¹⁹ Lagani gunana ena ripoti ese ia hahedinaraia, tanobada hegegemadai hua ta ta idia karaia Baibel stadi ibounai be 5,309,289. Unai ese ia hahedinaraia Baibel ena hereva momokani totona idia hitolo mamoe bamona taudia momo idia do noho. Memorial dekenai idia mai taudia 15,597,746 amo, momo be Iehova idia do hesiai henia lasi. Namona be edia diba bona edia lalokau Iehova bona tadikaka oreana totona idia habadaia noho. “Hutuma bada herea” “mamoe idaudia” be edia horoa tadikaka ida “dina bona hanuaboi . . . dubu helaga lalonai,” edia Havaraia Tauna ena hesiai gaukara idia karaia noho lalonai, anina namodia idia havaraia noho.​—⁠Apokalupo 7:​9, 15; NW; Ioane 10:⁠16.

Lota amo Ita Dibaia Gauna

20. Lota bona ena hahine edia haheitalai amo dahaka ita dibaia?

²⁰ Momokani, Dirava ena kamonai hesiai taudia danu be nega sisina lalonai edia karaharaga lalohadaina idia haboioa diba. Mani Aberahamo ena kakana ena natuna Lota ita laloa. Idia vadivadi aneru rua amo ia kamonai Dirava be Sodoma bona Gomora hanua do ia hadikaia ore. Lota ese unai sivarai ia hoalaia lasi, badina “unai lebulebu taudia edia kara dainai iena lalona be ia metau.” (2 Petero 2:⁠7) To, aneru rua ese ia be Sodoma amo idia hakaua siri totona idia mai neganai, “ia haraga lasi.” Aneru ese ia bona ena ruma bese taudia be unai hanua amo idia veria raka-lasi. Gabeai, Lota ena hahine be aneru edia sisiba herevana ia kamonai lasi bona ena vairana ia giroa. Iena kamonai lasi karana dainai, ena mauri ia haboioa. (Genese 19:​14-17, 26) Iesu ese ita ia sisiba henia, ia gwau: “Lota ena adavana umui laloa.”​—⁠Luka 17:⁠32.

21. Dahaka dainai hari inai negai ita noga noho be gau badana?

²¹ Pompeii bona Herculaneum dekenai idia vara dika bona Ierusalema idia hadikaia gwauraia neganai idia vara gaudia, bona Noa ena negai ia vara Abata Badana bona Lota ena haheitalai, inai ibounai ese idia hahedinaraia sisiba herevadia ita badinaia be gau badana. Ita be Iehova ena hesiai taudia dainai, ita ese inai nega dokona ena toana ita itaia. (Mataio 24:⁠3) Ita be tomadiho koikoi amo ita siri vadaeni. (Apokalupo 18:⁠4) Keristani taudia ginigunadia bamona, namona be ‘Iehova ena dina ita naria noho bona ia ginidae haraga totona ita gaukara goada noho.’ (2 Petero 3:12) Oibe, hari inai negai ita noga noho be gau badana! Ita ta ta ese dahaka ita karaia diba, bona ita noga noho totona, edena kara ita goadalaia be namo? Hereva gabena ese unai gaudia do ia herevalaia.

[Footnotes]

Edena Bamona Do Oi Haere?

• Dahaka ia vara dainai Iuda Keristani taudia be Ierusalema idia do hadikaia ore lasi neganai idia heau mauri?

• Edena dala ai aposetolo Petero bona Paulo edia sisiba herevadia ese ita idia durua ita noga noho totona?

• Hari inai negai, daidia idia hamomokania idia be lauma dalanai idia noga noho?

• Lota bona ena hahine edia sivarai amo dahaka ita dibaia?

[Chart on page 20-23]

IEHOVA ENA WITNES TAUDIA EDIA HESIAI LAGANINA 2002 ENA RIPOTI

(See bound volume)

[Picture on page 17]

Lagani 66 C.E. ai, Ierusalema dekenai idia noho Keristani taudia ese Iesu ena sisiba herevadia idia badinaia

[Pictures on page 18]

Gaukara goada karana ese Keristani taudia ia durua idia noga noho totona