“Umui Naria Noho”!

“Inai hereva lau hamaoroa umui, taunimanima ibounai dekenai danu lau hamaoroa, lau gwau, ‘Umui naria noho.’ ”​—⁠MAREKO 13:⁠37.

1, 2. (a) Tau ta be ena kohu gimaia karana amo dahaka ia dibaia? (b) Iesu ese ia gwauraia henaohenao tauna ena haheitalai amo, noga noho karana dekenai dahaka ita dibaia?

JUAN ena dava bada gaudia be ena ruma dekenai ia atoa. Iena bedi henunai ia atodia​—⁠ia laloa iena ruma lalonai unai gabu be ena kohu hunia gabuna namona. To, hanuaboi ta ai, ia bona ena adavana idia mahuta lalonai, henaohenao tauna ta be edia daiutu lalonai ia vareai. Ia hedinarai goevagoeva, henaohenao tauna be kohu ia noho gabuna ia diba. Juan ena dava bada kohu iboudiai be bedi henunai amo ia kokia mai regerege lasi bona Juan ese ena bedi badinai ia noho teibolo ena droa lalonai ia atoa moni danu ia abia. Daba ai, Juan ia diba ta ese ena kohu ia henaoa. Unai nega ai ia dibaia gauna be nega daudau lalonai do ia laloatao: Ia mahuta noho tauna ese ena kohu ia naria diba lasi.

² Lauma dalanai unai be ia momokani. Iseda helaro bona iseda abidadama ita gimaia diba lasi bema ita mahuta. Unai dainai, Paulo ena hagoadaia herevana be: “Namo ita mahuta lasi, haida idia mahuta bamona. To namo ita noga noho, ita laloa goada noho.” (1 Tesalonika 5:⁠6) Iesu ese henaohenao tauna ena haheitalai ia gaukaralaia, unai amo ia hahedinaraia ita noga noho be mai anina bada. Hahemaoro Tauna bamona do ia mai neganai, do idia vara guna gaudia ia herevalaia, bena ia gwau: “Unai dainai do umui naria, badina be umui emui Lohiabada do ia mai negana be umui diba lasi. Inai do umui laloatao! Ruma biaguna bema ia diba guna edena hora dekenai henaoa tauna do ia mai, ia be do ia naria, iena ruma do ia makohia lasi. Unai dainai, do umui hegaegae, badina be Taunimanima ena Natuna do ia mai ena hora be umui diba lasi.” (Mataio 24:​42-44) Henaohenao tauna be do ia mai negana ia gwauraia hedinarai lasi. Taunimanima idia laloa do ia mai lasi negana ai do ia ginidae. Unai hegeregerena, Iesu ia gwau, inai tanobada ena dokona be ita “diba lasi” horana ai do ia mai.

“Umui Naria Namonamo, Abidadama Dekenai Umui Gini Goada”

 3. Edia biaguna be headava ariana amo ia giroa mai totona idia naria hesiai taudia edia haheitalai amo, Iesu ese edena dala ai ia hahedinaraia ita noga noho be gau badana?

³ Luka ese ia torea Evanelia sivaraina lalonai, Iesu ese Keristani taudia ia hahegeregerea edia biaguna be headava ariana amo ia giroa mai totona idia naria hesiai taudia ida. Idia mahuta lasi be namo, unai amo ia mai neganai idia be idia noga noho, ia idia welkam henia totona. Unai hegeregerena, Iesu ia gwau: “Umui diba lasi negana dekenai, Taunimanima ena Natuna do ia mai.” (Luka 12:40) Lagani momo lalonai Iehova idia hesiai henia taudia haida be reana ita noholaia negana dekenai karaharaga lalohadaina idia haboioa diba. Reana do idia laloa dokona be daudau. To unai bamona lalohadai ese ita be lauma gaudia laloa bada karana amo ia veria oho diba bena tauanina gaudia ita laloa bada matamaia, unai amo lauma dalanai do ita mahuta.​​—⁠Luka 8:14; 21:​34, 35.

 4. Dahaka ese ita ia hagoadaia ita gima noho totona, bona Iesu ese unai be edena bamona ia hahedinaraia?

⁴ Iesu ena haheitalai amo gau ma ta ita dibaia danu. Ena be hesiai taudia be edia biaguna ia mai horana idia diba lasi, to idia diba ia be unai hanuaboi ai do ia mai. Bema idia diba edia biaguna be hanuaboi ma ta ai do ia mai, reana unai hanuaboi ibounai lalonai do idia noga be auka. To lasi, ia mai hanuaboina idia diba, bona unai ese idia ia hagoadaia idia noga noho totona. Unai hegeregerena, Baibel ena peroveta herevadia ese idia hahedinaraia goevagoeva ita be nega dokona lalonai ita noho; to dokona do ia mai dinana bona horana be ita dekenai idia hadibaia lasi. (Mataio 24:36) Ita abia dae dokona ia mai dainai do ita noga noho, to bema ita diba momokani Iehova ena dina be ia kahirakahira momokani, unai ese iseda lalona ia hagoadaia momokani ita gima totona.​​—⁠Sepanaia 1:⁠14.

 5. Edena dala ai ita ese Paulo ena sisiba, ita “naria namonamo” karana dekenai, ita badinaia diba?

⁵ Paulo ese Korinto taudia ia tore henidia neganai, idia ia hagoadaia: “Umui naria namonamo, abidadama dekenai umui gini goada.” (1 Korinto 16:13) Oibe, ita noga noho anina be Keristani abidadama dekenai ita gini goada. Edena dala ai ita noga noho diba? Dirava ena Hereva dekenai iseda diba ita habadaia karana amo. (2 Timoteo 3:​14, 15) Sibona eda stadi dala namodia bona hebou lao henia hanaihanai karana ese ita idia durua iseda abidadama ita hagoadaia totona, bona iseda abidadama dekenai, Iehova ena dina ita laloa noho be mai anina bada kahana ta. Unai dainai, nega ta ta ai, dokona negana dekenai ita noho idia hamomokania Baibel herevadia ita riviulaia karana ese ita ia durua, dokona negana ena mai anina bada hereva momokanidia ita laloaboio lasi totona.a Namona be tanobada ai idia vara gaudia, Baibel ena peroveta herevadia idia hagugurua noho gaudia unai, ita lalodia danu. Germany ai ia noho tadikakana ta ia gwau: “Nega ibounai nius​—⁠tuari, tano mareremarere, dagedage karadia, bona iseda tanobada idia hadikaia edia sivarai​—⁠lau itaia neganai, lau diba dokona be ia kahirakahira momokani.”

 6. Iesu ese edena dala ai ia hahedinaraia nega ia lao noho lalonai, lauma dalanai noga noho karana ia boio diba?

⁶ Mareko karoa 13 lalonai, Iesu ese ena murinai idia raka taudia dekenai idia noga noho totona ia gwauraia hagoadaia herevadia ita davaria. Unai karoa ena hereva hegeregerena, Iesu ese idia be iduara gimaia tauna ida ia hahegeregerea, iena biaguna be daudau gabuna amo do ia giroa mai dainai ia naria. Unai tauna be ena biaguna ia giroa mai horana ia diba lasi. Iena gaukara be ia gima sibona. Iesu ese gima negadia foa ia gwauraia, idia ta ai unai tauna ena biaguna do ia giroa mai diba. Gima negana namba foa ena daudau be daba 3 o’klok amo ela bona dina ia daekau. Unai gima negana ena nega dokona ai, reana gima tauna be ia mahuta diba. Tuari taudia idia laloa daba ia do rere lasi horadia be nega namona edia inai taudia idia dogoatao totona. Unai hegeregerena, inai dina gabedia edia nega dokona lalonai, lauma dalanai tanobada taudia idia mahuta momokani lalonai, ita noga noho totona ita hekwarahi be gau badana. (Roma 13:​11, 12) Unai dainai, Iesu ia gwauraia haheitalai lalonai, ita ia hadibaia loulou: “Umui naria namonamo, umui noga noho. . . . Unai dainai, umui naria noho. . . . Inai hereva lau hamaoroa umui, taunimanima ibounai dekenai danu lau hamaoroa, lau gwau, ‘Umui naria noho.’ ”​—⁠Mareko 13:​32-37.

 7. Dahaka dika ia noho, bona unai ita laloa noho lalonai, edena hagoadaia hereva be nega momo Baibel lalonai ita duahia?

⁷ Iesu ena hesiai gaukara lalonai bona ena toreisi lou murinai, ia ese gima noho karana goadalaia be nega momo ia gwauraia. Momokani, nega momo Baibel ese nega dokona ia herevalaia neganai, ita noga noho eiava ita gima noho ena sisiba herevadia ita davaria.b (Luka 12:​38, 40; Apokalupo 3:2; 16:​14-16) Ia hedinarai goevagoeva, lauma dalanai mahuta karana be dika ia havaraia momokani. Ita ibounai ese unai sisiba herevadia ita badinaia be gau badana!​—⁠1 Korinto 10:12; 1 Tesalonika 5:​2, 6.

Idia Noga Diba Lasi Hahediba Taudia Toi

 8. Getesemane umana lalonai, Iesu ese aposetolo taudia toi ia noia do idia gima noho neganai, dahaka idia karaia?

⁸ Petero, Iamesi, bona Ioane edia haheitalai amo ita itaia hegeregerena, noga noho karana be ura namodia ita abia sibona lasi. Unai tatau toi be lauma gaudia idia laloa bada taudia, mai edia kamonai ida Iesu idia badinaia bona ia idia lalokau henia bada. To, Nisan 14, 33 C.E. ena hanuaboi ai, idia noga lasi. Idia toi be Iesu ida Pasova ariana idia abia atai daiutuna idia rakatania, bona Getesemane umana dekenai idia lao. Unuseniai Iesu ese idia ia hamaoroa: “Lau be egu lalona ia hisihisi bada, kahirakahira lau mase. Iniseni do umui noho, do umui naria lau danu.” (Mataio 26:38) Iesu be nega toi ena Tamana ia guriguri henia goadagoada, bona nega toi ena turadia dekenai ia giroa lou neganai, idia be idia mahuta.​—⁠Mataio 26:​40, 43, 45.

 9. Toana be dahaka gauna dainai aposetolo taudia idia mahuta?

⁹ Dahaka dainai unai tatau toi mai edia kamonai be unai hanuaboi ai Iesu ia gwauraia karana idia karaia lasi? Tauanina dalanai idia hesiku be badina ta. Unai be hanuaboi momokanina ai, reana hanuaboi 12 o’klok murinai, bona “edia matana idia metau.” (Mataio 26:43) To, Iesu ia gwau: “Do umui naria, bona umui guriguri, Satani ena laloa dekenai do umui vareai garina. Emui lauma be ia ura, to emui tauanina be ia manoka vadaeni.”​—⁠Mataio 26:⁠41.

10, 11. (a) Ena be Iesu ia hesiku, to dahaka ese ia durua Getesemane umana lalonai ia gima noho totona? (b) Iesu ese aposetolo taudia toi ia noia do idia gima neganai ia vara gauna amo dahaka ita dibaia?

¹⁰ Ita daradara lasi, unai mai anina bada hanuaboina ai, Iesu danu ia hesiku. To Iesu ia mahuta lasi, unai mai anina bada negana ia gaukaralaia ia guriguri goadagoada totona. Dina haida idia lao vadaeni, iena murinai idia raka taudia ia hagoadaia idia guriguri totona, ia gwau: “Do umui naria, bona nega ibounai do umui guriguri, vadaeni inai dika ibounai dekena amo do umui heau mauri, vadaeni Taunimanima ena Natuna ena vairana dekenai do umui gini.” (Luka 21:36; Efeso 6:18) Bema Iesu ena sisiba ita badinaia bona ena haheitalai namona guriguri karana dekenai ita badinaia, mai eda kudouna ibounai ida Iehova dekenai ita gwauraia guriguridia ese ita do idia durua lauma dalanai ita noga noho totona.

¹¹ Momokani, Iesu ia lalo-parara​—⁠to unai negai iena hahediba taudia idia do lalo-parara lasi⁠—kahirakahira ia do idia dogoatao bona do idia hamasea. Ena hahetoho do idia bada idia lao ela bona mai hisihisi bada ida au ta dekenai do ia mase. Unai gaudia dainai Iesu ese ena aposetolo taudia ia sisiba henia vadaeni, to ia gwauraia gaudia idia lalo-pararalaia lasi. Unai dainai, ia guriguri lalonai idia mahuta. (Mareko 14:​27-31; Luka 22:​15-18) Aposetolo taudia bamona, iseda tauanina danu ia manoka bona gau haida ita do diba lasi. To, bema ita lalo-parara lasi ita be nega dokona lalonai ita noho, lauma dalanai ita mahuta diba. Ita gima noho karana sibona amo ita noga diba.

Mai Anina Bada Karadia Toi

12. Edena kara toi be Paulo ese iseda noga noho karana ida ia gwauraia hebou?

¹² Edena dala ai iseda karaharaga lalohadai ita dogoatao diba? Guriguri bona Iehova ena dina ita laloa bada be mai anina bada, unai ita itaia vadaeni. Ma danu, Paulo ia gwau mai anina bada karadia toi ita habadaia be namo. Ia gwau: “Ita be dina ena taudia, vadaeni do ita kekero lasi. Bona gau badana be, ita ese abidadama bona lalokau do ita atoa, iseda kemena ena dabua aukana bamona. Ma . . . hamauria do ita naria, mai laloa goada, inai kara do ita atoa iseda tuari kwara gauna aukana bamona.” (1 Tesalonika 5:⁠8) Lauma dalanai ita noga noho totona, namona be nega sisina lalonai abidadama, helaro bona lalokau edia gaukara ita herevalaia.

13. Ita gima noho lalonai abidadama ena gaukara be dahaka?

¹³ Namona be iseda abidadama goadana be, Iehova ia noho momokani bona ia idia tahua goadagoada ‘taudia ibounai, be davana namona Ia ese do ia henia.’ (Heberu 11:⁠6) Iesu ena peroveta herevana dokona negana totona, be guna aposetolo edia negai ia guguru dainai, iseda abidadama ia hagoadaia, ita diba momokani iseda nega lalonai unai peroveta herevadia be dala badana ai do idia guguru. Bona iseda abidadama dainai Iehova ena dina ita laloa noho, ita diba momokani unai peroveta matahanaina “do ia vara momokani,” do ia leiti lasi.​—⁠Habakuku 2:⁠3.

14. Dahaka dainai helaro be mai anina bada, bema ita ura ita noga noho?

¹⁴ Iseda helaro be “iseda mauri dogoatao gauna, dogo ese vanagi ia dogoatao bamona,” Dirava ena gwauhamata idia guguru totona ita naria noho lalonai, ita ia durua metau idauidau ita haheaukalaia totona. (Heberu 6:​18, 19) Horoa taihuna ta, Margaret, ena mauri lagani be 90, lagani 70 gunanai ia bapatiso hahinena ia gwau: “Lagani 1963 ai egu adavana be kensa gorerena amo ia mase neganai, lau laloa dokona ia mai haraga be namo. To hari lau lalo-parara, lau be sibona egu namo sibona lau laloa. Unai neganai, gaukara be tanobada ibounai dekenai edena bamona do ia bada ia lao be ai diba lasi. Hari danu, gabu momo dekenai gaukara be harihari sibona idia hamatamaia noho. Unai dainai lau moale Iehova be ia haheauka.” Aposetolo Paulo ese ita ia hagoadaia, ia gwau: “Haheauka [ese] lalo-namo abia mamina [ia havaraia]; bena lalo-namo abia mamina amo, helaro, bona unai helaro be lalohisihisi ia havaraia lasi.”​—⁠Roma 5:​3-5, NW.

15. Lalokau ese edena bamona ita ia hagoadaia diba herevana toana be nega daudau ita naria vadaeni?

¹⁵ Keristani lalokauna be kara ibounai ia hereaia, badina ia dainai gau ibounai ita karaia. Herevana Iehova ese ia abia hidi negadia be dahaka, to ia ita lalokau henia dainai ia ita hesiai henia. Dekena tauna lalokau henia karana ese ita ia veria Basileia sivarai namona ita harorolaia totona, herevana Dirava ena ura do ita karaia ela bona edena negai bona herevana nega hida ruma tamona dekenai ita giroa lou. Paulo ia gwau bamona, “abidadama, helaro, bona lalokau idia do noho, idia toi; to idia amo hereadaena be lalokau.” (1 Korinto 13:​13, NW ) Lalokau dainai ita haheauka noho bona ita ia durua ita noga noho totona. Lalokau be “nega ibounai Dirava ena gwauhamata ia naria noho mai moale danu. Bona metau ibounai lalonai ia gini goada noho. Lalokau be do ia noho hanaihanai doko lasi.”​—⁠1 Korinto 13:​7, 8.

“Oi Dekenai Ia Noho Gauna Do Oi Dogoatao”

16. Ita manoka lasi, to edena laloa dalana ita hahedinaraia be namo?

¹⁶ Mai anina bada negana lalonai ita noho, bona tanobada dekenai idia vara gaudia ese hanaihanai ita idia hadibaia ita be dina gabedia edia nega dokona lalonai ita noho. (2 Timoteo 3:​1-5) Hari be ita manoka negana lasi, to ‘ita dekenai ia noho gauna do ita dogoatao namonamo.’ (Apokalupo 3:11) Guriguri ita goadalaia karana amo bona abidadama, helaro, bona lalokau ita habadaia karana amo, hahetoho negana lalonai do ita gini goada. (1 Petero 4:⁠7) Lohiabada ena gaukara lalonai iseda gaukara be bada. Dirava badinaia karadia dekenai ita bisi karana ese ita do ia durua ita noga noho totona.​—⁠2 Petero 3:⁠11.

17. (a) Dahaka dainai ita naria noho gauna ia do vara lasi dainai ita lalo-manoka lasi? (Rau 29 dekenai ia noho mauana itaia.) (b) Edena dala ai Iehova ita tohotohoa diba, bona unai idia karaia taudia ese dahaka hahenamo do idia davaria?

¹⁷ Ieremia ia gwau: “Egu durua tauna be tamona, Lohiabada sibona, unai dainai ia dekenai egu abidadama lau atoa noho. Lohiabada idia abidadama henia taudia, be Lohiabada ese ia hanamodia noho. Unai dainai Lohiabada ese ita do ia hamauria totona, do ita naria noho be namo, do ita naria mai abidadama danu be namo.” (Lalohisihisi ena Ane 3:​24-26) Ita haida be ita do naria daudau lasi. Ma haida be Iehova ena hahemauri itaia totona, lagani momo idia naria. Bema ita naria negana ena daudau be iseda vairanai ia noho nega hanaihanai ida ita hahegeregerea, ia be nega kwadogina sibona. (2 Korinto 4:​16-18) Bona Iehova ese ia abia hidi negana ita naria noho lalonai, mai anina bada Keristani karadia ita habadaia diba bona ma haida ita durua Iehova ena haheauka amo namo idia abia bona hereva momokani idia abia dae totona. Namona be ita ibounai ita gima noho. Namona be Iehova ita tohotohoa bona ita haheauka danu, ita dekenai ia henia helarona dainai, ia ita tanikiu henia. Bona mai kamonai ida ita gima noho lalonai, namona be mauri hanaihanai ena helaro ita dogoatao auka noho. Bena, inai peroveta gwauhamata herevadia be ita dekenai do idia guguru: “[Iehova] ese oi dekenai ia henia tano, be do oi dogoatao diba, bona Lohiabada ese tau dikadia do ia hadikaia ore neganai, oi ese inai kara do oi itaia.”​—⁠Salamo 37:⁠34.

[Footnotes]

Edena Bamona Do Oi Haere?

• Edena bamona iseda lalona ai ita diba momokani ita be inai tanobada ena dokona ai ita noho?

• Petero, Iamesi, bona Ioane edia haheitalai amo dahaka ita dibaia?

• Edena kara toi ese ita do idia durua lauma dalanai ita gima noho totona?

• Dahaka dainai hari inai negai ‘ita dekenai ia noho gauna ita dogoatao’ noho be gau badana?

[Box/Picture on page 29]

‘Do Idia Naria Noho Taudia be Moale Do Idia Davaria.’​—⁠Daniela 12:⁠12

Mani oi laloa, gima tauna ta ia diba henaohenao tauna ta be palani ia karaia ia ese ia naria rumana dekenai do ia mai. Hanuaboi ia mai neganai, gima tauna be regerege idauidau dekenai do ia hakala namonamo, unai amo do ia diba bema henaohenao tauna ia mai vadaeni. Hora ta ta lalonai gabu ia itaia bona ia kamonai noho. Ita diba rege idauna ta​—⁠hegeregere lai ese au ia botaia ena rege eiava pusikasi ese gau ta ia hamorua ena regena​—⁠ese ia koia diba.​—⁠Luka 12:​39, 40.

‘Lohiabada Iesu Keriso ena mai idia naria’ taudia dekenai unai ia vara diba. (1 Korinto 1:⁠7) Aposetolo taudia idia laloa Iesu ia toreisi lou murinai, ‘basileia do ia henia lou Israela’ dekenai. (Kara 1:⁠6) Lagani haida murinai, Tesalonika dekenai idia noho Keristani taudia idia hadibaia lou, Iesu ena mai be do vaira negana ai. (2 Tesalonika 2:​3, 8) To, Iesu ena murinai idia raka taudia ginigunadia be idia laloa negana ai Iehova ena dina ia ginidae lasi neganai, idia ese mauri ia lao henia dalana idia rakatania lasi.​—⁠Mataio 7:⁠13.

Iseda nega lalonai, toana be inai nega ena dokona ia mai haraga lasi dainai ita lalohisihisi bena iseda gima noho karana ita rakatania be namo lasi. Ia noga noho gima tauna be gau haida ese idia koia diba, to ia naria noho be gau badana! Unai be iena gaukara! Keristani taudia dekenai unai be momokani danu.

[Picture on page 26]

Oi abia dae momokani Iehova ena dina be ia kahirakahira, a?

[Pictures on page 27]

Hebou, guriguri, bona sibona eda stadi dala namodia ese ita ia durua ita gima noho totona

[Picture on page 30]

Namona be Margaret hegeregerena, ita haheauka bona mai goada ida ita gima noho