Duahia Taudia Edia Henanadai

Levitiko 11:40 ia gwau: “Bema tau ta ese unai mase gauna ena kahana ta ia ania neganai, ia ese iena dabua do ia huria, bona ia be do ia miro noho ela bona dina ia diho.” Unai ese Deuteronomi 14:21 ena taravatu, “sibona ia mase kava gauna ta do umui ania lasi,” herevana ia hakoikoia, a?

Levitiko 11:40 ese Deuteronomi 14:21 ena hereva ia hakoikoia lasi. Deuteronomi 14:21 ese ia hahedinaraia, dagedage animal ese idia alaia mase animal be Israela taudia ese idia ania be taravatu. (Esodo 22:31; Levitiko 22:⁠8) Bema Israela tauna ta be ia diba lasi animal be edena bamona ia mase to ia ania bona unai taravatu ia utua, Levitiko 11:40 ena hereva ia badinaia be namo.

Ena be Mose ena Taravatu ese gau ta ia taravatua, to nega haida unai taravatu idia utua. Hegeregere, idia henaohenao, ala-ala, hereva koikoidia bona ma gau haida dekenai taravatu idia noho danu. To, Dirava ese ia henidia taravatu idia utua neganai panisi do idia abia. Unai panisi karana ese idia hahedinaraia unai taravatu be mai anina bada bona taunimanima ese idia badinaia be namo.

Bema tau ta ese ia mase vadaeni animal ia ania, Iehova vairanai ia be miro, bona Levitiko 11:40 ena hereva hegeregerena sibona do ia hagoevaia be namo. Bema sibona ia hagoevaia lasi neganai, “ia be do ia kerere.”​​—⁠Levitiko 17:​15, 16.