Gau ta ese ‘Dirava Ena Lalokau amo, Ita ia Hapararaia Diba Lasi’

 1. Dahaka lalohadai kererena be taunimanima momo bona Keristani taudia danu ese idia abia?

IEHOVA DIRAVA ese oi ia lalokau henia, a? Haida idia gwau Dirava ese taunimanima ibounai ia lalokau henia, Ioane 3:16 ena hereva bamona. To idia laloa: ‘Dirava ese lau ia lalokau henia diba lasi.’ Nega ta ta ai, Keristani taudia momokanidia danu be unai bamona lalohadai idia abia diba. Ia lalomanoka tauna ta ia gwau: “Dirava ese lau ia laloa bada lalohadaina lau abia dae be auka.” Nega haida oi be unai bamona lalohadai oi abia, a?

2, 3. Daika ia ura ita abia dae Iehova ena matana ai ita be anina lasi eiava ita ia lalokau henia lasi, bona unai lalohadai be edena bamona ita hanaia diba?

² Satani ia ura momokani ita abia dae Iehova Dirava ese ita ia lalokau henia lasi bona ita ia laloa bada lasi. Momokani, nega momo Satani ese taunimanima be sibodia idia laloa bada eiava edia hekokoroku karana dekenai ia koidia. (2 Korinto 11:3) To danu, ia ura lalogoada lasi taudia ia hamanokaia, unai amo sibodia do idia matauraia lasi. (Ioane 7:47-49; 8:13, 44) Inai “dina gabedia ai” unai kara ia bada. Hari inai negai, momo be ‘lalokau ia noho lasi’ ruma besedia lalonai idia tubu daekau. Ma haida be hanaihanai dagedage taudia, sibodia edia ura idia tahua taudia, bona laloauka taudia edia kara idia haheaukalaia. (2 Timoteo 3:1-5) Unai bamona taudia idia mamia idia be anina lasi eiava ta ese ia lalokau henia diba lasi, badina lagani momo lalodiai haida ese idia kara dika henia, bese idauna dainai idia dagedage henia, eiava idia inai henia.

³ Bema unai bamona hemami oi abia, oi lalometau lasi. Ita momo be nega ta ta ai sibona dekenai ita laloa kerere. To namona be ita laloatao, Dirava ena Hereva ese “gau idauidau [ia] hamaoromaoroa” bona “goada momokani gaudia idia koua totona” idia torea. (2 Timoteo 3:16; 2 Korinto 10:4) Baibel ia gwau: “Iseda kudouna ai do ita diba momokani Dirava ese ita ia lalokau henia, herevana gau haida dekenai iseda kudouna ese ita ia kota henia, namona be ita laloatao Dirava be iseda kudouna ia hereaia bona gau ibounai ia diba.” (1 Ioane 3:19, 20) Mani dala foa ai Baibel ese ita ia durua “iseda kudouna ai do ita diba momokani” Iehova be ita ia lalokau henia karana ita itaia.

4, 5. Iesu ia gwauraia manu maragidia edia haheitalai ese edena bamona ia hahedinaraia Iehova be ita ia laloa bada?

⁴ Gau ginigunana be, Baibel ese ita ia hadibaia Iehova ese ena hesiai taudia ta ta edia namo ia itaia. Hegeregere, Iesu ia gwau: “Manu maragidia rua be koini maragina tamona dekenai umui hoihoilaia, ani? To bema idia ta be tano dekenai ia moru, emui Tamana be ia diba. To, ia ese emui kwarana huina ibounai ia duahia vadaeni. Unai dainai umui gari lasi, umui ese unai manu maragidia ibounai umui hereaia.” (Mataio 10:29-31) Iesu ena hereva idia kamonai taudia ginigunadia dekenai, unai hereva ena anina mani ita laloa.

⁵ Reana ita laloa dahaka dainai tau ta ese manu maragina ta do ia hoia. Iesu ena negai unai manu maragina be davana maragi aniani gauna. Tau ta be moni maragimaragi tamona dekenai manu maragidia rua ia hoia diba. To gabeai Iesu ia gwau, tau ta ese toea rua amo manu maragidia foa ia abia lasi, to faiv ia abia. Manu maragina ta be davana lasi bamona idia atoa kau. Reana taunimanima edia matana dekenai unai manu be anina lasi, to Havaraia Tauna ese edena bamona ia lalodia? Iesu ia gwau: “To idia ta [idia atoa kau gauna danu] be Dirava ese ia laloaboio lasi.” (Luka 12:6, 7) Reana hari Iesu ena hereva ena anina ita lalopararalaia. Bema Iehova ese manu maragina tamona ia laloa bada, ita diba ia ese taunimanima ia lalodia bada momokani! Iesu ia hereva bamona, Iehova be iseda kara maragimaragidia ibounai ia diba. Oibe, iseda kwarana huina ibounai edia namba ia diba!

 6. Iesu ia gwau Iehova ese iseda huina ena namba ia diba neganai, dahaka dainai ita diba Iesu ia hereva momokani?

⁶ Iseda huina ibounai edia namba ia diba, a? Reana taunimanima haida idia laloa Iesu ena hereva be momokani lasi. Toreisi lou helarona mani oi laloa. Iehova be ita ia diba namonamo be namo, unai amo ita ia karaia lou diba! Ita ia laloa bada, unai dainai ita ia diba namonamo, hegeregere iseda tauanina ai sel ibounai ena infomeisen, bona mauri lalonai ita karaia gaudia ibounai be ia diba bona ia lalodiatao.a Unai dainai ia auka lasi iseda huina ibounai ena namba ia dibaia totona.

7, 8. (a) Iehova ia moalelaia kara namodia haida be dahaka? (b) Edena gaukara haida ita karaia be Iehova ese ia laloa bada?

⁷ Iharuana be, Baibel ese ita ia hadibaia Iehova be ena hesiai taudia edia kara namodia bona gaukara ia itaia bona ia laloa bada. King Davida ese ena natuna Solomona ia hamaoroa: “Iehova ese iseda kudouna ibounai ia tahua, bona iseda lalohadai bona ura gaudia ibounai ia diba.” (1 Sivarai 28:9) Inai dagedage bona badu amo ia honu tanobadana ai Dirava ese taunimanima bilioni momo edia kudouna ia tahua noho bona maino, hereva momokani, bona kara maoromaoro ia ura henia tauna ia davaria neganai, ia moale bada! Dahaka do ia vara, bema tau ta be ena kudouna ai Dirava ia lalokau henia, ia ura dibaia bona ma haida dekenai ia dibaia gaudia ia ura herevalaia? Iehova ese ita ia hamaoroa, ma haida dekenai ia idia herevalaia taudia ia laloatao. Bona Ia be mai ena “buka ta . . . , unai buka ai Iehova ese ia laloatao taudia bona iena ladana idia laloa bada taudia edia ladana” ia torea. (Malaki 3:16) Ena matana ai unai kara idauidau be mai anina bada.

⁸ Iehova ese ia laloa bada kara namodia haida be dahaka? Iena Natuna, Iesu Keriso, ita tohotohoa karadia ibounai ia laloa bada. (1 Petero 2:21) Dirava ese ia laloa bada gaukarana ta be, Basileia ena sivarai namona harorolaia gaukarana. Roma 10:15 ia gwau: “Sivarai namona idia gwauraia taudia edia aena be mai hairai!” Ita laloa lasi iseda aena be “namo herea momokani” eiava mai ena hairai. To unai siri ai, aena ese Iehova ena hesiai taudia edia hekwarahi sivarai namona harorolaia gaukarana dekenai ia laulaulaia. Edia hekwarahi ibounai be hairai gauna bamona bona gau badana Iehova ena matana dekenai.​—Mataio 24:14; 28:19, 20.

9, 10. (a) Dahaka dainai ita diba, metau idauidau ita haheaukalaia karana be Iehova ese ia laloa bada? (b) Iehova ese ena abidadama hesiai taudia be edena bamona ia lalodia lasi?

⁹ Iehova ese iseda haheauka karana danu ia laloa bada. (Mataio 24:13) Laloatao, Satani ia ura Iehova oi dadaraia. Dina ta ta ai Iehova oi badinaia neganai, Iehova oi durua Satani ena samani hereva koikoina ia haerelaia totona. (Aonega Herevadia 27:11) Nega haida gorere, moni lasi, lalohisihisi bona hekwakwanai ma haida dainai, dina ta ta ai haheauka oi hahedinaraia be auka. Danu, oi naria noho gauna ia vara lasi neganai, lalomanoka ia havaraia diba. (Aonega Herevadia 13:12) Unai bamona gaudia ita haheaukalaia karana be Iehova ese ia laloa bada. Unai dainai King Davida ese Iehova ia noia ena mata ranu be “ranu pusena” ta lalonai ia haboua, bona mai lalogoada ida ma ia gwau: “Idia be emu buka ai oi torea, ani?” (Salamo 56:8) Oibe, Iehova ita badinaia noho lalonai, ita haheaukalaia hisihisi bona taitai ibounai ia itaia bona ia laloatao. Idia danu be mai anina bada ena matana dekenai.

¹⁰ To iseda kudouna ese ita ia kota henia neganai, do ia auka ita abia dae Dirava ena matana ai ita be mai anina bada. Reana do ita laloa noho: ‘Haida be haheitalai namodia lau idia hereaia. Iehova be egu kara dekenai ia moale lasi!’ To, Iehova ese ita be ma haida ida ia hahegeregerea lasi, bona ita dekenai ia badu lasi. (Galatia 6:4) Iseda kudouna ia tahua namonamo, bona kara namodia—maragidia danu—ia laloa bada.

11. Iehova ese edena dala ai Abaisa ia kara henia bona dahaka ita dibaia?

¹¹ Gau ihatoina be, Iehova ese eda kudouna ia tahua neganai, iseda kara namodia ia tahua. Hegeregere, Iehova ese oda ia henia King Ieroboama ena bese ibounai—aposteit besena unai—do idia hamasea ore neganai, ia gwau king ena natuna ta, Abaisa, be hemataurai dalanai do idia guria. Dahaka dainai? “Israela ena Dirava Iehova ese ia dekenai gau namona ta ia itaia.” (1 King Taudia 14:1, 10-13) Iehova be unai tau matamatana ena kudouna ia tahua bona “gau namona ta” ia davaria. Herevana ia karaia gau namona be maragi sibona, to Iehova dekenai ia be mai anina bada dainai ena Hereva lalonai ia torea. Iehova ese Abaisa ena kara namona ia hanamoa, ia sibona dekenai hebogahisi ia hahedinaraia bona mase guria gabuna ai idia guria.

12, 13. (a) King Iehosapata dekenai ia vara gauna ese edena bamona ia hahedinaraia, ena be ita kara dika, to Iehova ese iseda kara namodia ia tahua? (b) Iseda gaukara bona kara namodia dekenai, Iehova be edena dala ai lalokau Tamana ta bamona ia kara?

¹² Haheitalai namona ta be kara namo King Iehosapata dekenai ita itaia. King ese kavakava karana ta ia karaia neganai, Iehova ena peroveta tauna ese ia hamaoroa: “Oi ese kara dika taudia oi durua bona Iehova idia inai henia taudia oi ura henia be maoro, a? Unai oi karaia dainai Iehova ena badu be oi latanai ia noho.” Unai be sisiba hereva badana! To Iehova ena hereva be unai sibona lasi. Ma ia gwau: “To, Dirava ese oi dekenai gau namodia ia itaia.” (2 Sivarai 19:1-3) Ena be Iehova ia badu be maoro, to ia be Iehosapata ena kara namodia ia laloa danu. Goevadae lasi taudia be unai bamona lasi! Ma haida dekenai ita badu neganai, edia kara namodia ita itaia lasi. Bona ita kara dika neganai, ita lalohisihisi, hemarai bona hemami dikana ita abia dainai, sibona iseda namo ita itaia lasi. To laloatao, bema iseda kara dika amo ita helalo-kerehai bona ita hekwarahi momokani unai kara ita karaia lou lasi totona, Iehova ese eda dika do ia gwauatao.

¹³ Iehova be emu kara ia tahua neganai, iseda kara dikadia ia kokia, hegeregere golo be nadi o tano amo ia hapararaia bamona. Emu kara namodia bona gaukara be edena bamona? Emu kara namodia be golo nadidia bamona ia lalodia bada! Lalokau tama sina haida be edia natudia ese sikuli dekenai idia torea laulaudia, eiava sikuli gaudia haida, be lagani momo herea lalonai idia naridia, ena be natudia ese idia laloaboio vadaeni, ani? Iehova be ena natudia ia lalokau henia Tamana ta bamona. Bema Ia ita abidadama henia noho, iseda gaukara bona kara namodia do ia laloaboio lasi. Bema ia laloaboio, ia dekenai unai be kara gageva, badina ia be kara maoromaoro Diravana. (Heberu 6:10) Dala ma ta amo iseda kara ia tahua.

14, 15. (a) Dahaka dainai iseda kara dika ese Iehova ia koua lasi iseda kara namo ia itaia totona? Haheitalaia. (b) Iehova be ita dekenai ia itaia kara namodia dekenai dahaka do ia karaia, bona ena abidadama hesiai taudia be edena bamona ia lalodia?

¹⁴ Ena be Iehova ese iseda kara dika ia itaia, to ita karaia diba gaudia danu ia laloa. Haheitalai ta be inai: Idia penia laulau namodia idia ura henia taudia be do idia hekwarahi bada, ia dika laulauna eiava laulau ma haida idia hanamoa lou totona. Hegeregere, England dekenai, London ena National Gallery ai, tau ta be ipidi amo Leonardo da Vinci ia penia laulauna ia pidia, laulau ena davana be 120 milioni kina bamona, tau ta ia gwau lasi unai laulau ia dika dainai idia negea be namo. To maoromaoro unai laulau gunana penia gaukarana idia karaia matamaia lou. Dahaka dainai? Badina laulau idia ura henia taudia dekenai unai be dava bada gauna. Oi be idia penia laulau ena davana ia hereaia momokani, ani? Dirava ena matana dekenai oi be mai anina bada—herevana oi be goevadae lasi. (Salamo 72:12-14) Iehova Dirava, taunimanima ia Havaraia Tauna, be ena lalokau idia abia dae taudia ibounai dekenai mauri goevadaena ia henia totona kara haida do ia karaia.​—Kara 3:21; Roma 8:20-22.

¹⁵ Oibe, ena be iseda kara namodia ita itaia lasi, to Iehova ese unai ia itaia. Bona ia ita hesiai henia noho lalonai, ena heduru amo iseda kara namodia be do ia namo ia lao ela bona ita goevadae. Herevana, Satani ena tanobada ese edena bamona ita ia kara henia, to Iehova ese ena abidadama hesiai taudia ia laloa bada, bona ia dekenai idia be dava bada kohudia bamona.​—Hagai 2:7.

16. Iehova ena lalokau ita dekenai ia hamomokania gauna badana be dahaka, bona edena dala ai ita diba unai harihari gauna be ita ta ta totona?

¹⁶ Gau ihahanina be, Iehova be ia karaia gaudia amo ia hamomokania ita ia lalokau henia. Oibe, Keriso ena mauri davalaia boubouna ese Satani ena koikoi herevana, ita be anina lasi eiava ta ese ita ia lalokau henia lasi herevana, ia hakoikoia momokani. Namona be inai ita laloaboio lasi: Iesu be au ta dekenai mai ena hisihisi bada ida ia mase, bona Iehova be mai ena lalohisihisi bada ida, ena Natuna lalokauna ena mase ia itaia, unai ese idia hamomokania ita idia lalokau henia. Madi, taunimanima momo idia abia dae lasi, unai harihari gauna be idia ta ta totona. Bona idia mamia idia be anina lasi. To laloatao, aposetolo Paulo be Keriso murinai idia raka taudia ia dagedage henia. To, ia gwau: “Dirava ena Natuna . . . ese lau ia lalokau henia bona lau totona sibona ia henia.”​—Galatia 1:13; 2:20.

17. Iehova ese edena dala amo ita ia veria lao Ia bona ena Natuna dekenai?

¹⁷ Iehova ese ena lalokau ita dekenai ia hamomokania dalana ta be, ita ta ta ia durua Keriso ena boubou ena hahenamo ita abia totona. Iesu ia gwau: “Tau ta be lau dekenai do ia mai diba, bema Tamana, lau ia siaia tauna ese ia veria mai.” (Ioane 6:44) Oibe, Iehova sibona ese ita ia veria lao ena Natuna bona mauri hanaihanai helarona dekenai. Edena dala ai? Haroro gaukara amo, ita ta ta idia davaria, bona Iehova ese ena lauma helaga amo ita ia durua hereva momokani ita lalopararalaia bona badinaia totona, ena be iseda goada be mai ena hetoana bona ita goevadae lasi. Unai dainai, Iehova ese Israela taudia dekenai ia hereva bamona ita dekenai ia gwau diba: “Lau ese oi lau lalokau henia, bona unai lalokau be ia noho hanaihanai. Unai dainai lau ese mai lalokau ida oi lau hakaua mai lau kahirakahira”—Ieremia 31:3.

18, 19. (a) Iehova ese ena lalokau ita totona ia hahedinaraia dala hereadaena be dahaka, bona dahaka ese ia hahedinaraia ia sibona ese unai ia karaia? (b) Dirava ena Hereva ese edena bamona ita ia hadibaia, Iehova be mai hebogahisi ida ita ia kamonai henia?

¹⁸ Reana ita ese guriguri amo Iehova ena lalokau ita mamia momokani. Baibel ese ita ta ta ia hamaoroa Dirava dekenai ‘nega ibounai ita guriguri.’ (1 Tesalonika 5:17) Ia kamonai. Baibel ese Iehova ia gwauraia “Guriguri kamonai Diravana.” (Salamo 65:2) Unai gaukara be ma ta dekenai ia henia lasi, ena Natuna dekenai danu ia henia lasi. Mani oi laloa: Guba bona Tanobada ia Havaraia Tauna ese ita ia hamaoroa, namona be mai gari lasi ida guriguri amo ia kahirakahira dekenai do ita lao. Bona Iehova ena kamonai karana be edena bamona? Ita ia hebogahisi henia eiava ia laloa bada, ani?

¹⁹ Iehova be iseda hemami ia laloa. Hemami laloa karana ena anina be dahaka? Abidadama Keristani burukana ta ia gwau: “Haida edia hemami laloa karana ena anina be, emu hisihisi be egu kudouna dekenai lau mamia.” Iehova ese ita abia hisihisina ia mamia momokani, a? Baibel ese Iena bese, Israela taudia, idia abia hisihisina ia herevalaia, ia gwau: “Edia lalometau negadia ibounai lalonai, ia danu ia lalometau.” (Isaia 63:9) Iehova ese edia hekwakwanai ia itaia sibona lasi; to edia hisihisi ia mamia danu. Iehova ena hemami be ena hesiai taudia dekenai ia gwauraia herevadia amo ia hedinarai: “Umui ia hadikaia tauna be egu matana ia daua toho noho.”b (Sekaraia 2:8) Unai be hisihisi bada herea! Oibe, Iehova ese iseda hisihisi ia mamia. Ita hisihisi neganai, ia danu ia hisihisi.

20. Bema ita ura Roma 12:3 ena sisiba ita badinaia, dahaka lalohadai kererena ita dadaraia be namo?

²⁰ Ia laloa maoromaoro Keristani tauna ese Dirava ena lalokau bona hemataurai karana ena hesiai taudia dekenai, be do ia gaukaralaia kerere lasi ia hekokoroku eiava sibona ena lalohadai ia atoa guna totona. Paulo ia gwau: “Dirava ese lau dekenai ia henia hebogahisi hereadaena amo, umui huanai idia noho taudia ta ta lau hamaoroa, namo lasi sibona do ia laloa bada, to ena laloa dalana amo do ia hahedinaraia ia laloa maoromaoro, bona Dirava ese ta ta dekenai ia henia abidadama hegeregerena, unai do ia karaia.” (Roma 12:3) Ita moale badina iseda guba Tamana be ita ia lalokau henia bada, namona be ita laloa maoromaoro bona ita laloatao, gau ta o kara ta amo Dirava ita doria diba lasi ena lalokau ita abia totona.​—Luka 17:10.

21. Dahaka koikoi herevadia Satani amo ita dadaraia, bona edena Baibel hereva momokani amo iseda lalona ita hagoadaia noho be namo?

²¹ Namona be ita gaukara goada Satani ena koikoi hereva ibounai, ita be anina lasi bona Dirava ese ita ia lalokau henia lasi herevana ita dadaraia. Bema emu mauri ai idia vara gaudia dainai oi laloa Dirava ena lalokau bada ese oi ia durua diba lasi, eiava emu gaukara namodia be anina lasi bona Dirava ese ia itaia lasi, eiava emu kara dikadia be bada herea dainai, ena lalokau Natuna ena mase ese ia kokia lasi, unai be koikoi herevadia. Emu kudouna ibounai ida unai koikoi herevadia oi dadaraia! Namona be Paulo ese Dirava ena lauma amo ia torea hereva momokanidia amo ita sibona ita hagoadaia, ia gwau: “Lau diba momokani, mase eiava mauri, eiava aneru, eiava gavamani, eiava hari idia noho gaudia, eiava gabeai do idia mai gaudia, eiava siahu gaudia, eiava ataiai gaudia, eiava dobu gaudia, eiava Dirava ese ia havaraia gaudia ma haida, unai gaudia ibounai ese ita be Dirava ena lalokau, Keriso Iesu iseda Lohiabada lalonai ia noho gauna amo, ita ia hapararaia diba lasi.”​—Roma 8:38, 39.