“Nega Ibounai Ia Hadibaia Parabole Sibona Dekena Amo”

“Iesu ese inai hereva ibounai parabole dekena amo ia gwauraidia unai taunimanima momo dekenai. Nega ibounai ia hadibaia parabole sibona dekena amo.”​—⁠MATAIO 13:⁠34.

1, 2. (a) Dahaka dainai taunimanima ese haheitalai namodia idia laloatao daudau? (b) Iesu ese edena bamona haheitalai ia gaukaralaidia, bona unai ia gaukaralaia dalana dekenai dahaka henanadai idia vara? (Futnout itaia danu.)

LAGANI momo gunanai, reana pablik tok ta lalonai oi kamonai haheitalai ta oi do laloatao diba, a? Anina namona idia havaraia haheitalai be ita laloaboio haraga lasi. Buka torea tauna ta ia gwau, haheitalai dainai “ta ese ia kamonai gaudia be matana amo ia itaia bamona bona kamonai taudia edia lalona dekenai laulau namona ia havaraia.” Nega momo unai kara ese iseda laloa karana ia hanamoa dainai, haheitalai ese ita ia durua diba lalohadai ta ita lalo-pararalaia haraga totona. Haheitalai ese hereva edia anina idia hahedinaraia, bona ita laloaboio haraga lasi gaudia be ita dekenai idia hadibaia.

² Tanobada dekenai hadibaia tauna ta lasi be Iesu bamona haheitalai ia gaukaralaidia namonamo diba. Iesu ena parabole momo be kahirakahira lagani 2,000 gunanai ia gwauraidia, to ita lalodiatao haraga diba.a Dahaka dainai Iesu ese unai hadibaia dalana ia gaukaralaia badabada? Bona dahaka dainai iena haheitalai ese namo idia havaraia?

Iesu be Haheitalai amo Ia Hadibaia Ena Badina

 3. (a) Mataio 13:​34, 35 ena hereva hegeregerena, Iesu ese haheitalai ia gaukaralaidia ena badina ta be dahaka? (b) Dahaka ese ia hahedinaraia Iehova be unai hadibaia dalana ia laloa bada?

³ Iesu ese haheitalai ia gaukaralaidia karana dekenai, Baibel ese badina namodia rua ia henia. Badina ginigunana be, unai bamona ia karaia ese peroveta herevana ia hagugurua. Aposetolo tauna Mataio, ia gwau: “Iesu ese inai hereva ibounai parabole dekena amo ia gwauraidia unai taunimanima momo dekenai. Nega ibounai ia hadibaia parabole sibona dekena amo. Inai bamona ia karaia, peroveta tauna ena hereva hamomokania totona, ia gwau: ‘Lau hadibaia neganai parabole do lau gwauraia.’ ” (Mataio 13:​34, 35) Mataio ese ia gwauraia “peroveta tauna” be Salamo 78:2 ia torea tauna. Lagani handred momo gunanai, Iesu ia do vara lasi neganai, unai salamo torea tauna be Dirava ena lauma helaga ese ia hasiahua bena unai hereva ia torea. Lagani handred momo gunanai, Iehova ia gwau iena Natuna be haheitalai amo do ia hadibaia be hoa gauna, ani? Momokani, Iehova ese unai hadibaia dalana ia laloa bada!

 4. Iesu ese haheitalai ia gaukaralaidia ena badina be edena bamona ia gwauraia hedinarai?

⁴ Badina iharuana be, Iesu sibona ese ia gwauraia hedinarai, ia gwau haheitalai ia gaukaralaia edia kudouna dekenai gau ta idia mamia lasi taudia ia hapararaia totona. “Taunimanima momo herea” dekenai uhe ia hadoa tauna ena parabole ia gwauraia murinai, iena hahediba taudia ese ia idia nanadaia: “Badina be dahaka taunimanima dekenai parabole dekena amo oi hadibaia noho?” Iesu ia haere ia gwau: “Guba Basileia ena hunia hereva umui dekenai be idia hedinarai, to haida dekenai be lasi. Inai dainai parabole dekena amo lau hereva idia dekenai, vadaeni edia matana idia negea, to do idia itaia diba lasi. Bona idia kamonai gwauraia, to do idia kamonai diba lasi, bona edia lalona be do ia kehoa diba lasi. Idia dekenai Isaia ena peroveta hereva ia momokani vadaeni, ia gwau: ‘Kamonai be do umui kamonai, to emui lalona do idia kehoa diba lasi. Itaia be do umui itaia, to diba do umui davaria lasi. Badina be inai bese taudia edia lalona idia dibura.’ ”​​—⁠Mataio 13:​2, 10, 11, 13-15; Isaia 6:​9, 10.

 5. Edena dala ai Iesu ena haheitalai ese iena hereva idia kamonai manau taudia be hekokoroku taudia amo ia hapararaia?

⁵ Iesu ena haheitalai dekenai dahaka ese taunimanima ia hapararaia? Nega haida, iena hereva idia kamonai taudia ese ena hereva ena anina idia tahua namonamo be namo, unai amo ena anina ibounai idia lalo-pararalaia. Unai ese manau taudia ia hagoadaia, hereva ma haida totona idia henanadai. (Mataio 13:36; Mareko 4:34) Iesu ena haheitalai ese hereva momokani totona idia hitolo taudia dekenai hereva momokani ia hahedinaraia; unai nega tamona ai, iena haheitalai ese hereva momokani be hekokoroku taudia amo ia hunia. Iesu be hadibaia tauna namona! Namona be hari iena haheitalai dekenai namo idia havaraia gaudia haida mani ita tahua.

Hereva Ia Abia Hidi Namonamo

6-8. (a) Iesu ena hereva idia kamonai taudia ginigunadia ese dahaka namo idia do abia lasi? (b) Dahaka ese idia hahedinaraia Iesu ese ena hereva ia abia hidi namonamo?

⁶ Iesu ena uduna amo hadibaia herevadia idia kamonai hahediba taudia ginigunadia edia hemami be nega ta oi laloa, a? Iesu ena gadona idia kamonai be hahenamo badana ta, to ia gwauraia gaudia idia laloa lou totona idia dekenai buka ta ia do noho lasi. To, Iesu ena hereva be edia lalona bona kudouna dekenai idia atoa be namo. Iesu ese haheitalai ia gaukaralaia namonamo karana amo dala ia kehoa ia hadibaia gaudia idia laloatao totona. Edena dala ai?

⁷ Iesu ese hereva ia abia hidi namonamo. Bema sivarai ta ia gwauraia bona kahana maragidia haida be mai anina unai sivarai dekenai, eiava ena anina idia hahedinaraia, ena sivarai unai lalonai ia gaukaralaia. Unai dainai biaguna ta be ia boio mamoe totona ia lao neganai, idia do noho mamoe edia namba ia gwauraia, gaukara taudia be vain umana ai hora hida idia gaukara ia gwauraia, bona haida dekenai moni hida idia henia ia gwauraia.​​—⁠Mataio 18:​12-14; 20:​1-16; 25:​14-30.

⁸ Unai nega tamona ai, Iesu ese haheitalai ena anina idia koua diba gaudia, anina lasi kahana maragidia, ia gwauraia lasi. Hegeregere, hebogahisi lasi hesiai tauna ena parabole ai, unai tauna ena abitorehai monina be kina 1,000,000 ia abia dalana be Iesu ese ia gwauraia lasi. Iesu ese gwauatao karana ia herevalaia. Unai hesiai tauna ese edena bamona unai abitorehai ia abia be gau badana lasi, to edena bamona ena dika idia gwauatao bona edena bamona ia dekenai moni maragi sibona ia abiatorehai hesiai tauna ia kara henia dalana be mai anina bada. (Mataio 18:​23-35) Unai hegeregerena, ia boio merona ena haheitalai dekenai, gabeai ia vara merona ese karaharaga ena ahuna ia noia ena badina bona ia haorea kava ena badina be Iesu ese ia gwauraia lasi. To unai mero ena lalona ia haidaua bona ruma dekenai ia giroa lou neganai iena tamana ia abia hemamina bona ia karaia karana be Iesu ese ia gwauraia goevagoeva. Tamana ena kara ia gwauraia hedinarai be mai anina bada, badina Iesu ia gwauraia hereva badana be Iehova be ‘dika ia gwauatao momokani.’​—⁠Isaia 55:7; Luka 15:​11-32.

9, 10. (a) Iesu ese ena haheitalai lalonai ia gwauraia taudia ia herevalaia neganai, dahaka ia herevalaia badabada? (b) Iesu ese edena dala ai ena kamonai taudia bona ma haida ia durua ena haheitalai idia laloatao totona?

⁹ Iesu be mai ena aonega ida ena parabole lalonai ia gwauraia taudia ia herevalaia danu. Unai taudia edia toana dekenai hereva idauidau momo ia gwauraia lasi, to nega momo ia gwauraia sivaraina dekenai idia karaia gaudia eiava karadia ia herevalaia badabada. Unai dainai, Iesu ese Samaria tauna namona ena toana ia gwauraia lasi, to mai anina bada gauna​—⁠Samaria tauna be mai ena hebogahisi ida tano dekenai ia hekure Iuda tauna mai ena bero ia durua dalana​—⁠ia gwauraia. Iesu ia ura idia ia hadibaia dekena tauna lalokau henia karana be iseda bese eiava tano taudia sibona dekenai ita hahedinaraia lasi, bona unai idia hahedinaraia herevadia sibona ia gwauraia.​—⁠Luka 10:​29, 33-37.

¹⁰ Iesu ese ena hereva ia gaukaralaia namonamo dainai, ena haheitalai be idia kwadogi bona hereva idauidau amo idia honu lasi. Unai amo ia ese ena kamonai taudia ginigunadia​​—⁠bona gabeai Dirava ena lauma amo ia vara Evanelia Bukadia do idia duahia taudia​​—⁠ia durudia unai haheitalai bona idia amo idia dibaia gaudia danu do idia laloatao totona.

Dina Ta Ta ai Idia Vara Gaudia amo Ena Haheitalai Ia Abia

11. Mani haheitalai haida amo oi hahedinaraia Iesu ena parabole momo be Galilea dekenai ia tubu daekau lalonai ia itaia gaudia idia hahedinaraia.

¹¹ Iesu be taunimanima edia mauri lalonai idia vara gaudia amo haheitalai ia abia bona ia gaukaralaia namonamo tauna. Iena parabole momo lalonai, Galilea dekenai ia tubu daekau lalonai ia itaia gaudia idia hahedinaraia. Mani nega sisina lalonai, ena maragi negana oi laloa. Nega hida ena sinana ia itaia, paraoa ia gabua negana gunana ai ia hatubua paraoa amo ia kokia kahana ta ia gaukaralaia hatubua paraoana ma ta ia karaia totona? (Mataio 13:33) Nega hida haoda taudia ia itaia, edia reke be Galilea ena davara dekenai idia atoa diho? (Mataio 13:47) Nega hida natudia ia itaia, maketi gabuna dekenai idia gadara? (Mataio 11:16) Toana be Iesu ese dina ta ta ai idia vara gaudia ma haida danu be ena haheitalai dekenai ia gaukaralaia​—⁠uhe hadoa karana, headava ariadia mai edia moale, bona dina dekenai uiti idia mage.​—⁠Mataio 13:​3-8; 25:​1-12; Mareko 4:​26-29.

12, 13. Iesu ese uiti bona ava dikadia ena parabole ia gwauraia ese edena bamona ia hahedinaraia ia noholaia gabuna ia diba namonamo?

¹² Ita hoa lasi, Iesu ena haheitalai momo lalodiai dina ta ta ena noho daladia idauidau ia herevalaia. Unai dainai, unai hadibaia dalana ia gaukaralaia karana ita lalo-pararalaia momokani totona, Iesu ena hereva ena anina ia idia kamonai henia Iuda taudia dekenai ita tahua be heduru gauna. Mani haheitalai rua ita itaia.

¹³ Haheitalai ginigunana, uiti bona ava dikadia ena parabole lalonai, Iesu ia gwau tau ta be ena uma dekenai uiti uhe namodia ia hadoa to “badu tauna” ta ia mai bona ava dikadia be uiti huanai ia hadoa. Dahaka dainai Iesu ese unai parabole ia abia hidi? Namona be oi laloatao, ia ese Galilea Gohuna kahirakahira dekenai unai haheitalai ia gwauraia, bona Galilea taudia edia gaukara badana be biru gaukarana. Bema biru tauna ena inai tauna be hehuni dalanai iena uma dekenai ia vareai bona ava dikadia ia hadoa, unai be dika momokani, ani? Unai nega ai idia noho taravatu ese idia hahedinaraia unai bamona gaudia idia vara. Ia hedinarai goevagoeva Iesu ese iena kamonai taudia idia lalo-pararalaia diba gauna ta ia gaukaralaia, ani?​—⁠Mataio 13:​1, 2, 24-30.

14. Iesu ese Samaria tauna namona ena parabole ia gwauraia neganai, dahaka dainai ‘Ierusalema amo Ieriko dekenai’ ia lao dalana ia gwauraia, ena hereva ena anina ia hahedinaraia totona?

¹⁴ Haheitalai iharuana be, Samaria tauna namona ena parabole mani oi laloa lou. Iesu ese ena hereva ia hamatamaia neganai, ia gwau: “Tau ta Ierusalema dekena amo Ieriko dekenai ia lao [“ia diho lao,” NW ] neganai henaoa taudia haida ese idia davaria. Vadaeni iena dabua idia dadia, idia botaia, kahirakahira ia mase, vadaeni idia rakatania.” (Luka 10:30) Iesu ese ena hereva ena anina ia hahedinaraia totona, ‘Ierusalema amo Ieriko dekenai’ ia lao dalana ia gwauraia. Ierusalema amo ia daudau lasi gabuna, Iudea dekenai ia noho neganai unai parabole ia gwauraia; unai dainai ena kamonai taudia be ia herevalaia dalana idia diba. Momo idia diba unai dala be dala dikana, bema tau ta be sibona ia lao. Unai dala be taunimanima lasi gabuna amo ia lao dainai, henaohenao taudia edia komu gabudia momo idia noho.

15. Samaria tauna namona ena parabole ai, dahaka dainai ta ese unai hahelaga tauna bona Levi tauna edia hebogahisi lasi karana ena badina maorona ta ia henia diba lasi?

¹⁵ Iesu ese ‘Ierusalema amo Ieriko dekenai ia diho lao’ dalana ia herevalaia neganai, gau ta danu ita diba be namo. Unai parabole hegeregerena, hahelaga tauna ta bona gabeai Levi tauna ta danu be unai dala dekenai idia lao​​—⁠to idia ta ia gini lasi unai bero tauna ia durua totona. (Luka 10:​31, 32) Hahelaga taudia be Ierusalema ena dubu dekenai idia gaukara, bona Levi taudia ese idia durudia. Hahelaga bona Levi taudia momo be dubu dekenai idia gaukara lasi neganai, Ieriko dekenai idia noho, badina Ieriko be kilomita 23 sibona Ierusalema amo. Unai dainai, idia be unai dala dekenai idia raka lao danu. Namona be oi diba danu, hahelaga tauna bona Levi tauna be “Ierusalema amo” idia raka mai, unai dainai idia be dubu amo idia giroa lao noho.b Unai dainai ta ese unai tatau rua edia hebogahisi lasi karana ena badina maorona ta ia henia diba lasi, bona ia gwau diba lasi, ‘Unai bero ia davaria tauna idia durua lasi badina toana be ia mase vadaeni, bona bema ena mase tauanina idia dogoatao, do idia hegeregere lasi dina haida dubu dekenai idia gaukara totona.’ (Levitiko 21:1; Numera 19:​11, 16) Ia hedinarai goevagoeva, Iesu ia gwauraia haheitalai be ena kamonai taudia idia diba gaudia, ani?

Iehova Ia Havaraia Gaudia amo Ena Haheitalai Ia Abia

16. Dahaka dainai ita hoa lasi Iesu be havaraia gaudia ia diba namonamo?

¹⁶ Iesu ena haheitalai bona parabole haida ese idia hahedinaraia, ia be tubutubu gaudia, animal, bona guba bona tanobada ai idia noho gaudia ia diba namonamo. (Mataio 6:​26, 28-30; 16:​2, 3) Unai bamona diba be edeseni amo ia abia? Galilea dekenai ia tubu daekau neganai, Iehova ia havaraia gaudia momo ia itadia. To unai sibona lasi, Iesu be “vara guna Natuna, ia be Dirava ese ia karaia gaudia ibounai edia biaguna momokani” bona Iehova ese unai “gaukara karaia tauna” namona ia gaukaralaia gau ibounai havaraia totona. (Kolose 1:​15, 16; Aonega Herevadia 8:​30, 31) Unai dainai ita hoa lasi, Iesu be havaraia gaudia ia diba momokani, ani? Namona be iena hadibaia gaukara lalonai ena diba ia gaukaralaia namonamo dalana mani ita itaia.

17, 18. (a) Iesu ena hereva Ioane karoa 10 dekenai ese edena bamona ia hahedinaraia Iesu be mamoe edia kara idauidau ia diba? (b) Baibel tanodia dekenai idia lao taudia ese mamoe naria taudia bona edia mamoe idia hetura karana dekenai dahaka idia itaia?

¹⁷ Iesu ese ia gwauraia haheitalai namodia amo, ta be Ioane karoa 10 dekenai, unuseniai ia bona ena murinai idia raka taudia edia hetura karana be mamoe naria tauna bona ia naria mamoe ida ia hahegeregerea. Iesu ena hereva ese ia hahedinaraia ia ese mamoe edia kara ia diba namonamo. Ia hahedinaraia mamoe idia ura ta ese idia ia hakaua, bona mai kamonai ida edia naria tauna idia badinaia. (Ioane 10:​2-4) Mamoe bona mamoe naria taudia huanai ia noho hetura karana idauna be Baibel tanodia dekenai idia lao taudia ese idia itaia. Lagani 1800 murinai, mauri gaudia ia stadilaia tauna, H. B. Tristram ia gwau: “Nega ta mamoe naria tauna ta lau itaia, ena mamoe serina ida ia gadara. Ia heau boio koikoi; mamoe be ia murinai idia heau lao bona idia hagegea. . . . bona mai moale ida ia badinai idia heau loaloa.”

¹⁸ Dahaka dainai mamoe ese edia naria tauna idia badinaia? Iesu ia gwau, badina be “iena gadona idia diba.” (Ioane 10:⁠4) Mamoe be momokani edia naria tauna ena gadona idia diba, a? George A. Smith be ena buka (The Historical Geography of the Holy Land ) lalonai ia itaia gauna ia torea, ia gwau: “Nega haida emai dina tubua ena laga-ani be Iudea ena ranu guri ta badinai ai abia, unuseniai mamoe naria taudia toi eiava foa be edia mamoe serina danu idia diho mai. Mamoe oreadia be idia haboua tamona, bona ai laloa noho edena bamona mamoe naria taudia ese edia mamoe korikori idia haboua lou diba. To mamoe be ranu idia inua bona idia gadara murinai, mamoe naria tauna ta ta be koura idauidau edia dorina dekenai idia daekau, bona idia ta ta be edia boiboi idauna idia karaia; bona mamoe ta ta be unai hutuma amo idia raka-lasi bona edia naria tauna dekenai idia lao, bona mamoe oreana ta ta be idia mai hegeregerena, edia orea ta ta dekenai ma idia giroa lou namonamo.” Iesu ese dala namo hereana amo ena hereva ena anina ia haheitalaia. Bema iena hadibaia herevadia ita lalo-pararalaia bona kamonai henia bona bema ena hakaua dalana ita badinaia, ita be “mamoe naria tauna namona” mai ena hebogahisi bona lalokau ena henari henunai do ita noho diba.​—⁠Ioane 10:⁠11.

Iena Kamonai Taudia Idia Diba Gaudia Ia Gaukaralaia

19. Iesu ese edena dala ai unai gabu dekenai ia vara dika ta ia gaukaralaia namonamo, lalohadai koikoina ta dadaraia totona?

¹⁹ Anina namona idia havaraia haheitalai be dala idauidau amo oi gwauraia diba, reana ekspiriens ta eiava sivarai ta amo gau ta oi hadibaia. Nega ta, Iesu ese vanegai sibona ia vara gauna ta ia gaukaralaia, kara dika taudia be dika badadia lalonai idia mase be maoro ena lalohadai ia dadaraia totona. Ia gwau: “Siloama kohoro ese taudia 18 edia latanai ia moru, vadaeni idia mase. Inai taudia 18, umui be umui gwau, idia edia dika be Ierusalema taudia oredia edia dika ia hanaia?” (Luka 13:⁠4) Idia vara gaudia ibounai be Dirava ese ia abia hidi vadaeni lalohadaina dekenai, Iesu be mai siahu ida ia hereva. Unai taunimanima 18 be Dirava idia habadua kara dika haida idia karaia dainai idia mase lasi. To, edia mase dikana be ia vara kava dika ta ese ia havaraia. (Hadibaia Tauna 9:11) Iena kamonai taudia idia diba vadaeni gauna ta ia gwauraia karana amo hahediba hereva koikoina ta ia hakoikoia.

20, 21. (a) Dahaka dainai Farisea taudia ese Iesu ena hahediba taudia idia gwauraia dika? (b) Iesu ese dahaka sivarai amo ia hahedinaraia Iehova ese Sabati taravatu aukana ia atoa lasi? (c) Stadi hereva gabena dekenai dahaka do ita herevalaia?

²⁰ Iesu ena hadibaia gaukara lalonai, ia ese Baibel amo haheitalai ia gwauraia danu. Oi laloatao, Iesu ena hahediba taudia ese Sabati dinana ai uiti idia kokia bona idia ania dainai Farisea taudia ese idia gwauraidia dika. Hahediba taudia ese Dirava ena Taravatu idia utua lasi, to Farisea taudia edia sabati taravatu aukana idia makohia. Iesu ia ura hahedinaraia Dirava ese sabati ena taravatu aukana badinaia karana ta ia gwauraia lasi, unai dainai 1 Samuela 21:​3-6 dekenai ia noho sivaraina ia gwauraia. Davida bona ena tatau idia hitolo neganai, dubu dekenai idia lao bona paraoa helaga, pata amo idia kokia gaudia unai, idia ania. Unai paraoa gunadia idia atodia siri, hahelaga taudia ese idia ania totona. To, Davida bona ena tatau ese unai gaudia idia ania neganai, ta ese ia gwauraidia dika lasi. Baibel lalonai hahelaga lasi taudia ese paraoa gunadia idia ania ena sivarai be unai sivarai sibona ese ia hahedinaraia. Iesu ia diba momokani edena sivarai maorona do ia gaukaralaia, bona ita daradara lasi badina iena hereva idia kamonai Iuda taudia be unai sivarai idia diba.​—⁠Mataio 12:​1-8.

²¹ Momokani, Iesu be Hadibaia Tauna Badana! Iena diba ia gaukaralaia mai anina bada hereva momokani be kamonai taudia ese idia lalo-pararalaia dalana dekenai ia gwauraia totona be hoa gauna. To, edena bamona ita ese iseda hadibaia gaukara lalonai ia ita tohotohoa diba? Stadi hereva gabena ese unai do ia hahedinaraia.

[Footnotes]

Oi Laloatao, A?

• Dahaka dainai Iesu ena hadibaia karana lalonai, parabole ia gaukaralaidia?

• Dahaka ese ia hahedinaraia Iesu be ena hereva idia kamonai taudia idia diba haheitalaidia ia gaukaralaia?

• Iesu ena diba Iehova ese ia havaraia gaudia dekenai be iena haheitalai lalodiai edena bamona ia gaukaralaia namonamo?

• Edena dala idauidau ai Iesu ese ena kamonai taudia idia diba vadaeni sivaraidia ia gaukaralaia?

[Pictures on page 23]

Iesu ena parabole lalonai, hesiai tauna ta be ia amo abitorehai maragi sibona ia abia tauna ena dika ia gwauatao lasi bona ena ahuna ibounai ia haorea merona ta be ena tamana ese ia gwauatao ena sivarai ia kikilaia

[Picture on page 24]

Iesu ese ia gwauraia Samaria tauna namona ena parabole ena anina be dahaka?

[Picture on page 25]

Mamoe be edia naria tauna ena gadona idia diba momokani, a?