Kamonai Karana ese Oi Do Ia Gimaia

BEMA oi ura gaudia sibona oi karaia, do oi moale, a? Nega haida oi ura lasi ta ese oi ia hamaoroa gauna ta oi karaia totona, a? Namona be oi hereva momokani, mani lau dekenai emu lalohadai oi gwauraia.—

To oi dekenai edena be namo? Emu ura gaudia sibona oi karaia be aonega karana, a? Eiava emu tamana bona sinana oi kamonai henia neganai, namo oi davaria?— Dirava ia gwau emu tama sina oi kamonai henia be namo, unai ita karaia be mai ena badina namona. Mani ena badina ita tahua.

Oiemu mauri lagani be hida?— Oiemu tamana ena mauri lagani oi diba, a?— Oiemu sinana eiava tubuna hahine eiava tubuna tau edia mauri lagani be hida?— Idia be tanobada dekenai idia noho daudau. Bona ta be nega daudau ia noho neganai, nega bada ia noho gau momo ia dibaia totona. Gau momo ia kamonai bona gau momo ia itaia bona lagani ta ta ai gau momo ia karaia. Unai dainai matamata taudia be taunimanima badadia amo diba idia abia.

Oi murinai ia vara tauna ta oi diba, a?— Emu diba ese ena diba ia hereaia, a?— Dahaka dainai emu diba be bada?— Badina tanobada dekenai nega daudau oi noho vadaeni dainai, gau momo oi dibaia.

Oi, lau bona taunimanima ibounai amo daika be nega daudau ia noho?— Iehova Dirava. Gau momo ia diba, bona ena diba ese oi bona lau eda diba ia hereaia. Bema ita ia hamaoroa gau ta ita karaia totona, ita diba do ita karaia karana be maoro, ena be do ia auka. Hadibaia Tauna Badana be nega ta ia hekwarahi Dirava ia kamonai henia totona, unai oi diba, a?—

Nega ta Dirava ese Iesu ia hamaoroa kara auka hereana ta ia karaia totona. Iesu be unai ia gurigurilaia, inai laulau dekenai ita itaia bamona. Ia guriguri: “Oiemu lalona bema ia hegeregere, inai kapusi be lau dekena amo do oi kokia.” Iesu be unai guriguri amo ia hahedinaraia, nega haida do ia auka Dirava ena ura ita karaia totona. To Iesu ena guriguri be edena bamona ia hadokoa? Oi diba, a?—

Iesu ese ena guriguri be inai bamona ia hadokoa, ia gwau: “Lauegu ura lasi, oiemu ura sibona.” (Luka 22:​41, 42) Oibe, ia ura Dirava ena ura ia karaia to ia sibona ena ura lasi. Bona Dirava ia ura do ia karaia gauna ia karaia, to ia laloa gauna ia karaia lasi.

Unai amo dahaka ita dibaia?— Ita dibaia gauna be, Dirava ia ura do ita karaia karana sibona ita karaia be maoro, ena be do ia auka. To gau ma ta ita dibaia danu. Oi diba unai gauna be dahaka?— Ita dibaia gauna ma ta be, Dirava bona Iesu be tau tamona lasi, taunimanima haida idia hereva bamona. Iehova be nega daudau ia noho bona ena diba ese iena Natuna, Iesu ena diba ia hereaia.

Dirava ita kamonai henia neganai, ita hahedinaraia ia ita lalokau henia. Baibel ia gwau: “Dirava ita lalokau henia ena anina be inai: Dirava ena taravatu do ita badinaia.” (1 Ioane 5:3) Unai dainai, ita ibounai ese Dirava ita kamonai henia be gau badana. Oi ura Dirava oi kamonai henia, ani?—

Mani iseda Baibel ita abia bona Dirava ena ura natudia dekenai ita itaia. Baibel amo Efeso karoa 6, siri 1, 2, bona 3 do ita duahia. Ia gwau: “Memero bona kekeni e, umui emui tamana bona sinana do umui kamonai henia. Kara maorona be unai. ‘Emui tamana bona sinana do umui matauraia.’ Inai be Buka Helaga ena Taravatu mai ena gwauhamata ginigunana. Badina be inai bamona umui karaia neganai, gwauhamata be inai: ‘Mauri namona do umui abia, bona emui mauri do ia daudau tanobada dekenai.’ ”

Unai dainai oi itaia, Iehova Dirava be umui ia hamaoroa noho emui tamana bona sinana do umui kamonai henia totona. Bona Dirava ia gwauhamata bema emui tama sina umui kamonai henia, “mauri namona do umui abia.”

Kamonai karana dainai idia roho mauri taudia haida edia sivarai lau ura oi dekenai lau gwauraia. Unai taudia be idaunegai Ierusalema ena hanua badana dekenai idia noho. Idia momo be Dirava idia kamonai henia lasi, unai dainai Iesu ese idia ia hadibaia Dirava ese edia hanua do ia hadikaia ore. Danu, Iesu be idia ia hamaoroa idia roho mauri diba bema kara namo idia ura henia. Ia gwau: ‘Tuari orea ese Ierusalema do idia koua hagegea do umui itaia neganai, do umui diba, iena dokona ia kahirakahira vadaeni. Unai neganai Ierusalema do umui rakatania bona ororo dekenai do umui heau lao.’—Luka 21:​20-22.

Oibe, Iesu ena hereva hegeregerena, tuari orea idia mai Ierusalema tuari henia totona. Roma ena tuari taudia ese unai hanua idia koua hagegea. Bena, badina ma ta dainai unai tuari taudia ese hanua idia rakatania. Taunimanima momo idia laloa dika ia ore. Unai dainai hanua dekenai idia noho. To Iesu ia gwau dahaka do idia karaia be namo?— Bema oi be unai negai Ierusalema dekenai oi noho, dahaka do oi karaia?— Iesu idia abidadama henia momokani taudia be edia ruma idia rakatania bona Ierusalema amo ia daudau herea ororodia dekenai idia heau lao.

Lagani ta lalonai, Ierusalema dekenai gau ta ia vara lasi. Lagani iharuana ai, gau ta ia vara lasi. Bona lagani ihatoina ai, gau ta ia vara lasi. Reana taunimanima haida idia laloa hanua idia rakatania taudia be idia kavakava. To lagani namba 4 ai, Roma tuari taudia idia giroa. Bona Ierusalema hanua idia hagegea lou. Hari idia be dala lasi idia heau mauri totona. Unai nega ai tuari oreana ese hanua idia hadikaia. Unai hanua lalonai idia noho taudia momo idia mase, bona oredia be dibura taudia bamona idia abidia lao.

To Iesu idia kamonai henia taudia dekenai dahaka ia vara?— Idia roho mauri. Idia be Ierusalema amo daudau herea idia noho. Unai dainai dika ta idia davaria lasi. Kamonai karana ese idia ia gimaia.

Bema kamonai karana oi hahedinaraia, unai ese oi do ia gimaia danu, a?— Reana emu tama sina ese oi idia hamaoroa dala dekenai oi gadara lasi. Dahaka dainai unai bamona idia hereva?— Unai bamona idia hereva badina motuka ta ese oi ia bampaia garina. To reana dina ta oi laloa: ‘Hari motuka be lasi. Dika ta do lau davaria lasi. Lau itaia natudia ma haida be dala dekenai idia gadara, to dika ta idia davaria lasi.’

Ierusalema dekenai idia noho taudia momo be unai bamona idia laloa. Roma tuari oreana be gabu idia rakatania murinai, toana be dika ta do ia vara lasi. Ma haida be hanua dekenai idia noho. Unai dainai idia noho danu. Hadibaia herevana idia abia, to idia kamonai lasi. Unai dainai edia mauri idia haboioa.

Mani haheitalai ma ta ita laloa. Nega ta masisi oi gadaralaia, a?— Masisi ta oi kisia neganai, reana ena lahi oi raraia be moale gauna. To masisi gadaralaia karana ese dika bada ia havaraia diba. Ruma ibounai be lahi ese ia araia ore bona oi mase diba!

Laloaboio lasi, nega ta ta sibona oi kamonai be hegeregere lasi. To bema hanaihanai hereva oi kamonai, unai ese oi do ia gimaia momokani. Bona daika ese umui ia hamaoroa, “memero bona kekeni e, umui emui tamana bona sinana do umui kamonai henia,” a?— Ia be Dirava. Bona laloatao, unai bamona ia hereva badina umui ia lalokau henia.