Oi be Dirava Idia Lalokau Henia Taudia Huanai Oi Noho, A?

“Lauegu taravatu ia abia dae bona ia badinaia tauna, inai tau ese lau ia lalokau henia. Lau ia lalokau henia tauna, be lauegu Tamana ese ia do ia lalokau henia.”​​—⁠IOANE 14:⁠21.

1, 2. (a) Iehova be edena dala ai ia hahedinaraia taunimanima ia lalokau henia? (b) Nisan 14, 33 C.E. ena hanuaboina ai, Iesu ese dahaka ia hamatamaia?

IEHOVA be ia havaraia taudia ia lalokau henia. Momokani, taunimanima ibounai ia lalokau henia bada dainai ‘iena Natuna tamona sibona ia henia ita dekenai, do idia abidadama henia taudia ibounai be do idia mase lasi, to mauri hanaihanai do idia abia.’ (Ioane 3:16) Keriso ena mase dinana laloatao hebouna, Memorial, be kahirakahira dainai, Keristani taudia momokanidia idia laloa noho gauna be Iehova ese ‘ita ia lalokau henia, bona ia ese iena Natuna ia siaia, ia sibona be iseda dika gwauatao dalana totona.’​​—⁠1 Ioane 4:⁠10.

² Nisan 14, 33 C.E. ena hanuaboi ai, Iesu bona ena aposetolo taudia 12 be atai daiutuna Ierusalema dekenai idia hebou, Israela taudia be Aigupito idia rakatania negana ena aria, Pasova, idia karaia totona. (Mataio 26:​17-20) Unai Iuda aria idia karaia murinai, Iesu ese Iuda Iskariote ia siaia lao bena Keristani taudia edia Memorial, Keriso ena mase laloatao anibouna, ia hamatamaia.a Iesu be hatubua lasi paraoa bona uaina kakakaka ia gaukaralaia ena tauanina bona iena rara laulaulaia totona, bona idia do noho aposetolo taudia 11 be unai idia ania bona inua hebou. Iesu ena karaia dalana ena kahana idauidau be Evanelia bukadia ginigunadia toi, Mataio, Mareko, bona Luka, bona aposetolo Paulo ena hereva lalonai ita davaria, bona Paulo ia gwau ia be “Lohiabada ena Anibou.”​​—⁠1 Korinto 11:20; Mataio 26:​26-28; Mareko 14:​22-25; Luka 22:​19, 20.

 3. Aposetolo Ioane ese atai daiutuna lalonai Iesu ena hora ginigabedia iena hahediba taudia ida ia herevalaia neganai, ena sivarai be edena mai anina bada daladia ai ia be ma haida amo ia idau?

³ Aposetolo Ioane ese paraoa bona uaina henia karana ia kikilaia lasi, reana ena Evanelia sivaraina ia torea neganai (lagani 98 C.E. bamona ai), Keristani taudia ginigunadia ese unai kara idia manadalaia vadaeni dainai. (1 Korinto 11:​23-26) To lauma helaga ena siahu amo Ioane sibona ese inai mai anina herevadia ia torea; Iesu ese ena mase laloatao Memorial ia do hamatamaia lasi bena ia hamatamaia murinai ia karaia karadia bona herevadia ia herevalaia. Ioane ena Evanelia bukana ena karoa 5 lalodiai unai hereva idauidau ia kikilaia. Idia hahedinaraia goevagoeva Dirava be edena bamona taudia ia lalokau henia. Namona be Ioane karoa 13 ia lao 17 ita itaia.

Iesu Ena Lalokau Hereadaena amo Diba Oi Abia

 4. (a) Iesu be ena hahediba taudia ida Memorial hebouna ia hamatamaia sivaraina lalonai, Ioane be edena dala ai iena sinado badana ia hahedinaraia goevagoeva? (b) Iehova be Iesu ia lalokau henia ena badina badana ta be dahaka?

⁴ Unai karoa lalodiai, Iesu be ia murinai idia raka taudia dekenai ia henia bamahuta sisiba ia noho, bona edia sinado badana be lalokau. Momokani, unai karoa lalodiai “lalokau” be nega 30 mai kahana idia herevalaia. Iesu ena lalokau bada iena Tamana, Iehova, bona iena hahediba taudia dekenai be unai karoa lalodiai ia hahedinaraia goevagoeva. Iesu ena lalokau Iehova dekenai be ena mauri ena sivarai Evanelia bukadia ibounai lalonai ita itaia diba, to Ioane sibona ese Iesu ena hereva ta ia torea, ia gwau: “Tamana lau lalokau henia.” (Ioane 14:31) Iesu ma ia gwau, Iehova ese Iesu ia lalokau henia, bona ena badina ia gwauraia hedinarai. Ia gwau: “Egu Tamana ese lau ia lalokau henia hegeregerena, lau danu umui lau lalokau henia. Egu lalokau dekenai do umui noho hanaihanai. Bema umui ese lauegu taravatu do umui badinaia, vadaeni egu lalokau dekenai do umui noho, lau hegeregerena, egu Tamana ena taravatu lau badinaia, vadaeni iena lalokau dekenai lau noho.” (Ioane 15:​9, 10) Oibe, Iehova ese ena Natuna ia lalokau henia iena kamonai henia karana dainai. Iesu Keriso murinai idia raka taudia ibounai dekenai unai be haheitalai namona!

 5. Iesu be edena dala ai iena lalokau ena hahediba taudia totona ia hahedinaraia?

⁵ Ioane bukana lalonai, Iesu be ena aposetolo taudia ida ia noho negana ginigabena ia gwauraia herevadia ginigunadia ai, Iesu ena lalokau badana ia murinai idia raka taudia dekenai ia hahedinaraia. Ioane ia gwau: “Pasova aria ena dina be ia kahirakahira, vadaeni Iesu ia diba inai tanobada do ia rakatania, iena Tamana dekenai do ia lao negana ia ginidae vadaeni. Inai tanobada dekenai, sibona ena lalokau taudia dekenai ia lalokau henidia, ia lao bona dokona.” (Ioane 13:⁠1) Unai mai anina hanuaboina ai, ma haida hesiai henia mai lalokau ida ia haheitalaia, do idia laloaboio lasi karana amo. Edia aena ia huria. Namona be idia ta ta idia ura unai idia karaia Iesu bona edia tadikaka dekenai, to idia karaia lasi. Iesu ese unai manau karana ia karaia bena ena hahediba taudia dekenai ia gwau: “Lau inai umui emui Lohiabada bona hadibaia tauna, to emui aena lau huria, umui danu ta ta emui aena do umui huria be namo. Badina be dala lau hedinaraia vadaeni umui dekenai, vadaeni umui ese danu lau karaia bamona do umui karaia.” (Ioane 13:​14, 15) Namona be Keristani taudia momokanidia be mai edia ura bona moale ida edia tadikaka idia hesiai henia.​—⁠Mataio 20:​26, 27; Ioane 13:⁠17.

Taravatu Matamatana Badinaia

6, 7. (a) Ioane be Memorial hebouna hamatamaia negana ia herevalaia neganai, edena mai anina herevana ia sibona ia gwauraia? (b) Iesu ese edena taravatu matamatana ia henia iena hahediba taudia dekenai, bona dahaka dainai ia matamata?

⁶ Ioane ena sivarai be Nisan 14 ena hanuaboina dekenai, atai daiutuna lalonai idia vara gaudia ia herevalaia neganai, ia sibona ia hahedinaraia Iuda Iskariote be idia ia rakatania. (Ioane 13:​21-30) Evanelia sivaraidia ma haida ita hahegeregerea neganai, idia hahedinaraia Iesu do ia hadikaia tauna ia lao, bena unai murinai Iesu ese Iena mase ena Memorial hebouna ia hamatamaia. Ia ese nega daudau lalonai ena abidadama aposetolo taudia ia hereva henia, do ia lao dainai idia dekenai sisiba bona hadibaia herevadia ia henia. Memorial dekenai ita lao totona ita hegaegae neganai, namona be ita ura dikadika unai nega ai Iesu ia herevalaia gaudia ita diba, badina ita ura Dirava ia lalokau henia taudia huanai ita noho.

⁷ Iesu ese ena mase ena Memorial hebouna ia hamatamaia murinai, ena hahediba taudia dekenai ia henia hadibaia herevana ginigunana be gau matamatana. Ia gwau: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:​34, 35) Dahaka dainai unai hahegani be matamata? Unai hanuaboi ai, Iesu ese ena hereva ena anina ia hahedinaraia goevagoeva, ia gwau: “Lauegu taravatu be inai, umui ta ta umui lalokau henia, lau ese umui lau lalokau henia hegeregerena. Lalokau namo herea momokani be inai, tau ta ese ena mauri do ia atoa diho, iena turana totona.” (Ioane 15:​12, 13) Mose ena Taravatu ese Israela taudia ia hagania ‘badibadinai tauna idia lalokau henia idia sibona idia lalokau henia hegeregerena.’ (Levitiko 19:18) To Iesu ena hahegani be unai sibona lasi. Keristani taudia idia lalokau heheni Keriso ese idia ia lalokau henia hegeregerena, do idia gini hegaegae edia mauri idia atoa diho edia tadikaka totona.

 8. (a) Sibona eda ura dadaraia lalokauna ena anina be dahaka? (b) Hari, Iehova ena Witnes taudia be edena dala ai sibodia edia ura dadaraia karana idia hahedinaraia?

⁸ Memorial negana be nega maorona iseda kara bona kongregesen ena kara tahua totona, bona do ita itaia bema Keristani momokani ena maka ta​​—⁠Keriso bamona lalokau​​—⁠ia noho eiava. Reana nega haida, Keristani tauna ese sibona ena ura dadaraia lalokauna ia hahedinaraia totona, ena inai taudia dekenai tadikaka edia ladana do ia hahedinaraia lasi, herevana ena mauri ia haboioa diba. To nega momo unai lalokau hahedinaraia dalana be iseda ura gaudia ita tahua guna lasi, to ita ura iseda tadikaka bona ma haida ita durua bona hesiai henia. Unai dala dekenai, aposetolo Paulo be haheitalai namona. (2 Korinto 12:15; Filipi 2:17) Tanobada ibounai dekenai, taunimanima idia diba Iehova ena Witnes be sibodia edia ura dadaraia taudia, edia tadikaka bona dekena taudia idia durua, bona idia hekwarahi Baibel ena hereva momokani be taunimanima ma haida dekenai idia herevalaia.b​—⁠Galatia 6:⁠10.

Ita Laloa Bada Hetura Karadia

 9. Iseda hetura karana namona Dirava bona iena Natuna ida ia noho totona, mai moale ida dahaka ita karaia?

⁹ Iehova bona iena Natuna Keriso Iesu ese ita idia lalokau henia neganai, gau ma ta ese unai ia hereaia diba lasi. To unai lalokau ita abia bona mamia totona, namona be kara ta ita karaia. Iesu be iena hahediba taudia ida ia noho hanuaboi ginigabena dekenai ia gwau: “Lauegu taravatu ia abia dae bona ia badinaia tauna, inai tau ese lau ia lalokau henia. Lau ia lalokau henia tauna, be lauegu Tamana ese ia do ia lalokau henia, lau danu do lau lalokau henia, bona ia dekenai do lau hedinarai.” (Ioane 14:21) Iseda hetura karana Dirava ida bona iena Natuna ida ita laloa bada dainai, mai moale ida edia hahegani ita badinaia. Idia ta be taravatu matamatana, sibona edia ura dadaraia lalokauna ita hahedinaraia, bona Keriso ia toreisi lou murinai ia henia oda, ‘taunimanima ibounai dekenai do ita haroro’ bona sivarai namona idia abia dae taudia be hahediba taudia ita halaodia danu.​​—⁠Kara 10:42; Mataio 28:​19, 20.

10. Horoa taudia bona “mamoe idaudia” taudia ese daidia idia tura henia namonamo diba?

¹⁰ Gabeai unai hanuaboi ai, Iesu ese abidadama aposetolo tauna Iuda (Tadeo) ia henia henanadai ia haerelaia, ia gwau: “Lau ia lalokau henia tauna ese lauegu hereva do ia badinaia, vadaeni egu Tamana ese do ia lalokau henia, bona ai ruaosi be ia dekenai do ai lao, ia dekenai do ai noho.” (Ioane 14:​22, 23) Guba dekenai Keriso ida do idia lohia horoa Keristani taudia be tanobada dekenai idia do noho neganai danu, Iehova bona ena Natuna Iesu be edia turadia momokanidia. (Ioane 15:15; 16:27; 17:22; Heberu 3:1; 1 Ioane 3:​2, 24) To edia bamodia, “mamoe idaudia,” edia helaro be tanobada dekenai do idia noho ela bona hanaihanai, bona idia danu ese edia ‘naria tauna tamona,’ Iesu Keriso, bona edia Dirava, Iehova, ida hetura karana namona idia abia diba, bema idia kamonai henidia noho.​​—⁠Ioane 10:16; Salamo 15:​1-5; 25:⁠14.

“Umui be Tanobada Ena Lasi”

11. Iesu ese iena hahediba taudia dekenai edena hadibaia hereva ia henia?

¹¹ Iesu ia do mase lasi neganai, iena hebou ginigabena iena abidadama hahediba taudia ida, inai hadibaia herevana ia henia: Bema Dirava be tau ta ia lalokau henia, inai tanobada ese unai tau do ia inai henia. Ia gwau: “Tanobada taudia ese umui do idia badu henia, to umui diba vadaeni, idia ese lau dekenai idia badu henia guna vadaeni. Bema umui be tanobada ena taudia momokani neganai, tanobada taudia ese umui do idia lalokau henia. To umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia. Umui dekenai lau hamaoroa herevana do umui laloatao: Hesiai tauna ese iena biaguna ia hereaia lasi. Bema idia ese lau dekenai idia dagedage henia, umui dekenai danu do idia dagedage henia. Bema lauegu hereva idia badinaia, umui emui hereva danu do idia badinaia.”​​—⁠Ioane 15:​18-20.

12. (a) Dahaka dainai Iesu be iena hahediba taudia ia hamaoroa tanobada ese idia do ia inai henia? (b) Memorial negana ia mai kahirakahira lalonai, ita ibounai ese dahaka ita laloa be namo?

¹² Iesu ese unai hadibaia hereva ia henia badina ia ura unai aposetolo taudia 11 bona idia murinai do idia noho Keristani taudia momokanidia do idia lalo-manoka lasi bona tanobada ena inai henia karana dainai hereva momokani do idia rakatania lasi. Ma ia gwau: “Inai hereva lau gwauraia umui dekenai, emui abidadama do umui rakatania garina. Dubu dekena amo umui do idia lulua murimuri dekenai. Oibe, nega do ia mai, umui do ia alaia mase tauna be do ia laloa ia be Dirava ena hesiai gaukara ia karaia. Unai bamona do idia karaia, badina lauegu Tamana be idia diba lasi, bona idia diba lasi lau.” (Ioane 16:​1-3) Baibel diksenari ta ia gwau unai hereva “rakatania” ena anina be “tau ta ese ia abidadama henia bona kamonai henia be namo tauna ia abidadama henia lasi bona ia kamonai henia lasi; iena badinaia karana ia rakatania.” Memorial negana ia mai kahirakahira lalonai, namona be guna bona hari idia noho abidadama taudia edia mauri dalana ita laloa, bona hahetoho negadia ai edia haheitalai namona ita tohotohoa. Dagedage karana dainai, Iehova bona Iesu oi rakatania lasi, to emu lalona oi hadaia idia do oi abidadama henia bona kamonai henia noho.

13. Iesu be ena Tamana dekenai ia guriguri neganai, ia murinai idia raka taudia totona dahaka ia noia?

¹³ Iesu be Ierusalema ena atai daiutuna ia do rakatania lasi neganai, iena guriguri dokona lalonai iena Tamana dekenai ia gwau: “Oiemu hereva lau henia vadaeni idia dekenai, bona tanobada ese ia badu henia vadaeni idia dekenai, badina idia be tanobada ena lasi, lau hegeregerena, lau be tanobada ena lasi. Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria. Idia be tanobada ena lasi, lau hegeregerena, lau be tanobada ena lasi.” (Ioane 17:​14-16) Ita diba Iehova ese ia lalokau henia taudia ia gimaia bona ia hagoadaia, inai tanobada amo idia gini siri totona.​​—⁠Isaia 40:​29-31.

Tamana Bona Natuna Edia Lalokau Dekenai Oi Noho

14, 15. (a) Iesu ia gwau ia be dahaka bamona, to ia amo ia idau ‘vain bodaga’ be daika? (b) “Vain korikori” ena “rigi” be daidia?

¹⁴ Nisan 14 hanuaboina ai, Iesu be ena abidadama hahediba taudia ida idia herevahereva neganai, ia gwau ia be “vain korikori” bona abidadama lasi Israela taudia amo ia idau, idia be ‘vain bodaga.’ Ia gwau: “Lau be vain korikori, egu Tamana be vain edia uma gabu naria tauna.” (Ioane 15:⁠1) Lagani handred haida gunanai, peroveta tauna Ieremia ese Iehova ena hereva iena gwau-edeede taudia dekenai ia torea: “Vain namona bamona lau ese oi lau hadoa, . . . to oi be edena bamona oi vara dika? Oi be vain dikana, bodaga gauna, oi lao vadaeni.” (Ieremia 2:21) Bona peroveta tauna Hosea ia gwau: “Guna, Israela tano be rigi momo vain bamona, iena huahua momo ia atoa . . . Edia kudoudia be mai edia koikoi danu.”​—⁠Hosea 10:​1, 2.

¹⁵ Israela ese tomadiho momokani ena huahua idia havaraia lasi, to tomadiho momokani negea karana idia karaia bona sibodia edia huahua idia havaraia. Dina toi idia do noho ela bona Iesu ese ena abidadama hahediba taudia ida hebou ginigabena do idia abia, bena Iuda hakaua taudia koikoidia ia hamaoroa: “Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.” (Mataio 21:43) Unai bese matamatana be “Dirava ena Israela,” horoa Keristani taudia 144,000, bona idia be “vain korikorina” Keriso Iesu ena “rigi.”​—⁠Galatia 6:16; Ioane 15:5; Apokalupo 14:​1, 3.

16. Iesu ese abidadama aposetolo taudia 11 ia hagoadaia dahaka idia karaia totona, bona hari inai nega dokona ai, abidadama orena taudia ese dahaka idia karaia?

¹⁶ Iesu ida unai atai daiutuna dekenai idia noho aposetolo taudia 11 ia hamaoroa: “Lauegu rigi ibounai bema huahua idia atoa lasi, be egu Tamana ese ia kokia. Mai huahua rigi ibounai be ia ese ia utua kwadogi, do idia goeva, bona huahua momo do idia atoa totona. Lauegu lalona dekenai do umui noho, lau danu umui emui lalona dekenai do lau noho. Rigi be sibona huahua do ia atoa lasi, to bema vain auna do ia badinaia, be huahua do ia atoa. Vadaeni unai bamona bema umui badinaia lasi lau dekenai, umui emui huahua do ia atoa lasi.” (Ioane 15:​2, 4) Hari inai negai, Iehova ena taunimanima edia histori ia hahedinaraia, abidadama horoa Keristani taudia oredia ese edia Kwarana, Keriso Iesu, idia badinaia noho. (Efeso 5:23) Hagoevaia karana bona rigi utu karana idia abia dae. (Malaki 3:​2, 3) Lagani 1919 amo, Basileia ena huahua momo idia havaraia; guna horoa Keristani taudia ma haida, bena 1935 amo, edia bamodia, ia bada ia lao ‘hutuma badana.’​—⁠Apokalupo 7:9; Isaia 60:​4, 8-11.

17, 18. (a) Edena hereva, Iesu ena, ese horoa taudia bona mamoe taudia idia durua Iehova ena lalokau dekenai idia noho totona? (b) Memorial hebouna ita lao henia neganai, edena dala ai ita ia durua?

¹⁷ Horoa Keristani taudia ibounai bona edia bamodia dekenai, Iesu ena hereva ma haida be mai anina: “Bema huahua momo do umui atoa neganai, egu Tamana be taunimanima ese do idia hanamoa. Unai dekena amo lauegu diba tahua taudia korikori do umui lao. Egu Tamana ese lau ia lalokau henia hegeregerena, lau danu umui lau lalokau henia. Egu lalokau dekenai do umui noho hanaihanai. Bema umui ese lauegu taravatu do umui badinaia, vadaeni egu lalokau dekenai do umui noho, lau hegeregerena, egu Tamana ena taravatu lau badinaia, vadaeni iena lalokau dekenai lau noho.”​—⁠Ioane 15:​8-10.

¹⁸ Ita ibounai ita ura Dirava ena lalokau dekenai ita noho, bona unai ese ita ia hagoadaia huahua havaraia Keristani taudia ai ita lao. Hanaihanai dala ita tahua “Basileia ena Sivarai Namona” ita harorolaia totona. (Mataio 24:14) Ita hekwarahi bada danu iseda mauri lalonai lauma ena huahua ita havaraia. (Galatia 5:​22, 23) Keriso ena mase ena Memorial hebouna dekenai ita lao ese ita do ia durua unai ita karaia totona, badina Dirava bona Keriso edia lalokau bada ita dekenai do ita laloatao.​—⁠2 Korinto 5:​14, 15.

19. Edena durua gauna ma ta be hereva gabena lalonai do ita kikilaia?

¹⁹ Iesu be Memorial hebouna ia hamatamaia murinai, ia gwauhamata iena Tamana ese ia murinai idia raka abidadama taudia dekenai ‘durua tauna, lauma helaga’ do ia siaia. (Ioane 14:26) Hereva gabena lalonai, edena dala ai unai lauma ese horoa taudia bona mamoe idaudia taudia ia durua, Iehova ena lalokau dekenai idia noho totona, do ita tahua.

[Footnotes]

Riviu Henanadai

• Iesu ese edena hesiai gaukara mai lalokauna ia karaia iena hahediba taudia ia hadibaia totona?

• Memorial negana ai, sibona dekenai dahaka ita tahua be maoro?

• Iesu ia gwau inai tanobada ese ita do ia inai henia bona dagedage henia, to dahaka dainai unai ese ita do ia hamorua lasi?

• “Vain korikorina” be daika? “Rigi” be daidia? Bona dahaka idia karaia be namo?

[Picture on page 15]

Iesu be iena aposetolo taudia dekenai, do idia laloaboio diba lasi dalanai, hesiai gaukara mai lalokauna ia hadibaia

[Pictures on page 16, 17]

Keriso ena hahediba taudia ese ena hahegani idia kamonai henia bona sibodia edia ura dadaraia lalokauna idia hahedinaraia