Tadikaka Taihu Ita Matauraia

“Namona be emui abidadama tamona taudia do umui hebogahisi henia bona lalokau henia, tadikaka idia lalokau heheni bamona. Bona umui ta ta dekenai hemataurai hahedinaraia karana do umui gunalaia.”​—⁠ROMA 12:​10, NW.

1, 2. (a) Paulo ese Roma taudia dekenai ia torea revarevana lalonai dahaka sisiba ia henia? (b) Edena henanadai haida do ita laloa?

APOSETOLO Paulo ena revareva Roma taudia dekenai ese ia hahedinaraia kongrigeisen lalonai lalokau ita hahedinaraia be gau badana. Ita ia hadibaia namona be “lalokau koikoina” ita hahedinaraia lasi. Danu ia gwau, “tadikaka idia lalokau heheni” bona unai lalokau be kara amo do idia hahedinaraia.​—⁠Roma 12:​9, 10a, NW.

² Oibe, tadikaka ita lalokau henia anina be idia ita ura henia sibona lasi. To kara haida amo ita hahedinaraia idia ita lalokau henia. Unai dainai, Paulo ma ia gwau: “Umui ta ta dekenai hemataurai hahedinaraia karana do umui gunalaia.” (Roma 12:10b, NW ) Hemataurai karana ita hahedinaraia ena anina be dahaka? Dahaka dainai tadikaka taihu ita matauraia be mai anina bada? Edena dala ai unai bamona ita karaia diba?

Hemataurai Karana Hahedinaraia

 3. Heberu bona Greek gado ai inai hereva “matauraia” ena anina be dahaka?

³ Heberu gado ai inai hereva “matauraia” ena anina be “metau.” Ta ita matauraia neganai, ita hahedinaraia ia be tau eiava hahine badana ta bamona ita laloa. Unai Heberu gado herevana be nega momo Baibel ai idia hahanaia neganai, “hairai” idia gaukaralaia, anina be ita matauraia tauna ita hanamoa. (Gen. 45:​13, BHğ) Greek gado herevana Baibel ai idia hahanaia “matauraia” ese anina bada eiava dava bada gauna ia gwauraia. (Luka 14:​10, NW ) Oibe, ita matauraia taudia be dava bada gaudia bamona do ita laloa.

4, 5. Edena dala ai hemataurai ita hahedinaraia? Haheitalai gwauraia.

⁴ Edena dala ai hemataurai ita hahedinaraia? Iseda hereva amo tadikaka taihu ita matauraia sibona be hegeregere lasi. To idia ita laloa bada dainai ita kara namo henidia dalana amo hemataurai ita hahedinaraia.

⁵ Edena dala ai Keristani tauna be mai ena kudouna ibounai ida ena tadikaka ia matauraia? (3 Ioa. 9, 10) Tubutubu gauna ta be do ia tubu namonamo bona ia noho daudau bema tano namona ai oi hadoa. Unai hegeregerena, mai kudouna ibounai ida hemataurai ita hahedinaraia neganai, unai be hemataurai korikorina bona do ia noho daudau. To bema unai kara be kudouna amo ita hahedinaraia lasi, do ia noho daudau lasi. (Kara 5:1-5) Unai dainai, ita laloparara dahaka dainai Paulo be ma haida matauraia karana dekenai inai sisiba ia gwauraia: “Namona be emui lalokau be lalokau koikoina lasi.”​—⁠1 Petero 1:22 duahia.

“Dirava ese Iena Toana Bamona Ia Karaia Taudia” Matauraia

6, 7. Dahaka dainai ma haida ita matauraia be namo?

⁶ Ita be mai kudouna ibounai ida hemataurai karana ita hahedinaraia dainai, namona be Baibel ena hereva iseda tadikaka taihu ibounai matauraia karana dekenai ita badinaia. Unai ena badina rua mani ita itaia.

⁷ Taunimanima be “Dirava ese iena toana bamona ia karaia.” (Iam. 3:⁠9) Unai dainai, ita be Dirava ena kara namodia haida, hegeregere lalokau, aonega bona hahemaoro maoromaoro ita hahedinaraia. Iseda Havaraia Tauna amo ita abia gaudia ma haida ita laloa. Salamo torea tauna ia gwau: “Lohiabada e, . . . oiemu hairaina, be guba dekenai oi atoa vadaeni. . . . Oi ese taunimanima oi karaia, be aneru sibona ese sisina idia hereaia. Oi ese taunimanima dekenai, hairai bona mataurai oi henia.” (Sal. 8:​1, 4, 5; 104:⁠1)a Dirava ese taunimanima ibounai dekenai hairai bona matauraia ia henia. Unai dainai, ta ita matauraia neganai ita be taunimanima edia hairai korikorina ia henia Tauna, Iehova, ita abia dae. Bema badina haida dainai taunimanima ibounai ita matauraia, vadaeni iseda tadikaka taihu ita matauraia bada be namo!​—⁠Ioa. 3:16; Gal. 6:⁠10.

Ruma Bese Tamona

8, 9. Dahaka dainai Paulo ia gwau iseda tadikaka taihu ita matauraia?

⁸ Ma haida ita matauraia ena badina ma ta be Paulo ese ia gwauraia. To, unai ia do gwauraia lasi neganai, ia gwau: “Namona be emui abidadama tamona taudia do umui hebogahisi henia bona lalokau henia, tadikaka idia lalokau heheni bamona.” Greek herevana idia hahanaia “hebogahisi henia bona lalokau henia” ese ruma bese lalonai lalotamona ia havaraia lalokauna ia herevalaia. Unai dainai, Paulo be unai hereva amo ia hahedinaraia kongrigeisen lalonai tadikaka taihu idia hetura heheni bona ruma bese ta bamona mai lalotamona ida idia gaukara hebou. (Roma 12:⁠5) Danu, Paulo ese unai hereva be horoa Keristani taudia dekenai ia gwauraia, idia be Iehova ena natuna ai idia lao. Unai dainai idia be ruma bese ta bamona. Unai badina badana dainai Paulo ena negai idia noho horoa Keristani taudia idia hemataurai heheni. Hari inai negai idia noho horoa taudia danu be unai bamona idia karaia.

⁹ To “mamoe idaudia” be edena bamona? (Ioa. 10:16) Ena be idia be unai horoa oreana lalonai idia noho lasi, to tanobada hegegemadai idia be Keristani ruma bese tamona dainai ta ta idia gwauraia tadikaka bona taihu. (1 Pet. 2:17; 5:⁠9) Bema mamoe idaudia be ta ta dekenai “tadikaka” o “taihu” idia gwauraia ena badina idia lalopararalaia, vadaeni mai kudouna ibounai ida edia tadikaka taihu idia matauraia be namo.​—⁠1 Petero 3:8 duahia.

Hemataurai Karana Hahedinaraia Ena Badina

10, 11. Dahaka dainai hemataurai karana ita hahedinaraia be mai anina bada?

¹⁰ Dahaka dainai hemataurai karana ita hahedinaraia be mai anina bada? Ena badina be inai: Iseda tadikaka taihu dekenai hemataurai karana ita hahedinaraia neganai, kongrigeisen lalonai lalotamona do ia noho.

¹¹ Oibe, ita be Keristani taudia dainai, ita diba Iehova tura henia karana bona lauma helaga ena heduru amo goada do ita abia. (Sal. 36:7; Ioa. 14:26) Danu, bema tadikaka taihu ese ita idia laloa bada, unai ese ita ia hagoadaia. (Aon. 25:11) Ta be mai hemataurai ida ita dekenai hereva ta ia gwauraia o kara ta ia karaia neganai ita moale, bona unai ese ita ia hagoadaia mauri dalana dekenai ita raka noho totona. Reana oi dekenai unai bamona ia vara.

12. Edena dala ai ita ta ta ese kongrigeisen ai lalotamona bona lalokau ita havaraia?

¹² Iehova ia diba iseda ura be ma haida ese ita do idia matauraia, unai dainai Baibel amo ita ia hagoadaia ‘ta ta dekenai hemataurai hahedinaraia karana do ita gunalaia.’ (Roma 12:​10, NW; Mataio 7:12 duahia.) Unai sisiba namona idia badinaia Keristani taudia be edia tadikaka huanai lalotamona bona lalokau idia havaraia. Unai dainai, sibona ita nanadaia, ‘Edena negai egu hereva o kara amo lau hahedinaraia lau be mai egu kudouna ibounai ida kongrigeisen ai tadikaka o taihu ta lau matauraia?’​—⁠Roma 13:⁠8.

Hemataurai Hahedinaraia Karana Ita Gunalaia

13. (a) Daika ese hemataurai hahedinaraia karana ia gunalaia? (b) Roma 1:7 ai Paulo ena hereva ese dahaka ia hahedinaraia?

¹³ Daika ese hemataurai hahedinaraia karana ia gunalaia? Paulo ese Heberu taudia dekenai ia torea revarevana ai elda taudia ia gwauraia “hakaua taudia.” (Heb. 13:17) Momokani, elda taudia be gaukara idauidau idia gunalaia. To, idia be mamoe naria taudia dainai, idia ese tadikaka taihu​—⁠elda taudia danu​—⁠idia matauraia be namo. Hegeregere, elda taudia be kongrigeisen ena lauma dalana naria totona idia hebou neganai, idia be elda taudia ma haida edia hereva idia kamonai namonamo, unai amo hemataurai karana idia hahedinaraia. Danu, abia hidi ta idia karaia neganai, ta ta edia lalohadai idia laloa bada amo hemataurai idia hahedinaraia. (Kara 15:​6-15) To, namona be ita laloatao, Paulo ena revareva Roma taudia dekenai be elda taudia ia herevalaia sibona lasi, to kongrigeisen taudia ibounai danu. (Roma 1:⁠7) Unai dainai, hari inai negai ita ibounai ese hemataurai hahedinaraia karana ita gunalaia be namo.

14. (a) Hemataurai ita hahedinaraia bona hemataurai hahedinaraia karana ita gunalaia ena idau haheitalaia. (b) Edena henanadai be sibona dekenai ita henia?

¹⁴ Danu, Paulo ena sisiba mani ita laloa. Ia ese Roma dekenai idia noho tadikaka ia hagoadaia, hemataurai do idia hahedinaraia sibona lasi, to hemataurai hahedinaraia karana do idia gunalaia. Ena idau be dahaka? Inai haheitalai oi laloa: Tisa ta ese duahiduahi idia diba stiuden haida ia hamaoroa duahiduahi idia dibaia totona, a? Lasi. Idia be duahiduahi idia diba vadaeni. To, tisa ia ura idia do ia durua edia duahiduahi karana idia hanamoa totona. Unai hegeregerena, ta ta ita lalokau henia karana ese ita ia durua hemataurai ita hahedinaraia totona, badina lalokau be Keristani taudia korikoridia edia toana ta. (Ioa. 13:35) To, duahiduahi idia diba stiuden taudia ese edia duahiduahi karana idia hanamoa hegeregerena, ita ese hemataurai hahedinaraia karana do ita gunalaia, bona unai kara ita habadaia noho. (1 Tes. 4:​9, 10) Hemataurai hahedinaraia karana be ita ta ta eda maduna. Namona be ita ta ta be sibona ita nanadaia, ‘Lau be egu kongrigeisen ai ma haida dekenai hemataurai karana lau hahedinaraia guna, a?’

“Ogogami Taudia” Matauraia

15, 16. (a) Kongrigeisen ai daidia ita matauraia be namo, bona dahaka dainai? (b) Dahaka ese ia hahedinaraia ita be mai kudouna ibounai ida eda tadikaka taihu ita matauraia?

¹⁵ Kongrigeisen ai daidia ita matauraia be namo? Baibel ia gwau: “Bema ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.” (Aon. 19:17) Edena dala ai unai siri ai idia noho herevadia ese ita ia durua hemataurai karana ita hahedinaraia totona?

¹⁶ Momokani, taunimanima momo be dagi bada taudia idia matauraia bona dagi bada lasi taudia idia matauraia lasi. To, Iehova be unai bamona lasi. Ia gwau: “Lau dekenai idia matauraia taudia be do lau matauraidia.” (1 Sam. 2:30; Sal. 113:​5-7) Iehova be ia idia hesiai henia bona matauraia taudia ibounai ia matauraia. Ia ese “ogogami taudia” ia dadaraia lasi. (Iobu 34:19 duahia; 2 Siv. 16:⁠9) Oibe, ita ura Iehova ita tohotohoa. Unai dainai, bema ita ura ma haida matauraia dalana ita diba, namona be sibona dekenai ita henanadai, ‘Kongrigeisen ai maduna idia huaia lasi taudia be edena bamona lau kara henia?’ (Ioa. 13:​14, 15) Unai henanadai ena haere ese ia hahedinaraia mai kudouna ibounai ida ma haida ita matauraia be namo.​—⁠Filipi 2:​3, 4 duahia.

Nega Ita Atoa

17. Edena dala ai kongrigeisen taudia ibounai dekenai hemataurai ita hahedinaraia, bona dahaka dainai?

¹⁷ Edena dala ai kongrigeisen taudia ibounai dekenai hemataurai ita hahedinaraia? Ma haida totona eda nega ita atoa. Dahaka dainai? Ita be Keristani taudia dainai, eda mauri lalonai ita bisi bada bona nega bada ita atoa kongrigeisen ena gaukara idauidau ita karaia totona. Unai dainai, ita dekenai nega be mai anina bada. Danu, namona be ita laloparara iseda tadikaka taihu ita doria lasi ita dekenai edia nega bada idia henia totona. Unai hegeregerena, ita moale bema kongrigeisen ai haida be idia laloparara dainai ita idia doria lasi idia dekenai eda nega bada ita henia totona.

18. Rau 18 ena laulau ese ia hahedinaraia bamona, edena dala ai mai eda ura ida eda tadikaka taihu totona nega ita atoa?

¹⁸ To danu, namona be ita bona elda taudia be inai ita diba: Iseda tadikaka taihu totona nega ita atoa karana amo ita hahedinaraia idia ita matauraia, herevana unai ese iseda gaukara idauidau ia koua. Edena dala ai? Ita karaia gaukaradia ita rakatania bona iseda tadikaka dekenai ita gwau diba, ‘Oi lau laloa bada dainai nega lau atoa oi ida ita herevahereva totona, gabeai egu gaukara do lau karaia lou.’ (Mar. 6:​30-34) To danu, bema ita karaia gaukaradia ita karaia noho bona eda tadikaka totona nega ita atoa lasi, reana do ia mamia ia ita laloa bada lasi. Oibe, ita laloparara ta be mai anina bada gaukarana ia karaia neganai, ena gaukara ita hadikaia lasi be namo. To, mai eda ura ida​—⁠o ita ura lasi​—⁠ma haida totona nega ita atoa karana amo ita hahedinaraia, ita be mai kudouna ibounai ida eda tadikaka taihu ita matauraia eiava lasi.​—⁠1 Kor. 10:⁠24.

Lalona Ita Hadaia Hemataurai Karana Ita Hahedinaraia Totona

19. Edena dala ma haida ai eda tadikaka taihu ita matauraia?

¹⁹ Dala badadia ma haida ai eda tadikaka taihu ita matauraia diba. Hegeregere, idia dekenai eda nega ita henia bona idia ita durua be namo. Iehova be haheitalai namona ia hahedinaraia. Salamo torea tauna Davida ia gwau: “Lohiabada ese kara maoromaoro taudia ia naria noho. Edia taitai be ia ese ia kamonai henia noho.” (Sal. 34:15) Iseda heduru idia noia tadikaka taihu edia hereva ita kamonai namonamo neganai, ita hahedinaraia ita be Iehova ita tohotohoa. Unai bamona ita karaia neganai, ita hahedinaraia idia ita matauraia.

20. Hemataurai karana ita hahedinaraia totona, edena hadibaia herevadia ita laloatao be namo?

²⁰ Inai stadi lalonai ita herevalaia bamona, mai kudouna ibounai ida eda tadikaka taihu ita matauraia ena badina ita laloatao be namo. Danu, ita ese taunimanima ibounai​—⁠ogogami taudia danu​—⁠dekenai hemataurai karana ita hahedinaraia guna be namo. Unai bamona ita karaia neganai, kongrigeisen lalonai lalokau bona lalotamona do ia noho. Unai dainai, namona be ita ta ta ese hemataurai ita hahedinaraia sibona lasi, to hemataurai hahedinaraia karana ita gunalaia. Emu lalona oi hadaia unai bamona oi karaia totona, a?

[Footnote]

Oi Laloatao, A?

• Ma haida ita matauraia ena anina be dahaka?

• Dahaka dainai iseda tadikaka taihu ita matauraia?

• Dahaka dainai ta ta ita matauraia be mai anina bada?

• Edena dala haida ai eda tadikaka taihu ita matauraia?

[Picture on page 18]

Edena dala ai tadikaka taihu ita matauraia?