Sibona Oi Noho Mamina Oi Halusia Diba

TA IA gwau diba lasi sibona ia noho hemami ena hisihisi ia diba lasi, ani? Gau idauidau dainai sibona ita noho mamina ita abia diba. To, idia headava lasi, edia adavadia idia mase, eiava edia headava idia hadokoa hahinedia be nega momo unai idia mamia momokani.

Hegeregere, Keristani hahine matamata ta, ladana Frances, ia gwau: “Egu mauri lagani be 23 neganai, lau itaia egu turadia ibounai idia headava vadaeni, bona lau sibona lau noho.”a Lagani momo idia lao bona idia adavaia diba taudia idia davaria lasi neganai, sibona ia noho mamina ia bada ia lao diba. Sandra, hari kahirakahira mauri lagani 50 ia abia hahinena, ia gwau: “Headava lasi lalohadaina lau abia lasi, bona bema dala ia kehoa, lau ura lau headava.” Angela, mauri lagani 50 ia hanaia hahinena, ia gwau: “Egu lalona lau hadaia lasi do lau headava lasi, to unai bamona ia vara. Spesel painia gaukarana lau karaia gabuna dekenai, headava lasi tadikaka haida sibona idia noho.”

Gau namona ta be, Keristani hahine momo be headava lasi maurina idia abia hidi badina Iehova ena sisiba, “Keristani tauna sibona do [idia] adavaia diba,” idia badinaia. (1 Korinto 7:​39) Haida be headava lasi maurina idia manadalaia, to ma haida idia davaria lagani haida murinai, headava bona natudia havaraia urana ia bada ia lao. Sandra ia gwau: “Lau be adavana lasi dainai hanaihanai egu hemami dekenai gau ta ia do namo lasi.”

Ma gau haida, hegeregere buruka tama sina naridia, ese sibona ia noho mamina ia habadaia diba. Sandra ia gwau: “Lau headava lasi dainai, egu ruma bese taudia idia laloa emai buruka tama sina do lau naridia. Ena be ai natudia ibounai be 6, to lagani 20 lalonai unai maduna badana lau huaia. Bema lau be mai egu adavana, lau do ia durua diba bona egu mauri do ia namo sisina.”

Frances be sibona ia noho mamina ia habadaia gauna ma ta ia herevalaia. Ia gwau: “Nega haida taunimanima be maoromaoro lau idia nanadaia, ‘Dahaka dainai oi headava lasi?’ Unai bamona hereva dainai lau laloa lau headava lasi be egu kerere. Kahirakahira lau lao henia headava aria ibounai dekenai, ta be lau dekenai lau ura henia lasi henanadai ia henia, ‘Edena negai do oi headava?’ Bona lau laloa, ‘Bema lauma gaudia idia laloa bada tadikaka be lau idia ura henia lasi, reana Keristani karadia lau hahedinaraia lasi, eiava egu toana be ia namo lasi.’ ”

Turana ta be lasi mamina bona ta sibona ia noho mamina be edena bamona idia hanaia diba? Ma haida be heduru idia henia diba, a?

Iehova Dekenai Tabekau

Salamo torea tauna be inai ane ia abia: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” (Salamo 55:22) Heberu gado herevana, idia hahanaia “laloa hekwarahi,” ena anina korikori be iseda mauri lalonai ita davaria “gaudia,” bona unai gaudia dainai ita abia maduna metauna bona lalo-hekwarahi mai ena hisihisi ia herevalaia. Iehova be haida bamona lasi, unai lalo-hekwarahi ibounai ia diba momokani bona unai ita haheaukalaia totona ita dekenai goada ia henia. Angela be Iehova Dirava dekenai ia tabekau bona unai ese ia durua sibona ia noho mamina ia hanaia totona. Ena ful-taim hesiai gaukarana ia herevalaia neganai, ia gwau: “Painia gaukarana lau matamaia neganai, lau bona lau ia bamoa painia ta be kongregesen ta amo ai noho daudau. Iehova dekenai ai tabekau momokani karana ai dibaia bona egu mauri ibounai lalonai unai ese lau ia durua. Bema lalohadai dikadia lau abia, Iehova lau hereva henia bona lau ia durua. Salamo 23 be lau ia durua bada, bona nega momo lau duahia.”

Aposetolo Paulo be maduna metauna ta ia huaia. Nega toi bona reana nega ma haida, Lohiabada ia noia ena kopina ia gwadaia ginigini do ia kokia. Paulo be hoa dalanai heduru ia abia lasi, to gwauhamata ia abia Dirava ena hariharibada ese ia do ia hagoadaia. (2 Korinto 12:​7-9) Paulo ese lalona ena mamina namona davaria dalana ia dibaia danu. Gabeai, inai hereva ia torea: “Mauri mai lalo namo ena dalana lau davaria vadaeni. Unai dainai gabu ibounai, nega ibounai, lau boga kunu o lau hitolo, be lau laloa momo lasi. Bona lauegu gau be momo, o hegeregere lasi neganai, egu lalona ia namo noho. Keriso ese lau ia hasiahua, vadaeni gau ibounai lau goadalaia diba.”​​—⁠Filipi 4:​12, 13.

Bema ta ia lalo-manoka eiava sibona ia noho mamina ia abia neganai, edena dala ai Dirava ena goada ia abia diba? Paulo ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.” (Filipi 4:​6, 7) Sandra be inai sisiba ia badinaia. Ia gwau: “Lau headava lasi dainai, nega momo sibona lau noho. Unai dainai nega bada ia noho Iehova lau guriguri henia totona. Egu mamina be ia kahirakahira lau noho bona egu hekwakwanai bona moale ibounai be ia dekenai lau herevalaia diba.” Bona Frances ia gwau: “Hanaihanai lau hekwarahi egu lalohadai kereredia lau tuari henia totona. To mai momokani ida Iehova dekenai egu hemami lau herevalaia bona lau ia durua bada. Lau diba momokani Iehova be egu lalona ena hemami bona egu goada lauma dalanai ia laloa bada.”​​—⁠1 Timoteo 5:⁠5.

“Umui Ta Ta Dekenai Umui Durua Henia”

Keristani tadikaka oreana lalonai, maduna metau be ita sibona ita huaia lasi. Aposetolo Paulo ia gwau: “Umui ta ta dekenai umui durua henia, emui metau do umui huaia totona. Inai dala dekenai Keriso ena taravatu do umui badinaia.” (Galatia 6:⁠2) Iseda Keristani hebamo karana amo, “hereva namodia” ita abia neganai ita idia hagoadaia bona sibona ita noho mamina ena metau ia kokia diba.​​—⁠Aonega Herevadia 12:⁠25.

Baibel be Israela ena hahemaoro tauna Iepeta ena natuna kekeni ena sivarai ia gwauraia, mani ia oi laloa danu. Iepeta be Amono taudia ia do halusia lasi neganai, Iehova ia gwauhamata henia, ia hanamoa totona ia mai ruma bese tauna ginigunana be Iehova dekenai do ia henia. To, ena ruma amo ia mai guna tauna be ena natuna kekeni. (Gunalaia Tauna 11:​30, 31, 34-​36) Ena be unai kara ena anina be do ia headava lasi bona ruma bese havaraia lalohadaina do ia reaia, to mai ena ura ida Iefeta ena natuna kekeni be unai gwauhamata ia badinaia bona Silo dubu dekenai ena mauri ibounai lalonai hesiai gaukara ia karaia. Ia reaia gauna idia laloaboio, a? Lasi. “Lagani ta ta ibounai, Israela kekeni ese dina 4 lalonai, edia gabu idia rakatania, bona Iepeta, Gileada tauna, ena natuna kekeni totona idia taitai.” (Gunalaia Tauna 11:40) Oibe, hanamoa herevadia ese idia abia taudia idia hagoadaia diba. Unai dainai, hanamoa herevadia idia abia be namo taudia dekenai ita henia be maoro.

Iesu ena haheitalai ita laloa danu be namo. Ena be Iuda tatau edia kastom be hahine ida idia herevahereva lasi, to Iesu be Maria bona Mareta dekenai ena nega ia henia. Reana, idia be vabu eiava idia be headava lasi hahinedia. Iesu ia ura ena hetura karana amo do idia abia hahenamo lauma dalanai idia moalelaia. (Luka 10:​38-​42) Iesu ena haheitalai ita tohotohoa diba bema headava lasi taihu ita boiridia iseda hebamo negadiai ai, bona dala ita karaia idia danu haroro gaukara karaia hebou totona. (Roma 12:13) Unai bamona kara idia laloa bada, a? Taihu ta ia gwau: “Lau diba tadikaka be lau idia lalokau henia bona laloa bada, to dala idauidau ai egu namo idia tahua tadikaka lau tanikiu henia bada.”

Sandra ia gwau: “Tau bona natudia ai abia lasi dainai, Keristani ruma bese lalonai tadikaka bona taihu bamona ai noho, bona ai idia lalokau henia be namo.” Momokani, Iehova be unai bamona taudia ia naridia, bona idia ita laloa bada bona lalokau henia neganai, Iehova ida ita gaukara hebou diba. (1 Petero 5:​6, 7) Unai bamona laloa bada karana ia itaia, badina Baibel ia gwau “ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.”​​—⁠Aonega Herevadia 19:⁠17.

“Ta Ta Sibona Ena Metau Do Idia Huaia”

Ena be ma haida ese idia durua diba, bona edia heduru be ta ia hagoadaia diba, to “ibounai ta ta sibona ena metau, ena metau do idia huaia.” (Galatia 6:⁠5) Sibona ita noho mamina ena maduna ita huaia lalonai, namona be dika idia havaraia gaudia haida dekenai ita naria namonamo. Hegeregere, bema ma haida ida ita herevahereva lasi, sibona ita noho mamina ese ita do ia hamorua. To, lalokau amo sibona ita noho mamina ita halusia diba. (1 Korinto 13:​7, 8) Henia bona durua kara be moale davaria dala namona ta​​—⁠herevana iseda noho be edena bamona. (Kara 20:35) Gaukara goadagoada painia taihu ta ia gwau: “Lau dekenai nega bada ia noho lasi sibona lau laloa totona. Gau ta lau karaia bona lau bisi neganai, sibona lau noho mamina lau abia lasi.”

Danu, ita naria namonamo, unai mamina ese ita ia doria bona hebamo dikadia lalonai do ita vareai garina. Hegeregere, bema ita ura ita headava, bona unai ura ia goada dainai abidadama lasi tauna adavaia bona ia havaraia hekwakwanai momo bona Baibel ena sisiba unai bamona kara dekenai ita laloa lasi, madi, unai be dika! (2 Korinto 6:​14) Ena headava ia hadokoa Keristani hahine ta ia gwau: “Headava lasi ena hisihisi ia hanaia momokani gauna ta ia noho. Ia be tau kererena oi adavaia.”

Bema hari, hekwakwanai ta oi hamaoromaoroa diba lasi, oi haheaukalaia be namo. Dirava ena heduru amo ta be sibona ia noho mamina ia haheaukalaia diba. Iehova ena hesiai gaukarana ita karaia noho lalonai, namona be ita diba iseda ura gaudia ibounai be nega ta, dala namona ta ai do ia henia.​​—⁠Salamo 145:​16, NW.

[Footnote]

[Pictures on page 28]

Sibona ita noho mamina ita hanaia diba, bema henia bona durua karadia ita karaia