Baibel​—Dirava amo Ia Mai Bukana

1, 2. Edena dala ai Baibel be Dirava amo ia mai harihari gauna namona?

EMU lalokau turana ta amo harihari gauna namona ta oi abia negana ta oi laloatao diba, a? Reana, unai harihari gauna oi abia dainai oi moale bada. Badina unai harihari gauna ia henia tauna dekenai gau ta oi dibaia​—ia ese emui hetura karana ia laloa bada. Momokani, emu turana ese ia henia harihari gauna dainai ia oi tanikiu henia.

² Baibel be Dirava amo ia mai harihari gauna ta, bona unai harihari gauna dainai ita moale bada diba. Inai buka be idau herea, ia hahedinaraia gaudia be ma buka ta amo ita davaria diba lasi. Hegeregere, guba ai idia noho hisiu momo herea, tanobada, bona tau bona hahine ginigunadia idia vara daladia be ita dekenai ia gwauraia. Baibel dekenai idia noho hakaua hereva namodia ese ita idia durua mauri ena hekwakwanai bona lalohekwarahi ita haheaukalaia totona. Bona Dirava ese ena gwauhamata do ia hagugurua bona tanobada do ia hanamoa dalana ia gwauraia danu. Baibel be harihari gauna namo hereana!

 3. Iehova ese Baibel ia henia karana amo dahaka ita dibaia Ia dekenai, bona dahaka dainai unai ese iseda lalona ia hamoalea?

³ Danu, Baibel be lalona ia hamoalea harihari gauna ta, badina unai harihari gauna ia Henia Tauna, Iehova Dirava, dekenai gau ta ita dibaia. Unai bamona buka ia henia karana ese ia hamomokania ia ura ia do ita dibaia namonamo. Momokani, Baibel ese oi ia durua diba Iehova kahirakahira oi lao totona.

 4. Baibel hariharilaia karana dekenai, dahaka oi hoalaia?

⁴ Taunimanima momo be mai edia Baibel. Baibel ibounai eiava ena kahana, be gado 2,300 bamona ai idia hahanaia bona tanobada dekenai idia noho taudia 90 pesen bamona ese idia gaukaralaia. Pura ta ta iboudiai Baibel milioni mai kahana idia hariharilaia! Baibel ibounai eiava ena kahana bilioni momo idia halasia. Momokani, Baibel ese buka ibounai ia hereaia.

 5. Edena dala ai Baibel be “Dirava ena Lauma ese ia havaraia”?

⁵ Ma danu, Baibel be “Dirava ena Lauma ese ia havaraia.” (2 Timoteo 3:16) Edena dala ai? Baibel ia gwau: “Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.” (2 Petero 1:21) Haheitalai ta be inai: Bisinesi tauna ese ena seketere ia hamaoroa revareva ta ia torea totona. Unai revareva lalonai bisinesi tauna ena lalohadai bona hadibaia herevadia idia noho. Unai dainai unai revareva be iena, to seketere ena lasi. Unai hegeregerena, Baibel lalonai Dirava ena hereva idia noho, to toretore taudia edia lasi. Momokani, Baibel ibounai be “Dirava ena hereva.”​—1 Tesalonika 2:13.

6, 7. Baibel ena hereva ibounai be idia tamona, dahaka dainai unai be gau idauna ta?

⁶ Baibel be lagani 1,600 mai kahana lalonai idia torea. Baibel toretore taudia be nega idauidau ai idia noho bona mauri dala idauidau amo idia mai. Idia haida be biru taudia, haoda taudia, bona mamoe naria taudia. Ma haida be peroveta taudia, diadi bona king taudia. Evanelia toretore tauna Luka be doketa. Ena be Baibel idia torea taudia edia noho daladia be idauidau, to matamana amo ela bona dokona ena hereva be tamona.a

⁷ Baibel ena buka ginigunana ese ita dekenai taunimanima edia hekwakwanai ia matamaia dalana ia gwauraia. Bona buka ginigabena ese ia hahedinaraia, tanobada ibounai be paradaiso, eiava uma gabu ta ai do ia lao. Baibel ena kahana idauidau ese lagani tausen momo gunanai idia vara gaudia ia sivarailaia, bona Dirava ena ura do ia hagugurua karana ia gwauraia. Baibel ena hereva ibounai idia tamona be gau hereadaena, to unai ita hoalaia lasi badina ia be Dirava amo ia mai.

 8. Mani haheitalai haida amo oi hahedinaraia Baibel be saiens dalanai ia maoro.

⁸ Saiens dalanai Baibel ena hereva be maoro. Taunimanima ese gabeai idia dibaia gaudia be Baibel ese idaunegai ia herevalaia vadaeni. Hegeregere, Levitiko bukana ai idaunegai Israela taudia ese gorere taudia be hanua murimurinai idia atoa bona goeva karana dekenai hahegani idia abia neganai, idia badinai idia noho besedia be unai bamona gaudia idia diba lasi. Unai negai taunimanima ese tanobada ena toana dekenai lalohadai kereredia idia gwauraia, to Baibel ia gwau tanobada be ia kuboru. (Isaia 40:​22, BHğ) Baibel ia hereva maoro, tanobada be “gau lasi gabuna ena latanai.” (Iobu 26:7) Oibe, Baibel be saiens bukana ta lasi. To saiens gaudia ia herevalaia neganai, ena hereva be maoro. Badina ia be Dirava amo ia mai, ani?

 9. (a) Edena bamona ita diba Baibel ese ia gwauraia idaunegai sivaraidia be maoromaoro bona momokani? (b) Baibel toretore taudia idia kara momokani dainai, Baibel dekenai unai ese dahaka ia hahedinaraia?

⁹ Danu, Baibel ese ia gwauraia idaunegai sivaraidia be maoromaoro bona momokani. Idia vara momokani gaudia ia sivarailaia. Taunimanima edia ladadia sibona ia gwauraia lasi, to edia tubudia ia gwauraia danu.b Histori toretore taudia be nega momo edia bese edia lusi sivaraidia idia hunia, to Baibel toretore taudia be idia kara momokani, idia ese idia bona edia bese edia kerere idia torea danu. Hegeregere, Baibel bukana Numera lalonai, Mose ese ia karaia kerere badana bona ia abia sisibana ia gwauraia. (Numera 20:​2-12) Unai bamona kara momokani be nega momo idaunegai sivaraidia haida dekenai oi itaia lasi, to Baibel dekenai ita davaria badina ia be Dirava amo ia mai bukana.

10. Baibel be ita ia durua diba, dahaka dainai unai ita hoalaia lasi?

¹⁰ Baibel be Dirava ena lauma helaga ese ia havaraia dainai, ‘ita do ia hadibaia. Ia be mai ena siahu iseda kara dika do ia hedinaraia, iseda kerere do ia hamaoromaoroa.’ (2 Timoteo 3:16) Oibe, Baibel be ita ia durua diba. Ia gwauraia herevadia ese ita taunimanima eda kara korikori ia hahedinaraia. Unai ita hoalaia lasi, badina Baibel ia Torea Tauna, Iehova Dirava, be iseda Havaraia Tauna! Iseda lalohadai bona hemami ia diba namonamo, ita sibona be unai ita diba lasi. Danu, ita do idia hamoalea gaudia ia diba. Bona ita dadaraia be namo mauri dalana ia diba danu.

11, 12. (a) Iesu be ena Ororo Harorona ai dahaka ia herevalaia? (b) Baibel be edena gau ma haida ia herevalaia, bona dahaka dainai ena sisiba be ia noho hanaihanai?

¹¹ Iesu ese Mataio karoa 5 ia lao 7 dekenai ia henia herevana ladana, Ororo Harorona, mani oi laloa. Iesu ena haroro hereva namo hereana lalonai gau momo ia herevalaia, hegeregere, moale korikorina davaria dalana, hepapahuahu hamaoromaoroa dalana, guriguri dalana, bona tauanina gaudia laloa maoromaoro karana ia herevalaia. Iesu ese unai hereva ia gwauraia negana amo ema bona hari unai hereva be mai ena siahu.

¹² Baibel ena hakaua herevadia haida be ruma bese maurina, gaukara daladia, bona ma haida hetura henia karana dekenai. Baibel ena hakaua herevadia be taunimanima ibounai totona, bona hanaihanai ena sisiba ese namo ia havaraia. Baibel lalonai ia noho aonegana be Dirava ese peroveta tauna Isaia amo ia gwauraia: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho.”​—Isaia 48:17.

13. Iehova ese peroveta tauna Isaia ia hasiahua dahaka ia perovetalaia Babulonia hanua totona?

¹³ Baibel ena peroveta herevadia be momo herea, bona idia momo be idia guguru vadaeni. Haheitalai ta mani oi laloa. Iehova ese lagani 750 B.C.E. bamona ai ia noho peroveta tauna, Isaia amo, Babulonia hanuana do idia hadikaia ore negana ia perovetalaia. (Isaia 13:19; 14:​22, 23) Unai hanua do idia hadikaia dalana be Baibel ese ia gwauraia. Ia gwau tuari oreadia ese Babulonia ena sinavai do idia hakaukaua bona hanua lalonai idia vareai neganai do idia tuari lasi. Unai sibona lasi. Isaia ena peroveta herevana ese Babulonia do ia halusia tauna ena ladana ia gwauraia danu​​—Kurese.​​—Isaia 44:27–45:2.

14, 15. Isaia ese Babulonia totona ia gwauraia peroveta hereva haida be edena dala ai idia guguru?

¹⁴ Lagani 200 bamona murinai​—lagani 539 B.C.E. ena October 5/6 hanuaboina ai​—tuari oreana ta be Babulonia kahirakahira idia kamepa. Idia ia gunalaia tauna be daika? Parasa ena king ta ladana Kurese. Unai ese dala ia kehoa peroveta hereva idau hereana ia guguru totona. To idia perovetalaia hegeregerena, Kurese ena ami be Babulonia idia vareai neganai, do idia tuari lasi, a?

¹⁵ Unai hanuaboi ai, Babulonia taudia be aria ta idia karaia bona edia hanua ena magu be bada dainai idia laloa gau ta do ia vara lasi. To, Kurese be mai aonega ida hanua huanai ia aru lao sinavaina ena aru dalana ia haidaua. Daudau lasi ranu ia diho bona ena tatau be sinavai idia raka hanai diba bona hanua ena magu dekenai idia ginidae. To edena dala ai Kurese ena ami be Babulonia ena magu lalonai idia vareai? Unai hanuaboi ai, gima taudia ese hanua ena iduara idia koua lasi!

16. (a) Babulonia dekenai do ia vara gauna be Isaia ese edena bamona ia perovetalaia? (b) Edena dala ai Isaia ena peroveta herevana Babulonia hadikaia ore karana dekenai be ia guguru?

¹⁶ Babulonia be inai bamona idia perovetalaia: “Tau ta be Babulonia dekenai do ia noho lasi lou. Arabia tauna ta, be unuseni do ia kamepa lasi, bona mamoe naria tauna ta ese, iena mamoe do ia naria lasi unuseni.” (Isaia 13:20) Unai peroveta herevana ese hanua ena moru sibona ia herevalaia lasi. Ia hahedinaraia Babulonia be ta ese do ia noholaia lasi ela bona hanaihanai. Unai peroveta herevadia edia guguru dalana oi itaia diba. Idaunega Babulonia​—kilomita 80 bamona Baghdad, Iraq, ena saut kahana ai​—be taunimanima ese idia noholaia lasi, unai ese ia hamomokania Iehova ese Isaia amo ia gwauraia herevana ia guguru: “Lau ese Babulonia do lau daroa momokani, egu daroa gauna dekena amo. Inai be gau ibounai ia hadikaia ore ena daroa gauna.”​—Isaia 14:​22, 23.c

17. Edena dala ai Baibel ena peroveta herevadia idia guguru ese iseda abidadama ia hagoadaia?

¹⁷ Baibel dekenai idia noho peroveta hereva namodia ita laloa karana ese iseda abidadama ia hagoadaia, ani? Momokani, bema Iehova Dirava ese ena gwauhamata gunadia ia hamomokania, ita abia dae diba, tanobada paradaisona totona ia karaia gwauhamatana danu do ia hagugurua. (Numera 23:19) Oibe, “abidadama ese mauri hanaihanai ia havaraia noho. Inai mauri hanaihanai be tanobada ia do karaia lasi neganai, Dirava ese ia gwauhamatalaia, bona Dirava be koikoi diba lasi.”​—Tito 1:2.d

18. Keristani aposetolo Paulo be “Dirava ena hereva” dekenai dahaka hereva mai siahuna ia gwauraia?

¹⁸ Inai karoa dekenai ita herevalaia gaudia ese idia hahedinaraia goevagoeva Baibel be buka idau hereana. Ena hereva be tamona, saiens dalanai bona ia gwauraia idaunega sivaraidia be maoro, aonega ia henia, bona ena peroveta hereva idia guguru, to ia lalonai mai anina bada hereva ma haida danu idia noho. Keristani aposetolo Paulo ia gwau: “Dirava ena hereva be ia mauri noho, bona ia be mai ena siahu. Ia be mai ena matana momokani. Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.”​—Heberu 4:12.

19, 20. (a) Edena dala ai Baibel ese oi do ia durua diba, sibona oi tahua namonamo totona? (b) Edena bamona ita hahedinaraia Dirava amo ia mai harihari gauna idau hereana, Baibel, ita moalelaia?

¹⁹ Baibel dekenai Dirava ena “hereva” duahia karana ese iseda mauri ia haidaua diba. Ita do ia durua sibona ita tahua namonamo totona, guna bamona lasi. Reana ita gwau Dirava ita lalokau henia, to ena lauma amo ia torea Herevana, Baibel, ena hadibaia herevadia ita dibaia neganai, ita karaia gaudia ese iseda lalohadai korikorina do ia hahedinaraia.

²⁰ Momokani, Baibel be Dirava amo ia mai bukana. Unai buka ita duahia, stadilaia bona ura henia be namo. Iena hereva duahia hanaihanai karana amo oi hahedinaraia Dirava amo ia mai harihari gauna oi moalelaia. Unai bamona oi karaia neganai, Dirava ena ura taunimanima dekenai do oi lalopararalaia goevagoeva. Iena ura be dahaka bona ita dibaia dalana be karoa gabena dekenai do ita herevalaia.