Sibona Emu Hereva Amo

REANA oi gaukara goada emu hereva oi hegaegaelaia totona. Reana oi herevalaia gauna ese diba ia henia. Reana lalohadai oi hakapudia namonamo. Reana oi hereva namonamo diba. To bema kamonai taudia idia kamonai namonamo lasi​—oi gwauraia gaudia haida sibona idia kamonai badina gau ma haida idia laloa loulou​—emu hereva ese anina ia havaraia, a? Bema emu hereva idia laloa noho be auka, edia kudouna oi hamarerea diba, a?

Unai hekwakwanai ena badina be dahaka? Reana ena badina be tamona lasi. Nega momo, badina be hereva henia tauna be ia sibona ena hereva amo hereva ia henia lasi. Anina be, ena pepa ia itaia momo, eiava hereva henia dalana ta ia badinaia auka. To, unai hekwakwanai be hereva ia hegaegaelaia dalana dainai idia vara.

Bema emu hereva ibounai oi torea guna bena gabeai autlain ai oi halaoa toho, reana do oi davaria sibona emu hereva amo unai hereva oi henia be auka. Dahaka dainai? Badina do oi gwauraia hereva ta ta iboudiai oi palanilaia vadaeni. Ena be hereva oi henia neganai autlain oi gaukaralaia, to matamanai oi gaukaralaia herevadia do oi laloatao toho. Gau ta oi torea neganai, oi gaukaralaia herevadia bona sentens torea dalana be iseda dina ta ta hereva bamona lasi. Hereva oi henia dalana amo unai do ia hedinarai.

Do oi henia herevana ena hereva ta ta iboudiai oi torea lasi, to inai oi tohoa: (1) Sinado bona unai sinado oi herevalaia lalonai do oi gaukaralaia hereva badadia oi abia hidi. Hereva kwadogina lalonai, reana hereva badadia rua idia hegeregere. Hereva latana ai reana foa eiava faiv be namo. (2) Hereva badadia ta ta henunai, unai kahana oi herevalaia neganai do oi gaukaralaia siri badadia oi torea; emu haheitalai bona hamomokania herevadia oi torea danu. (3) Hamatamaia herevadia oi laloa. Reana sentens ta eiava rua oi torea. Danu, hereva dokona oi palanilaia be namo.

Hereva henia dalana oi hegaegaelaia be mai anina bada. To ena hereva ta ta iboudiai oi laloatao toho lasi. Sibona emu hereva amo hereva oi henia totona oi hegaegae neganai, hereva ta ta lasi to oi gwauraia lalohadai oi laloa namonamo. Namona be unai lalohadai oi lalodia loulou ela bona emu lalona ai lalohadai ta ia hedinarai murinai ma ta ia hedinarai haraga. Bema emu hereva oi hegaegaelaia namonamo, unai be auka lasi, bona hereva oi henia neganai, lalohadai do idia heau namonamo.

Ena Namo Oi Laloa. Sibona emu hereva amo hereva oi henia ena namo be taunimanima ese unai bamona manau dalana idia ura henia. Emu hereva do ia mauri bamona bona kamonai taudia idia ura kamonai.

Inai dala ai hereva oi henia neganai kamonai taudia oi itaia namonamo, bona unai dainai emu herevahereva dalana ia namo ia lao. Sentens ta ta edia hereva iboudiai be pepa amo oi duahia lasi dainai, kamonai taudia do idia itaia oi herevalaia gauna oi diba namonamo bona oi abia dae momokani. Unai dainai, inai dala ai hereva oi henia be herevahereva bamona bona kamonai taudia edia kudouna oi hamarerea diba.

Sibona emu hereva amo hereva oi henia neganai hereva oi haidaua diba. Unai oi karaia diba, badina hereva henia dalana tamona sibona oi abia hidi lasi. Mani oi laloa, reana emu hereva do oi henia dinana ai, idia halasia niusi badana dekenai do oi herevalaia gauna ia hedinarai. Unai do oi herevalaia be namo, ani? Eiava reana hereva oi henia neganai, oi itaia sikuli natudia momo idia noho. Ia namo bema emu haheitalai bona badinaia daladia oi haidaua sisina, bena do idia itaia oi herevalaia gauna be mai anina bada edia mauri dekenai!

Sibona emu hereva amo hereva oi henia ena namo ma ta be emu lalona ia gaukara namonamo. Kamonai taudia ese emu hereva idia laloa namonamo neganai, oiemu ura ia habadaia bena lalohadai haida oi herevalaia namonamo eiava nega oi atoa hereva haida oi gwauraia lou, edia anina oi hahedinaraia namonamo totona. Bema oi itaia kamonai taudia be emu hereva idia laloa namonamo lasi, unai hekwakwanai oi hanaia toho be namo, to idia be gau ma haida idia laloa noho lalonai idia dekenai oi hereva kava be anina lasi.

Ena Dika Oi Naria Namonamo. Namona be oi lalo-parara, sibona emu hereva amo hereva oi henia be mai ena dika danu. Dika ta be emu nega oi hanaia. Bema hereva oi henia lalonai lalohadai ma momo oi gwauraia, reana nega dainai do oi hekwarahi. Unai oi hanaia dalana ta be emu autlain dekenai, kahana ta ta be miniti hida do oi herevalaia oi torea. Bena unai sediual oi badinaia.

Ena dika ma ta be sibona emu diba oi laloa bada, bona idia manada hereva henia taudia dekenai unai ia vara haraga. Haida be taunimanima vairanai hereva henia dalana idia manadalaia dainai, reana idia davaria edia kahana ena nega idia gaukaralaia totona lalohadai haida idia haboua be auka lasi. To bema ita manau bona ita abia dae momokani ita ese Iehova, Hadibaia Tauna Hereadaena, ena hadibaia gaukarana ita karaia, do ita ura bada ita abia kahana iboudiai be mai guriguri ida ita hegaegaelaia namonamo.​—Isa. 30:20; Roma 12:​6-8.

Sibona edia hereva amo hereva idia henia dalana idia do manadalaia lasi taudia momo idia lalo-hekwarahilaia gauna ta be idia ura gwauraia gaudia do idia laloaboio. To namo lasi unai ese oi ia koua bena inai dala namona, hereva henia namonamo karana ia durua dalana, oi tohoa lasi. Oi hegaegae namonamo, bona Iehova ena lauma ena heduru dekenai oi tabekau.​—Ioa. 14:26.

Hereva henia taudia ma haida ese unai dala idia tohoa lasi badina idia ura hereva ta ta iboudiai idia gwauraia dalana ia goevadae. Momokani, sibona emu hereva amo hereva oi henia neganai reana sentens ena grama bona hereva edia heau dalana be maniuskrip herevana ena bamona lasi, to lalona veria herevahereva dalana ena namo ese unai ia hereaia. Taunimanima ese idia lalo-pararalaia haraga herevadia bona auka lasi sentens amo oi hahedinaraia lalohadai idia abia dae mai edia ura ida. Bema oi hegaegae namonamo, hereva oi gwauraia be auka lasi, hereva ta ta iboudiai oi laloatao dainai lasi, to badina lalohadai oi lalodia loulou. Bona bema dina ta ta ai herevahereva lalonai oi hereva namonamo, platfom amo oi hereva neganai ia auka lasi.

Oi Gaukaralaia Nouti. Bema oi tohoa loulou, gabeai emu autlain lalonai hereva badadia ta ta henunai hereva haida sibona oi torea. Unai, bona oi ura gaukaralaia siridia, be kadi ta eiava pepa ta dekenai oi torea diba do oi itaia haraga totona. Haroro gaukara totona, nega momo autlain kwadogina sibona oi laloatao toho. Bema lou henia totona hereva haida oi tahua, reana pepa maragina ta dekenai oi torea bona emu Baibel lalonai oi udaia. Reana Bible Ena Hereva Badadia buklet ena autlain ta oi gaukaralaia eiava Buka Helaga Herevalaia bukana amo oi hereva.

To, bema pura haida lalonai kongregesen heboudia ai kahana haida oi karaia bona pablik tok do oi henia danu, reana emu nouti oi habadaia sisina be namo. Dahaka dainai? Unai kahana ta ta oi do karaia lasi neganai idia oi laloa lou totona. Unai neganai danu, bema hereva oi henia neganai emu nouti oi itaia momo​—reana sentens ta ta oi gwauraia neganai idia oi itaia​—sibona emu hereva amo hereva oi henia dalana ena namo do oi haboioa. Bema emu nouti idia lata, idia oi makaia namonamo bena mai anina herevadia bona siri oi itaia haraga diba, unai gaudia be oiemu autlain bamona.

Ia manada hereva henia tauna ese nega momo sibona ena hereva amo ena hereva ia henia, to dala ma haida ida nega tamona ia gaukaralaia be namo danu. Hamatamaia herevana bona hereva dokona ia gwauraia lalonai, kamonai taudia ia itaia bona lalohadai mai edia siahu ia hahedinaraia be mai anina bada, unai dainai hereva namodia amo ia haboua sentens haida ia laloatao be namo. Idia vara gaudia, namba, ta ena hereva, eiava siri ia gwauraia neganai, ia duahia be namo bona unai amo namo bada do ia vara.

Henanadai Idia Henia Neganai. Nega haida ita abia dae gaudia idia henanadailaia bona haere totona ita hegaegae diba lasi. Reana haroro gaukara lalonai ita davaria tauna ta ese ia abia dae momokani lasi herevana ta ia henanadailaia. Bona varavara ida ita noho neganai, gaukara gabuna ai, eiava sikuli ai unai bamona ia vara diba. Reana gavamani ena ofesa taudia ese ita abia dae gaudia bona eda mauri dalana dainai idia henanadai. Baibel ia gwau: “Emui abidadama bona lalona namo totona umui idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.”​—1 Pet. 3:15.

Petero bona Ioane ese Iuda taudia edia Sanhedrin idia haere henia dalana mani oi itaia, Kara 4:​19, 20 dekenai ia noho. Sentens rua sibona amo, idia abia dae lalohadaina idia gwauraia. Kamonai taudia dekenai ia hegeregere dalanai idia haere​—idia hahedinaraia unai gauna be mai anina bada idia dekenai sibona lasi to unai kota taudia dekenai danu. Gabeai, Stefano idia samania koikoi, bona unai kota tamona vairanai idia abia lao. Kara 7:​2-​53 ai, ia hegaegaelaia lasi haerena mani oi duahia. Edena dala ai ena hereva ia gwauraia? Histori ena sivarai hegeregerena ia karaia. Nega maorona ai, Israela besena ena gwau-edeede karana ia herevalaia matamaia. Dokonai, ia hahedinaraia Sanhedrin taudia ese Dirava ena Natuna idia hamasea neganai, unai bamona kara idia hahedinaraia danu.

Oi abia dae gaudia idia henanadailaia bona haere oi hegaegaelaia diba lasi neganai, dahaka ese oi ia durua haere namona oi henia totona? Nehemia oi tohotohoa, King Aratasaseta ena henanadai ia do haere henia lasi neganai, ia guriguri guna. (Neh. 2:4) Murinai, emu lalona dekenai autlain oi karaia haraga. Reana inai be karaia dalana namona: (1) Haere lalonai do oi hahedinaraia hereva badadia ta eiava rua oi abia hidi (reana oi ura Buka Helaga Herevalaia bukana ena kahana haida oi gaukaralaia). (2) Unai hereva badadia hamomokania totona oi ura gaukaralaia siridia oi abia hidi. (3) Emu hereva ena hamatamaia herevadia namodia oi abia hidi, henanadai tauna ia ura kamonai totona. Bena oi hereva matamaia.

Oi lalo-hekwarahi neganai, do oi laloatao diba dahaka oi karaia be namo, a? Iesu ese ia murinai idia raka taudia ia hamaoroa: “Umui emui lalona do idia hekwarahi lasi, do umui gwauraia herevadia totona. Badina be unai neganai do umui gwauraia herevadia be Dirava ese do ia henia umui dekenai. Badina be gwauraia tauna be umui lasi, to umui emui Tamana ena Lauma be umui emui lalona dekenai do ia hereva.” (Mat. 10:​19, 20) Oi laloa lasi Keristani taudia ginigunadia idia abia “hereva mai aonega ena diba” be hoa dalanai do oi abia. (1 Kor. 12:8) To bema Iehova ese Keristani kongregesen lalonai ena hesiai taudia ia hadibaia dalana amo diba oi abia hanaihanai, gau haida do oi laloatao be namo neganai lauma helaga ese oi do ia durua.​—Isa. 50:4.

Ita daradara lasi, sibona emu hereva amo hereva oi henia neganai, namo ia vara. Bema kongregesen lalonai kahana haida oi karaia neganai unai dala ai oi karaia, oi hegaegaelaia lasi haere oi henia be auka lasi, badina idia ruaosi lalonai autlain karaia dalana be tamona. Oi gari lasi. Sibona emu hereva amo hereva oi henia neganai, haroro gaukara lalonai anina do oi havaraia. Bona bema kongregesen lalonai hereva oi henia diba, kamonai taudia do idia kamonai namonamo bona edia kudouna oi hamarerea.