“Lalokau ai Do Ita Raka Noho”

1-3. Lalokau hahedinaraia karana dekenai Iehova ita tohotohoa neganai, dahaka ia vara?

“HENIA kara ena moale be bada, to abia kara ena moale be maragi.” (Kara 20:35) Iesu ese unai hereva amo mai anina bada hereva momokanina ia hadibaia: Sibona ena namo tahua lasi lalokauna ese hahenamo ia mailaia. Ena be lalokau abia karana dekenai ita moale, to ita ese haida dekenai henia karana eiava lalokau ita hahedinaraia neganai ita moale bada.

² Iseda guba Tamana be unai ia diba momokani. Inai kahana ena karoa idauidau dekenai ita dibaia, Iehova sibona be lalokau ia hahedinaraia tauna hereadaena. Iehova ese kara badadia momo amo eiava nega daudau lalonai ita dekenai lalokau ia hahedinaraia, taunimanima ta be unai bamona ia karaia diba lasi. Unai dainai Baibel ese Iehova be “moale Diravana” ia gwauraia, ani?​—1 Timoteo 1:11.

³ Iseda lalokau Diravana ia ura ia hahedinaraia lalokauna ita tohotohoa. Efeso 5:1, 2 ese ita ia hamaoroa: “Dirava umui tohotohoa, badina umui be iena lalokau natudia. Bona lalokau ai do ita raka noho.” Iehova ese ia hahedinaraia lalokauna ita tohotohoa neganai, henia karana ena moale do ita mamia. Bona do ita moale badina ita diba Iehova ita hamoalea noho, badina iena Hereva ese ita ia hagoadaia ita “lalokau heheni” totona. (Roma 13:8) To danu, “lalokau ai do ita raka noho” ena badina ma haida idia noho.

4, 5. Dahaka dainai iseda tadikaka dekenai sibona iseda namo tahua lasi lalokauna ita hahedinaraia be mai anina bada?

⁴ Dahaka dainai iseda tadikaka dekenai lalokau ita hahedinaraia be mai anina bada? Lalokau be Keristani tomadiho momokanina ena kara badana. Lalokau be lasi neganai, iseda Keristani tadikaka ita tura henidia diba lasi, bona mai anina bada gauna be inai, Iehova ena matana dekenai ita be anina lasi. Do ita itaia, edena dala ai Dirava ena Hereva ese ita ia durua lalokau ita hahedinaraia ena badina ita lalopararalaia totona.

⁵ Iesu ena tanobada maurina ena hanuaboi ginigabena ai, ena murinai idia raka taudia ia hamaoroa: “Umui dekenai taravatu matamata lau henia inai: Do umui lalokau heheni. Lau ese umui lau lalokau henia hegeregerena, umui danu do umui lalokau heheni. Unai amo taunimanima ibounai do idia diba umui be egu hahediba taudia, bema umui huanai lalokau ia noho.” (Ioane 13:34, 35) “Lau ese umui lau lalokau henia hegeregerena”—oibe, Iesu ese ita ia oda henia ia hahedinaraia lalokauna do ita hahedinaraia. Karoa 29 dekenai ita itaia, Iesu ese sibona ena ura dadaraia lalokauna dekenai, haheitalai hereadaena ia hahedinaraia. Ia be haida edia dabu gaudia bona ura ia atoa guna. Ita danu be sibona eda namo tahua lasi lalokauna ita hahedinaraia goevagoeva, unai amo Keristani kongrigeisen murimurinai idia noho taudia ese unai lalokau do idia itaia danu. Momokani, tadikaka dekenai sibona iseda namo tahua lasi lalokauna ita hahedinaraia karana amo, taunimanima idia diba ita be Keriso murinai ita raka taudia.

6, 7. (a) Edena bamona ita diba Iehova ena Hereva ese ia hahedinaraia lalokau be mai anina bada? (b) Paulo ese 1 Korinto 13:4-8 ai daidia lalokau henia karana ia herevalaia?

⁶ To bema lalokau ita hahedinaraia lasi be edena bamona? Aposetolo Paulo ia gwau: “Bema . . . lau dekenai lalokau be lasi, lau be idia botaia gaba mai ena rege bada eiava simbol bamona.” (1 Korinto 13:1) Simbol bona gaba idia botaia neganai rege bada ia havaraia. Unai be haheitalai maorodia! Lalokau lasi tauna be unai simbol eiava gaba ta bamona, rege bada ia havaraia bona taunimanima idia ura lasi kamonai eiava ena regena idia moalelaia lasi. Unai bamona tauna be haida do ia tura henia diba, a? Paulo ia gwau danu: “Bema egu abidadama be bada dainai ororo be gabu ta amo gabu ma ta dekenai lau atoa diba, to lau dekenai lalokau be lasi, lau be anina lasi.” (1 Korinto 13:2) Mani oi laloa, herevana dahaka gaukara ia karaia, lalokau lasi tauna be “anina lasi” tauna! Iehova ena Hereva ese ia hahedinaraia, lalokau hahedinaraia karana be mai anina bada.

⁷ To, edena bamona ma haida dekenai unai kara ita hahedinaraia diba? Paulo ena hereva 1 Korinto 13:4-8 ese unai do ia haerelaia. Unai Baibel siri ese Dirava ena lalokau ita dekenai eiava iseda lalokau Dirava dekenai ia herevalaia lasi. To, Paulo ese ta ta dekenai lalokau ita hahedinaraia dalana ia herevalaia. Ia hahedinaraia lalokau be dahaka bona ia be dahaka lasi.

 8. Dahaka dainai haheauka karana ese ita ia durua diba?

⁸ “Lalokau be ia haheauka” Ena anina be ma haida edia kara haheaukalaia. (Kolose 3:13) Dahaka dainai ita haheauka be gau badana? Badina ita be goevadae lasi taudia bona hesiai gaukara ita karaia hebou lalonai, ita diba nega ta ta ai reana iseda tadikaka ese ita do idia habadua bona reana ita ese idia danu do ita habadua. To, haheauka karana ese ita ia durua diba ma haida ida ita gaukara negadiai, ita huanai idia vara kerere maragidia ita haheaukalaia—bona kongrigeisen ena maino ita hadikaia lasi.   

 9. Edena dala idauidau ai ma haida dekenai hebogahisi ita hahedinaraia diba?

⁹ “Lalokau be . . . ia hebogahisi.” Hebogahisi be taunimanima durua karadia bona hagoadaia herevadia amo ita hahedinaraia. Lalokau dainai ita ese dala idauidau do ita tahua hebogahisi ita hahedinaraia totona, dabu taudia dekenai unai ita karaia be namo. Hegeregere, Keristani tadikaka eiava taihu burukana ta be ia sibona ia noho bona ta ese ia vadivadi henia bona hagoadaia be namo. Adavana lasi sinana ta eiava tomadiho dalanai ia parara ruma besena lalonai ia noho taihu ta be reana heduru haida idia abia be namo. Ia gorere tauna eiava hekwakwanai haida ia davaria noho tauna be ena turana namona amo hagoadaia hereva namodia haida ia kamonai be namo. (Aonega Herevadia 12:25; 17:17) Unai bamona daladia ai hebogahisi ita hahedinaraia neganai, ita be lalokau korikorina ita hahedinaraia.​—2 Korinto 8:8.

10. Edena dala ai lalokau ese ita ia durua hereva momokani sibona ita gwauraia, herevana unai ita karaia be auka?

¹⁰ “Lalokau be . . . hereva momokani ia moalelaia.” Baibel ma ta ia gwau: “Lalokau . . . be mai moale ida hereva momokani ia durua.” Lalokau ese ita ia doria ‘ta ta dekenai hereva momokani ita gwauraia.’ (Sekaraia 8:16) Hegeregere, bema iseda lalokau tauna ta be kara dika badana ia karaia, ita ese Iehova—bona ia kara dika tauna—ita lalokau henia dainai, unai ese ita do ia durua Dirava ena taravatu ita badinaia bona unai kerere ita hunia totona ekskius herevadia eiava koikoi herevadia do ita gwauraia lasi. Momokani, ia vara gauna ita abia dae totona be ia auka. To bema ita lalokau henia tauna ena namo ita laloa, do ita ura ia be Dirava ena matahakani mai lalokauna ia abia bona ia badinaia. (Aonega Herevadia 3:11, 12) Ita be lalokau Keristani taudia dainai, ita ura ‘mai momokani ida gau ibounai ita karaia.’​—Heberu 13:18.

11. Lalokau be “gau ibounai dekenai ia gini goada” dainai, iseda tadikaka edia kerere maragidia dekenai dahaka ita karaia be namo?

¹¹ “Lalokau be gau ibounai dekenai ia gini goada.” Unai hereva ena anina be “gau iboudiai ia koua.” (Kingdom Interlinear) Petero Ginigunana 4:8 ia gwau, “lalokau ese kara dika momo ia gwauatao.” Oibe, lalokau ese ia biagua Keristani tauna be ena Keristani tadikaka edia kara dika bona kerere ibounai do ia gwauraia hedinarai lasi. Nega momo, iseda tadikaka edia kerere be maragi bona lalokau amo ita koua diba.​—Aonega Herevadia 10:12; 17:9.

12. Edena dala ai aposetolo Paulo ia diba momokani Filemona be kara namo do ia karaia, bona Paulo ena haheitalai amo dahaka ita dibaia?

¹² “Lalokau be . . . gau ibounai ia abidadama henia.” Baibel ta ia gwau lalokau be “nega ibounai gau namodia sibona ia laloa.” Namo lasi iseda tadikaka ita laloa kerere, eiava edia lalohadai ibounai ita daradaralaia. Lalokau dainai ita abia dae iseda tadikaka be “gau namodia sibona” idia karaia bona idia ita abidadama henia.a Haheitalai ta be Paulo ena revareva Filemona dekenai, mani ita itaia. Paulo ena revareva lalonai Filemona ia hagoadaia, Onesimo, ia heau boio hesiai tauna be hari Keristani tauna ai ia lao dainai, do ia abia dae. Paulo ese Filemona ia doria lasi, to mai lalokau ida ia noia unai ia karaia totona. Ia diba Filemona ese kara maorona do ia karaia, ia gwau: “Lau diba momokani lau noia gauna do oi karaia, unai dainai oi lau tore henia. Lau diba lau noia gauna sibona do oi karaia lasi, to gau ma haida danu.” (Siri 21) Lalokau ese ita ia doria iseda tadikaka be unai bamona ita abidadama henia neganai, edia kara namo ia hedinarai.

13. Edena bamona ita hahedinaraia iseda tadikaka edia namo ita laloa?

¹³ “Lalokau be . . . gau ibounai lalonai ia be mai ena helaro.” Lalokau be ia abidadama bona nega namona ia naria danu. Lalokau dainai, ita ura eda tadikaka be namo idia davaria. Hegeregere, bema tadikaka ta be “dala kererena ai ia raka bona ia diba lasi,” ita ura ia idia hamaoromaoroa totona mai lalokau ida idia henia sisibana ia abia dae. (Galatia 6:1) Ita ura edia abidadama dekenai idia manoka taudia be gabeai do idia goada lou. Unai bamona taudia dekenai ita haheauka bona edia abidadama dekenai idia goada lou totona ita durudia be namo. (Roma 15:1; 1 Tesalonika 5:14) Ena be ita lalokau henia tauna ia raka oho, ita hesiku lasi to ita laloa noho, nega ta ena lalona do ia kehoa bona Iehova dekenai do ia giroa lou, Iesu ese ena haheitalai lalonai ia gwauraia boio merona bamona.​—Luka 15:17, 18.

14. Dahaka ese iseda haheauka karana kongrigeisen lalonai ia tohoa diba bona lalokau dainai dahaka ita karaia diba?

¹⁴ “Lalokau be . . . gau ibounai ia haheaukalaia.” Haheauka dainai lalohisihisi eiava metau negadiai ita gini goada. Iseda haheauka karana idia tohoa gaudia be kongrigeisen murimurina sibona amo idia mai lasi. Nega haida hahetoho be kongrigeisen lalonai ita davaria diba. Ita goevadae lasi dainai, iseda tadikaka ese nega haida ita idia habadua diba. Idia laloa namonamo lasi bona idia gwauraia herevadia ese iseda hemami ia hadikaia diba. (Aonega Herevadia 12:18) Reana ita laloa kongrigeisen lalonai hekwakwanai ta idia hamaoromaoroa namonamo lasi. Ita matauraia tadikakana ta ena kara amo reana ma haida ia habadua dainai, ita laloa, ‘Inai be Keristani tauna ena kara, a?’ Unai bamona ia vara neganai, kongrigeisen do ita rakatania bona Iehova hesiai henia karana do ita hadokoa, a? Bema ita be mai iseda lalokau, unai bamona do ita karaia lasi! Oibe, lalokau ese ita ia durua diba ena be iseda tadikaka ia kerere to ena kara namodia do ita laloa bona kongrigeisen dekenai lalohadai kererena do ita abia lasi danu. Herevana goevadae lasi tauna ta ese dahaka ia gwauraia eiava ia karaia, lalokau ese ita ia durua Dirava ita abidadama henia bona kongrigeisen ita durua noho.​—Salamo 119:165.

15. Mama dikana be dahaka, bona lalokau ese edena bamona ita ia durua unai hemami dikana ita dadaraia totona?

¹⁵ “Lalokau be ia mama lasi.” Mama dikana ese iseda lalona ia veria diba ma haida edia kohu, hahenamo, bona diba dainai ita mama totona. Unai bamona mama karana be sibona ena namo ia tahua, ia be dika ia havaraia diba hemami, bona bema ita biagua lasi, kongrigeisen ena maino do ia hadikaia. Dahaka ese ita do ia durua mama karana ita dadaraia totona? Haere be, lalokau. (Iamesi 4:5) Unai kara hereadaena dainai, edia mauri lalonai hahenamo idia abia taudia ida ita moale hebou, ena be unai bamona hahenamo ita abia lasi. (Roma 12:15) Ta ena diba eiava gaukara ta ia hagugurua dainai hanamoa hereva ia abia neganai, lalokau dainai do ita laloa lasi ia ese ita ia hanaia.

16. Bema mai momokani ida iseda tadikaka ita lalokau henia, dahaka dainai Iehova ena hesiai gaukarana lalonai ita heagi lasi?

¹⁶ “Lalokau be . . . ia heagi lasi, bona ia hekokoroku lasi.” Lalokau dainai iseda diba eiava ita karaia gaudia dainai do ita heagi lasi. Bema mai momokani ida iseda tadikaka ita lalokau henia, dahaka dainai haroro gaukara dekenai ita hagugurua gaudia, eiava kongrigeisen lalonai ita abia hahenamodia ita heagilaia? Unai kara ese ma haida edia lalona ia hamanokaia diba, bena do idia laloa idia be anina lasi. Lalokau dainai, Dirava ena hesiai gaukara lalonai ita karaia diba gaudia ita heagilaia lasi. (1 Korinto 3:5-9) Paulo ia gwau lalokau dainai ta do ia “hekokoroku lasi,” eiava Baibel ta ia gwau, “lalokau dainai ta do ia gwau lasi ia be mai anina bada.” Lalokau ese ita ia durua sibona laloa bada karana ita dadaraia totona.​—Roma 12:3.

17. Lalokau ese ita ia durua ma haida be edena bamona ita lalodia totona, bona edena kara ita dadaraia?

¹⁷ “Lalokau be dala kererena ai ia kara lasi.” Dalana kererena ai ia kara tauna be haida ia matauraia lasi eiava iena kara amo haida ia habadua. Unai be lalokau lasi karana, badina ma haida edia hemami eiava edia namo ia laloa lasi. To, lalokau be mai ena hebogahisi, ita ia durua ma haida ita laloa totona. Lalokau ese kara namo, Dirava ia ura henia kara, bona iseda tadikaka matauraia karana ia havaraia. Unai dainai, lalokau ese ita do ia koua “hemarai karadia”—oibe, iseda Keristani tadikaka do ia habadua karadia—do ita karaia lasi.​—Efeso 5:3, 4.

18. Dahaka dainai lalokau tauna be haida do ia doria lasi ena lalohadai sibona idia badinaia totona?

¹⁸ “Lalokau be . . . sibona ena namo ia tahua lasi.” Baibel ma ta ia gwau: “Lalokau be sibona ena ura ia badinaia lasi.” Lalokau tauna do ia gwau lasi gau ibounai be ia ura dalana ai idia karaia, hegeregere ena lalohadai ibounai be idia maoro sibona. Ia ese ma haida ia biagua lasi, bona iena hereva amo ma haida ia doria lasi iena lalohadai idia badinaia totona. Unai bamona laloauka karana be hekokoroku karana, bona Baibel ia gwau: “Hekokoroku karana be dika ia lao henia.” (Aonega Herevadia 16:18) Bema iseda tadikaka ita lalokau henia momokani, edia lalohadai do ita matauraia, bona mai ura ida edia lalohadai do ita abia dae. Unai bamona laloa dalana be Paulo ena hereva ida ia hegeregere, ia gwau: “Namo lasi ta be sibona ena namo ia tahua, to namona be ma ta ena namo ia tahua.”​—1 Korinto 10:24.    

19. Haida ese ita idia habadua neganai, lalokau ese ita ia durua edena bamona ita kara totona?

¹⁹ “Lalokau be . . . Ia badu haraga lasi. Bona ia be ta ena kerere ia laloatao noho lasi.” Lalokau tauna be ma haida ese idia gwauraia eiava idia karaia gaudia dainai do ia badu haraga lasi. Momokani, ma haida ese ita idia habadua neganai, vaia ita badu. To ena be badina maorona dainai ita badu, to lalokau be ia badu daudau lasi. (Efeso 4:26, 27) Namo lasi ta ese oi dekenai ia gwauraia hahisia hereva eiava kara oi laloatao, hegeregere buka ta dekenai oi torea, bena oi laloatao. To, lalokau ese ita ia durua iseda lalokau Diravana ita tohotohoa totona. Karoa 26 dekenai ita herevalaia bamona, bema badina namona ia noho, Iehova ese ta ena kara dika ia gwauatao. Ita ia gwauatao neganai, ia laloaboio, anina be unai kara dika totona gabeai ita do ia kota henia lasi. Iehova be iseda kara dika ia laloatao lasi dainai ia ita tanikiu henia, ani?

20. Bema tadikaka ta be kara dika ena tarapu lalonai ia moru bona dika bada ia davaria, edena bamona ita kara be namo?

²⁰ “Lalokau be kara maoromaoro lasi karana ia moalelaia lasi.” Baibel trensleisen haida idia gwau: “Lalokau be . . . haida edia kara dika ia moalelaia lasi.” Eiava “haida idia kerere neganai, ia moale lasi.” Lalokau be kara dika ia moalelaia lasi, unai dainai matabodaga karadia ibounai ita dadaraia. Dahaka ita karaia, bema tadikaka ta be kara dika ena tarapu lalonai ia moru bona dika bada ia davaria? Lalokau dainai, ia karaia kara dekenai do ita moale lasi, do ita gwau lasi, ‘Namo herea! Ena dika davana ia abia be namo!’ (Aonega Herevadia 17:5) To, ita moale bema ia be dala maorona ia badinaia bona ena hetura karana Iehova ida ia hanamoa lou.

21-23. (a) Paulo ena hereva, “lalokau be ia ore diba lasi”ena anina be dahaka? (b) Karoa ginigabena dekenai dahaka do ita herevalaia?

²¹ “Lalokau be ia ore diba lasi.” Paulo ena hereva anina be dahaka? Unai siri ta ta ese idia hahedinaraia, Paulo ese Keristani ginigunadia idia abia lauma helaga ena harihari gaudia ia herevalaia. Unai harihari gaudia ese idia hamomokania Dirava ese unai negai ia vara kongrigeisen matamatana ia lalonamo henia. To Keristani taudia haida sibona ese gorere idia hanamoa, idia peroveta, eiava gado idauidau dekenai idia hereva. To unai be gau badana lasi, badina idia abia harihari gaudia be do idia ore. To gau ma ta be do ia noho, unai be Keristani taudia ibounai ese idia hahedinaraia karana. Ia be kara hereadaena bona ia noho hanaihanai gauna. Oibe, Paulo ese unai ia gwauraia “dala namo hereana.” (1 Korinto 12:31) Unai be dahaka? Lalokau ena dala.   

²² Momokani, Paulo ese ia herevalaia Keristani lalokauna be ia “ore diba lasi,” anina be do ia noho hanaihanai. Ema bona hari, sibona iseda namo tahua lasi dalanai tadikaka ita lalokau henia karana, ese ia hamomokania ita be Keriso murinai ita raka taudia. Tanobada hegegemadai lalonai Iehova ena Witnes taudia dekenai, unai bamona lalokau karana ita itaia, ani? Unai lalokau be do ia noho hanaihanai, badina Iehova ese ena kamonai hesiai taudia dekenai mauri hanaihanai ia gwauhamatalaia. (Salamo 37:9-11, 29) Namona be “lalokau ai do ita raka noho” totona ita gaukara goada. Unai bamona ita karaia neganai, henia karana amo moale bada ita mamia diba. Gau hereadaena be, do ita mauri noho—oibe, lalokau do ita hahedinaraia noho—ela bona hanaihanai, iseda lalokau Diravana, Iehova, hegeregerena.

²³ Inai karoa lalonai, ta ta dekenai lalokau ita hahedinaraia dalana ita herevalaia. To Iehova ena kara namodia hegeregere; lalokau siahu, hahemaoro goeva, bona aonega dainai, dala idauidau ai namo ita davaria. Unai dainai namona be ita sibona ita nanadaia, ‘Edena dala ai do lau hahedinaraia Iehova lau lalokau henia bada?’ Unai henanadai be karoa ginigabena dekenai do ita herevalaia.