Karoa 5

Iesu mai Ena Hairai Ioane ese Ia Itaia

Matahanai 1​—⁠Apokalupo 1:10–3:⁠22

Anina: Iesu ese lauma Israel taudia tanobada dekenai ia tahudia bona sisiba ia henidia edia lalona ia hagoadaia totona

Hagugurua negana: Unai matahanai ena hagugurua negana, Lohiabada ena dina lalonai, be lagani 1914 amo ela bona kamonai horoa tauna ginigabena ia mase bona ia toreisi lou neganai

APOKALUPO bukana ena matahanai ginigunana be Apok karoa 1, siri 10 dekenai ia matamaia. Ioane ese unai matahanai ginigunana bona Apokalupo bukana ena matahanai ma haida edia sivarai ia hamatamaia neganai, ia gwau hoa gauna ta ia itaia eiava ia kamonaia. (Apokalupo 1:​10, 12; 4:1; 6:⁠1) Unai matahanai ginigunana ia hedinarai dalana be Keristen taudia ginigunadia edia nega lalonai, bona Ioane ena nega lalonai idia noho kongregesen 7 dekenai ia siaia. To Ioane ese ia hahedinaraia ena anina be edena negai do ia vara momokani. Ia gwau: “Vadaeni, Lohiabada ena dina dekenai Lauma Helaga ese lau ia abia.” (Apokalupo 1:10a) Unai “dina” be edena negai? Ia be mai anina hari inai negai idia vara hekwakwanai badadia dekenai, a? Bema oibe, namona be inai peroveta herevana ita laloa namonamo, badina ia be mai anina iseda mauri dekenai​—⁠oibe, do ita roho mauri eiava lasi anina unai.​—⁠1 Tesalonika 5:​20, 21.

Lohiabada Ena Dina Dekenai

² Apokalupo bukana ena hagugurua negana be edena negai do ia vara? Lohiabada ena dina be dahaka? Aposetolo Paulo ia gwau unai dina be hahemaoro negana ta bona Dirava ena gwauhamata hagugurua negana ta. (1 Korinto 1:8; 2 Korinto 1:14; Filipi 1:​6, 10; 2:16) Unai “dina” ia ginidae neganai, Iehova ena ura badana ena guguru negana ia mai kahirakahira, mai ena kwalimu ida. Iesu be guba dekenai Pavapava dagina ia abia neganai unai “dina” ia matamaia. Iesu ese Satana ena tanobada ia hahemaoro henia murinai, Lohiabada ena dina do ia doko lasi, to tanobada be Paradaiso ai do idia halaoa lou bona taunimanima do idia goevadae idia lao, ela bona Iesu ese “Dirava ena Basileia Tamana Dirava ena imana dekenai do ia atoa.”​—⁠1 Korinto 15:​24-​26; Apokalupo 6:​1, 2.

³ Baibel ena peroveta herevadia ma haida idia guguru dalana ese ita idia durua dainai, ita diba Lohiabada ena dina be edena negai ia matamaia. Haheitalai ta be inai: Daniel ia gwau, Pavapava David ena bese edia lohia dagina do idia utua; bena “nega 7” idia ore murinai, taunimanima be do idia diba “Atai Herea Diravana ese taunimanima edia basileia ia lohiaia noho, bona ia ura do ia henia tauna be ia henia.” (Daniela 4:​23, 24, 31, 32) Iuda basileia idia hadikaia neganai unai peroveta herevana ena hagugurua karana badana ia hamatamaia. Baibel ena hereva ma haida ese idia hahedinaraia October 607 B.C.E. ai, Iuda basileia idia hadikaia ore. Apokalupo 12:​6, 14 lalonai ia hedinarai nega 3 1/2 be dina 1,260 hegeregerena; unai dainai, nega 7 (3 1/2 idia habadaia nega rua amo) be dina 2,520. “Dina ta anina be lagani ta, dina ta anina be lagani ta” ena taravatu ita badinaia neganai, ita lalo-parara “nega 7” edia anina be lagani 2,520 hegeregerena. (Esekiela 4:⁠6) Unai dainai, lagani 1914 be kahirakahira ia ore neganai, Keriso Iesu be guba dekenai ena lohia gaukara ia hamatamaia. Unai lagani ai tanobada tuarina ginigunana ia matamaia neganai, unai “be hisihisi nega ena hamatamaia sibona, natuna havaraia ena hisihisi bamona.” Taunimanima ese unai hisihisi idia ania noho. Lagani 1914 amo ema bona hari, rara ia hamiroa tanobadana dekenai idia vara gaudia ese idia hamomokania unai lagani ai Iesu ena noho ena “dina” ia matamaia!​—⁠Mataio 24:​3-​14.a

⁴ Unai dainai hari matahanai ginigunana bona ena sisiba be mai anina Lohiabada ena dina lalonai, lagani 1914 murinai. Apokalupo bukana ena hereva ma haida ese unai idia hamomokania. Unai hereva be Dirava ese ena hahemaoro momokanidia bona maoromaorodia ia karaia bona unai kara lalonai Lohiabada Iesu be mai ena gaukara bada. (Apokalupo 11:18; 16:15; 17:1; 19:​2, 11) Bema lagani 1914 ai matahanai ginigunana ena guguru negana ia matamaia, edena negai do ia ore? Unai matahanai ena hadibaia herevadia be Dirava ena kongregesen horoa orena taudia tanobada dekenai idia henidia. Unai dainai ita diba unai horoa oreana ena kamonai namonamo tauna ginigabena do ia mase bona guba dekenai do ia daekau murinai, matahanai ginigunana ena guguru negana do ia ore. To, Lohiabada ena Dina do ia ore lasi ela bona Iesu ena Lagani 1,000 Lohia Negana ia ore. Unai nega lalonai mamoe idaudia ese hahenamo do idia abia.​—⁠Ioane 10:16; Apokalupo 20:​4, 5.

⁵ Unai matahanai ginigunana lalonai, Ioane ese gau ta ia do itaia lasi neganai, ia ese gau ta ia kamonai: “Unai neganai lauegu murina kahanai be gado badana ta, kibi ena regena bamona, lau kamonai. Ia gwau, ‘Inai oi itaia gaudia buka dekenai do oi torea, bona ekalesia orea 7 dekenai inai buka do oi siaia lao. Ekalesia orea be inai: Efeso, Semurana, Peregamo, Tuatira, Sadi, Filadelefia, Laodikea.’ ” (Apokalupo 1:10b, 11) Siahu bada bona dagi bada tauna ta bamona, kibi regena bamona, gado ta ese Ioane ia hagania “ekalesia orea 7” dekenai revareva do ia torea. Unai gado ia gwau Ioane ese hadibaia herevadia haida do ia kamonai, bona ia ese do ia itaia gaudia bona do ia kamonaia gaudia do ia harorolaia. Ioane ena nega ai unai kongregesen 7 be momokani idia noho. Idia iboudiai be Asia Minor dekenai idia noho. Idia be Patamo motumotuna kahirakahira dekenai, davara kahanai, idia noho. Roma taudia ese idia karaia daladia namodia amo laolao tauna ese unai kongregesen iboudiai ia vadivadi henia diba. Gwaukau tauna do ia hekwarahi lasi unai buka be kongregesen ta ta iboudiai dekenai do ia abia loaloa totona. Unai kongregesen 7 be hari inai negai Iehova ena Witness taudia edia sekit ta ena kahana ta bamona.

⁶ Apokalupo bukana ena peroveta herevadia momo be Ioane ena nega murinai do idia vara. Idia be “vaira neganai do idia vara gaudia.” To kongregesen 7 idia abia sisibana be “hari idia noho gaudia” totona, unai kongregesen 7 lalonai idia vara gaudia unai. Unai hereva be unai kongregesen 7 bona horoa Keristen taudia edia kongregesen iboudiai danu edia kamonai elda taudia idia durudia bada.b Unai matahanai ena anina badana be Lohiabada ena dina dekenai do ia vara. Unai dainai, Iesu ena hereva ese ia hahedinaraia unai kongregesen 7 lalonai idia vara gaudia be hari iseda nega lalonai horoa Keristen taudia edia kongregesen lalodiai do idia vara danu.​—⁠Apokalupo 1:​10, 19.

⁷ Unai matahanai ginigunana lalonai, Ioane ese Lohiabada Iesu Keriso ia itaia, mai ena guba hairaina. Unai bamona ia hedinarai be maoro, badina Lohiabada, guba ese ena dagi ia henia tauna, ena dina badana ena sivarai be momo unai peroveta bukana lalonai. Bona hari ita be unai nega, Lohiabada ena dina, lalonai ita noho dainai, ena hahegani iboudiai dekenai ita kamonai be gau badana, ani? Mesia Garana ese Satana ena hahetoho bona dagedage iboudiai ia haheaukalaia vadaeni, bona kahirakahira lagani 2,000 gunanai mai hisihisi bada herea ia mase, Satana ese ena “aena geduna” ia haberoa neganai. Unai amo edia ura be Iehova ese gau iboudiai ia lohiaia taudia be idia moale dikadika badina Mesia Garana guba dekenai hari ia mauri noho, bona siahu idia henia vadaeni Dirava ena ura badana do ia hagugurua, mai ena kwalimu ida!​—⁠Genese 3:​15.

⁸ Hari ia hedinarai Iesu ia gini hegaegae, Pavapava gaukara do ia karaia totona. Iehova ese Iesu be ena Kara Dika Taudia Hamasedia Tauna Badana ai ia halaoa vadaeni, hari inai nega gabena bona dikana dekenai, bona ena dirava dikana, Satana, dekenai, Iehova ena hahemaoro ginigabedia do ia henidia totona. Danu, ia hegaegae ena horoa kongregesen taudia, edia bamodia hutuma bada herea taudia, bona inai tanobada do ia hahemaoro henidia totona.​—⁠Apokalupo 7:​4, 9; Kara 17:⁠31.

⁹ Ioane ese gado badana ia kamonai neganai, ia giroa, bona ia itaia gauna be inai: “Vadaeni lauegu vairana lau giroa, lau ia hereva henia tauna lau itaia totona. Bona golo lamepa ibounai 7 lau itaia.” (Apokalupo 1:12) Gabeai, Ioane ia diba, unai lamepa ese dahaka idia laulaulaia. To hari Ioane ese unai lamepa edia huanai ia gini tauna ia itaia. “Lamepa edia huanai tau ta ia gini, iena toana be Taunimanima ena Natuna bamona. Iena dabua be lata, ela bona iena aena dekenai, bona iena kemena be golo beleta ese ia hagegea.” (Apokalupo 1:13) Iesu, “Taunimanima ena Natuna” be Ioane vairanai ia hedinarai mai hairai bada bona mai hururuhururu ida. Idia diaridiari golo lamepa edia huanai ia gini. Unai bamona ia hedinarai neganai unai gabu ena toana be dubu badana bamona. Unai ese Ioane ia hadibaia Iesu be Iehova ena Hahelaga Tauna Badana, bona ia be mai ena hahemaoro siahudia. (Heberu 4:14; 7:​21-​25) Ena dabua lata herea ese ena hahelaga dagina ia hahedinaraia. Idaunegai Iuda hahelaga taudia badadia bamona, beleta ta ia karaia​—⁠unai be golo gauna ta bona ena kemena dekenai ia kwatua, ena kudouna ia koua unai. Ia laulaulaia gauna be, mai ena kudou ibounai ida Iehova Dirava ese ia henia gaukarana do ia karaia.​—⁠Esodo 28:​8, 30; Heberu 8:​1, 2.

¹⁰ Ioane be ma ia gwau: “Iena huina be kurokuro momokani, mamoe huina bamona, eiava ori kurokuro bamona. Iena matana be lahi ena hururuhururu bamona.” (Apokalupo 1:14) Ena huina kurokurona ese ia hahedinaraia ia aonega, badina nega daudau ia mauri dainai. (Aonega Herevadia 16:31 itaia danu.) Bona ena matana be lahi hururuhururu bamona. Unai ese ia hahedinaraia ena lalo-parara be haraga bona ia noga, ia ese gau ta ia tahua, bona ia tohoa, eiava ena badu ia gwauraia neganai. Ioane ese Iesu ena aena danu ia itaia: “Iena aena be kapa ia diaridiari bamona, lahi dekenai idia gabua neganai. Iena gadona ena regena be bada herea, sinavai momo edia regena bamona.” (Apokalupo 1:15) Unai matahanai lalonai Iesu ena aena be kapa bamona, idia hururuhururu, bona idia diaridiari​—⁠unai be maoro, badina mai ena lalo-goada ida ia raka bona Iehova Dirava ena vairanai ia gini maoromaoro. Danu, Baibel lalonai nega momo golo gaudia ese Dirava ena gau idia laulaulaia, to kapa gaudia ese taunimanima edia gau idia laulaulaia.c Unai dainai Iesu ena aena be kapa bamona idia hururuhururu dainai, ita laloatao Iesu be tanobada dekenai ia raka bona sivarai namona ia harorolaia neganai, ena aena be “namo herea momokani.”​—⁠Isaia 52:7; Roma 10:⁠15.

¹¹ Momokani, tau goevadaena Iesu be mai ena hairai, bona aneru bona taunimanima ese ena hairai idia itaia diba. (Ioane 1:14) Ena aena hairaidia dainai ita diba Iehova ena orea lalonai ia be Helaga Tauna Badana bona ena kara be hegeregere tano helagana ia rakalaia bamona. (Esodo 3:⁠5 itaia danu.) Danu, ena gado be guba ena boiboi bamona, sinavai badana ena ranu be ororo amo ia moru ena rege bamona. Ena gado be hagaria gauna. Unai be maoro badina iena ladana idia hatoa Dirava ena Hereva, bona ia maoro badina ia mai dala maoromaoronai “tanobada ibounai do ia kota henia” totona.​—⁠Kara 17:31; Ioane 1:⁠1.

¹² “Iena imana idibana dekenai be hisiu 7 ia dogoatao. Tuari kaia ta mai matana, isena rua gauna, be iena uduna dekena amo ia duduia maoromaoro. Iena vairana be dina tubu neganai, dina ena diaridiari bamona. Lau itaia neganai, iena aena badinai lau moru diho, lau be mase tauna bamona.” (Apokalupo 1:​16, 17a) Gabeai, Iesu ese hisiu 7 edia anina ia gwauraia. To, ena uduna amo ia lasi gauna oi itaia: “tuari kaia ta mai matana, isena rua gauna.” Unai be maoro! Badina Iehova ese Iesu ia abia hidi, Iena hahemaoro herevadia ginigabedia be ena inai taudia dekenai do ia gwauraia totona. Iesu be mai ena goada ida ia gwauraia gaudia dainai kara dika taudia iboudiai do ia alaia mase.​—⁠Apokalupo 19:​13, 15.

¹³ Iesu ena vairana ia diaridiari dainai, ita laloa Sinai Ororona latanai Iehova ese Mose ia hereva henia murinai, Mose ena vairana ia diaridiari danu. (Esodo 34:​29, 30) Danu, kahirakahira lagani 2,000 gunanai ena aposetolo taudia toi vairadiai Iesu ena toana ia idau neganai, “iena vairana be diaridiari dina bamona, ena dabua ia kurokuro momokani diari bamona.” (Mataio 17:⁠2) Unai matahanai ese Iesu ia laulaulaia ia be Lohiabada ena dina lalonai ia noho neganai. Mose hegeregerena, Iesu ena vairana ese Iehova ena vairanai ia gini tauna ena hairai ia hahedinaraia. (2 Korinto 3:18) Momokani, Ioane ena matahanai toana ibounai be mai hairai bona mai diari bada herea. Iesu ena huina be kurokuro momokani, ena matana be lahi ena hururuhururu bamona, ena vairana bona ena aena idia diaridiari. Vadaeni, unai matahanai lalonai ia hedinarai Tauna be “ia sibona diaridiari bada dekenai ia noho, bona ia kahirakahira ita lao diba lasi.” (1 Timoteo 6:16) Unai matahanai ia hedinarai goevagoeva! Ioane ia gari. Dahaka ia karaia? Ia gwau: “Lau itaia neganai, iena aena badinai lau moru diho, lau be mase tauna bamona.”​—⁠Apokalupo 1:⁠17.

¹⁴ Hari inai negai, Ioane ena matahanai ena sivarai dainai Dirava ena orea taudia idia moale. Ema bona hari Lohiabada ena dina lalonai lagani 90 bona ma haida idia ore vadaeni. Unai lagani lalodiai, unai matahanai be hoa dalana ai ia guguru noho. Iesu ena Basileia be vaira nega ena gau lasi, to harihari ia lohia noho, ia be gau momokanina. Unai Basileia henunai ita noho bona ita badinaia dainai, Ioane ena matahanai ginigunana ena sivarai ita tahua noho, bona hairai tauna Iesu Keriso ena hereva dekenai ita kamonai be maoro.

[Footnotes]

[Study Questions]

 1. Matahanai ginigunana ena sivarai be edena bamona ia hedinarai, bona ena anina ia vara negana edena bamona Ioane ese ia hahedinaraia?

 2. Lohiabada ena dina be edena negai ia matamaia, bona edena negai do ia doko?

 3. (a) Daniel ena “nega 7” peroveta herevana ese ita edena bamona ia durua Lohiabada ena dina ia matamaia negana ita diba totona? (b) Tanobada dekenai dahaka gau idia vara neganai idia hamomokania lagani 1914 ai Lohiabada ena dina ia matamaia?

 4. (a) Apokalupo ena hereva ese idia hahedinaraia, matahanai ginigunana ena hagugurua negana be edena negai? (b) Matahanai ginigunana ena hagugurua negana be edena negai do ia doko?

 5. (a) Gado ta ese Ioane ia hamaoroa dahaka do ia karaia? (b) Dahaka dainai “ekalesia orea 7” edia noho gabudia be namo, idia dekenai buka do idia siaia totona?

 6. (a) “Hari idia noho gaudia” be dahaka? (b) Badina be dahaka ita diba namonamo, hari inai negai horoa taudia edia kongregesen lalonai idia vara gaudia be Ioane ena negai idia vara gaudia hegeregeredia?

 7. Ena matahanai ginigunana lalonai Ioane ese daika ia itaia, bona badina be dahaka hari inai negai unai be mai anina bada ita dekenai?

 8. Iesu ia gini hegaegae dahaka do ia karaia totona?

 9. (a) Ioane ese golo lamepa edia huanai ia gini hairai abia tauna Iesu Keriso be edena bamona ia gwauraia? (b) Dubu badana ena toana bona Iesu ese ia karaia dabuana be dahaka idia hahedinaraia? (c) Golo beleta ese dahaka ia hahedinaraia?

10. (a) Iesu ena huina kurokuro momokani bona ena lahi bamona matana ese dahaka idia hahedinaraia? (b) Iesu ena aena be kapa bamona idia hururuhururu ena anina be dahaka?

11. (a) Iesu ena aena hairaidia dainai dahaka ita diba? (b) Iesu ena gado be “sinavai momo edia regena bamona”; unai ese dahaka ia hahedinaraia?

12. “Tuari kaia ta mai matana, isena rua gauna” ena anina be dahaka?

13. (a) Iesu ena vairana ia diaridiari dainai, dahaka ita diba? (b) Ioane ese Iesu ia gwauraia dalana amo dahaka ita diba?

14. Ioane ena matahanai lalonai hairai ia abia tauna Iesu ena toana edena bamona ita laloa be namo?

[Pictures on page 23]

Tano idia geia saiens taudia ese unai kongregesen 7 edia hanua edia kohu bona gau haida oredia idia davaria vadaeni. Unai gau ese Baibel ena hereva idia hamomokania. Iniseniai, Keristen kongregesen ginigunadia ese Iesu ena hadibaia herevadia idia kamonai. Unai hereva ese edia lalona idia hagoadaia bona hari inai negai unai hereva ese kongregesen taudia tanobada ibounai lalonai idia hagoadadia danu

PEREGAMO

SEMURANA

TUATIRA

SADI

EFESO

FILADELEFIA

LAODIKEA