Karoa 22

Dika Ginigunana​—⁠Kwadi

ANERU namba 5 ia hegaegae ena kibi do ia hiriria totona. Guba kibi 4 idia hiriria vadaeni, bona hisihisi 4 ese Kerisendom idia hadikaia. Iehova ena matana dekenai, Kerisendom be tanobada kahana toi amo kahana dika hereana. Kerisendom ena gorere dikana ia hedinarai goevagoeva. Aneru ese kibi idia hiriria lalonai, tanobada dekenai hesiai taudia ese edia sivarai idia gwauraia hedinarai. Aneru namba 5 ese dika ginigunana ia herevalaia gwauraia. Unai dika ese idia vara vadaeni gaudia edia dika ia hanaia momokani. Unai dika lalonai kwadi momo herea ese gau momo do idia hadikaia. To, mani ma siri haida ita tahua guna, unai dika dekenai do ita lalo-parara namonamo totona.

² Lagani 900 B.C.E. ia mai 800 B.C.E. huanai, Ioel ese Baibel buka ta ia torea. Unai buka lalonai ia gwau manumanu momo herea, kwadi danu, ese gau momo idia hadikaia. Ioane ese ia itaia gauna hegeregerena. (Ioela 2:​1-​11, 25)a Unai dika ese tomadiho momokani idia dadaraia Israel taudia do ia hahisidia momo, to unai dika dainai Iuda taudia haida idia helalo-kerehai bona Iehova ena lalo-namo idia abia lou. (Ioela 2:​6, 12-​14) Unai nega ia ginidae neganai, Iehova ese ena lauma be “taunimanima idauidau iboudiai latadiai” do ia seia diho bona hagaria toadia idauidau do idia vara, “Iehova ena dina badana, gari havaraia dinana” ia do mai lasi neganai.​—⁠Ioela 2:​11, 28-​32.

Hisihisi Badana Aposetolo Edia Negai

³ Aposetolo taudia edia nega lalonai Ioela karoa 2 ena hereva haida idia guguru. Pentekoste 33 C.E. ai, lauma helaga idia bubua diho, bona Keristen taudia ginigunadia ia horodia bona ia hasiahudia gado idauidau momo ai “Dirava ena hoa gaudia idia herevalaia” totona. Unai dainai, taunimanima hutuma idia mai. Aposetolo Petero ese unai idia hoa taudia ia hereva henidia neganai, Ioela 2:​28, 29 ena hereva ia gwauraia lou bona ia hahedinaraia ena guguru negana idia raraia noho. (Kara 2:​1-​21) To, unai nega ena sivarai idia torea neganai idia gwau lasi manumanu momo herea ese gau momo idia hadikaia, bona unai dainai haida idia hisihisi to ma haida idia helalo-kerehai.

⁴ Laulau dalana ai, nega ta, manumanu idia momo idia lao bona taunimanima idia hahisia, a? Oibe! Idia horoa matamata Keristen taudia edia haroro goadagoada dainai ia vara.b Edia uduna amo Iehova ese do idia kamonai Iuda taudia ia boiridia do idia helalo-kerehai, bona ia dekena amo hahenamo do idia abia totona. (Kara 2:​38-​40; 3:19) Kamonai taudia ese ena lalo-namo idia abia. To ena boiboi idia ura lasi kamonai taudia dekenai, Keristen taudia ginigunadia be kwadi momo herea bamona. Guna, Ierusalem dekenai idia haroro, bena idia lao Iudea ibounai lalonai bona Samaria dekenai idia haroro danu. Nega sisina murinai, gabu iboudiai dekenai kamonai lasi Iuda taudia idia hahisidia, badina Iesu ena toreisi lou bona ena toreisi lou anina ibounai idia harorolaia dainai. (Kara 1:8; 4:​18-​20; 5:​17-​21, 28, 29, 40-​42; 17:​5, 6; 21:​27-​30) Unai hisihisi idia henia noho ela bona lagani 70 C.E. ai, “Iehova ena dina badana, gari havaraia dinana” ai, Iehova ese Roma tuari taudia ia siaidia lao, Ierusalem hanuana do idia hadikaia totona. Mai abidadama danu Iehova dekenai idia boiboi Keristen taudia sibodia ese hahemauri idia abia.​—⁠Ioela 2:32; Kara 2:​20, 21; Aonega Herevadia 18:⁠10.

Kwadi Hutuma Hari Inai Negai

⁵ Vadaeni, ita laloa diba nega dokona ai Ioel ena peroveta herevana ena guguru dokona do ia vara. Unai bamona ia vara momokani! Bible Student taudia be September 1-8, 1919 ai, Cedar Point, Ohio, U.S.A. ai, edia hebouhebou lalonai, Iehova ese ena lauma helaga ia bubua diho bona ena orea taudia ia hasiahudia tanobada ibounai dekenai haroro gaukara do idia karaia totona. Sibodia idia gwauraia Keristen taudia iboudiai edia amo, Iehova ena orea taudia sibodia ese idia abia dae Iesu be guba Pavapavana ai ia lao vadaeni, bona idia sibodia ese unai sivarai namona idia harorolaia goadagoada. Baibel ese ia perovetalaia hegeregerena, idia haroro goadagoada dainai, Kerisendom, tomadiho momokani ia dadaraia oreana, idia hahisia bada.​—⁠Mataio 24:​3-8, 14; Kara 1:⁠8.

⁶ Ierusalem idia hadikaia murinai lagani 26 bamona, Ioane ese Apokalupo bukana ia torea. Unai buka danu ese hisihisi badana ta ia herevalaia. Unai hereva ese Ioel ena hereva edena bamona ia habadaia? Ioane ia gwau: “Aneru namba 5 ese iena kibi ia hiriria. Vadaeni hisiu ta lau itaia, guba dekena amo ia moru diho tanobada dekenai. Inai hisiu dekenai ki idia henia. Ki be dobu masemase gurina kehoa gauna.” (Apokalupo 9:⁠1) Apokalupo 8:10 lalonai Ioane ese ia itaia ia moru hisiuna bona unai “hisiu” be idia idau. Ioane ia itaia “hisiu ta . . . guba dekena amo ia moru diho” vadaeni, bona unai hisiu be mai ena gaukara ta inai tanobada dekenai. Unai hisiu be lauma tauna eiava tanobada tauna? Gabeai, Apokalupo lalonai ia gwau unai ki, “dobu masemase gurina kehoa gauna,” ia dogoatao tauna ese Satana be “guri dobu masemase” lalonai ia negea. (Apokalupo 20:​1-3) Unai amo ia hedinarai ia be lauma tauna mai goadana. Apokalupo 9:11 dekenai Ioane ia gwau kwadi “be mai edia king. Ia be guri dobu masemase ena aneru.” Vadaeni, unai siri rua lalonai tau tamona idia gwauraia. Guri dobu masemase ena ki ia dogoatao aneruna be guri dobu masemase ena aneru. Bona hisiu ese Iehova ena abia hidi Pavapavana ia laulaulaia. Horoa Keristen taudia ese aneru Pavapavana tamona sibona idia abia dae, Iesu Keriso unai.​—⁠Kolose 1:13; 1 Korinto 15:⁠25.

⁷ Ioane be ma ia gwau: “Hisiu ese dobu masemase gurina ia kehoa. Vadaeni kwalahu be guri dekena amo ia daekau, amu badana ena kwalahu bamona. Inai guri dekena amo ia daekau kwalahuna ese dina bona guba padana idia koua, vadaeni idia dibura. Vadaeni kwalahu dekena amo kwadi idia diho mai tanobada dekenai. Bona idia ese tanobada doadoa edia siahu hegeregerena idia abia.” (Apokalupo 9:​2, 3) Baibel lalonai, “dobu masemase gurina” be gaukara lasi gabuna bona mase gabuna. (Roma 10:7; Apokalupo 17:8; 20:​1, 3 itaia danu.) Tanobada ibounai ena tuarina ginigunana ena dokonai (lagani 1918-​19 ai), Iesu ena tadikaka be unai bamona “dobu masemase gurina” lalonai idia noho; anina be gaukara momo idia karaia lasi. To, lagani 1919 ai, Iehova ese ena lauma helaga be ena helalo-kerehai hesiai taudia latanai ia bubua diho neganai, idia roho lao haraga edia gaukara badana do idia karaia totona.

⁸ Ioane ia itaia, kwadi idia ruhaia neganai, kwalahu bada ia daekau, “amu badana ena kwalahu bamona.”c Lagani 1919 ai, unai ia vara. Kerisendom bona inai tanobada ibounai be dibura negana lalonai idia vareai. (Ioela 2:​30, 31 itaia danu.) Kerisendom ena dubu gunalaia taudia idia hegaegae bona palani idia karaia, Basileia gaukarana do idia hadikaia ore totona bona Dirava ena Basileia idia dadaraia vadaeni. Unai kwadi, Ioane oreana taudia, be guri dobu masemasena amo idia ruhaia neganai, unai ese Kerisendom ena dubu gunalaia taudia ia halusidia bamona. Dirava ese siahu be unai kwadi taudia ia henidia bona unai siahu idia gaukaralaia hahemaoro auka herevadia idia harorolaia totona. Unai neganai, ia hedinarai dibura be Kerisendom latanai ia diho, kwalahu bamona. Idia hahedinaraia Kerisendom ena dirava be “hodahoda ena siahu ena lohia.” Unai idia karaia neganai, Kerisendom ena “dina”​—⁠ena lalo-parara toana unai⁠​—⁠​ia boio, bona “guba padana” be Dirava ena hahemaoro auka herevadia amo ia honu.​—⁠Efeso 2:⁠2, NW; Ioane 12:31; 1 Ioane 5:⁠19.

Unai Hisihisi Havaraia Kwadidia!

⁹ Unai kwadi ese dahaka sisiba idia abia tuari do idia karaia totona? Ioane ia gwau: “Oda hereva inai bamona idia abia, ‘Umui ese rei do umui hadikaia lasi, tano dekenai idia tubu avadia bona au danu do umui hadikaia lasi. To umui ese Dirava ena maka edia baguna dekenai idia abia lasi taudia sibona do umui hadikaia. Umui ese inai taudia do umui hisihisi henia ia lao bona hua 5, to umui ese idia do umui alaia lasi.’ Vadaeni inai kwadi ese taunimanima idia hahisia dikadika. Unai hisihisi be tanobada doadoa edia koria hisihisi bamona. Unai hua 5 lalonai, taunimanima ese mase do idia tahua, to do idia davaria lasi. Idia be mase do idia ura dikadika, to mase ese idia dekena amo do ia heau siri bamona.”​—⁠Apokalupo 9:​4-6.

¹⁰ Guna, hisihisi be tanobada taudia eiava edia ladana bada taudia​—⁠‘rei, tano ena tubu avadia bona au’⁠​—⁠​dekenai idia siaia lasi. (Apokalupo 8:7 itaia danu.) Edia baguna ai Dirava ena maka idia abia lasi taudia sibodia do idia hadikaia. Unai taudia be Kerisendom lalonai idia noho. Idia gwau Dirava ena maka idia abia vadaeni, to edia kara amo ia hedinarai idia hereva koikoi. (Efeso 1:​13, 14) Unai dainai, hari inai negai idia noho kwadidia ese edia hereva aukadia be Kerisendom ena dubu gunalaia taudia dekenai idia henia guna. Taunimanima idia hadibaia Kerisendom gunalaia taudia ese edia dubu taudia be guba dekenai idia hakaudia lao lasi. Unai sibona lasi, to unai gunalaia taudia danu be guba dekenai do idia lao lasi. Kwadi edia haroro dainai, unai heagi taudia idia hisihisi bada!d Momokani, ‘matakepulu taudia ese matakepulu taudia idia hakaudia’ noho!​—⁠Mataio 15:⁠14.

¹¹ Hua 5 lalonai taunimanima do idia hahisidia. Unai be nega kwadogi, a? Kwadi korikoridia dekenai unai nega ia kwadogi lasi. Edia mauri ena daudau be hua 5 bamona. Unai dainai, hari inai negai idia noho kwadidia be edia mauri laganidia iboudiai lalonai Dirava ena inai taudia idia hahisidia noho. Danu, unai hisihisi ia dika herea dainai, taunimanima ese mase idia tahua. Momokani, toretore taudia idia gwau lasi, kwadi idia hahisidia taudia haida ese sibodia idia alaia mase toho. Lasi, to unai hereva amo hisihisi ena metau ita diba. Unai hisihisi be doadoa ena hekori ena hisihisi bamona. Unai hegeregerena, Ieremia ia perovetalaia, Babulono tuari taudia ese kara dika Israel taudia be gabu idauidau dekenai do idia siaia neganai, Israel taudia do idia hisihisi bada herea, bona unai dainai, mase do idia ura henia bada, mauri do idia ura henia maragi.​—⁠Ieremia 8:3; Hadibaia Tauna 4:​2, 3 itaia danu.

¹² Dahaka dainai unai taudia ese gwaumaoro idia abia lauma dalanai idia hahisidia, to idia hamasedia lasi? Hari dika be dika ginigunana. Kerisendom ena koikoi bona kerere ia hahedinaraia, to gabeai Lohiabada ena dina ia do noho lalonai, do idia hahedinaraia goevagoeva lauma dalana ai ia mase vadaeni. Dika iharuana lalonai tanobada tataudia toi toi iboudiai amo, ta ta idia alaia mase.​—⁠Apokalupo 1:10; 9:​12, 18; 11:⁠14.

Kwadi be Tuari Totona Idia Hegaegae

¹³ Unai kwadi edia toana be idau momokani! Ioane ese edia toana be inai bamona ia gwauraia: “Inai kwadi edia toana be tuari hosi bamona. Edia kwarana latanai be golo kwara gaudia bamona. Edia vairana be taunimanima edia vairana bamona. Edia huina be hahine edia huina bamona. Edia isena be leona edia isena bamona. Edia kemena dekenai be palaka gaudia, auri bamona, idia noho. Edia hanina regena be kariota edia regena bamona, hosi momo ese idia veria gaudia, tuari dekenai idia heau vareai neganai.”​—⁠Apokalupo 9:​7-9.

¹⁴ Unai hereva ese kamonai Keristen taudia ia laulaulaia, lagani 1919 ai idia goada lou murinai. Hosi bamona idia hegaegae tuari do idia karaia totona. Idia ura hereva momokani totona do idia tuari, bona edia tuari dalana be aposetolo Paulo ese ia herevalaia hegeregerena. (Efeso 6:​11-​13; 2 Korinto 10:⁠4) Ioane ia itaia golo kwara gaudia bamona be edia kwarana latanai idia noho. Korona korikori idia karaia be maoro lasi, badina tanobada dekenai idia do noho neganai, edia lohia gaukara idia do hamatamaia lasi. (1 Korinto 4:8; Apokalupo 20:⁠4) To lagani 1919 ai, pavapava toana bamona idia abia vadaeni. Idia be Pavapava ena tadikaka bona, bema idia gini goada ela bona idia mase, edia guba korona do idia abia.​—⁠2 Timoteo 4:8; 1 Petero 5:⁠4.

¹⁵ Matahanai lalonai, kwadi ese kemena ena auri dabuana idia karaia. Unai ese edia kara maoromaoro goadana ia laulaulaia. (Efeso 6:​14-​18) Danu, edia vairana be taunimanima edia vairana bamona. Unai ese ia hahedinaraia idia be mai edia lalokau karana, badina be Dirava ese taunimanima ia karaia ia sibona ena laulau hegeregerena, bona Dirava be lalokau. (Genese 1:26; 1 Ioane 4:16) Edia huina ia lata, hahine ena huina bamona. Unai ese ia hahedinaraia edia Pavapava, guri dobu masemase ena aneru, henunai idia noho. Leona ese ena isena ia gaukaralaia vamu ia koria totona. Lagani 1919 amo, Ioane oreana taudia ese lauma aniani aukana idia ania diba. Dirava ena Basileia herevadia momokanidia idia abia diba, aniani korikori bamona. Iesu Keriso, “Iuda iduhuna ena Leona,” ese Dirava ena Basileia do ia lohiaia. Leona ese boga-auka bona gari lasi karana ia laulaulaia. Unai hegeregerena, edia sivarai aukana do idia abia dae totona, edia buka lalonai unai sivarai do idia gwauraia totona, bona tanobada ibounai lalonai unai sivarai do idia hariharilaia totona idia boga-auka bona idia gari lasi be namo. Unai laulau kwadidia idia regerege bada, “kariota edia regena bamona, hosi momo ese idia veria gaudia, tuari dekenai idia heau vareai neganai.” Keristen taudia ginigunadia hegeregeredia, idia ura lasi edia uduna do idia koua.​—⁠1 Korinto 11:​7-​15; Apokalupo 5:⁠5.

¹⁶ Unai haroro gaukara be uduna sibona amo idia karaia lasi! “Edia iuna be doadoa edia iuna bamona, mai ena koria gauna, doadoa bamona. Edia siahu, taunimanima do idia hahisia hua 5, be edia iuna dekenai ia noho.” (Apokalupo 9:10) Unai anina be dahaka? Edia Basileia gaukarana idia karaia neganai, Iehova ena Witness taudia be edia haroro herevana bona idia printaia gaudia amo hereva mai siahudia, Dirava ena Hereva amo idia halasia. Unai hereva ese hisihisi idia havaraia, doadoa ena koria ena hisihisi bamona, badina Iehova ena kara dika davana henia dinana idia gwauraia. (Isaia 61:⁠2) Harihari idia noho lauma kwadidia edia mauri ia do ore lasi neganai, Dirava ese ia henidia gaukarana, Iehova ena hahemaoro aukadia harorolaia gaukarana unai, do idia karaia guguru​—⁠Dirava ena ladana idia hadikaia gwau-edeede taudia iboudiai do idia hahisidia unai.

¹⁷ Unai kwadi oreana ia moale, badina lagani 1919 ai edia hebouhebou dekenai magasin matamatana ta, The Golden Age, idia halasia. Unai magasin be wiki rua rua iboudiai idia printaia, kwadi edia haroro gaukarana ena hisihisi siahuna do idia habadaia totona.e Unai magasin namba 27, September 29, 1920 gauna, lalonai idia hahedinaraia dubu gunalaia taudia idia kara koikoi, badina lagani 1918 ia lao 1919 ai, Bible Student taudia United States lalonai idia dagedage henidia. Lagani 1920 bamona amo ia lao lagani 1939 bamona, The Golden Age magasin be hereva aukadia bona laulau amo dubu gunalaia taudia ia hahisidia. Unai gaudia amo idia hahedinaraia dubu gunalaia taudia be politikol karadia lalonai idia vareai, bona Katolik Dubu taudia badadia ese Fascist bona Nazi dagedage lohiadia idia tura henidia. Unai dainai dubu gunalaia taudia ‘be taravatu amo dika idia havaraia’ bona dala idia hegaegaelaia taunimanima hutuma ese Dirava ena orea taudia idia dagedage henidia totona.​—⁠Salamo 94:​20.

Tanobada Lohiadia Idia Hadibaia

¹⁸ Hari inai negai idia noho kwadidia be mai edia gaukara badana ta. Basileia ena sivarai idia harorolaia be gau badana. Kerere idia hahedinaraia goevagoeva be gau badana. Idia boio mamoedia idia davaria lou be gau badana. Kwadi be unai gaukara idia karaia lalonai, tanobada taudia ese kwadi edia kara idia laloa momo. Aneru ese kibi ia hiriria neganai, Ioane oreana taudia be mai edia kamonai ida idia gwauraia hedinarai Iehova ese Kerisendom ia hahemaoro auka henia be maoro. Kibi namba 5 idia hiriria dainai, May 25-​31, 1926 ai, London, England dekenai, Bible Student taudia ese edia hebouhebou idia karaia neganai, unai hahemaoro karadia edia anina ta idia gwauraia hedinarai goevagoeva. Unai hebouhebou lalonai gwaubou herevana, “Hadibaia Herevana ta Tanobada Ena Lohia Taudia Dekenai” idia karaia. Royal Albert Hall dekenai pablik tok idia karaia danu. Iena hereva kwarana be “Tanobada Gavamanidia Idia Moru Ena Badina​—⁠Heduru Gauna be Inai.” Dina ta murinai, unai gwaubou herevana ibounai bona pablik tok ena hereva ibounai be London ena niuspepa badana ta lalonai idia printaia. Gabeai, kwadi oreana ese unai gwaubou herevana ena pepapepa 50 milion idia hariharilaia tanobada ibounai lalonai​—⁠dubu gunalaia taudia idia hahisidia dikadika unai! Lagani momo murinai, England taudia ese unai hahisia herevana idia gwauraia noho.

¹⁹ Unai hebouhebou lalonai unai kwadi ese tuari gaudia ma haida idia abia. Buka matamatana ta, ladana Deliverance, idia abia. Unai buka lalonai, Baibel ena siri amo toa ta idia kikilaia, unai toa ese ia hamomokania gauna be ‘mero’ gavamanina, Keriso ena guba Basileia unai, be lagani 1914 ai ia vara. (Mataio 24:​3-​14; Apokalupo 12:​1-​10) Bena, unai buka lalonai, lagani 1917 ai London dekenai idia karaia pepana ta ena hereva idia gwauraia lou. Dubu taudia badadia 8 ese unai pepa idia sainia. Taunimanima idia gwau unai taudia be “haroro taudia badadia haida.” Idia be Protestan dubu badadia taudia​—⁠Baptist, Congregational, Presbyterian, Episcopalian, bona Methodist taudia unai. Unai pepa lalonai idia gwau “hari inai negai idia vara hekwakwanai idia hahedinaraia ita be Idau Bese Taudia Edia Nega ena dokona ai ita noho” bona “kahirakahira Lohiabada do ia hedinarai.” Oibe, unai dubu taudia be Iesu ena noho ena toana idia diba! To unai diba dainai idia ura gau ta idia karaia, a? Deliverance bukana lalonai ia gwau: “Mai anina bada gauna be inai: Gabeai, unai pepa idia sainia taudia ese ena hereva ibounai idia dadaraia. Idia hamomokania tanobada ena nega dokona lalonai bona Lohiabada ena noho iharuana lalonai ita noho herevana idia abia dae lasi.”

²⁰ Kerisendom ena dubu gunalaia taudia ese kahirakahira do ia mai gauna, Dirava ena Basileia, idia harorolaia lasi, to idia ura Satana ena tanobada lalonai do idia noho. Idia ura lasi kwadi oreana bona edia Pavapava ida idia gaukara hebou. Ioane ese unai Pavapava be inai bamona ia gwauraia: “Idia be mai edia king. Ia be guri dobu masemase ena aneru. Iena ladana Heberu gado dekenai be Abadon [anina be “Hadikaia”], to Helene gado dekenai iena ladana be Apolion, ena anina be ‘Hadikaia Tauna.’ ” (Apokalupo 9:11) Ia be “guri dobu masemase ena aneru” bamona bona “Hadikaia Tauna” bamona, Iesu ese hisihisi dika herea be Kerisendom dekenai ia siaia vadaeni. To ma gau haida danu do idia vara!

[Footnotes]

[Study Questions]

 1. Aneru ese kibi idia hiriria neganai, daika ese edia sivarai idia gwauraia hedinarai, bona kibi ena hiriri namba 5 ese dahaka ia hahedinaraia?

 2. Edena Baibel bukana lalonai ia gwau kwadi momo herea ese gau momo idia hadikaia, Ioane ia itaia gauna hegeregerena? Unai hisihisi dainai idaunegai Israel besena dekenai dahaka ia vara?

3, 4. (a) Ioela karoa 2 ena hereva haida be edena negai idia hagugurua, bona edena bamona idia hagugurua? (b) Aposetolo edia nega lalonai, edena dala ai hisihisi ta ia vara, kwadi momo herea idia mai bamona, bona unai hisihisi be edena negai ia ore?

 5. Lagani 1919 amo, Ioel ena peroveta herevana be edena bamona ia guguru?

 6. (a) Aneru namba 5 ese kibi ia hiriria neganai, Ioane ese dahaka ia itaia? (b) “Hisiu” ese daika ia laulaulaia, bona dahaka dainai?

 7. (a) “Dobu masemase gurina” idia kehoa neganai, dahaka ia vara? (b) “Dobu masemase gurina” be dahaka, bona nega sisina lalonai daidia be unuseniai idia noho?

 8. Kwadi idia ruhaia neganai, dahaka dainai “kwalahu” momo ia daekau?

 9. Kwadi ese dahaka sisiba idia abia tuari do idia karaia totona?

10. (a) Guna, unai hisihisi be daika dekenai idia siaia lao, bona unai dainai dahaka idia mamia? (b) Hisihisi ena anina be dahaka? (Futnout itaia danu.)

11. (a) Kwadi ese siahu idia abia Dirava ena inai taudia be hua hida lalonai idia hahisidia totona? Dahaka dainai unai be nega kwadogi lasi? (b) Unai hisihisi be bada, a?

12. Dahaka dainai kwadi ese gwaumaoro idia abia Kerisendom tomadiho ena gunalaia taudia be lauma dalana ai idia hahisidia totona, to gwaumaoro idia abia lasi idia hamasedia totona?

13. Kwadi edia toana be edena bamona?

14. Edena bamona Ioane ese ia gwauraia kwadi edia toana be lagani 1919 ai idia goada lou Keristen taudia edia toana hegeregerena?

15. Inai gaudia ese dahaka idia laulaulaia: Kwadi edia (a) kemena ena auri dabua? (b) vairana be taunimanima edia vairana bamona? (c) huina be hahine ena huina bamona? (d) isena be leona edia isena bamona? (e) regerege bada?

16. Kwadi edia “iuna be doadoa edia iuna bamona, mai ena koria gauna, doadoa bamona” ena anina be dahaka?

17. (a) Lagani 1919 ai, Bible Student taudia be edia hebouhebou dekenai dahaka idia halasia, edia haroro gaukara ena hisihisi siahuna do idia habadaia totona? (b) Dubu gunalaia taudia be edena bamona hisihisi idia ania, bona unai dainai dahaka idia karaia?

18. Kwadi ese dahaka gaukara idia abia, bona kibi namba 5 idia hiriria dainai dahaka ia vara?

19. Kwadi ese dahaka tuari gauna idia abia, bona unai gau ese London dubu taudia ese idia sainia pepana edena bamona ia herevalaia?

20. (a) Dubu gunalaia taudia edia lalohadai bona kara kwadi oreana bona edia Pavapava dekenai be dahaka? (b) Ioane ia gwau daika ese kwadi oreana ia biagua, bona ena ladana be daika?

[Picture on page 143]

Kibi namba 5 idia hiriria neganai, dika toi amo dika ginigunana idia gwauraia

[Picture on page 146]

Oiemu diba be mai edia matana, pavapava ena inai taudia edia kudoudia idia gwadaia. (Salamo 45:⁠5) Lagani 1930 bamona ia lao 1939 ai, laulau momo, inai laulau bamona, be unai hereva danu idia printaia. Inai laulau ese “Dirava ena maka edia baguna dekenai idia abia lasi taudia” idia hadikaia

[Pictures on page 147]

The Royal Albert Hall. Unuseniai, Deliverance bukana idia halasia bona gwaubou herevana “Hadibaia Herevana ta Tanobada Ena Lohia Taudia Dekenai” idia karaia