“Kota Henia Ena Nega” Be Ia Ginidae Vadaeni

BAIBEL ena buka ginigabena, Apokalupo, ese ita ia hamaoroa aneru ta be guba ena ataiai ia roho lao, “noho hanaihanai Sivarai Namona do ia gwauraia hedinarai” totona. Mai boiboi badabada ida, ia gwau: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni.” (Apokalupo 14:​6, 7) Unai “kota henia ena nega” lalonai, Dirava be hahemaoro herevana do ia gwauraia bona karana do ia karaia. Unai be “nega ena dokona” momokani dekenai do ia vara, bona hari ita be unai nega lalonai ita noho.​—2 Timoteo 3:1.

Kara maoromaoro idia ura henia taudia dekenai, “kota henia ena nega” be sivarai namona. Unai nega lalonai, Dirava ese ena hesiai taudia be inai dagedage bona lalokau lasi tanobadana amo do ia hamauridia.

Inai tanobada dikana be kota ena nega ena dokonai do idia hadikaia ore, to hari ita ia hagoadaia herevana be inai: “Dirava do umui gari henia, ia do umui hanamoa bada.” Unai bamona oi karaia noho, a? Unai ena anina be “Dirava lau abidadama henia” herevana sibona ita gwauraia be hegeregere lasi. (Mataio 7:​21-23; Iamesi 2:​19, 20) Namona be Dirava gari henia karana maorona ese ita ia durua Ia ita matauraia totona. Namona be unai gari karana ese ita ia durua kara dika amo ita raka siri totona. (Aonega Herevadia 8:13) Namona be unai gari karana ese ita ia durua kara namo ita ura henia bona kara dika ita inai henia totona. (Amosa 5:​14, 15) Bema Dirava ita matauraia, ia do ita kamonai henia namonamo. Gau ma haida do ita laloa momo lasi to iena Hereva, Baibel, do ita duahia hanaihanai. Nega ibounai, mai eda kudouna ibounai ida Dirava do ita abidadama henia be namo. (Salamo 62:8; Aonega Herevadia 3:​5, 6) Dirava idia matauraia bada taudia idia diba guba bona tanobada ia Havaraia Tauna be Lohia Badana, bona mai edia lalokau ida ia idia badinaia, idia gwau Ia ese edia mauri ia lohiaia be maoro. Bema ita laloa unai gaudia ita laloa bada be gau badana, vadaeni kara ta ita karaia haraga be namo.

Aneru ese ia gwauraia kota negana be idia gwauraia “Lohiabada ena dina” danu. Unai bamona “dina” ta be lagani 607 B.C.E. ai, idaunegai Ierusalema latanai ia ginidae, badina Iehova ese ena peroveta taudia amo ia henia sisiba herevadia be unai hanua taudia ese idia badinaia lasi. Idia laloa Iehova ena dina be do ia mai haraga lasi dainai, edia mauri idia hadikaia noho. Iehova ese idia ia hadibaia: “Ia kahirakahira vadaeni inai. Ia be ia mai noho haraga.” (Sepanaia 1:14) “Lohiabada ena dina” ma ta be lagani 539 B.C.E. ai, idaunegai Babulonia dekenai ia ginidae. (Isaia 13:​1, 6) Babulonia taudia be edia hanua ena magu badadia bona edia dirava idauidau idia abidadama henia dainai, Iehova ena peroveta taudia edia sisiba herevadia idia kamonai henia lasi. To, hanuaboi tamona lalonai, Mede bona Parasa taudia ese Babulonia badana idia halusia.

Hari, ita dekenai do ia vara gauna be dahaka? “Dirava ena dina” badana ta mai garina. (2 Petero 3:​11-14) Dirava ena hahemaoro herevana be “Babulonia badana” dekenai ia gwauraia. Apokalupo 14:8 ena hereva hegeregerena, aneru ta ia gwau: “Babulonia badana be ia moru vadaeni!” Unai kara be ia vara vadaeni. Babulonia Badana be Iehova idia tomadiho henia taudia ia biagua diba lasi. Iena kara gageva bona tuari ai ia vareai karana be idia hedinarai goevagoeva vadaeni. Do idia hadikaia ore negana be hari ia kahirakahira. Unai badina dainai, Baibel be taunimanima ibounai ia hadibaia: “Ia [Babulonia Badana] dekena amo do umui raka siri, ia danu do umui kara dika hebou garina, bona ia danu panisi do umui abia hebou garina! Badina Babulonia ena kara dikadia be momo herea momokani, ororo bamona idia daekau lao, ela bona guba dekenai. Bona Dirava ese, Babulonia ena kara dikadia do ia laloaboio lasi.”​—Apokalupo 18:​4, 5.

Babulonia Badana be dahaka? Ia be tanobada ibounai ena tomadiho oreana, iena kara be idaunegai Babulonia ena kara hegeregerena. (Apokalupo, karoa 17, 18) Mani idia hegeregere daladia haida oi itaia.

• Idaunegai Babulonia ena pris taudia be Babulonia besena ena politikol karadia lalonai idia vareai momo. Hari, tomadiho momo be unai bamona idia karaia.

• Nega momo Babulonia ena pris taudia be Babulonia besena ena tuari idia durua. Hari, nega momo tanobada besedia idia tuari neganai, tomadiho gunalaia taudia ese Dirava idia noia ami taudia ia durua totona.

• Idaunegai Babulonia ena hahediba herevadia bona karadia ese Babulonia besena ia hakaua lao matabodaga karadia idia karaia totona. Hari, tomadiho gunalaia taudia be Baibel ena kara maoromaoro taravatudia idia laloa lasi neganai, dubu gunalaia taudia oreana bona kongregesen oreana huanai matabodaga karadia idia bada idia lao. Danu, ita itaia Babulonia Badana be tanobada bona ena politikol oreadia ida ia heudahanai dainai, Apokalupo ia gwau, ia be ariara hahinena ta ese ia laulaulaia.

• Baibel ma ia gwau, Babulonia Badana ese “lebulebu idauidau ia karaia momo.” Idaunegai Babulonia dekenai dubu bona ena gaukara idauidau totona tano bada herea idia abia, bona pris taudia be ladana bada bisinesi taudia ai idia lao. Hari inai negai, Babulonia Badana be mai ena tomadiho gabudia sibona lasi, to ia ese tano bona bisinesi momo ia biagua. Iena hahediba herevadia bona holide karadia dainai, bisinesi karadia dekenai, ia sibona bona ma haida be taga bada taudia ai idia lao.

• Idaunegai Babulonia dekenai kaivakuku gaukaralaia karana, meamea bona babalau karadia be bada, hari gabu momo ai be unai bamona. Edia lalohadai ta be, mase be mauri idauna ma ta abia dalana. Babulonia ai, dubu badadia bona maragidia momo herea idia noho, edia dirava idia hanamoa totona, to Babulonia taudia ese Iehova tomadiho henia taudia idia dagedage henia. Babulonia Badana danu ese unai hahediba herevadia bona karadia ia hahedinaraia.

Idaunegai, Iehova ese bese mai edia politikol bona ami goadadia ia hakaua, Ia bona ena ura idia matauraia lasi taudia ia panisia totona. Unai dainai, Samaria hanuana be lagani 740 B.C.E. ai Asuria taudia ese idia hadikaia. Ierusalema hanuana be lagani 607 B.C.E. ai Babulonia taudia ese idia hadikaia bona lagani 70 C.E. dekenai Roma taudia ese idia hadikaia. Bona, Babulonia hanuana be lagani 539 B.C.E. ai Mede bona Parasa taudia ese idia halusia. Baibel ese eda nega ia perovetalaia neganai, ia gwau politikol gavamanidia, dagedage gauna ta bamona, ese “ariara hahine” do ia dagedage henia bona ena dabua ibounai do idia kokia, ena kara korikori ia hedinarai totona. Idia ese unai ariara hahine do idia haorea momokani.​—Apokalupo 17:16.

Tanobada gavamanidia be unai kara do idia karaia momokani, a? Baibel ia gwau, “Dirava ese iena palani be . . . edia lalona dekenai do ia atoa.” (Apokalupo 17:17) Unai be hoa dalanai do ia vara haraga.

Dahaka oi karaia be namo? Oi sibona oi nanadaia: ‘Lau be Babulonia Badana ena hahediba herevadia bona kara bodagadia ese ia hamiroa vadaeni tomadiho oreana ta lau do badinaia noho, a?’ Herevana oi be Babulonia Badana ena memba ta lasi, to reana oi sibona oi nanadaia: ‘Dala lau kehoa iena kara haida ese lau idia biagua totona, a?’ Unai kara haida be dahaka? Idia be lebulebu karadia idia abia dae, kohu bona moale karadia idia ura henia bada to Dirava idia lalokau henia maragi, eiava mai edia ura bada ida Iehova ena Hereva idia laloa lasi (gau maragidia dekenai danu). Oiemu haere oi laloa namonamo be namo.

Iehova ena lalo-namo ita abia totona, namona be eda kara bona kudouna ia ura henia gaudia amo ita hahedinaraia momokani, ita be Babulonia Badana ena kahana lasi. Nega ita halusia kava lasi. Baibel ese ita ia hagoadaia dokona be do ia mai haraga, ia gwau: “Babulonia hanua badana . . . do idia negea diho, vadaeni taunimanima ese . . . do idia itaia lou lasi.”​—Apokalupo 18:21.

To unai sibona lasi. “Kota henia ena nega” lalonai do ia vara gauna ma ta be, tanobada ena politikol oreana, ena lohia taudia bona Iehova Dirava ena lohia dagina maorona, Iesu Keriso ena guba Basileiana amo ia hahedinaraia gauna idia dadaraia taudia be Iehova ese do ia hahemaoro henidia. (Apokalupo 13:​1, 2; 19:​19-21) Daniela 2:​20-45 ena peroveta matahanaina lalonai politikol gavamanidia, idaunegai Babulonia ena nega amo ema bona hari idia noho gaudia, be golo, siliva, auri laboralabora, auri bona raro amo idia karaia kaivakuku badana ta ese ia laulaulaia. Peroveta herevana ese iseda nega ia herevalaia: “Guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai.” Bona Iehova ena “kota henia ena nega” lalonai Basileia ese do ia karaia gauna be Baibel ese ia herevalaia: “Unai basileia ese [taunimanima idia haginia] basileia ibounai do ia hamakohia, bona haorea momokani, bona ia sibona do ia noho ela bona hanaihanai.”​—Daniela 2:44.

Baibel ese tomadiho momokani taudia ia hamaorodia “tanobada ena gaudia”​​—Dirava momokanina ia dadaraia tanobadana ena mauri dalana​​—idia dadaraia be namo. (1 Ioane 2:​15-17) Emu abia hidi gaudia bona kara amo oi hahedinaraia oi ese Dirava ena Basileia oi abia dae momokani, a? Emu mauri lalonai unai oi atoa guna, a?​—Mataio 6:33; Ioane 17:​16, 17.

[Box on page 14]

Dokona be Edena Negai Do Ia Mai?

“Taunimanima ena Natuna do ia mai ena hora be umui diba lasi.”​—Mataio 24:44.

“Do umui naria namonamo noho. Badina dina bona hora be umui diba lasi.”​—Mataio 25:13.

“Ia be do ia vara momokani.”​—Habakuku 2:3.

[Box on page 14]

Bema Unai Nega Oi Diba, Emu Kara Do Oi Haidaua, A?

Bema oi diba Dirava ena hahemaoro do ia karaia lasi ela bona lagani ma haida idia ore guna, emu kara do oi haidaua, a? Bema oi diba vadaeni inai tanobada gunana ena dokona be do ia mai haraga lasi dainai, Iehova ena hesiai gaukara do oi hamaragia be namo, a?​—Heberu 10:​36-38.

Hahemaoro negana korikorina be ita diba lasi dainai, inai be nega namona mai eda ura namona ida Dirava ita hesiai henia totona. Iehova idia diba taudia idia lalo-parara bema nega dokona ia ginidae bona ura bada karana ita hahedinaraia, unai ese kudouna ia itaia Diravana ena lalona do ia hamoalea lasi.​—Ieremia 17:10; Heberu 4:13.

Iehova idia lalokau henia momokani taudia ese nega ibounai Iehova idia atoa guna. Keristani taudia momokanidia be taunimanima ma haida bamona, moni gaukara idia karaia danu. To, edia tahua gauna be, edia taga idia habadaia totona lasi, to edia kohu bona aniani do ia hegeregere idia bona ma haida totona. (Efeso 4:28; 1 Timoteo 6:​7-12) Danu, idia ese moale karadia namodia bona laga-ani negadia idia moalelaia, to idia ura goada idia abia bona taunimanima edia kara idia tohotohoa lasi. (Mareko 6:31; Roma 12:2) Iesu Keriso bamona, mai edia moale ida Dirava ena ura idia karaia.​—Salamo 37:4; 40:8.

Keristani taudia momokanidia idia ura idia mauri bona Iehova idia hesiai henia hanaihanai. Ena be haida idia laloa unai hahenamo abia totona do idia naria daudau, to unai helaro be dava bada gauna dainai idia naria noho be namo.

[Box/Picture on page 15]

Lohia Siahuna Hepapahuahulaia Karana

Dirava ese hisihisi iboudiai ia koua lasi ena badina ita lalo-pararalaia totona, lohia siahuna hepapahuahulaia karana ita lalo-pararalaia be namo.

Iehova be Havaraia Tauna dainai, tanobada bona ia lalonai idia noho taudia ibounai ia lohiaia be maoro. To, Baibel ese taunimanima edia sivarai gunadia amo ia hahedinaraia, haida be Iehova ena lohia siahuna idia hepapahuahulaia. Satani Diabolo ia gwau Iehova ese taravatu ia atoa be maoro lasi, ia gwau Iehova ia koikoi badina eda tama sina ginigunadia ia hamaorodia bema idia ese Iena taravatu idia dadaraia bona sibona edia ura dalana idia abia hidi do idia mase, bona Satani ia gwau bema Dirava amo idia siri bona sibona idia biagua, namo bada do idia davaria.​​—Genese, karoa 2, 3.

Bema Iehova ese maoromaoro Satani, Adamu bona Heva ia hamasea, unai ese iena siahu do ia hahedinaraia to ia vara hepapahuahu badana do ia hamaoromaoroa lasi. Iehova ese idia ia hamasea haraga lasi, to nega ia henia taunimanima bona aneru ese gwau-edeede dainai do ia vara gauna idia itaia totona. Ena be unai gauna dainai hisihisi bada ia vara, to danu dala ia kehoa ita vara totona.

Ma danu, Iehova sibona be mai lalokau ida dala ia karaia dainai, bema taunimanima ese Ia idia badinaia bona iena Natuna ena mauri davalaia boubouna idia abidadama henia, idia be kara dika bona kara dika ena davana amo do ia ruhadia bona Paradaiso dekenai do idia noho. Bema ia ura, mase amo idia ia hatorea isi lou diba.

Dirava ese nega ia henia hepapahuahu badana ia hamaoromaoroa totona dainai, iena hesiai taudia ese idia hahedinaraia diba idia be hegeregere Dirava ena lalokau dainai kara ta idia karaia totona, bona nega ibounai idia hamomokania idia ese Iehova idia badinaia. Dirava ena lohia siahuna bona taunimanima be Dirava do idia badinaia lasi ena hepapahuahu hamaoromaoroa karana be mai anina bada, badina unai amo guba bona tanobada ai taravatu matauraia karana maorona do ia noho. Bema lasi, maino korikorina be lasi.a

[Footnote]

[Picture]

Tanobada ibounai ena politikol gavamanidia be do idia ore vaitani